यूहन्ना 1
1
सिजेम मु़चु़ दु़म्मिडिम
1सु़म्दिमोलो सिजेम बाम्डी। सिजेम माम्चु़नीनुङ बाम्डी, मा मे सिजेम माम्चु़नी बाम्डी। 2सु़म्दिमोलो गुमी माम्चु़नीनुङ बाम्डी।
3माम्चु़नीका गुमीलामका खोत्ले प्रङ्मिडी, मा गुमी मान्थि कोले वो मेप्रङ्सिप्मिवा। 4गुमीडा त्वारो़म बाइडा, मा मेराम त्वारो़म मु़चु़मिमकु ओल बाइडा। 5मेराम ओल तुकुम्चिमडला झ्वा, मा तुकुम्चिमका मेरामलाई घ्ल्वामु मेचाप्सु़।
6यूहन्ना र्वाक्मा कोले मु़चु़ बाइडा, गुलाई माम्चु़नीका थु़र्मीडिम बाइडा।#मत्ती ३:१; मर्क १:४; लूक ३:१-२ 7खोत्लेका मेराम ल्वा थो़साका थो़रलु़मिनु़ र्वाक्साका ओलकु दुथाम मु़चु़मिमनुङ सो़प्डा गु रोक्ता। 8यूहन्ना उ त्वाप ने ओल मेबायावा, लावो ओलकु दुथाम सो़प्डा गु रोक्ताम बाइडा।
9खोत्ले मु़चु़लाई ओल ग्वाक्पा आच्छाङाकाम ओल सु़म्दिसेरडा योक्तोङा बेम्डी। 10गुमी सु़म्दिसेरडा बाम्डी, मा माम्चु़नीका गुमीलामकाङा सु़म्दिसेर प्रङ्मिडी, लावो सु़म्दिसेरका गुमीलाई मेछेडु़वा। 11गुमी उनी त्वाकु मु़चु़मिमकाडा योम्डी, लावो उनी मु़चु़मिमका गुमीलाई हुनाखाना मेबेमिवा। 12लावो गुमीलाई हुनाखाना बेपा, मा गुमीडला थो़र लु़पामिम खोत्लेलाई गुमीका माम्चु़नीकु चो़मिम दु़म्पा साखाम ग्वाम्डिमी। 13पाइमाखालामका वो मेएँ, मु़चु़कु मुलु़ लोवो मु़चु़कु नका वो मेर्मिम चो़मिम गम्डिम मेएँ। लावो माम्चु़नीकु नका मेर्मिम माम्चु़नीकु चो़ दु़म्मिडिम बाइडा।
14सिजेम मु़चु़ दु़म्मिडी, मा गुकुगोडा बाम्डी। गुकु उनीमा यु़म-झ्वाक्सी ल्वात्तोको। मेराम यु़म-झ्वाक्सी पापकामलाम योक्पा कोलेङा तारापाचो़काम होप्माम छो़म दिदामनुङमा नुङ आच्छाङाकाम बाइडा।
15कु-रु़दु़म ग्वाक्पा यूहन्नाका उनीमा दुथाम सो़त्तो डोक्पु लो़लामका र्वाक्ता, “‘गोडाम चङडा रोक्तोङा बेपा मु़चु़ गोडाम डोक्पु बुमी, हेङालोने गुमी गोडाम ङादो आथामङा बाम्डी’ र्वाङडोम मेराम गुमीङा सो़।” 16छो़म उनी दिदामडला दिदाम गुइ ल्वास्तिम बु। 17हेङालोने माम्चु़नीका मोशालामका डु़म्ला ग्वाक्साड्डामी, लावो दिदाम नुङ आच्छाङाकाम ल्वा ने येशू ख्रीष्टलाम रेम्बेम्डी। 18सु़का वो माम्चु़नीलाई हेल्लो वो ल्वास्तु़म मिबु। पापनुङ बाट्पा माम्चु़नी होप्मामङा तारापाचो़का माम्चु़नीलाई रेम्बेसाड्डामिम बु।
कु-रु़दु़म ग्वाक्पा यूहन्नाका येशूकु दुथाम सो़यु़डु़म
(मत्ती ३:१-१२; मर्कूस १:१-८; लूका ३:१-१८)
19यरूशलेमडाम डोक्पु यहूदीमिमका कु-रु़दु़म ग्वाक्पा यूहन्नालाई “सु़ गाना?” र्वाक्साका हिलाबेप्डा डु़म्लाचो़मिम नुङ लेवीमिमलाई थु़र्मिडी। मेम्लो यूहन्नाका ओराम सो़यु़डु़म बाइडा। 20यूहन्नाका लिमा मेथेसाका जो़होमका र्वाक्ता, “ख्रीष्ट गो मेएँ।”
21मेर्मिमका गुलाई हिलाबेम्डी, “मेएँ माला सु़ गाना? गाना माम्चु़नीलाम-जेपा एलिया?”
यूहन्नाका मेएँ र्वाक्ता।
मेर्मिमका हिलाबेम्डी,
“हाम गाना गुकु लथान्कुमिम माम्चु़नीलाम-जेपा मु़चु़?”
गुका मेएँ र्वाक्ता।#व्य १८:१५,१८; मला ४:५
22मेर्मिमका गुलाई र्वाम्डी, “सु़ गाना? गुकुनुङ र्वाका, मा गुकुलाई थु़र्पामिमनुङ सो़कु। इमा दुथाम गाना हाम र्वाना?”
23यूहन्नाका र्वाक्ता, “माम्चु़नीलाम-जेपा यशैयाका ‘मिप्रङमाकु लाम्दी बनेबे’#यशै ४०:३ र्वाक्ताम होङङा गो र्याङगो-र्याङगोडा येपाकु लो़लाम सो़।”
24मेकोतिमा फरिसीमिमका थु़र्मीडिम सेलाचो़मिमका 25यूहन्नालाई हिलाबेम्डी, “गाना ख्रीष्ट वो मेएँ, एलिया वो मेएँ, माम्चु़नीलाम-जेपा मु़चु़ वो मेएँ माला हेङा मु़चु़मिमलाई कु-रु़दु़म ग्वानामिमिम?”
26यूहन्नाका मेर्मिमलाई र्वाक्ता, “गो ने कु-रु़दु़म ग्वाक्पुमी, लावो गानीगोडा कोले मु़चु़ बुमी गुमीलाई गानी मेछेनी। 27गोडाम चङडा रोक्पा मु़चु़ गुमीङा सो़। उनीमा सो़लो़पकु साले फ्रोमु वो गो ने घ्रेटपा मेबुङु।”
28यूहन्नाका कु-रु़दु़म ग्वाक्तोङा बु़डु़मिम मे यर्दन ब्लोकुडाम होनोहोम्बु बेथानिया देलडा ओराम ल्वा सो़यु़डु़म बाइडा।
मु़चु़मिमकु छु़ल हेपा भेन्दाकु चो़ होप्माम माम्चु़नीकु चो़ येशू
29उ दिकाम उ त्वापथो़ येशू बिक्तोङा लेट्मिडिम यूहन्नाका ल्वास्तु़मा र्वाक्ता, “रेप्नी, सु़म्दिसेरडाम मु़चु़मिमकु छु़ल हेपा भेन्दाकु चो़ होप्माम माम्चु़नीकु चो़। 30‘गोडाम चङडा कोले मु़चु़ रोमी, गोडाम गुमी डोक्पु बुमी, हेङालोने गोडाम गुमी ङादो आथामङा बाम्डी’ र्वाङडोम गुमीङा सो़। 31गो आ त्वाकाङा वो गुमीलाई छेत्तोमिम मेबायावा, लावो गुमी इस्राएलडाम मु़चु़मिम गोडा रेम्बेम्सिमिनु़ र्वाक्साका कु-रु़दु़म ग्वाक्तो रोङडो।”
32यूहन्नाका आरे र्वाक्तो सो़यु़डु़, “माम्चु़नी-पेल पाह्रीलामका तुकतुकुर होङङा बेपा योम्डिमा गुमीडला गन्मिडिम गो ल्वाउतो। 33गुमीलाई आथावो गो छेत्तोमिम मेबायावा, लावो कु-रु़दु़म ग्वाका र्वाक्साका थु़र्पा माम्चु़नीका गोलाई आरे र्वाम्डी, ‘पेल उहेम मु़चु़डला योमिमा गन्मिमिम ल्वाना, गुमीकाङा माम्चु़नी-पेल-रु़दु़म ग्वाकु़मी।’ 34गो ल्वाउतोम बु, मा सो़त्तोङा लेट्पु माम्चु़नीकु तारापाचो़ गुमीङा सो़।”
येशूकु ङादोम सीसिपामिम
35उ दिकाम यूहन्ना नले सीसिपाचिपनुङ आथावो मेराम खोमडाङा येम्तासिड्डाम बाइडा। 36गुका येशू मेमभाल लक्तोङा बेम्डिम ल्वास्तु़मा र्वाक्ता, “रेप्नी, मु़चु़मिमकु छु़ल हेपा भेन्दाकु चो़ होप्माम माम्चु़नीकु चो़।” 37गुका आरे र्वाक्ताम ल्वा मे सीसिपाचिपका थो़च्चिमा येशूकु चङचङ लक्ची।
38येशूका चङथो़ रेप्मिडिलो मेर्चिप उनी चङचङ बिक्तोङा लेट्पा ल्वाम्डिमा मेर्चिपलाई हिलाबेम्डी, “हाम माल्चिमिम गाची?” मेर्चिपका गुमीनुङ र्वाक्ची, “रब्बी, गानी बान्ते बुन्थाल्नी?” (रब्बी र्वाक्मा “सीपा मु़चु़” सो़।)
39गुमीका मेर्चिपलाई र्वाम्डी, “बिक्ची, मा गाची ल्वाची।” मेर्चिप लक्ची, मा गुमी बाट्पा खोम ल्वाच्ची। मेनेम मेर्चिप गुमीनुङङा मेसिन्डा बाच्ची। मेकोतिलो ने-नेम्थाम ब्ल (४) जेमु खाप्डु़म बाइडा।
40यूहन्नाका र्वाक्ताम थो़पा, मा येशूकु चङचङ लाम्दिपाचिपगोडाम कोले ने सिमोन पत्रुसकु ल्वाक अन्द्रियास बाइडा। 41ङादो गुका उ वा सिमोन पत्रुसलाई क्रो़म्डु़, मा गुनुङ र्वाक्ता, “गुचुकु मसीहलाई (मसीह र्वाक्मा ख्रीष्ट) डार्चोकोम बु।” 42मेकोतिमा अन्द्रियासका सिमोनलाई येशू क्रो़म्बेड्डा रेड्डु़।
येशूका सिमोनलाई किकिर्या रेप्मिडिमा र्वाम्डी, “यूहन्नाकु तारापाचो़, इमा नङ सिमोन, लावो इमा नङ केफास (केफास र्वाक्मा पत्रुस)#१:४२ नङ (अरामेइक ल्वाडा) केफास (ग्रीक ल्वाडा) पत्रुस, ओर्चिप निफिका र्वामिम “साम्फ्ले लुङ”। दु़म।”
येशूका फिलिप नुङ नथानेललाई येट्मिडिचिम
43उ दिकाम येशूका गालील क्षेत्रथो़ लक्पा मुलु़ बेम्डी। गुमीका फिलिपलाई डार्मिडिमा र्वाम्डी, “आमा चङचङ लाम्दिया।”
44फिलिप वो अन्द्रियास नुङ पत्रुसकु देल बेथसेदाडामङा बाइडा। 45फिलिपका नथानेललाई डार्डु़मा र्वाक्ता, “मोशाकु डु़म्लाडा नुङ माम्चु़नीलाम-जेपामिमका कोले मु़चु़कु दुथाम र्वाम्डिम मेराम मु़चु़लाई गुकु डार्तोको। गुमी नासरतडाम योसेफकु तारापाचो़ येशू।”
46नथानेलका गुनुङ र्वाक्ता, “हाम नासरतलाम कोङनिम जो़पा ल्वा रोमु चाप्सु़ मा?”
फिलिपका र्वाक्ता, “बिकामा रेप्डा।”
47नथानेल उनी त्वापथो़ बिक्तोङा लेट्पा ल्वाम्डिमा नथानेलकु दुथाम येशूका र्वाम्डी, “लु-फेले मेबेपा आच्छाङाकाम कोले इस्राएलीलाई रेप्नी।”
48नथानेलका येशूनुङ हिलाबु़डु़, “गानी गोलाई हेसाका येट्ङिडिनी?”
येशूका मेरामलाई र्वाम्डी, “फिलिपका गानालाई येन्मु ङादो बैससीकु धक्सा फारगोयु़ बान्नाम ल्वान्नी।”
49नथानेलका र्वाक्ता, “सीपा, गानी माम्चु़नीकु तारापाचो़, गानी इस्राएलडाम हप।”
50येशूका गुलाई र्वाम्डी, “गो गानालाई बैससीकु धक्सा फारगोयु़ ल्वान्नी र्वाङडोम ल्वाडाङा थो़र लु़ना? गाना ओरामडाम वो हापा डोक्पुतो ल्वामिम ल्वाना।” 51गुमीका मेरामलाई र्वाम्डी, “आच्छाङा गो गानालाई र्वाङु, पाह्री ह्वासिमिम, मा माम्चु़नीकु पाह्रीचो़मिम मिनीचो़डला योक्तो लक्तो बोमिमिम गाना ल्वाना।”#उत २८:१२
Currently Selected:
यूहन्ना 1: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
