Axwɛwɛwa 12
12
Petro Buvu Kukuei Nɛ Gɛ Bhɛtɛ Kibi
1Kibe nɛ mɛ Ekusigbla Heroɖes evu banɔ teli gɛ baza busɔlɛ ɔha nɛm, pɛ apɛa sɛ eklu kebhui naa lɛ. 2Akɔ Yakobo gɛ enu Yohanɛsɛ yadzya, le yi nɛ ɛhɛ. 3Gɛ Heroɖes amɔ sɛ yɛ anɔ yiyi ne ku Yuɖanɛ nɛ awɔ̃, aza vɛ klɛa bha ede vu Petro tsyɛ. Kibui nɛ bɛlɛm nɛ Mawɛ manyɛnya manyɛnya wi nɛɛ ŋa be. 4Gɛ evu Petro beke, ada yɛkɔɛ akpɛ buvu, klɛ aza bepupo etsu talɛ ahwɛ mɛ, keyutugbani tɛalɛ balɛ abhɛtɛ kitsu zɛzɛ. Heroɖesɛ atrɔ sɛ tɛ ayɛkɔɛ amɛna tɛ beklu kebhui nɛ yɛ nɛ ɔtɔ nɛ Tɛfɛflɛ̃wi nɛe de.
5So nɛɛ banyɛna Petro evunɔ nɛ buvu, pɔ busɔlɛ ɔha nɔ za Kpaya tɛkuklua bha gɛganɛɛ nɛ yɛ kɛtɔkpu.
6Keli nɛ ga ba za pɛ Heroɖesɛ aba gbanɛ yɛ amɛna kebhui, Petro aza tram nɛ keyutugbani tɛabha shi nɛ buɖɛ mɛ, klɛ bepupo nɛ li kedunu. 7Nɛ kibi tilim ko, Kpaya axwɛdɛ teli ko ya ba klɛ ebe bui fu akpɛ buvu nɛ peteem. Etu Petro kɛdɔ nɛ yɛ ɔwɔã nɛm klɛ anyɛmɛ yɛ. Klɛ etsrea sɛ, “Kɔɛa tsɔ, vu ɔlɔ!” Klɛ buɖɛ nɛ bule nɛ yɛ buhukpɔ.
8Klɛ Kpaya axwɛdɛ nɛ etsrea sɛ, “Yɛkɔ wɔ bawi anɛ ɛtsraklɔ nɛ ɔkpɛ.” Klɛ Petro abhɛtɛ ana. Kpaya axwɛdɛ nɛ eze tsrea sɛ, “Yɛkɔ wɔ kabha awi nɛ ɔda wɔ shu tɛ ɔza mɛede.” 9Petro aza yɛede klɛ ekoeyi nɛ buvu nɛm, pɔ edi ti kibuinyɛbui edenɔ kɛdɔnɔ kɛgɛ Kpaya axwɛdɛ nɛ edzia bhɛtɛ nɛ kɛɛ dzyɔɛ gba; edi lɛ asɛ kɛdɔ aamɔ. 10Baga bepupo tutɔpu nɛ babhla nɛ ɔbha afla klɛ ba ba tɔnɔ ɛɖa kedunu gɛ ɔfla ko pɛ obo tsoku ɔmagbla nɛm. Kedunu nahwɛ na danɛ kɔa lɛ, klɛ la ga fla. Gɛ ba ga vɛ otugba nɛ kidzogbla tidzidzem nu, ko klɛ Kpaya axwɛdɛ nɛ ashɛ̃ alɔ yɛ.
11Petro aba vɛ ishum klɛ aɖɔ sɛ, “Ɔtsɔ̃ nɛɛ eba ti otro maza klɛ mɛ sɛ Apalete nɛ yakpɛ yɛ axwɛdɛ klɛ ebe bu mɛ nɛ Heroɖes buɖɛ mɛ nɛ kɛdɔ nyɛdɔm gɛ Yuɖanɛ nɛ bee di kidzoe nu sɛ tɛ kɛ ba mɛa bha.”
12Kibe lɛ nɛ gɛ Petro amɔ yɛ shu edzyesi beke sɛ Kpaya ebui nɛ butsi mɛ beke nɛ, ashɛ̃ avɛ Yohanɛsɛ gɛ be ke kulu asɛ Marko yɛeni Maria bupa mɛ, nɛ ɔkɛlɛ gɛ banɔ gelee be xogo pɛ bee klu Kpaya. 13Petro ehuahwɛ ɔtɔ opupu nɛa bha, klɛ axwɛdɛ adzɛnuvɔɛ teli gɛ be klua sɛ Roɖa nɛ ekoeyi aba. 14Gɛ adzɛnuvɔɛ nɛ enu Petro oli nɛm edzyesi nɛ, same eku yɛ ezi so nɛ adɛ danɛ opupu nɛ akɔɛ etsodzi akpɛsi avɛ bupa nɛm klɛ ada kpɛ ogugua sɛ, “Petro ebe li kedunu nɛ mɔ oo!”
15Banɔ nɛ bupa nɛm nɛ betsre adzɛnuvɔɛ na sɛ, “Ɔma nɛ awɔ̃.” Gɛ asa zɛa ɖɔ nɛ be tsrea sɛ onu kɛgba aɖɔ nɛa kɛlɛalɛ “Yɛ Kpaya axwɛdɛ nɛ wɔ ɔmɔ.”
16Pɔ Petro yɛ aza opupu nɛ tɛbhubhoa bha, klɛ gɛ ba ba danɛ opupu pɛ ba mɔ yɛ, kɛ bhɛtɛ alɛ kibi. 17Klɛ mɛ nɛ Petro akasɛ alɛ ahwɛ sɛ ba da onugbu ba tɛ ɖɔ kaɖɔ, klɛ akplahwɛ kana gɛ Apalete nɛ ebu yɛ nɛ buvu. Klɛ aɖɔ sɛ, “No tsre Yakobo nɛ yɛadzyalɛ nɛ tsyɛ kibui, ko klɛ Petro ashɛ̃ avɛ ɔkɔ bhlatɔ.
18Nɛ kɛvlɔ nɛ mɛ, ganɛ tɛwɛwlãkɛ bɔɛ alɛ ku behudugbani nɛ kishi denɔ Petro tɛlɛ lɛla nɛ buvu nɛm shu. 19Nɛ klɛede gɛ Heroɖesɛ aba pɔɛ ebui nɛ bepupo pɛ ba pɛɛ Petro adɛ mɔ nɛɛ, akɔ sɛ be bhui bepupo nɛ gɛ po kedunu nɛ elishi alɛlɛ nɛ petee atɔkpu.
Heroɖesɛ Titsitsi
Heroɖesɛ aba shɛ nɛ Yuɖia avɛ Sizeria klɛ ada za ɔkɛlɛ bɔɛ. 20Heroɖesɛ ada pɛ ebla nɛ banɔ nɛ Tire anɛ Sidɔn; so banɔ na ba kpɛ ketsu klɛ ba vɛ ada mɔɛ. Putɔnɔ nɛ bada wɛ Blastus gɛ enu Heroɖesɛ yɛ anɔ shishe teli sɛ tɛ ada mɔ Heroɖesɛ kɔa lɛ sɛ ba pɛ sɛ tɛ ba bhɛtɛ ishu yuyɔ nɛ yɛ, alasɛ ba pɛ sɛ tɛ bamɔ kidzo tɛ ba za ga kedzi nɛ banɔ nɛa bha gɛ Heroɖesɛ aŋa, balɛ kɛdɔ ŋɛŋa tsyɛ ɛkɛlɛ ba ba mɔɛ lɛ edenɔ.
21Nɛ kiwi nɛ gɛ batrɔ kɔ tɛtsyɛtsya nɛɛ, Heroɖesɛ aza yɛ bukusi bawi mɛ nɛ yɛ bukusie bhum klɛ aɖɔ kaɖɔ kɔ yɛ banɔ. 22Heroɖes banɔ na kpɛ igugu klɛ la ɖɔ sɛ, “Kaɖɔa nɛ gɛ bunu nɛ nu kpaya kaɖɔ, ganɛ anɔdzyrame aɖɔ.” 23Nɛ ɔkɛlɛ ɔlɛ nɛ ko, alasɛ Heroɖes adɛ kpɛ Kpaya kinyi nɛ kabha so nɛ, Apalete nɛ yaxwɛdɛ teli ebe huebho, klɛ asɔ̃ aba ŋa yɛ klɛ etsi.
24Pɔ nɛ Kpaya kibui nɛ kabha koe lɛ vɛ pɛ kɛ kaka.
25Kibe lɛ nɛ gɛ Banabas anɛ Saolo ba bhɛtɛ beke pɛ ashɛ nɛ Yerusalɛm nɛ, be vunɔ Yohanɛsɛ gɛ beke klua sɛ Marko tsyɛ amɛna.
Currently Selected:
Axwɛwɛwa 12: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation
