Mâreke 15

A ë la Jezü atə̂ tchâtchu Pïlâte

(Mat 27.1-2,11-14; Luk 23.1-5; Jan 18.28-38)

1Po mbatchâ, agbölö a-earə̂ kə̂ wa ngela sə̈ Ndjapä pâlatə̂ andjê la akpôkpô azü la a-earə̂ kə̂ nyisə̂ ndïɛ̈ la kpûlû ndə̂ a-earə̂ kə̂ wa ngbanga gbɛ̂. Andjë î Jezü, kə̈ nə̂ la tchë ânyë kə̈ gbôtə̂ yê ëtchânə̂ Pïlâte. 2Pïlâte yû tchë päkëdə̂: «Mo də̈ gbïɛ̈ ndə̂ ajuîfu?» Jezü tô rə̂ ndə̂nə̈ sə̈ tchë päkëdə̂: «Momö kä âkə̈ tô rə̂.» 3Agbölö a-earə̂ kə̂ wa ngela sə̈ Ndjapä yî apö lə̂ küma Jezü tə̂ gbölösə̂nə̈. 4Pïlâte kâ yû Jezü päkëdə̂: «Mo tôâbo pö ndə̂ pö lâme? Mo djê apö ndə̂ andjë yî rə̂ lə̂ küma zə̈ lâme nə̂ gbɛ̂.» 5Praâbalë Jezü pôâbo ndə̂ pö lâme balë-a, âmbô rə̂ pä tchə̂lə̂ küma Pïlâte dîngɨli-ê.

A wä ngbanga kuzü lə̂ küma Jezü

(Mat 27.15-26; Luk 23.13-25; Jan 18.39—19.16)

6Logbɛ̂ ndə̂ a mbo kpülü ndə̂ Pâke, Pïlâte jï ngâ earə̂ kânga balë sə̈ azü gö nə̈, tchanə̈ ndə̂ andjë yûkû yê. 7Dëkë, ngâ köchë alême kä tâ ndə̂ rə̈ yê wû pä Bäräbâse, a yï tchë bhâlə̂ nda kânga la angâ yê ndə̂ andjë âlafô la gbölö pö ânyë kə̈ wôn ngâ akrə lə̂nə̈. 8Kpûlû azü nə̈ gbɛ̂ ê bhândə̂ Pïlâte ndə̂kə̂ pa tche mbo rə̂ batə̂ rə̂ ndə̂ tche mbo tchê rə̂. 9Pïlâte yû andjê päkëdə̂: «Nyë nyində̂ nə̈ pä më ji gbïɛ̈ ndə̂ ajuîfu sə̈ nyê?» 10Bëte Pïlâte wûnsə̂ nə̈ nə̂ pä agbölö a-earə̂ kə̂ wa ngela sə̈ Ndjapä gbötə̂ Jezü ëtchânə̂ yê lə̂ köbosə̂ gbölö su. 11Praâbalë agbölö a-earə̂ kə̂ wa ngela sə̈ Ndjapä nə̈ mbô rə̂ gbɛ̂ ndə̂kə̂ pa kpûlû azü nə̈ yukû nə̈ sə̈ Pïlâte ndə̂kə̂ ji kütû Bäräbâse. 12Pïlâte yû andjê päkëdə̂: «Käko nyë nyïndə̂ nə̈ pä më mbo giamâ tə̂ tchanə̈ ndə̂ nyë ê rə̂ tə̂ yê pä gbïɛ̈ ndə̂ ajuîfu âtə?» 13Andjë tâ wârə̂ päkëdə̂: «Amö won tchë tə̂ yö ndə̂ gba!» 14Pïlâte yû andjê päkëdə̂: «Ngbongbo rə giamâ kä ndə̂ tche mbô rə̂?» Praâbalë andjë kä tâ wârə̂ ngbôô päkëdə̂: «Amö won tchë tə̂ yö ndə̂ gba!» 15Pïlâte nyîndə̂ kə̂ za mômô tə̂ su kpûlû azü nə̈, kə̈ jî Bäräbâse sə̈ andjê. Pânə̈ tche zâma ndə̂kə̂ pa a bhi Jezü la föröngbö, kə̂ gbotə̂ yê ndə̂kə̂ pa a e la tchë kə̂ bhi tchë tə̂ yö ndə̂ gba.

Aturûgu mö Jezü

(Mat 27.27-31; Jan 19.2-3)

16Aturûgu zâ Jezü kə̈ ê la tchë bhâlə̂ gbölö tchâalê kua ndə̂ goverenëre ânyë kə̈ ê kpûlû angâ andjê gbɛ̂. 17Andjë yû ngâ gbölö ngbêngbê lə̂ba ëtə̂ yê, kə̈ djû ngâ gbâbî ndə̂ chi batə̂ kpoto-gbïɛ̈ ânyë kə̈ yû rə̂ ëtə̂ küma yê. 18Pânə̈ andjë sə̂ lakə̂ po ndə̂ yê päkëdə̂: «Ârâ pô ndə̂ zə̈ nə̂, gbïɛ̈ ndə̂ ajuîfu!» 19Andjë bhî tchë tə̂ küma yê la wärə̈, kə̈ kû ngrʉ̂srö ëtə̂ yê ânyë kə̈ gʉ̂te ëbêche lakə̂ chi küma andjê tə̂ cho tchâtchâ yê. 20Pânə̈ ndə̂ andjë mô tchë, andjë zû gbölö ngbêngbê lə̂ba lâme tə̂ yê, kə̈ yû alə̂ba ndə̂ yê ëtə̂ yê ngbânə̈. Pânə̈ andjë wûtu la tchë kə̈ ê la tchë ndə̂kə̂ won tchë tə̂ yö ndə̂ gba.

A bhï Jezü tə̂ yö ndə̂ gba

(Mat 27.32-44; Luk 23.26-43; Jan 19.17-27)

21Ngâ köchë ndə̂ rə̈ yê wû pä Chemön akrə gö ndə̂ Sïrêne, tche də̈ bha Alegezândere la Rüfûse, tche tô bhâlə̂ kɨ̈ndɨ̈ kə̈ sə̂ lakə̂ ka lə̂ köbo nə̈ lâme. Aturûgu zâ tchë la gbôgbô ndə̂kə̂ pa tche za yö ndə̂ gba ndə̂ Jezü. 22Andjë ê la Jezü bhâsə̂ tchô ndə̂ rə̈ nə̈ wû pä Gologotä, ndə̂ ânyîndə̂ kə̂ to rə̂ päkëdə̂: «Sə̂ kpökrô küma.» 23Andjë nyîndə̂ kə̂ za vɛ̂n-ɛn ndə̂ andjë sû mîre lə̂nə̈ sə̈ tchë, praâbalë tche kôsə̂ kə̂ ndjo rə̂-ê. 24Andjë bhî tchë tə̂ yö ndə̂ gba, kə̈ tâ kʉ̂kâ ndə̂kə̂ krʉ tchə̂lə̂ alə̂ba ndə̂ yê tə̂ andjê ânyë kə̂ wunsə̂ rə ndə̂ akrə balë balë gbo rə̂ lə̂nə̈#15.24 Nyë dɨ̈ Aps 22.19. 25Ndə̂ andjë bhî tchë tə̂ yö ndə̂ gba dëkë dalo wä mïndûu manə̈ voanə̈. 26Andjë mbö ngâ mbëtï ndə̂ ânyîsə̂ dju kə̂ wa ngbanga lə̂ küma yê, kə̈ bhî rə̂ dəpâ küma yê. Mbëtï nə̈ tö rə̂ päkëdə̂: «Gbïɛ̈ ndə̂ ajuîfu.» 27Andjë bhî ndjë angâ angbongbo azü bïchuû pâ ayö ndə̂ gba ndrotə̂ Jezü, ngânə̈ balë də ndôkö, ânyë ngânə̈ balë də gele. [28Ädə̈ käko ânyë pö ndə̂ Mbëtï Ndjapä tô rə̂ mbô gundə̂sə̂ nə̈. Mbëtï nə̈ tö rə̂ päkëdə̂: «A dɨ̈ tchë lə̂ gbâtə̂ a-earə̂ kə̂ mbo ngbongbo rə#15.28 Lə̂ angâ angbängbä abəndɨ Mbëtï Ndjapä la ma gerêke, yɛ̈yɛ̈ da 28 lâme wâbo lə̂nə̈-a. Nyë dɨ̈ Luk 22.37; Eza 53.12..»]

29Azü ndə̂ andjë ro pâ köbo sə̂ lakə̂ nyoanyoa küma andjê lakə̂ dro tchë päkëdə̂: «Êe! Momö ndə̂ mo nyîndə̂ kə̂ ndjondjo tchə̂lə̂ gbölö nda Ndjapä alême ânyë kə̂ kä nyikrə rə̂ ëngbânə̈ lə̂ lö vötaâ âtə, 30amö tcha tə̂ zə̈ la tə̂ zə̈ lakə̂ jrê tə̂ yö ndə̂ gba atə̂ ëbêche!» 31Agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ mô tchë lə̂ gbâtə̂ andjê päkëdə̂: «Tche tchä angâ azü, tchê tchabô ndjë tə̂ yê la tə̂ yê-ê! 32Krîsiti nə̈ ndə̂ tche də̂ gbïɛ̈ ndə̂ Isarayële, äwäpä tche jre angangaâtə tə̂ yö ndə̂ gba âtə ëbêche azə̈ wûn rə̂, ânyë kə̂ zadje su azə̂ sə̈ tchë.» Andjanə̈ ndə̂ a bhî andjê la tchë tə̂ yö ndə̂ gba sə̂ lakə̂ dro ndjë tchë.

Kə̂ tchu ndə̂ Jezü

(Mat 27.45-56; Luk 23.44-49; Jan 19.28-30)

33Ndə̂ lo wûtu lə̂ gûgû tchə̂lə̂ɛtchô, tchô bû pâ cho nə̈ gbɛ̂ ndjoa ëtə̂ dalo vötaâ ndə̂ tchêndə̂gölo. 34Tə̂ dalo vötaâ nə̈ Jezü tâ wârə̂ päkëdə̂: «Eloyï, Eloyï, lamâ sabâketanï?» Änyïndə̂ kə̂ to rə̂ päkëdə̂: «Ndjapä ndə̂ mê, Ndjapä ndə̂ mê, bëte giamâ kä ndə̂ mo gbôtə̂ mê-ê#15.34 Nyë dɨ̈ Aps 22.2.?» 35Angânə̈ lə̂ gûtə̂ andjê ndə̂ andjë sə̂ tâ djê wârə̂ nə̈, kə̈ tô rə̂ päkëdə̂: «Wunsaâ! Tche kä lakə̂ e Elïe.» 36Ngâ akrə balë kpê kə̈ zâ ndakôro kə̈ yî rə̂ lə̂ kpïkpï vɛ̂n-ɛn nə̈, kə̈ î rə̂ ëtə̂ küma wärə̈, kə̈ zâ rə̂ sə̈ tchë ndə̂kə̂ pa tche ndjo rə̂. Tche tô rə̂ päkëdə̂: «Nyë sə̈ gii, azə̂ wun-adje rə̂ ndə̂ Elïe nə̈ nə ndə̂kə̂ jreadje tchë tə̂ yö ndə̂ gba nə̈.» 37Praâbalë Jezü kâ tâ wârə̂, kə̈ tchû-î.

38Gbölö kʉ̈kʉ̂-lə̂ba ndə̂ a wâ tchə̂lə̂ gbölö nda Ndjapä la rə̂, tchə̂lə̂ nə̈ srô kpôlə̂ gûgû nə̈ bïchuû ätö də lafô ndjoa atə̂ bêche. 39Kabïta ndə̂ aturûgu ndə̂ Rômo wûn köbo ndə̂ Jezü tchû la rə̂ lâme, kə̈ tô rə̂ päkëdə̂: «Tə̂ lëge nə̈, köchë âtə də̈ Modô ndə̂ Ndjapä.» 40Angâ aɛ̈chë sə̈ ndjë alême sə̂nə̈, andjë sə̂ bhâchï ânyë kə̈ sə̂ lakə̂ wun tchô. Malê ndə̂ gö ndə̂ Magadalä, Malê, anyï Jâke yɛ̈yɛ̈ nə̈, ndə̂ tche də̂ ndjë anyï Jozë, la Salomë; andjë kä lə̂ gbâtə̂ andjê. 41Aɛ̈chë lâme zä tchêngbâ Jezü alême kə̈ mbô kua sə̈ tchë sə̂nə̈ ndə̂ tche sə̂ bhâ Galilë. Angâ angbängbä aɛ̈chë kä ndjë alême sə̂nə̈ ndə̂ andjë ê la tchë atə̂ Jerûzalêmo.

Jozêfu chï krʉkrʉ Jezü

(Mat 27.57-61; Luk 23.50-56; Jan 19.38-42)

42La tchêndə̂gölo ndə̂ azü sə̂ lakə̂ nyikrə arə bëte kpülü ndə̂ Pâke, ndə̂ ânyîndə̂ kə̂ to rə̂ pä balë lö ndə̂kə̂ pa lö sabäa wutu, 43Jozêfu, akrə gö ndə̂ Arimatë wûtu, tche wä ndjë tə̂ ngâ gbölö akrə lə̂ gbölö kpûlû ngbanga ndə̂ ajuîfu, tche sə̈ ndjë bëte Gbölö gö-gbïɛ̈ ndə̂ Ndjapä. Tche âbolafô la wa-a, kə̈ ê bhândə̂ Pïlâte, kə̈ yû tchë ndə̂kə̂ za krʉkrʉ Jezü. 44Ndə̂ Pïlâte âsə̈ dje rə̂ pä Jezü tchû nə̂, tchə̂lə̂ küma yê djîngɨli. Pïlâte ê kabïta ndə̂ aturûgu, kə̈ yû tchë päkëdə̂: «Jezü tchü gasa-ë?» 45Ndə̂ tche djê pö nə̈ lə̂ ma turûgu nə̈, kə̈ nyîndə̂ nə̈ sə̈ Jozêfu ndə̂kə̂ pa tche za krʉkrʉ Jezü nə̈. 46Jozêfu yô ngâ grôgrô lə̂ba. Tche zû krʉkrʉ Jezü tə̂ yö ndə̂ gba nə̈, kə̈ gʉ̂â rə̂ la grôgrô lə̂ba nə̈, kə̈ ê la tchë bhâlə̂ cho akuzü ndə̂ a djî rə̂ lə̂ täme, ânyë kə̈ rô täme ëma kudû nə̈. 47Malê ndə̂ gö ndə̂ Magadalä la Malê anyï Jozë sə̂ lakə̂ cheko tchô ndə̂ a zâ Jezü tâ.

Currently Selected:

Mâreke 15: lnl

Highlight

Copy