Mâreke 8

Jezü kʉ̈ kɨ̈zɨ̂ sə̈ azü sâke voanə̈

(Mat 15.32-39)

1Sə̂nə̈ lâme, angbängbä kpûlû azü kâ pâlatə̂ andjê. Ndə̂ azü nə̈ wâbô wâ la kɨ̈zɨ̂ ndə̂kə̂ zɨ rə̂, Jezü ê adjisîpili ndə̂ yê ânyë kə̈ tô rə̂ sə̈ andjê päkëdə̂: 2«Nyonyo kpûlû azü âtə mbö mê, bëte lə̂ alö vötaâ ndə̂ andjë sə̂ ndrotə̂ mê, andjë wâbo la ngâ rə ndə̂kə̂ zɨ rə̂-a. 3Âdə mê âgro andjê pä andjë gu atə̂ndə̂ andjê la gʉ, andjê yorotoadje la gʉ lə̂ köbo gbɛ̂, bëte angânə̈ tö ngrɨ̈ ânyë kə̈ nə̂.» 4Adjisîpili ndə̂ yê tô rə̂ sə̈ tchë päkëdə̂: «Ârâ âgbo kɨ̈zɨ̂ bhâ tchêbâ ndə̂kə̂ pa andjë zɨ rə̂ ânyë tchə̂lə̂ andjê sɨ, ndə̂ azə̈ sə̂ lə̂ tchô ndə̂ âwâtə̂ kpaɛ̈gâ âtə?» 5Jezü yû andjê päkëdə̂: «Nyë wä la mâpa atöko?» Andjë tô rə̂ ndə̂nə̈ sə̈ tchë päkëdə̂: «Mïndûu manə̈ bïchuû.» 6Käko tche zâma sə̈ kpûlû azü nə̈ ndə̂kə̂ sə bêche. Pânə̈ tche kʉ̂ mâpa mïndûu manə̈ bïchuû lâme, kə̈ zâ ayîabâ sə̈ Ndjapä, kə̈ tchô tchə̂lə̂ nə̈ kə̈ kʉ̂ rə̂ sə̈ adjisîpili ndə̂ yê ndə̂kə̂ pa andjë krʉ tchə̂lə̂ nə̈ tə̂ azü nə̈. Andjë krʉ̂ tchə̂lə̂ nə̈ tə̂ kpûlû azü nə̈. 7Andjë wä ndjë la angâ akanyïɛ̈ giangû. Jezü ê tchôtchô pö pâ agiangû nə̈ ânyë kə̈ tô rə̂ sə̈ adjisîpili ndə̂ yê ndə̂kə̂ krʉ ndjë tchə̂lə̂ nə̈ tə̂ azü nə̈. 8Akrə balë balë zɨ̂ rə̂ âlê tchë. La tchêngbâ nə̈ adjisîpili nə̈ pâla adɨ̂ andöma nə̈ âsɨ̂ gbasa mïndûu manə̈ bïchuû. 9Kə̂ ngba ndə̂ azü nə̈ wä alême sâke voanə̈ (4 000). Pânə̈ Jezü grô andjê ndə̂kə̂ gu atə̂ndə̂ andjê. 10Kpro la tchêngbâ nə̈, tche â lə̂ külû, tchetchë la adjisîpili ndə̂ yê, kə̈ ê atə̂lə̂ agö ndə̂ Dalamanutä.

Afarizïɛ̈n yükû nə̈ ndə̂kə̂ wun ngâ kpɨ̈ngbɨ̈ rə

(Mat 16.1-4)

11 Afarizïɛ̈n nə̂ ânyë kə̈ sə̂ lakə̂ gama andjê la Jezü. Andjë nyïndə̂ kə̂ vu tchë, ânyë kə̈ yûkû nə̈ sə̈ tchë ndə̂kə̂ pa tche mbo ngâ kpɨ̈ngbɨ̈ rə ndə̂kə̂ nyisə̂ nə̈ pä Ndjapä kä ndə̂ âwân tchë. 12Jezü wû foo la gbôgbô, ânyë kə̈ tô rə̂ sə̈ andjê päkëdə̂: «Bëte giamâ kä ndə̂ azü ndə̂ tchô angêta yûkû ngâ kpɨ̈ngbɨ̈ rə? Ɛn-ɛn, tə̂ lëge nə̈ më tö rə̂ sə̈ nyê, azü lâme wun-abô ngâ kpɨ̈ngbɨ̈ rə balë tee-a!» 13Pânə̈ tche gbôtə̂ andjê, kə̈ â lə̂ külû ânyë kə̈ zû dəkalâ gbölö kpakpa ngû.

Djëvö ndə̂ afarizïɛ̈n la andə̂ Hërôde

(Mat 16.5-12)

14Sə̂kə̂ kʉ amâpa yû tə̂ adjisîpili ndə̂ Jezü, praâbalë andjë wä kütû la mâpa balë lə̂ külû. 15Jezü zâma sə̈ andjê päkëdə̂: «La nyê gbö-ê! La nyê gbö tə̂ djëvö#8.15 Äwä batə̂ lëvûre, ndə̂ âmbo rə̂ pä zûwü farîni ndə̂ a gia tchə̂lə̂ nə̈ la rə̂ suku. ndə̂ mâpa ndə̂ afarizïɛ̈n la andə̂ Hërôde!» 16Adjisîpili sə̂ lakə̂ gama andjê lə̂ gbâtə̂ andjê bëte andjë wâbo la mâpa-a. 17Jezü wûnsə̂ pö ndə̂ andjë sə̂ lakə̂ to rə̂ lə̂ gbâtə̂ andjê lâme, ânyë kə̈ yû andjê päkëdə̂: «Bëte giamâ kä ndə̂ nyë tô rə̂ päkëdə̂: ‹Ârâ wâbo la mâpa›? Nyë wûn-âbo sə̂nə̈ dämba? Nyë djêâbo tchə̂lə̂ pö nə̈? Nyë də̈ azü ndə̂ su nyê kpô? 18La nyê kä tâ: Nyë wûn-âbo tchô la rə̂? Tü nyê kä tâ: Nyë djêâbo pö la rə̂? Su nyê têâbo pânə̈?#8.18 Nyë dɨ̈ 4.12; Jer 5.21; Ezk 12.2. 19Sə̂nə̈ ndə̂ më tchô tchə̂lə̂ mâpa mïndüu kə̈ krʉ̂ tchə̂lə̂ nə̈ tə̂ azü sâke mïndûu lâme, nyë rʉ̈ä adɨ̂ andöma nə̈ âsɨ̂ agbasa atöko?» Andjë tô rə̂ ndə̂nə̈ päkëdə̂: «Lə̂ könô gbɛ̂ tchêpâ nə̈ bïchuû.» 20Jezü kâ yû andjê päkëdə̂: «Sə̂nə̈ ndə̂ më tchô tchə̂lə̂ mâpa mïndûu manə̈ bïchuû ndə̂kə̂ krʉ tchə̂lə̂ nə̈ tə̂ azü sâke voanə̈ lâme, nyë gü la adɨ̂ andöma nə̈ lə̂ agbasa atöko?» Andjë tô rə̂ ndə̂nə̈ päkëdə̂: «Mïndûu manə̈ bïchuû.» 21Käko Jezü tô rə̂ sə̈ andjê päkëdə̂: «Nyë djêâbo tchə̂lə̂ nə̈ dämba?»

Jezü tchä ngâ earə̂ föla

22Jezü la adjisîpili ndə̂ yê wûtu bhâ Betesayidä; angâ azü nə̂ la ngâ earə̂ föla sə̈ tchë, kə̈ dɨ̂ tchə̂lə̂ ma andjê sə̈ tchë ndə̂kə̂ pa tche grʉ tchë. 23Jezü zâ könô earə̂ föla nə̈ kə̈ wûtu la tchë lə̂ yɛ̈yɛ̈ gö nə̈ bhâchï. Pânə̈ tche mbô ngrʉ̂srö pâ la yê, kə̈ tô könô yê pâ yê, kə̈ yû tchë päkëdə̂: «Giamâ mo wûn rə̂?» 24Earə̂ föla nə̈ vrô la yê, kə̈ tô rə̂ päkëdə̂: «Më wün azü, andjë wä batə̂ ayö, praâbalë andjë kä lakə̂ nə.» 25Jezü kâ tô könô yê pâ la earə̂ föla nə̈ ânyë tche wûn tchô ngrôô; la yê vrô nə̂, tche kä lakə̂ wun arə gbɛ̂ ngrôô. 26Jezü grô tchë ndə̂kə̂ gu atə̂ndə̂ yê, tche tô rə̂ sə̈ tchë päkëdə̂: «Guabô gû atə̂lə̂ gö nə̈.»

Pîêre tö rə̂ pä, Jezü də̈ Mesï

(Mat 16.13-20; Luk 9.18-21)

27Käko Jezü la adjisîpili ndə̂ yê âlafô sə̂ tchô nə̈ lâme, kə̈ ê pu ayɛ̈yɛ̈ gö ndə̂ Sezarë ndə̂ Fïlîpe. Pâ köbo, tche yû andjê päkëdə̂: «Azü tö rə̂ pä më də̈ tchabâ?» 28Andjë tô rə̂ ndə̂nə̈ sə̈ tchë päkëdə̂: «Angâ azü tö rə̂ pä Jâan-Batîse, angânə̈ tô rə̂ pä mo də̈ Elïe, ânyë angânə̈ tô ndjë rə̂ pä mo də̈ ngâ earə̂ ndə̂ma Ndjapä.» 29Jezü yû andjê päkëdə̂: «Â nyënyê, nyë tö andə̂ nye nə̈ pä më də̈ tchabâ?» Pîêre tô rə̂ ndə̂nə̈ sə̈ tchë päkëdə̂: «Mo də̈ Krîsiti.» 30Käko Jezü yûkû nə̈ sə̈ andjê la gbôgbô ndə̂kə̂ pa andjë toabô pö lâme tô sə̈ ngâ akrə balë-ê.

Jezü tö pö ndə̂kə̂ tchu lakə̂ jo ndə̂ yê lə̂ kuzü

(Mat 16.21-23; Luk 9.22)

31La tchêngbâ nə̈, Jezü jêtə̂ kə̂ nyisə̂ rə sə̈ adjisîpili ndə̂ yê päkëdə̂: «Äwäpä Modô ndə̂ Akrə wun yûkü tə̂ gbölösə̂nə̈. Akpôkpô azü la agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ koadje sə̂ yê. A âwon-adje tchë, ânyë pâ lö vötaâ tchê joadje lə̂ kuzü.» 32Tche tö pö lâme kraâ sə̈ andjê. Käko Pîêre zâ tchë, kə̈ gîtə̂ yê la tchë bhâchï, ânyë kə̈ sə̂ lakə̂ hro la tchë. 33Praâbalë Jezü djêtə̂ yê kə̈ wûn adjisîpili ndə̂ yê, ânyë kə̈ hrô la Pîêre päkëdə̂: «Gitə̂ zə̈ tə̂ mê chï Satäa! Bëte kə̂ wun tchô ndə̂ zə̈ wâbo batə̂ andə̂ Ndjapä-a, praâbalë äwä batə̂ andə̂ azü.»

Köbo kə̂ nə ngbâ Jezü

(Mat 16.24-28; Luk 9.23-27)

34Pânə̈ Jezü ê kpûlû azü nə̈ la adjisîpili ndə̂ yê ânyë kə̈ tô rə̂ sə̈ andjê päkëdə̂: «Âdə ngâ akrə ânyində̂ kə̂ nə ngbâ mê, äwäpä tche kosə̂ tə̂ yê la tə̂ yê, kə̂ za yö ndə̂ gba ndə̂ yê, ânyë kə̂ nə ngbâ mê. 35Bëte akrə ndə̂ tche nyîndə̂ kə̂ tcha tchîsûwu ndə̂ yê, tchîsûwu ndə̂ yê nə̈ yuadje tə̂ yê. Praâbalë akrə ndə̂ tchîsûwu ndə̂ yê yû bëte mê ndjë tə̂ pö ndə̂ Tchôtchô Pö ndə̂ mê, tchê tchadje tchîsûwu ndə̂ yê. 36Âdə akrə âgbo arə tchêbêche âtə gbɛ̂, ânyë tchîsûwu ndə̂ yê yû, giamâ kä ndə̂ tche gbo rə̂ ngbânə̈? 37Giamâ kä ndə̂ akrə yo rə̂ ânyë kə̂ za rə̂ ëlə̂ kpâlâ tchîsûwu ndə̂ yê? 38Bëte âdə ngâ akrə âmbo ganô mê la apö ndə̂ mê lə̂ la azü ndə̂ tchô angêta ndə̂ andjë kôsə̂ pö ma Ndjapä lakə̂ mbo ngbongbo rə, Modô ndə̂ Akrə mboadje ndjë ganô yê lo nə̈ ndə̂ tchê kadje lə̂ gbôgbô ndə̂ Bha nə̈ la aânje ndə̂ yê ndə̂ andjë wâ ngbî tiî bëte Ndjapä.»

Currently Selected:

Mâreke 8: lnl

Highlight

Copy