मत्ती 6
6
खेरेला दु़म्पामिमलाई हाम-हुम ग्वामुकु दुथाममिम येशूकु सीसि
1“चङचङया बानी वो! मु़चु़मिमलाम इनीमा नङ कोला सो़म्सिमु लागि मु़चु़मिमकु ङादोडा जो़पा खारीमिम मेबेनी। मेम बेन्नी माला ने पाह्रीलाम माम्चु़नी इनी पापका गानीलाई पुरस्कार मेग्वानी।#मत्ती २३:५
2“मेम्मिमका खेरेला दु़म्पा मु़चु़मिमलाई गानी हाम-हुम ग्वानिलो मिनी मिक्सीलामडा जो़पा लिसिक्पामिमका मु़चु़मिमलाम नङ कोला सो़म्सिमु लागि घ्रो़म्दीनेमबाडे नुङ लाम्दी-गुदीबाडे डोक्पु रेम्बेम्सिप्मिमिम होङङा मेबेनी। आच्छाङा गो गानीलाई र्वाङु, मेर्मिमका खोत्ले उनी पुरस्कार ल्वामु दु़म्मिडिम बु। 3लावो खेरेला दु़म्पामिमलाई हाम-हुम ग्वानिलो वाङमिम सु़का वो मेल्वासाका ग्वाक्नी।#६:३ ग्रीक ल्वाडा, पे-ल्वाका ग्वानिमिम जो़प-ल्वाका मेलु़लेट्नु़ र्वाक्साका र्याक्मा बु। 4मेम्साका मु़चु़मिमलाई गानी हाम-हुम ग्वानिलो सु़का वो मेल्वाहोमका ग्वाक्नी। मेम्मा मेल्वाहोमका खारी बोनिमिम ल्वापा माम्चु़नी इनी पापका गानीलाई पुरस्कार ग्वानिमी।
सो़म्दीकु दुथाममिम सीसि
(लूका ११:२-४)
5“गानी सो़म्दी बोनिलो मु़चु़मिमलाम ल्वाला सो़म्सिमु लागि लाम्ख्राबाडे नुङ घ्रो़म्दीनेममिमबाडे सो़म्दी बोमु द्वाक्पा मु़चु़मिमकु मिक्सीलामडा जो़पा लिसिक्पा मु़चु़मिम होङङा मेबान्सिट्नी। आच्छाङा गो गानीलाई र्वाङु, मेर्मिमका खोत्ले उनी पुरस्कार ल्वामु दु़म्मिडिम बु।#लूक १८:१०-१४ 6लावो गानी सो़म्दी बोनिलो नेमकु गोनोम बाखोपनो हुनी। लाम्चोको चनिमा सु़का वो ल्वामु मेचाप्मिमिम माम्चु़नी इनी पापलाई सो़म्दीडा देप्नी। मेम्मा मेल्वाहोमका बोनिमिम खारी ल्वापा माम्चु़नी इनी पापका गानीलाई पुरस्कार ग्वानी।
7“गानी सो़म्दी बोनिलो माम्चु़नी मेछेपा मु़चु़मिमका होङङा न ना थो़मका सो़म्दी मेबेनी। हापा ल्वामिम सो़साका सो़म्दी बिइलो माम्चु़नीका थो़मी र्वाक्पा मेर्मिमका मिम्मी। 8मेर्मिम होप्माम गानी मेदु़म्नी, हेङालोने गानी गुमीनुङ बिमु ङादोङा गानीलाई उहेम ल्वाकाम खेरेला बु, मेराम माम्चु़नी इनीमा पापका चमी। 9गानी ने आरेसाका सो़म्दी बेनी:
‘पाह्रीला बाट्पा आकीमा पाप,
इनीमा सेपा नङ कोसिनु़,
10इनीमा किब्दी रोनु़,
इनीमा न पाह्रीला हेप्माम बु,
मेम्साकाङा ओराम सुबुडा वो रोथिनु़।
11हेल्लो लोवो गुकुलाई चाहेदु़म्पा पोमु-डुमु
आनेप वो ग्वाक्किनी,
12आकी कोर्थो़लाम बक्पामिमकु छु़ल हेप्साक्तोकोम होङङा
आकी छु़लमिम हेप्साक्किनी,
13मेजो़पा ल्वालाम न-छाम्सिमु मेग्वाक्किनी,
लावो मेजो़पा मुनाङलामका सेल्किनी।
[हेङालोने किब्दी, यु़म नुङ यु़म-झ्वाक्सी, हेल्लो लोवो इनीमाङा सो़। आमेन]’
14 #
मर्क ११:२४-२६
“इनी कोर्थो़लाम बक्पामिमकु छु़ल हेम्साट्नी माला पाह्रीला बाट्पा माम्चु़नी इनी पापका वो इनी छु़लमिम हेम्सानी। 15लावो गानी वाङमिमकु छु़ल हेम्सामु मेबिन्सिट्निवा माला माम्चु़नी इनी पापका वो इनी छु़लमिम मेहेम्सानी।
उपास बुमुकु दुथाममिम सीसि
16“गानी उपास बुनिलो मु़चु़मिमकु मिक्सीलामडा जो़पा लिसिक्पामिम होङङा इनी ङाली मेडन्थाट्नी। हेङालोने मेर्मिमका उपास बाम्डिम मु़चु़मिमलाई रेम्बोमु लागि उनी ङाली डमी। आच्छाङा गो गानीलाई र्वाङु, मेर्मिमका उनी पुरस्कार ल्वामु दु़म्मिडिम बु। 17लावो गानी ने उपास बुनिलो इनी बुइडा तेलका क्लक्साका इनी सेम डु़ट्नी, मा इनी कल सो़ल्नी। 18मेम्साका गानी उपास बुनिमिम मु़चु़मिमका मेएँ, मेल्वासिमिम माम्चु़नी इनी पापका ल्वामिनु़। मेल्वाहोमका खारी बेम्मा ल्वापा माम्चु़नी पापका गानीलाई पुरस्कार ग्वानी।
पाह्रीलाम खाप्चीकु दुथाममिम सीसि
(लूका १२:३३-३६; १६:१३)
19“इनीमा लागि ओ सुबुडा खाप्ची मेफुट्नी। आसिन्डा ने मे खाप्ची तु़मका पु़, गारका पु़, खुचु़वाका नेम पिसाका खुमी।#याक ५:२-३ 20लावो इनीमा लागि पाह्रीला खाप्ची फुट्नी, मेला ने तु़मका वो मेपु़ मा गारका वो मेपु़। मेम्मा खुचु़वाका वो पिसाका खुमु मेचाप्सु़। 21बान्ते इनी खाप्ची बु, मेसिन्डाङा इनी न वो दु़म।
22“मिक्सी ने मिरो़मडाम ओल होप्मामङा सो़। इनी मिक्सी जो़पा बु माला खोत्ले इनी मिरो़मङा ओलनुङमा दु़म। 23लावो इनी मिक्सी मेजो़पा बु माला खोत्ले मिरो़मङा तुकुम्चिमनुङमा दु़म। गानीगोडा बाट्पा ओल तुकुम्चिम दु़स्ता माला गानी छो़म मेजो़पा दु़म्नी।
24“सु़का वो नले नेमहपचिपकु चापे-डुपे बोमु मेचाप्सु़। मेरामका कोलेलाई रिखाम बु़, मा कोङमीलाई मेद्वाकु़। मेराम डु़ल्चो़ कोले नेमहपकु ल्वाडा दु़म, मा कोङमीलाई हाम ना हामकाम मिम्डु़। मेम्साका गानी वो माम्चु़नी नुङ खउलुङलाई कोयो डोक्पु मिम्साका निफिलाई सेव सान्मु मेचाम्नी।
पोमु-डुमुकाम मिम्ताम-सो़र्ताम मेबोमुकु दुथाम येशूकु सीसि
(लूका १२:२२-३१)
25“मेम्मिमका गो गानीलाई र्वाङु, इनी साम जु़ल्मुकाम लागि हाम पोमु-डुमु मा मिरो़मकाम लागि हाम फम्सिमु र्वाक्साका मिम्ताम-सो़र्ताम मेबेनी। पोमु-डुमुडाम साम डोक्पु मा ये-सेमडाम मिरो़म डोक्पु मेएँ मा? 26चक्पुमिमलाई रेप्नी, मेर्मिमका मा-के मेख्लिमी, मा मेहिम्मी, छेदेनेमडा वो मेजु़ल्मी, लावो पाह्रीलाम माम्चु़नी इनी पापका मेर्मिमलाई पोमु-डुमु ग्वामी। माम्चु़नीकाम लागि हाम गानी मेर्मिमडाम वो हापा थिकाम मेबुनी मा? 27गानी मिम्ताम-सो़र्ताम बोनिमिमका इनी सो़ररिप किचो़ लोवो बर्बेन्मु चाम्नी मा?
28“मेम्मा ये-सेमकाम लागि हेङा मिम्ताम-सो़र्ताम बोनी? सो़ब्दीडाम लिली बुङमामिम हेसाका बर्मी, मेराम रेप्नी। मेर्मिमका ब्राम्दु़ल्वा मेबोमी, उनीमा ये-सेम मेफिर्मी। 29सोलोमन हप वो छो़म खाप्चीचो़ बाइडा, लावो मे बुङमामिम कोतिम वो जो़पा दु़म्साका ब्ल्वास्ताम मेबाया।#१ राज १०:४-७; २ इति ९:३-६ 30आनेप बाट्पा मा दिकाम मुडडा घ्रु़पा सो़ब्दी बुङमालाई ने माम्चु़नीका आरेसाका रेम्मी माला गुमीका गानीलाई आच्छाङा मेरेम्नी मा? हेङा गानी कि-कि थो़रलु़निमिम?
31“मेम्मिमका ‘हाम पोमु?’ डे ‘हाम डुमु?’ डे ‘हाम फम्सिमु?’ र्वाक्साका मिम्ताम-सो़र्ताम मेबेनी। 32माम्चु़नीडा थो़र मेलु़पामिमका डे आरेप्माम ल्वाकु मिम्ताम-सो़र्ताम बोमी, लावो पाह्रीला बाट्पा इनी माम्चु़नी पापका ओर्मिम खोत्ले गानीलाई बासी र्वाक्साका ङादोङा चमी। 33ङादो माम्चु़नीकु किब्दी माल्नी, मा उनी ङादोडा जो़पा खारी बेनी। मेम्मा ओर्मिम खोत्ले ल्वामिम गुमीका गानीलाई ग्वानी। 34मेम्मिमका दिकाम लागि मिम्ताम-सो़र्ताम मेबेनी। हेङालोने दिकाम लागि दिकाङा मिम्ताम-सो़र्ताम बेपा थारी रो। आनेपमिम दु़खा आनेपमिमकाम लागिङा छो़म ड्वासोट्पा बु।”
Currently Selected:
मत्ती 6: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
