मत्ती 18
18
पाह्री-किब्दीडा खोत्लेडाम डोक्पु मु़चु़
(मर्कूस ९:३३-३७; लूका ९:४६-४८)
1मेकोतिलोङा सीसिपामिम येशूकाडा रोम्डिमा हिलाबेम्डी, “पाह्री-किब्दीडा खोत्लेडाम डोक्पु मु़चु़ सु़ दु़म?”#लूक २२:२४
2येशूका कोले याक्के चो़च्चो़लाई येट्मिडिमा मेर्मिमकु फार्डा येम्सिबेट्मिडी, 3मा र्वाम्डी, “आच्छाङा गो गानीनुङ र्वाङु, इनी छु़ललामका ख्लोसिसाका याक्के चो़च्चो़मिम होप्माम मेदु़म्निवा माला पाह्री-किब्दीडा हेल्लो वो हुमु मेल्वानी।#मर्क १०:१५; लूक १८:१७ 4मेम्मिमका उहेम ओराम चो़च्चो़ होप्माम याक्के दु़म, मेरामङा पाह्री-किब्दीडा डोक्पु दु़म। 5उहेमका आमा लागि आरेप्माम चो़च्चो़लाई हुनाखाना बु़, मेरामका गोलाई हुनाखाना बोङि।
6“लावो उहेमका गोडला थो़रलु़पा आरेप्माम याक्केमिमगोडाम कोलेलाई छु़ल बेबेडु़, मेरामकु लक्चाडा खुरुक लुङ चेसाका घ्लु़म्पा दिरिदिनगोयु़ घ्रोम्सोमु मेरामकाम लागि छो़म जो़पा दु़म।
7“ओ सु़म्दिसेरडाम मु़चु़मिम ने हाउरेमा, हेङालोने मु़चु़मिमलाई छु़ल बेबेट्पा ल्वा ने हापाङा बु। आरेप्माम ल्वामिम ने रो ङा, लावो वाङमिमलाई छु़ल बेबेट्पा मु़चु़ ने हाउरेमा! 8इमा ल्वाका लोवो खेलका लोवो छु़ल बेबेडु़ माला मेरामलाई क्रिप्डाम घ्रोक्सोका। हेल्लो वो मेसिपा खादीगोयु़म मुड्डा ल्वा-खेलनुङ घ्रोला सो़म्सिमुडाम ने कोलेङा ल्वानुङमा लोवो खेलनुङमाका त्वारो़म ल्वामुङा इमा लागि जो़पा दु़म।#मत्ती ५:३० 9मेम्साकाङा इमा मिक्सीका थो़रलु़मु मेग्वाना माला मेरामलाई फिलामा पारा। खादीगोयु़म मुगोडा निफिङा मिक्सीनुङमा घ्रोला सो़म्सिमुडाम ने कोलेङा मिक्सीनुङमाका त्वारो़म ल्वामुङा इमा लागि जो़पा दु़म।#मत्ती ५:२९; मर्क ९:४७
दाम्पा भेन्दाकु सीसि-सो़म्दी
(लूका १५:३-७)
10“चङचङया बानी, ओ याक्केमिमगोडाम कोलेलाई वो हाम ना हामकाम मेमिम्नी। हेङालोने गो गानीलाई र्वाङु, मेर्मिमकु पाह्रीचो़मिम पाह्रीलाम आमा पापकु ङादोडा हेल्लो लोवो पाह्रीला बुमिम बुमी। 11[हेङालोने मिनीचो़ ने दाम्पा मु़चु़मिम ङा सेल्मु लागि योक्ताम सो़।]#लूक १९:१०
12“ओराम सो़म्दीलाम गानी हाम मिम्नी? कोले मु़चु़काम को सङ (१००) भेन्दामिम बाम्डी लावो कोले दाम्स्ता। गुका गु-गुले (९९) भेन्दामिमलाई मेराम पोप्चङडा पार्जो़लु़मी, मा दाम्पा मे कोले भेन्दा माल्मु लागि मेल मा? 13गो गानीलाई आच्छाङा र्वाङु, दाम्पा मे भेन्दा डारु़मा मेदाम्पा गु-गुले (९९) भेन्दामिमडाम वो डार्डु़म कोलेडाम गु छो़म गेर्सी द्वा। 14मेम्साकाङा ओ याक्केमिमगोडाम कोलेङा वो मेदाम्मिनु़ र्वाक्पा पाह्रीलाम इनीमा पापकाम न बु।
येशूडा थो़रलु़पा कोङमीलाई जो़पा दु़म्बेट्पा
(लूका १७:३)
15“थो़रलु़पा इमा वा-ल्वाकका इमा कोर्थो़लाम छु़ल बु़डु़ माला लक्सामा गाची कोङङा बुचिलो गुका ख्लो़ड्डु़म ल्वा गुनुङ सो़या। गाना र्वाक्नाम ल्वा मेरामका थो़स्तु़ माला मेरामलाई थो़रलु़पा वा-ल्वाक दु़म्बेन्मु चाम्ना।#लूक १७:३ 16लावो मेरामका थो़मु मेबिसावा माला कोले लोवो नले लोवो मु़चु़नुङ मेरामकाडा लक्सा, मेम्साका नले लोवो सुले लोवो सो़पाका गाना मुमा बेट्नाम ल्वा आच्छाङा रेम्बोमिनु़।#व्य १९:१५ 17गुका इनीमा वो ल्वा मेबिसावा माला मण्डलीनुङ सो़या। मण्डलीका र्वामिम वो मेरामका थो़मु मेबिसावा माला मेरामलाई माम्चु़नीडा थो़रमेलु़पा वाङसामा होङङा लोवो कर फक्पा मेजो़पा छु़लचो़ होङङा लोवो बेनी।
18“आच्छाङा गो गानीलाई र्वाङु, गानी सुबुडा चक्निमिम ल्वा पाह्रीला वो चसी, मेम्साकाङा सुबुडा डिट्निमिम ल्वा पाह्रीला वो डिन्सी।#मत्ती १६:१९; यूह २०:२३
19“आथावो गो गानीलाई र्वाङु, ओ सुबुडा हाम-हुम ल्वाकाम लागि गानीगोडाम नलेका उची न-थो़म घ्रो़म्बेसाका बिच्ची माला पाह्रीलाम आमा पापका मेराम ग्वामिची। 20हेङालोने बान्ते नले लोवो सुले लोवो आमा नङडा खोम्सिमिलो मेर्मिमकु थेतेडा गो दु़म्ङु।”
पाचो मेग्वाक्पा मु़चु़कु सीसि-सो़म्दी
(लूका १७:४)
21मेकोतिमा पत्रुस येशूकाडा रोक्तामा हिलाबु़डु़, #लूक १७:३-४“ङाचो़, थो़रलु़पा आमा ल्वाकका आमा कोर्थो़लाम छु़ल बु़लो हाङको खेप मेरामलाई पाचो ग्वाक्पुमिम? येतले खेप?”
22येशूका गुलाई र्वाम्डी, “येतले खेप मेएँ, येत धु़मकाम (७०) येतले (७) हापा खेप।
23“मेम्मिमका पाह्री-किब्दी ने कोले हप होप्मामङा सो़, उहेमका उ खारी बेपा मु़चु़मिमलामका उ जेर फमु न बु़डु़। 24गुका हिसाब रमु चो़म्डु़, मा को सङसङ (१०,०००) सो़नाकु सिक्का#१८:२४ कोले सो़ना सिक्का ने कोले मु़चु़का १५ थ खारीकु खउलुङ मेकोति दु़म। जेर मोक्पा उ खारी बेपा मु़चु़ उमाडा रेट्मिडी। 25लावो मेरामका जेर सोमु मेचाप्सु़वा। मेम्मिमका हपका मेरामलाई उ त्वाप, उ नाइमे, उ चो़मिम, गुनुङ बाट्पा खोत्ले भ्रेडामा ग्वाक्ङी बु़डु़।
26“लावो मेराम मु़चु़का मे हपकु खेल चु़म्डु़मा आरे र्वाक्ताम-र्वाक्तामङा बु़डु़, ‘ङाचो़, कोलेम-नलेम लट्नी, गो मोक्तोम खोत्ले इनीमा जेर सोक्पु।’ 27मेकोतिमा मे हपकु थो़म भ्रो़स्ता, मा गुका मेराम मु़चु़लाई जेर सोमेबेसाकाङा थु़र्सोड्डु़।
28“लावो मेराम मु़चु़ मेलामका लस्तामा गुनुङ खारी बेपामिमगोडाम कोलेकाडा लस्ता। मेरामका उमा को सङ मतोको सिक्का#१८:२८ कोले मतोको सिक्का ने कोले मु़चु़का कोलेम खारीकु खउलुङ मेकोति दु़म। मोक्तु़म बाइडा। मेरामलाई उ लक्चाडा झेड्डु़मा र्वाक्ता, ‘गाना मोनाम जेर सोक्थाडा।’
29“गुनुङ खारी बेपा मेराम ङोप्सो़का क्रचु़खुम बु़डु़मा गुलाई आरे र्वाक्ताम-र्वाक्तामङा बु़डु़, ‘कोलेम-नलेम लडा, गो सोक्पु।’
30“लावो गु मेबिसावा। मेम्मा गुनुङ खारी बेपा मेराम ङोप्सो़का खोत्ले जेर मेसोक्सोक्थु़मसम्म झ्यालखानडा गुलाई चक्तु़। 31गुनुङ खारी बेपा वाङमिम ङोप्सो़का ओराम ल्वाम्डिमा छो़म उनी गो नो़डा। मेर्मिम लम्डिमा ओराम ल्वाकु दुथाम खोत्ले उनी हपनुङ सो़म्डी।
32“मेकोतिमा हपका उ खारी बेपा मेराम मु़चु़लाई येड्डु़मा र्वाक्ता, ‘ए मेजो़पा न-गोनुङमा डु़ल्चो़, गाना गोनुङ छो़म र्वाक्नामका गानालाई डोक्पु जेर सोमेबेट्निवा। 33गानाडला न-थो़म रेम्बेउतोम होम्साकाङा गानानुङ खारी बेपा इमा ङोप्सो़लाई न-थो़म रेम्बोमु मेबासावा?’ 34हपकु छोक्चो बक्तामा खोत्ले जेर मेराम मु़चु़का मेसोक्सोक्थु़मसम्म झ्यालखानडा चक्साका छो़म देन्दे ग्वाबेड्डु़मी।
35“गानी वो थो़रलु़पा इनी वा-ल्वाकमिमलाई इनी न-गोलामका पाचो ग्वामु मेबिन्सिट्निवा माला पाह्रीलाम आमा पापका वो गानीलाई मेमङा बोनिमी।”
Currently Selected:
मत्ती 18: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
