लूका 23
23
पिलातस नुङ हेरोदकु ङादोडा येशू
(मत्ती २७:१-२,११-२६; मर्कूस १५:१-१५; यूहन्ना १८:२८–१९:१६)
1मेकोतिमा डोक्पु घ्रो़म्दीडाम खोत्ले मु़चु़मिम बम्डिमा येशूलाई पिलातसकाडा रेट्मिडी। 2मेर्मिमका गुमीलाई आरेसाका मुमा बेत्तो पिलातसनुङ र्वाम्डी, “ओराम मु़चु़का आकी मु़चु़मिमलाई रोमी सरकारकु कोर्थो़लाम कोस्तु़मिम गुकु डार्तोको। ओरामका कैसरलाई कर मेसोक्नी र्वामा गुकुलाई भोम्की, उ त्वाप ने ख्रीष्ट, हप र्वा।”
3मेम्मिमका पिलातसका येशूनुङ हिलाबु़डु़, “हाम गाना यहूदीमिमकु हप?”
गुमीका र्वाम्डी, “गानी र्वाक्निम होङङा सो़।”
4पिलातसका ङाउ डु़म्लाचो़मिम नुङ सेर्पा मु़चु़मिमलाई र्वाक्ता, “ओराम मु़चु़का मेजो़पा खारी बु़डु़म गो हाम वो मेडारु।”
5लावो मेर्मिमका छो़म येत्तो र्वाम्डी, “ओराम मु़चु़का गालील नुङ खोत्ले यहूदियाडाम नुङ गालीललामका ओ यरूशलेमसम्म मु़चु़मिमलाई सीसाका कोक्तोङा लेडु़।”
6पिलातसका ओराम थो़स्तु़मा, “हाम गु वो गालीलडाम मु़चु़ ङा?” र्वाक्तामा हिलाबु़डु़।
7मेकोतिमा पिलातसका येशू हेरोद अन्तिपासकु इलाकाडाम रेछा र्वाक्पा चडु़मा येशूलाई हेरोदकाडा थु़र्स्तु़मी। मेकोतिलो हेरोद यरूशलेमडाङा बाइडा।
8येशूलाई ल्वास्तु़मा हेरोद छो़म गेर्सिद्वाक्ता। हेङालोने गुका उनीमा दुथाम थो़स्तु़मका हापा ङादो आथाम गुमीलाई क्रो़म्मु, मा गुमीका बेम्डिम हेल्लो मेल्वाम्मा खारी रेम्मु न बु़डु़म बाइडा। 9गुका येशूनुङ हापा ङा हिलाबु़डु़, लावो येशूका गुनुङ हाम वो मेर्वाक्मिवा। 10मेकोतिलोङा ङाउ डु़म्लाचो़मिम नुङ यहूदीकु डु़म्ला सीपा पातु़म्रीमिम बम्डिमा येशूलाई मुमा बेन्मु चो़म्मिडी। 11मेम्मा हेरोद हप नुङ उ सिपाहीमिमका येशूलाई डक्साका जेम्डिमा नाले डाट्मिडी। मेम्मा गुमीलाई हपकु ये-सेम फबेड्डु़मा पिलातसकाडा ङा ख्लोक्सोड्डु़। 12ङादो पिलातस नुङ हेरोद मेदु़थाल्चिवा। लावो मेनेम आथाम मेर्चिपकु न-थो़म घ्रो़म्स्ता।
13मेकोतिमा पिलातसका ङाउ डु़म्लाचो़मिम, यहूदीमिमकु ङाउ, मा मु़चु़मिमलाई खोप्डु़मी। 14मेम्मा मेर्मिमलाई र्वाक्ता, “रोमी सरकारकु कोर्थो़लाम मु़चु़मिमलाई कोस्तु़मि र्वाक्साका गानी ओरामलाई आमाडा रेट्नी। गो इनी ङादोडाङा ओरामलाई हिलाहिसी बेउतो लोवो गानी मुमा बेट्निम ल्वा गुनुङ मेडारुवा। 15हेरोदका वो ओराम मु़चु़लाई मुमा बेन्मु बासिक्पा ल्वा हाम वो मेडारु़वा। मेम्मिमका गुका ओराम मु़चु़लाई इकीमाडाङा ख्लोक्सोक्तु़। रेप्नी, सिमु घ्रेट्पा खारी येशूका हाम वो बु़डु़म मिबु। 16मेम्मिमका गो ओरामलाई कोक्तेकु रिवाका यालुमा डिसोक्पु।”
17[सेल्सिमुनेम चाडकाम#२३:१७ निस्तार चाड थारीका यहूदीमिमकाम लागि कोले चक्मा मु़चु़ पिलातसका डिन्मु बास्थाल्ला।] 18मेर्मिम खोत्ले कोङ सि दु़म्साका छो़म येम्डिमा र्वाम्डी, “येशूलाई सेट्नी, मा आकीमा लागि बारब्बालाई डिन्सोट्नी।” 19बारब्बाका ने यरूशलेम शहरडा रोमी सरकारकु कोर्थो़लाम बक्तामका नुङ मु़चु़ सेड्डु़मका चम्डिम बाइडा।
20पिलातसका येशूलाई डिसोट्पा न बु़डु़मका गुका आथावो र्वाक्ता, 21लावो मेर्मिमका आरे र्वाक्तो येम्डिम बाम्डी, “मेरामलाई क्रूसडा चेट्नी! मेरामलाई क्रूसडा चेट्नी!”
22पिलातसका मेर्मिमलाई सुकखेपडा हिलाबु़डु़, “हेङा? येशूका हाम मेजो़पा खारी बु़डु़म बु? ओरामलाई सेन्मु बासिक्पा मेजो़पा ल्वामिम ने हाम वो मेडारुवा। मेम्मिमका गो ओरामलाई कोक्तेकु रिवाका यालुमा डिसोक्पु।”
23लावो मेर्मिमका छो़म डोक्पु लो़लामका येत्तो “येशूलाई क्रूसडा चेन्मुङा बासी!” र्वाक्साका येम्डिम बाम्डी। मेर्मिमका येम्डिम होङङा दु़स्ता। 24मेम्मिमका मेर्मिम मु़चु़का र्वाम्डिम होङङा पिलातसका बेउ र्वाक्ता। 25रोमी सरकारकु कोर्थो़लाम बक्ता, मा मु़चु़ सेड्डु़मका चक्मा बारब्बालाई मु़चु़मिमका बिम्डिम होम्साकाङा पिलातसका डिसोड्डु़। लावो येशूलाई ने मेर्मिमकु न होङङा सेन्मु लागि सिपाहीमिमकु ल्वाड्डा ग्वाक्तु़मी।
येशूलाई क्रूसडा चेट्मिडिम
(मत्ती २७:३२-४४; मर्कूस १५:२१-३२; यूहन्ना १९:१७-२७)
26पिलातसकु सिपाहीमिमका येशूलाई क्रूसडा चेन्मु लागि लक्तोङा बेम्डिलो कुरेनी शहरडा बाट्पा सिमोन देललामका यरूशलेमथो़ रोक्तोङा लेट्पा डार्मिडी। मेम्मा मेरामलाई सिपाहीमिमका चु़म्मिडिमा येशूकु क्रूस कुर्बेसाका उनी चङचङ लाम्दी बेट्मिडी। 27छो़म सेर्पा मु़चु़मिम येशूकु चङचङ लम्डी। मेगोडा मेसेममिम वो बाम्डी, मेर्मिम येत्तो ख्राप्तो बेम्डिम बाम्डी। 28लावो मे मेसेममिमथो़ ख्लोसिम्डिमा येशूका र्वाम्डी, “यरूशलेमडा बाट्पा रिचो़नी, गानी आमा लागि मेख्राप्नी। लावो त्वाकाम लागि नुङ इनी चो़मिमकाम लागि ख्राप्नी। 29हेङालोने आरेप्माम थारी वो रो, मु़चु़मिमका र्वामी, ‘चो़ मेदु़म्पा नुङ चो़ मेकक्पा मा दु़दु़ मेथो़पा मेसेममिम ने आलाकाम सो़।’ 30मेकोतिलो मेर्मिमका भ्र्वालाई र्वामी, ‘गुकुलाई ख्रेप्किनी’ मा पोप्चङमिमलाई र्वामी, ‘गुकुडला आल्नी।’#होशे १०:८; रेम्बे ६:१६ 31गिगियाम धक्सा होप्माम माम्चु़नीकु न-गोनुङमा मु़चु़लाई ने मेर्मिमका आरे बोमी माला साट्पा धक्सा होप्माम छु़लचो़मिमलाई हाङको छो़म देन्दे ग्वामी?”
32सिपाहीमिमका ख्ल्याम्या बेपा नले मु़चु़चिपलाई वो येशूनुङङा सेन्मु लागि लम्डी। 33मेर्मिम बुइसेर र्वाक्मा खोमडा रोम्थिम्डी। मेकोतिमा मेसिन्डा मेर्मिमका येशूलाई क्रूसडा चेट्मिडी, मा ख्ल्याम्या बेपा मु़चु़चिपलाई वो कोले येशूकु जो़पलाम मा कोङमीलाई पेलामका क्रूसडा चेट्मिडी। 34येशूका र्वाम्डी, “माम्चु़नी, ओर्मिम मु़चु़लाई पाचो ग्वाक्निमी, हेङालोने मेर्मिमका हाम बेत्तोङा लेन्मी मेराम मेचमी।” मेम्मा सिपाहीमिमका चिठ्ठा ओप्साका#२३:३४ रोमी सिपाहीमिमका कोङनिम मु़चु़लाई क्रूसडा चेट्मिडिलो आरे बेम्थाल्मिडी। सिपाहीमिमका आरे बेसाका भज २२:१८ डा र्यामा होङङा रोथिबेट्मिडी। येशूकु ये-सेम दो़म्डी।#भज २२:१८
35मु़चु़मिम येम्सिम्डिमा येशूलाई रेम्थाट्मिडिम बाइडा। यहूदीकु ङाउमिमका येशूलाई सेम्ला बेत्तो र्वाम्डी, “ओरामका वाङमिम मु़चु़लाई सेल्लु़मी, माम्चु़नीका थुट्डिम ओराम ख्रीष्ट माला उ त्वापलाईङा सेल्नु़।”#भज २२:७
36येशूलाई जु़र्पा ग्वाल थो़त्तो सिपाहीमिमका वो नालेडाट्मिडी,#भज ६९:२१ 37“गाना यहूदीमिमकु हप माला इ त्वापलाई सेला।”
38“ओराम यहूदीमिमकु हप” र्वाक्मा छेखोप येशूकु बुइकुडला चेट्मा बाइडा।
39येशूकु फार्डा चेट्मिडिम ख्ल्याम्या बेपा मु़चु़चिपगोडाम कोलेका गुमीलाई सेम्ला बेत्तो र्वाक्ता, “गाना ने ख्रीष्ट मेएँ डे? इ त्वाप सेल्सामा गुचुकुलाई वो सेल्चिकी।”
40लावो ख्ल्याम्या बेपा कोङमी मु़चु़का गुलाई भुर्तो र्वाक्ता, “गाना वो गुमीका ल्वापा देन्दे ल्वात्तोङा बोना। मावो माम्चु़नीकु ङिम मेजु़ल्ना? 41गुची ने ख्ल्याम्या बेच्चिमका सिमु घ्रेट्पाङा बुची, लावो गुमीका ने आरेप्माम मेजो़पा खारी ने हाम वो बेम्डिम मिबु।”
42मेकोतिमा मेरामका येशूलाई र्वाक्ता, “ए येशू, गानी हप दु़म्निलो गोलाई वो मिम्ङिनी।”
43येशूका मेरामलाई र्वाम्डी, “आच्छाङा गो गानालाई र्वाङु, आनेप ङा गाना गोनुङ पाह्रीला दु़म्ना।”
येशू सिम्डिम
(मत्ती २७:४५-५६; मर्कूस १५:३३-४१; यूहन्ना १९:२८-३०)
44नेम्फुम को-न (१२) जेस्ताम बाइडा, मा मेम्लो आथाम सु जेस्तामसम्म खोत्लेथो़ तुकुक्चिमका हुप्डु़। 45नेप्सुङ केकेया दु़स्ताम बाइडा, मा सो़रनेमगोडाम रिपा-ये थेते धालु़ आ़स्तामा नक्फाक्चो़ल दु़स्ता।#प्रस २६:३१-३३ 46मेकोतिमा डोक्पु लो़लामका येम्डिमा येशूका र्वाम्डी, “पाआ, गो आमा पेल इनी ल्वाडा जु़लु।” मेकोति र्वाम्डिमा उनी साम लस्ता।#भज ३१:५
47ओर्मिम खोत्ले ल्वास्तु़मा रोमी सिपाहीमिमकु कप्तानका माम्चु़नीकु नङ कोक्तो र्वाक्ता, “आच्छाङा ओराम माम्चु़नीकु न-गो होप्माम मु़चु़ बाइडा।” 48रेप्डा रोक्पा खोत्ले मु़चु़मिमका मेसिन्डा हाम दु़स्ताम बाइडा, मेराम ल्वाम्डिमा ख्राप्तो मेभ्रसिक्तो उनी नेम ख्लोसिम्डी। 49लावो येशूकु ङोप्सो़ नुङ गालीललामका येशूकु चङचङ लाम्दिपा मेसेममिमका होनोवा बासाका रेप्मिडिम बाम्डी।#लूक ८:२-३
येशू क्लु़म्मिडिम
(मत्ती २७:५७-६१; मर्कूस १५:४२-४७; यूहन्ना १९:३८-४२)
50योसेफ नङकाम कोले मु़चु़ बाइडा। गु माम्चु़नीकु न-गो होप्माम मा जो़पा मु़चु़ बाइडा। गु यहूदीमिमकु डोक्पु घ्रो़म्दीडाम कोले मु़चु़ बाइडा। 51लावो वाङमिम ङाउमिमका येशूकु कोर्थो़लाम बेम्डिम मुलु़ नुङ खारी बोमुडा गु मेबासावाम बाइडा। गु यहूदियाडाम अरिमाथिया शहरडाम मु़चु़ बाइडा, मा माम्चु़नीका साखाम थो़पा थारी गुका लथाड्डु़म बाइडा। 52योसेफ पिलातसकाडा लस्तामा येशूकु सिप्खा बिइडु़। 53मेकोतिमा योसेफका क्रूसलामका येशूकु सिप्खा धाली थास्तु़, मा हापा थिकाम साङखिमका दिल्लु़। मेम्मा भ्र्वागोनो धासाका बनेबेम्मा लाले सु़लु़मगोनो क्लु़म्डु़। 54मेनेम ङेम्सिमुकाम लागि यहूदीमिम झो़म्सिट्पा मिक्सीवानेम बाइडा, मा ङेम्सिमुनेम रोमुङा खाप्डु़म बाइडा।
55गालीलामका येशूनुङ रोक्पा मेसेममिम वो योसेफकु चङचङ लम्डी, मा मे सु़लु़म नुङ मेगोडा येशू क्लु़म्मिडिम ल्वाम्डी। 56मेकोतिमा मेसेममिम उनी नेम ख्लोसिम्डिमा येशूकु सिप्खाडा क्लमु लागि भ्रपा मुर्नेम्पा तेल नुङ मसला रेट्मिडी। मेम्मा मोशाकु डु़म्लाका र्वाक्ताम होम्साका ङेम्सिमुनेम मेर्मिम ङेम्सिम्डी।#प्रस २०:१०; व्य ५:१४
Currently Selected:
लूका 23: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
