Axwɛwɛwa 16

Timotio Ada Ta Paolo Anɛ Silas

1Paolo ebe ku Dɛbi klɛ afla vɛ Listra, ɔkɛlɛ adɔkpasɛ teli gɛ be klua sɛ Timotio aza, yɛeni edzi Yuɖadzi teli gɛ ayɛkɛaŋa, pɔ yaka nɛ edzi Grikieyi teli. 2Ɔhamɛanɛ nɛ Listra anɛ Ikonio na ɖɔ kaɖɔ dzyɔgo nɛ yɛ shu. 3Paolo apɛa sɛ tɛ agbanɔ Timotio evunɔ nɛ yɛ kidzo gɛga nɛm, so nɛ ebhui bunyɛnyɛ akɔɛ, alasɛ Yuɖanɛ nɛ ga lɛ kibe lɛlɛ ne nyia sɛ yaka nɛ enu Grikieyi. 4Nɛ balɛ tɛnyunyɔ denɔ ɔma nɛm ɔvɛ ɔma nɛ mɛ nɛ, be bu ɛshã nɛ gɛ banɔkpɛkpɛ anɛ beshishe na bhɛtɛ nɛ Yerusalɛm sɛ tɛ ɛlɛa bha la bhɛtɛ na kasɛ banɔ. 5Klɛso nɛ busɔlɛha nɛ ba gɛganɛ nɛ kabha yɛyɛkɛŋam klɛ lɛ she trɔ nɛ tikpikpem kiwi nyɛ wi.

Paolo Kɛdɔmumɔ Nɛ Makedoniaeyi Shu

6Paolo anɛ yɛshopoalɛ na nyɔa ganɔ Frigia anɛ Galatia kɛdɔ nɛm pete, gɛ Ɔfufɔɛ Dzyɔgo nɛ ɔdɛ kɔa lɛ kidzo sɛ baɖɔ kibui nɛ Eshia kɛdɔ nɛm. 7Gɛ be be ku Misia bubo nɛa bha, ba pɛa sɛ tɛ be tsoku Bithiana, pɔ Yesu Ɔfufɔɛ nɛ ɔdɛ kɔa lɛ kidzo. 8So ba fla Misia klɛ be de zhi avɛ Troasɛ. 9Nɛ elishi nɛ mɛ Paolo amɔ Makedonia anyɛ teli nɛ kɛdɔmumɔm gɛ eli kititi nɛ yɛa mɛ klɛ akɔ yɛ kɛtɔkpu sɛ, “Ba Makedonia tɛ ɔbɔ plɛnɔ lɔ.” 10Gɛ Paolo amɔ kɛdɔ nɛ na beke, bu bala tsiɔ̃ kɔ Makedonia tɛ shɛshɛ vɛ, alasɛ bu yɛkɔ sɛ Kpaya eklu lɔ sɛ bu da ɖɔ kibui dzyɔgo nɛ tsrea lɛ.

Liɖia Kitem Tsyitsyina Nɛ Filipi

11Denɔ Troasɛ ko klɛ buyɛkɔ aƒu bha kidzo klɛ buyɛkɔ kenia bha opupu nɛ tɛdzyudzyɔm klɛ lɔ tsɔkɛ ku Samotras, klɛ nɛ kiwi bhla nɛ buda ku Nɛapolisɛ. 12Denɔ ɔkɛlɛ klɛ bu ga kidzo da ku Filipi, gɛ akpasɛ Romanɛe si klɛ enu ɔmagbla gɛ lo putɔ kɔ ɛma nɛ Makedonia kɛdɔ nɛm. Klɛ buza ɔkɛlɛ ewi gelee.

13Nɛ Kimuenewi nɛa bha bu ga ɔmagbla nɛ kedunu nɛ koeyi vɛ keni nu tɔ, nɛ kɛtɔkpum sɛ bu ba mɔ ɔkɔ toli za klu Kpaya. Gɛ budzi ɔkɛlɛ nɛ bu kpa kaɖɔ ɖɔ tsre badzɛ nɛ gɛ xogo nɛ ɔkɛlɛ. 14Bagɛ bala ta tɔ nɛ bulɔ nɛ teli enu adzɛ gɛ beklua sɛ Liɖia, gɛ aga apɔtɛ ŋɛŋaedzi kedzi alasɛ ehoeyi aza yɛahwɛ, klɛ ede Taɛtira ɔmagbla nɛm, klɛ enu anɔ gɛ akpɛ kɛtɔkpue si kɔ Kpaya. Apalete na danɛ yɛ idzyi akɔ sɛ tɛ evu Paolo kibui nɛ asɔlɛ. 15Kibe lɛ gɛ yɛɛnɛ yɛ bupa nɛ petee ba yɛkɛ bunikpɛkpɛ beke nɛɛ eklu lɔ avɛnɔ yɛ bupa mɛ. Ɔkɛlɛ aɖɔ asɛ, “Onu gɛ nɔ mɔ mɛ ansɛ anɔ gɛ ayɛkɛ Apalete nɛa bha aŋa nɛɛ,” “klɛ ba tɛ nɔ bɔ za mɛ ɔkɔ.”

Paolo Anɛ Silas Buvu Zɛza

16Kiwi tili gɛ bu vɛ Kpaya oklu kɔ nɛɛ, bu tsyanɔ adzɛnuvɔɛ axwɛdɛ teli gɛ ɔfufɔɛ ɔza yɛ abha pɛ ayɛkɔ mɔ ebui gɛ aba ba nɛ kivum aɖɔ. Adzɛnuvɔɛ nɛ abhɛtɛ ehoeyi gelee kɔ yelete alɛ nɛ yɛ ebui mumɔɖɔ nɛm. 17Adzɛnuvɔɛ anɛ aza Paolo anɛ bulɔ bagɔgɔɛ nɛe de nɛ igugu asɛ, “Banɔa nɛ benu Ɔɖɛɖamakɔ dɛ nɛ Kpaya anɛ baxwɛdɛ, gɛ ba kasɛ wɔ kidzo nɔɔ nɛ gɛ ɔbɔ ga pɛ bebe bu wɔ.” 18Adzɛnuvɔɛ nɛ aza kibui nɛa bha ewi gelee. Gugɔɛ nɛɛ yɛ tɛbhɛbhɛtɛ ba kpɛ Paolo bunuhu ɔklɛ etsyina tɔ ɔfufɔɛ klɛ etrse ɔlɛ asɛ, “Nɛ Yesu Kristo kinyim nɛɛ ɛtsre wɔ sɛ koeyi ɔbɔ fla nɛ adzɛnɛvuɔɛ nɛm!” Nɛ kibelɛ nɛm ko klɛ ɔfufɔɛ nɛ ɔshɛnahwɛ adzɛnuvɔɛ nɛ shu.

19Gɛ adzɛnuvɔɛ anɛ yɛ beshopo na mɔ sɛ balɛ ehoeyi bhɛbhɛtɛ kidzoenu nɛ fla nɛɛ, be vu Paolo anɛ Silasɛ klɛ be he alɛ avɛnɔ ɔklɛ gɛ baa dɛ kedzi sɛ tɛ ada mɔ bagɛ baŋɛabha naa mɛ. 20Ba yɛkɔa lɛ amɛna bebhuiklu nɛ amɛ klɛ baɖɔ asɛ, “Banɔa nɛ benu Yuɖanɛ, klɛ la ba yɛkɔ bulɔ ɔmagbla nɛ akpɛ bugbudu gbudum 21ganɔ begu nɛ gɛ amɛ ɔshãm tɛyɛyɛkɔ kɔ bulɔ Romanɛ na sɛ buyɛkɛ ɔdɔgɔsɛ bubhɛtɛ alɛa bha.”

22Banɔɛza nɛ tsyɛ tsoku aplɛnɔ nɛ kititi lulɔ nɛ Paolo anɛ Silas shu, klɛ bebhuiklu na kɔ igbe sɛ batsyuɛ bawi nɛ balɛ shu tɛ be tua lɛ. 23Kibe lɛ gɛ betua lɛ tsutsɔmɔ tsɔmɔ beke nɛɛ, ba yɛkɔa lɛ ada kpɛ buvu, klɛ bakɔ sɛ aga kpɛa lɛ buvu nɛ eze poa lɛ mɔmɔ. 24Gɛ epupo nɛ enua na nɛɛ, ada yɛkɔa lɛ akpɛ kishitibha okpukɔ nɛm klɛ akpɛa lɛ buɖɛ nɛ balɛ butsrukpɔ.

25Nɛ elishi kishitibha mɛ nɛɛ Paolo anɛ Silas ba za ɛdzɛ zhɛzha nɛ Kpaya kuklua bha, klɛ baga za buvu nɛ aplɛnɔa lɛ na za ta batɔ nɛ ebui nɛ gɛ ba za bhɛtɛ. 26Nɛ kɛ ba tilim ko kesukpahuhuwa gɛganɛɛ tieli ba gɛ ke shuku buvu nɛm gɛ ba kpasɛ nɛ bulɛ igu tsutsɔmɔ tsɔmɔ. Nɛ kɛba tilim ko buvu nɛ opupu nɔ danɛ vua, klɛ anɔnyanɔ buɖɛ nɛ bule nɛ yɛ butsrukpɔ. 27Gɛ epupo nɛ gɛ akpɛa lɛ nɛ buvu nɛ anyɛmɛ pɛ amɔ sɛ buvu nɛ danɛ dzi nɛɛ, etso yɛ ɛhɛ nɛ ebu nɛ kɛklɔm sɛ tɛ eyi yɛshu alasɛ ebu sɛ ba gɛ ba kpɛ buvu be ti si ashɛ̃. 28Pɔ Paolo amɔɛ klɛ akpɛ ozi nɛa bha sɛ, “Tɛ zi ishu! Bulɔ pete li ɔkɛ!”

29Agɛ akpɛa lɛ buvu nɛ kulu asɛ ba kɔ yɛ kifu, klɛ esi ede tu klɛ ada wɔlɛ adɔ nɛ Paolo anɛ Silas otugba nɛ tɛ shushuku gbagbagbam. 30Ɔkɛlɛ eklua lɛ ebu eyinɔ klɛ ebisi asɛ, “Bapalete mɔ, klɛ mɛ ba bhɛtɛ pɛ eba mɔ ɛkpã?”

31Be bu klɛ nu etsre yɛ asɛ, “Yɛkɛ Apalete Yesua bha ɔŋa, klɛm ɔbɔ mɔ ɛkpã—wɔnɔ nɛ wɔ pa nɛ wɔeyia lɛ nɛ petee.” 32Ɔkɛlɛ Paolo anɛ Silas ba ɖɔ Kpaya kibui nɛ etsre anyɛ anɛ bupa mɛ nɛ petee. 33Nɛ elishia lɛlɛ nɛ mɛ anyɛ nɛ gɛ akpɛa lɛ buvu pɛ eepoa lɛ nɛ agbanɔ Paolo anɛ Silas klɛ ada bɔ balɛ apɔ na kɔa lɛ; ganɔ klɛ mɛ nɛɛ anyɛ nɛ yɛ bupa nɛ petee ba yɛkɛ bunikpɛkpɛ. 34Agɛ akpɛa lɛ buvu na gbanɔa lɛ amɛna yɛ bupa mɛ klɛ aba trɔ kɛŋɛŋa ɔkplɔ̃ akɔa lɛ; anyɛ nɛ ebe yuku nɛ samɛ alasɛ yɛ nɛ yɛeyialɛ nɛ petee aba yɛkɛ Kpaya bha aŋa.

35Kibe lɛ gɛ keli nɛ kaza, bebhuiklu na kpɛ balɛ baxwɛwa nɛ asɛsɛ agɛ akpɛ banɔ ne vu sɛ: “Shɛnahwɛ bagɛ ba kpɛ buvu nɛ shu.” 36Anɔ nɛ gɛ akpɛa lɛ buvu nɛ etsre Paolo asɛ, “Bebhuiklu na kpɛ odu asɛsɛ sɛ ba shɛnahwɛ Silas anɛ wɔ shu. Ɔtsɔ̃ nɛɛ nɔ bɔ naa shɛ so, nɔ vɛ nɛ ishu yuyɔm.”

37Pɔ Paolo aɖɔ tsre baxwɛwa nɛ asɛ: “Be tu lɔ nɛ ɔtɔ kebhui maklumaklu nɛ bulɔ, gɛ kɛlɛ klɛm sɛ bu nu Romanɛ flogo, klɛ ba yɛkɔ lɔ atɛ̃ akpɛ buvu. Klɛ ɔtsɔ̃ nɛɛ kide so pɛ ba pɛɛ sɛ tɛ ba kɛka lɔ ebu kɛdzyɛɛ nɛ ɔma nɛm tɛ anɔ eti nu? Owo! Kɔ balɛ nahwɛ aba tɛ ba ba gbanɔ lɔ ebu eyinɔ.”

38Balɛ baxwɛwa na vɛ ede tsre bebhuiklu nɛ kana, klɛ gɛ benu asɛ Paolo anɛ Silas benu Romanɛ nɛɛ, kishukua lɛ. 39Nɛ kɛlɛ mɛ, ba ba klɛ la ba yɔa lɛ idzyi klɛ balɛ nahwɛ agbanɔ lɛ ebu nɛ buvu, klɛ be bisi edenɔ balɛ ahwɛmɛ sɛ be koeyi nɛ ɔmagbla nɛm. 40Nɛ Paolo anɛ Silas buvu kukoeyi nɛe de ba shɛ avɛ Liɖia bupa mɛ, ɛklɛ bada tsyanɔ balɛ ɔha mɛanɛ klɛ bakpɛa lɛ kemi klɛ ba shɛ.

Currently Selected:

Axwɛwɛwa 16: tcd

Highlight

Copy