Matiyə̈ 20

Ndoka pâ a-earə̂ kua ndə̂ vînye

1«Gbölö gö-gbïɛ̈ ndə̂ tchêlafô wä batə̂ ngâ earə̂ nda ndə̂ tche wûtu po la mbatchâ ndə̂kə̂ pu azü kua bëte kɨ̈ndɨ̈ vînye ndə̂ yê. 2Andjë djêtə̂ andjê ndə̂kə̂ pa tche kʉ makətche nə̈ batə̂ rə̂ ndə̂ a kʉ rə̂ sə̈ earə̂ kua ngbâ lö balë. Pânə̈ tche zâ köbo sə̈ andjê ndə̂kə̂ e atə̂lə̂ kɨ̈ndɨ̈ vînye ndə̂ yê. 3Dalo nə̈ âsə̈ wa mïndûu manə̈ voanə̈, tche kä wûtu kə̈ gbô angâ azü ndə̂ andjë sə̂ ämbämbänə̈, kə̈ mbôâbo ngâ rə-a. 4Tche tô rə̂ sə̈ andjê päkëdə̂: ‹Nyënyê ndjë gbɛ̂, äwäpä nyë e kə̂ mbo kua bhâlə̂ kɨ̈ndɨ̈ vînye ndə̂ mê. Më âkʉ makətche sə̈ nyê gundə̂sə̂ kua ndə̂ nyê mbo rə̂.› 5Andjë zâ köbo kə̈ ê atə̂lə̂ kɨ̈ndɨ̈ nə̈. Ndə̂ lo âsə̈ wa lə̂ gûgû tchə̂lə̂ɛtchô, earə̂ kɨ̈ndɨ̈ nə̈ kä wûtu, ârə̂ âsə̈ wa lə̂ dalo vötaâ ndə̂ tchêndə̂gölo tche kä wûtu, kə̈ mbô kütû tâ käko ndə̂kə̂ gbo azü kua nə̈. 6Ârə̂ âsə̈ wa lə̂ dalo mïndûu ndə̂ tchêndə̂gölo, tche kä wûtu kə̈ wûn angâ azü ndə̂ andjë sə̂ ämbämbänə̈. Tche yû andjê päkëdə̂: ‹Bëte giamâ kä ndə̂ nyë sə̂ ämbämbänə̈ tchâtə dalobiî ânyë kə̈ mbôâbô ngâ rə mbô-ê?› 7Andjë tô rə̂ ndə̂nə̈ sə̈ tchë päkëdə̂: ‹Bëte ngâ akrə sə̂âbo ndə̂kə̂ kʉ ârâ tə̂ ma kua-a.› Tche tô rə̂ sə̈ andjê päkëdə̂: ‹Nyënyê ndjë gbɛ̂, nyë ë kə̈ mbô kua bhâlə̂ kɨ̈ndɨ̈ vînye ndə̂ mê.›

8«La zɨtɨ tchêndə̂gölo, earə̂ kɨ̈ndɨ̈ vînye nə̈ tô rə̂ sə̈ kabïta ndə̂ yê päkëdə̂: ‹Amö e azü kua nə̈ gbɛ̂ kə̈ kʉ̂ makətche ndə̂ andjê sə̈ andjê. Amö dokʉ̈tchê tə̂ andjanə̈ ndə̂ më ê andjê dəngbânə̈ lâme, ânyë kə̂ wutu tə̂ andjanə̈ ndə̂ më ê andjê dokʉ̈tchê lâme.› 9Andjanə̈ ndə̂ a kʉ̂ andjê lə̂ dalo mïndûu ndə̂ tchêndə̂gölo lâme nə̂, kə̈ gbô makətche ndə̂ a kʉ tchê rə̂ sə̈ earə̂ kua ndə̂ lö balë balë. 10Andjanə̈ ndə̂ a kʉ̂ andjê dokʉ̈tchê lâme nə̂ ndjë, kə̈ wûntî pä anyê âgbo makətche âge kə̂ ro andə̂ angâ anyê lâme. Praâbalë akrə balë balë gbö ndjë makətche ndə̂ lö balë. 11Andjë âsə̈ gbo rə̂ käko kə̈ sə̂ lakə̂ jende earə̂ kɨ̈ndɨ̈ lâme. 12Andjë tö rə̂ päkëdə̂: ‹Azü ndə̂ a kʉ̂ andjê dəngbânə̈, andjë mbö kua kütû lə̂ dalo balë. Makətche ndə̂ andjê wâ batə̂ andə̂ ârâ, ndə̂ ârâ wûn yûkü tchâtchâ lo la mbatchâ ndjoa ëtə̂ tchêndə̂gölo.› 13Earə̂ kɨ̈ndɨ̈ nə̈ tô rə̂ ndə̂nə̈ sə̈ ngânə̈ balë päkëdə̂: ‹Agü mê, më bôloabô mö-a. Azə̈ djêâbo tə̂ azə̂ la mö âme ndə̂kə̂ pa më kʉ makətche ndə̂ lö balë sə̈ mö? 14Kʉ makətche ndə̂ zə̈ kə̈ gûgü. Më nyïndə̂ kə̂ kʉ makətche sə̈ earə̂ kua ndə̂ më zâ tchë dəngbânə̈ gundə̂sə̂ andə̂ zə nə̈. 15Äwätə̂ mê ndə̂kə̂ mbo rə ndə̂ su mê nyîndə̂ nə̈ la makətche ndə̂ mê, âdə̂âbo käko-ë? Su zə̈ kʉ̈ mö bëte rə̂ ndə̂ më wâtə̂ tchôtchô akrə?› 16Ndə̂kə̂ ka pö lâme Jezü tô rə̂ päkëdə̂: Azü dəngbânə̈ wadje tə̂ azü dokʉ̈tchê, ânyë azü dokʉ̈tchê wadje tə̂ azü dəngbânə̈.»

Jezü kä tô pö ndə̂ kuzü lakə̂ jo ndə̂ yê tə̂ vötaâ nə̈

(Mar 10.32-34; Luk 18.31-34)

17Ndə̂ Jezü sə̂ lakə̂ e atə̂ Jerûzalêmo, pâ köbo, tche kʉ̂ adjisîpili ndə̂ yê lə̂ könô gbɛ̂ tchêpâ nə̈ bïchuû. Tche gîtə̂ yê la andjê bhâchï ânyë kə̈ tô rə̂ sə̈ andjê päkëdə̂: 18«Nyë djë mê! Azə̈ âkenga atə̂ Jerûzalêmo. A âgboadje tə̂ Modô ndə̂ Akrə ëtchânə̂ agbölö a-earə̂ kə̂ wa ngela sə̈ Ndjapä, la a-earə̂ kə̂ nyisə̂ ndïɛ̈. Andjê wadje ngbanga kuzü lə̂ küma yê. 19Andjê gboadje tə̂ yê tchânə̂ azü ndə̂ andjë wâbô wâtə̂ ajuîfu ndə̂kə̂ pa andjë mo tchë, kə̂ bhi tchë la föröngbö, kə̂ won tchë pâ yö ndə̂ gba. Lö vötaâ la tchêngbâ nə̈ tchê joadje lə̂ kuzü.»

Anyï Jâke la Jâan yükû ngâ rə tchânə̂ Jezü

(Mar 10.35-45)

20Käko anyï abechë ndə̂ Zebede nə̂ ndola Jezü la amodô ndə̂ yê. Tche gʉ̂te tchâtchâ Jezü ndə̂kə̂ yu tchë tə̂ ngâ rə. 21Jezü yû tchë päkëdə̂: «Mo nyïndə̂ giamâ?» Tche tô rə̂ ndə̂nə̈ sə̈ Jezü päkëdə̂: «Amö zama sə̈ mê ndə̂kə̂ pa lo nə̈ ndə̂ mo ka ndə̂kə̂ wa gbïɛ̈, mo âkʉ amodô ndə̂ mê bïchuû ndrotə̂ zə̈. Ngânə̈ balë də ndôkö ânyë ngânə̈ balë də gele.» 22Jezü tô rə̂ ndə̂nə̈ päkëdə̂: «Nyë wûn-âbo sə̈ rə ndə̂ nyê yukû nə̈ lâme-a. Nyê ndjoadje kangûchi yûkü ndə̂ më wâ ndə̂kə̂ ndjo rə̂ lâme?» Andjë tô rə̂ ndə̂nə̈ sə̈ tchë päkëdə̂: «Ârâ âdjo rə̂ ämbänə̈.» 23Jezü tô rə̂ sə̈ andjê päkëdə̂: «Tə̂ lëge nə̈ nyê ndjoadje kangûchi yûkü ndə̂ mê lâme, praâbalë ndə̂kə̂ sə ndrotə̂ mê də ndôkö âdəndjë də gele, âwûn-âbo mê-a. Tchô lâme wätə̂ andə̂ azü ndə̂ Bha mê nyîkrə rə̂ bëte andjê.»

24Adɨ̂ adjisîpili lə̂ könô gbɛ̂ âsə̈ dje pö lâme käko, su andjê kʉ̂ andjê tə̂ arə̂mâ bïchuû lâme. 25Jezü ê andjê gbɛ̂ ndrotə̂ yê ânyë kə̈ tô rə̂ sə̈ andjê päkëdə̂: «Nyë wûnsə̂ nə̈ nə̂ pä agbïɛ̈ ndə̂ gö, andjë mbö kümändëmä la gbôgbô pâ azü gö nə̈. Agbölö azü nə̈ mbö rə̂ ndə̂kə̂ pa azü gö wunsə̂ gbôgbô ndə̂ andjê. 26Praâbalë âwâbo pä rə nə̈ wa käko lə̂ gbâtə̂ nyê-a. Âdə ngâ akrə lə̂ gbâtə̂ nyê ânyində̂ kə̂ wa gbölö, äwäpä tchë watə̂ earə̂ kua ndə̂ nyê. 27Âdə ngâ akrə lə̂ gbâtə̂ nyê ânyində̂ kə̂ sə tə̂ küma nyê, äwäpä tche watə̂ ngbâa ndə̂ nyê. 28Ârə̂ kä ndə̂ Modô ndə̂ Akrə nə̂âbo ndə̂kə̂ pa azü mbo kua sə̈ tchë-a, praâbalë tche nə̈ ndə̂kə̂ mbo kua sə̈ azü lakə̂ zatə̂ yê sə̈ kuzü ndə̂kə̂ ji angbängbä azü lə̂ ngbongbo rə ndə̂ andjê.»

Jezü tchä a-earə̂ föla bïchuû

(Mar 10.46-52; Luk 18.35-43)

29Jezü la adjisîpili ndə̂ yê tô bhâ Jerikö ndə̂kə̂ wutu. Ngâ gbölö kpûlû azü zâ tchêngbâ yê. 30Angâ a-earə̂ föla bïchuû ndə̂ andjë sə̂ ndroma köbo âsə̈ dje rə̂ pä Jezü kä lakə̂ ro, andjë sə̂ lakə̂ ta wârə̂ päkëdə̂: «Gbölö Gbïɛ̈, Modô ndə̂ Davîdi, wun nyonyo ârâ!» 31Kpûlû azü nə̈ gbɛ̂ hrô la andjê ndə̂kə̂ pa andjë ngbo ma andjê tâ. Praâbalë andjë kä tâ wârə̂ ngbôô, päkëdə̂: «Gbölö Gbïɛ̈, Modô ndə̂ Davîdi, wun nyonyo ârâ!» 32Jezü krʉ̂-ê, kə̈ ê andjê ânyë kə̈ yû andjê päkëdə̂: «Nyë nyïndə̂ nə̈ pä më mbo tə̂ nyê atöko?» 33Andjë tô rə̂ ndə̂nə̈ sə̈ tchë päkëdə̂: «Gbölö Gbïɛ̈, ârâ nyïndə̂ kə̂ wun tchô.» 34Nyonyo andjê mbô Jezü ânyë tche grʉ̂ la andjê. Posə̂nə̈, andjë kä wûn tchô, kə̈ zâ tchêngbâ Jezü.

Currently Selected:

Matiyə̈ 20: lnl

Highlight

Copy