यूहन्ना 5
5
उ ल्वा-खेल सोक्पा मु़चु़लाई दिनकु फार्डा येशूका सबेट्मिडिम
1ओराम चङडा यहूदीमिमकु कोङ चाड बाइडा, मा मेरामकाम लागि येशू यरूशलेमथो़ लम्डी। 2यरूशलेम शहरगोनो भेन्दाकु लाम्चोको फार्डा दिनकु बाइडा। मेरामकु होनोलाम-आथो़लाम ङोले पिन्दी बाइडा, मेरामलाई हिब्रू ल्वाडा बेथस्दा र्वामी। 3मे पिन्दीडा नो़पा, मिक्सीका मेल्वापा, खेल ब्लेट्पा, ल्वा-खेल सोक्पा सेर्पा मु़चु़ झार्ल्याक्पा बाम्डी। [हाङकोलोका कु दो र्वाक्साका लन्थाल्मिडी। 4मिप्रङमाकु कोले पाह्रीचो़ थारी-थारीका योक्थाल्लामा मे दिनडाम कु थो़ट्थाल्लु़। मेम्मा मे कु दोमिम चङडा ङादो मेगोनो हुपा मु़चु़ हेप्माम सोमोरीनुङमा लोवो सस्थाल्ला।]
5सु-लेत (३८) थ आथाम नो़पामा झार्ल्याक्पा कोले मु़चु़ मेसिन्डा बाइडा। 6येशूका गुलाई मेसिन्डा झार्ल्याक्पा ल्वाम्डी। गु हापा थ आथाम नो़पा रेछा र्वाक्पा चम्डिमा मेरामलाई र्वाम्डी, “हाम समु इमा न बु?”
7नो़पा मे मु़चु़का र्वाक्ता, “ङाचो़, कु दोमिम थारीका गोलाई मेगोयु़ हुमु ख्लो़पा सु़ वो मेबुमी। गो लक्तो-लक्तोङा गोडाम ङादो कोङमीङा मु़चु़ मेगोयु़ हुल्या।”
8मेकोतिमा येशूका मेरामलाई र्वाम्डी, “बका, इमा प्लान फकामा लाम्दिया।” 9मे मु़चु़ सस्ल्याड्डा, मा उ प्लान फक्साका लाम्दिमु चो़म्डु़। मेनेम ङेम्सिमुनेम बाइडा। 10मेम्मिमका यहूदी ङाउमिम कोर्थो़लाम बम्डी। मेर्मिमका सपा मे मु़चु़लाई र्वाम्डी, “ङेम्सिमुनेम गाना खारी बेसीमेनु़। मे प्लान कुर्मु डु़म्लाका मेग्वाना।”#नहे १३:१९; यर १७:२१
11गुका मेर्मिमलाई र्वाक्ता, “उहेमका गोलाई सबेट्ङिडिमी गुमीकाङा गोलाई र्वाम्डी, ‘इमा प्लान कुरामा लाम्दिया’।” 12मेर्मिमका गुनुङ हिलाबेम्डी, “इमा प्लान कुरामा लाम्दिया गानालाई र्वाक्पा मु़चु़ सु़?” 13लावो मेराम मु़चु़का गुमी सु़ र्वाक्साका छेड्डु़म मेबायावा। हेङालोने मेसिन्डा सेर्पा मु़चु़ बाम्डिमका येशू मेलामका लम्ल्याम्डिम बाइडा।
14चङडा येशूका मेरामलाई सो़रनेमगोडा डार्मिडिमा र्वाम्डी, “रेप्डा, गाना सन्नाम बु। आथाडा आनो गाना छु़ल मेबे, मा गानाडला मेजो़पा मेरोनु़।” 15गुलाई सबेट्पा ने येशू रेछा र्वाक्पा ल्वा लस्तामा यहूदी ङाउमिमनुङ सो़यु़डु़।
येशूका उनी त्वाप माम्चु़नीकु तारापाचो़ र्वाम्डिम
16येशूका ङेम्सिमुनेम ओराम खारी बेम्डिमका यहूदी ङाउमिमका गुमीलाई दु़खा ग्वामु चो़म्मिडी। 17येशूका मेर्मिमलाई आरे र्वाम्डी, “आमा पापका ओम्लोसम्म खारी बोमिम बुमी, मा गो वो खारी बेत्तोङा लेट्पु।” 18मेम्मिमका यहूदी ङाउमिमका येशूलाई सेन्मु छो़म माल्मिडी। हेङालोने गुमीका ङेम्सिमुनेम बेसिमेनु़पा खारी बेम्डिम कोङङा मेएँ, लावो त्वापङा माम्चु़नीनुङ कोहोप्माम बेसिसाका माम्चु़नीलाई उनी त्वाकु पाप वो र्वाम्डिम बाइडा।
19येशूका मेर्मिमलाई र्वाम्डी, “आच्छाङा गो गानीलाई र्वाङु, तारापाचो़ उ त्वाकाङा हाम वो बोमु मेचाप्सु़। पापका हाम बोमिमिम ल्वासु़ मेराम कोङङा बु़। पापका हाम बु़ तारापाचो़का मेमङा बु़। 20हेङालोने पापका तारापाचो़लाई रिखाम बोमी, मा गुमीका बोमिमिम खोत्ले खारी उनी तारापाचो़लाई रेम्बेन्मी। ओर्मिमडाम वो डोक्पुतो खारीमिम गुमीका उनी तारापाचो़लाई रेम्बेन्मी, मा गानी ङाङाया दु़म्नी। 21पापका सिपा मु़चु़मिमलाई फमिमा मेर्मिमलाई मेसिपा त्वारो़म ग्वामी। मेम्साकाङा तारापाचो़का उहेमलाई उ ग्वाग्वाद्वा मेरामलाई मेसिपा त्वारो़म ग्वाकु़। 22मेरामडाम वो कोङमी ल्वा, पापका सु़काम वो निया मेबोमी, लावो खोत्ले निया बेपा साखाम तारापाचो़लाई ग्वाम्डिम बु। 23मेम्साका पापलाई डोक्पु मिम्मिमिम होङङा तारापाचो़लाई वो डोक्पु मिम्मिनु़। तारापाचो़लाई डोक्पु मेमिम्पाका गुलाई थु़र्पा पापलाई वो डोक्पु मेमिम्मी।
24“आच्छाङा गो गानीलाई र्वाङु, उहेमका आमा सिजेम थो़सु़, मा गोलाई थु़र्पा पापडला थो़र बु़, मेरामनुङ मेसिपा त्वारो़म दु़म। मेम्मा मेराम मुमा बेन्ला मेसो़सी। गु सिमुलामका त्वारो़मडा हुमुदु़म्स्तु़म बु। 25आच्छाङा गो गानीलाई र्वाङु, मेराम थारी रोक्तोङा लेडु़, मा मेराम थारी ओम्लोङा सो़। सिपा मु़चु़मिमका माम्चु़नीकु तारापाचो़काम लो़लाम थो़मी, मा सु़का थो़मी मेर्मिम नु़मी। 26त्वारो़म ग्वाक्पा यु़म पापकाडा बुमिम होम्साका त्वारो़म ग्वाक्पा यु़म पापका उनीमा तारापाचो़लाई ग्वाम्डिम बु। 27मेम्मा मु़चु़मिमकु निया बेपा साखाम गुलाई ग्वाम्डिम बु, हेङालोने गु मिनीचो़ सो़।
28“ओराम ल्वाडा ङाङाया मेदु़म्नी, हेङालोने थारी रोक्तोङा लेडु़। मेकोतिलो सु़लु़मगोयु़ बाट्पा खोत्लेका माम्चु़नीकु लो़लाम थो़मी, 29मा जो़पा खारी बेपामिम ने नु़मु लागि, मा मेजो़पा खारी बेपामिम ने देन्दे ल्वामु लागि सु़लु़मलामका बम्गेमी।#दान १२:२
30“गो आ त्वाकाङा ने हाम वो बोमु मेचापु। हेप्माम गो थो़उ, मेम्साकाङा निया बेउ। गो बेउमिम निया जो़पा दु़म, हेङालोने गो आ त्वाकु न होङङा मेएँ, गोलाई थु़र्पा पापकु न होङङा खारी बोमु न बेउ।
येशूकु दुथाममिम ल्वा
31“आमा दुथाम गो त्वाका कोङङा सो़उतो माला मेराम ल्वा आच्छाङा मेदु़म। 32आमा दुथाम सो़पा पाप बुमी, गुमीका सो़मिमिम आमा दुथाममिम खोत्ले ल्वा आच्छाङा दु़म र्वाक्पा गो चक्पु।
33“कु-रु़दु़म ग्वाक्पा यूहन्नाकाडा मु़चु़मिमलाई गानी थु़र्नी, मा गुका गानीलाई आच्छाङा सो़यु़डु़म बु।#यूह १:१९-२७; ३:२७-३० 34आमा दुथाम सो़मु गोलाई मु़चु़ मेबासी। लावो गानी सेल्सिट्नी र्वाक्साका गो ओर्मिम ल्वा सो़उमिम। 35यूहन्नाका सो़यु़डु़म ल्वा वाक्पा नुङ झ्वाक्पा धिप्री होप्माम बाइडा। मेम्मा गानी घरिकोङ उमा ल्वाडा गेर्सिमु न बेन्नी।
36“लावो यूहन्नाका सो़यु़डु़मडाम वो डोक्पु ल्वामिम गोनुङ बु। खारी बोम्सोमु आमा पापका गोलाई ग्वाङ्डिमिम बु। मेराम गो बेत्तोङा लेट्पु। पापका गोलाई थु़र्ङिडिमिम र्वाक्पा मेरामकाङा सो़यु़। 37गोलाई थु़र्पा पाप उनी त्वाकाङा आमा दुथाम सो़म्डी। उनीमा लो़लाम गानी हेल्लो वो थो़न्निम मिबु, मा उनीमा ङाली हेल्लो वो ल्वान्निम मिबु।#मत्ती ३:१७; मर्क १:११; लूक ३:२२ 38मेम्मा उनी सिजेम इनीमा न-गोडा मिबु, हेङालोने गुमीका इनीमाडा थु़र्ङिडिमिम गोडला गानी थो़र मेलु़नी। 39माम्चु़नीकु सिजेम गानी डानी, हेङालोने मेरामका मेसिपा त्वारो़म ग्वाक्सा र्वाक्पा गानी लु़नी। मेरामका आमा दुथामङा सो़यु़। 40मेम्मा वो ओराम त्वारो़म ल्वामु लागि आमाडा रोमु मेद्वानी।
41“गानी आमा नङ कोनिमिम गोलाई मेबासी। 42हेङालोने माम्चु़नीकु रिखाम गानीगोडा मिबु र्वाक्पा गो चक्पु। 43गो आमा पापकु साखामडा योङडोम बु, गानी गोलाई मेरङिनी। लावो कोङनिम मु़चु़ उ साखामडा रोक्ता माला गुलाई गानी रनी। 44गानी इनी त्वाप-त्वापगोडा डोक्पु बेला सो़म्सिमु माल्नी। लावो कोलेङा माम्चु़नीलाम रोक्पा डोक्पु बेला सो़सिसी ने मेमाल्नी, माला हेसाका गानी थो़रलु़नी मा?
45“पापकु ङादोडा गानीलाई गो मुमा बेनिनी र्वाक्पा मेमिम्नी। गानीलाई मुमा बेट्पा ने मोशा सो़, गुलामका ख्लो़ला सो़म्सिमु लन्थाट्निम बाइडा। 46मोशालाई गानी थो़रलु़निवा माला गोडला वो थो़रलु़निवा। हेङालोने गुका आमा दुथाम र्याक्तु़म बाइडा। 47लावो गुका र्याक्तु़म ल्वाडा गानी थो़र मेलु़नी माला गो जेङुमिम ल्वाडा हेसाका थो़रलु़नी मा?”
Currently Selected:
यूहन्ना 5: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
