Abadjângele 7
7
Kə̂ mu pö ndə̂ Etîêne
1Gbölö earə̂ kə̂ wa ngela sə̈ Ndjapä yû Etîêne päkëdə̂: «Pö ndə̂ a tô rə̂ tə̂ zə̈ âtə wätə̂ lëge nə̈?» 2Etîêne tô rə̂ ndə̂nə̈ päkëdə̂: «Arə̂mâ ndə̂ mê la arabha mê, nyë djë mê! Ndjapä ndə̂ tche wâ gbölö, tche wütu ëtə̂ âta azə̂ Abrahâmo ndə̂ tche sə̂ alême bhâ Mezopotamï#7.2 Nyë dɨ̈ Jen 11.31—12.5.. Abrahâmo sə̈ bhâye dokʉ̈tchê ndə̂kə̂ pa tche e atə̂lə̂ gö ndə̂ Harä. 3Ndjapä tô rə̂ sə̈ tchë päkëdə̂: ‹Gbo lə̂ gö ndə̂ zə̈ la bûngrɨ̂ ndə̂ zə̈, kə̂ e atə̂lə̂ gö ndə̂ mê nyiadje sə̂nə̈ sə̈ mö#7.3 Nyë dɨ̈ Jen 12.1..› 4Käko Abrahâmo gbô lə̂ gö ndə̂ azü ndə̂ Kaledë, kə̈ sə̂ bhâlə̂ gö ndə̂ Harä. La tchêngbâ nə̈ ndə̂ bha nə̈ tchû, Ndjapä jî tchë bhâye, kə̈ kâ la tchë atə̂lə̂ gö ndə̂ nyë sə̂ lə̂nə̈ âtə. 5Ndjapä zâbo ngâ tchô sə̈ tchë lə̂ gö nə̈ lâme-a, âdəndjë ngâ kpîɛ̂kpîɛ̂ tchô ndə̂kə̂ pa tche za da yê tâ-a. Praâbalë Ndjapä zä bâlâ sə̈ tchë päkëdə̂: ‹Mê zadje gö âtə sə̈ mö ndə̂kə̂ watə̂ andə̂ zə nə̈, la azü pâ mawo ndə̂ zə̈ la tchêngbâ zə̈.› Dëkë, Abrahâmo wâbo la bechë sə̂nə̈ lâme-a#7.5 Nyë dɨ̈ Jen 12.7; 13.15; 15.18; 17.8. 6Ndjapä tô rə̂ sə̈ tchë päkëdə̂: ‹Azü pâ mawo ndə̂ zə̈ katə̂ ngbânə̈ səadje lə̂ gö ndə̂ angâ azü ngbî. Bhâye, azü nə̈ kʉadje andjê la ngbâa, kə̂ mboadje andjê la yûkü lə̂ angû ngbangbo voanə̈#7.6 Nyë dɨ̈ Jen 15.13-14.. 7Praâbalë mê wadje ngbanga lə̂ küma azü lə̂ gö ndə̂ andjë kʉadje andjê la ngbâa lâme. La tchêngbâ nə̈, andjê wutuadje ndə̂kə̂ voga mê lə̂ tchô âtə#7.7 Nyë dɨ̈ Eki 3.12..› 8Ndjapä ndə̂ Abrahâmo drô madɨ̈ tə̂ pö ndə̂ gasa. Käko pânə̈ ndə̂ tche zɨ̂ Izâke, tche wâ tchë la gasa la tchêngbâ lö mïndûu manə̈ vötaâ. Izâke wâ ndjë modô ndə̂ yê Jakôbo la gasa, Jakôbo wâ amodô ndə̂ yê lə̂ könô gbɛ̂ tchêpâ nə̈ bïchuû la gasa, ndə̂ andjë də̂ araâta azə̂#7.8 Nyë dɨ̈ Jen 17.10-14; 21.4..
9«Araâta azə̂ wä alême la gbölö su tə̂ Jozêfu, kə̈ kâ tchë ânyë tche wâtə̂ ngbâa lə̂ gö ndə̂ Ejîpiti. Praâbalë Ndjapä kä la tchë#7.9 Nyë dɨ̈ Jen 37.11,28; 39.2,3,21,23.. 10Ndjapä jî tchë lə̂ agbôgbô arə gbɛ̂ ndə̂ âgbô tchë. Ndə̂ Jozêfu wûtu tchâtchu Faraön gbïɛ̈ ndə̂ Ejîpiti, Ndjapä mbô rə̂ pä küma yê wa lanə̈ ndə̂kə̂ pa gbïɛ̈ nə̈ wun tchë la tchôtchô su. Käko gbïɛ̈ zâ Jozêfu ndə̂kə̂ mbo kümändëmä pâ Ejîpiti ndjë la arə tchâalê ndə̂ yê gbɛ̂#7.10 Nyë dɨ̈ Jen 41.39-41.. 11Dëkë ngâ gbölö gʉ tê katchôgbɛ̂ lə̂ gö ndə̂ Ejîpiti la Kanän gbɛ̂. Yûkü wâtə̂ gbölösə̂nə̈, araâta azə̂ gbôâbo kɨ̈zɨ̂ ndə̂kə̂ zɨ rə-a#7.11 Nyë dɨ̈ Jen 41.54-57; 42.1-2.. 12Ndə̂ Jakôbo djê rə̂ pä, kɨ̈zɨ̂ kä bhâ Ejîpiti, tche wân araâta azə̂ bhâye tə̂ dokʉ̈ nə̈. 13Kə̂ e ndə̂ andjê tə̂ bïchuû nə̈, Jozêfu nyîsə̂ tə̂ yê sə̈ arə̂mâ ndə̂ yê, ânyë Faraön wûnsə̂ arə̂mâ lə̂ bûngrɨ̂ ndə̂ Jozêfu#7.13 Nyë dɨ̈ Jen 45.1-4,16.. 14Käko Jozêfu wân tchô ndə̂kə̂ pa a ka la bha nə̈ Jakôbo ndjë la azü tə̂ azü vötaâ la lə̂ könô gbɛ̂ tchêpâ nə̈ mïndûu (75) lə̂ bûngrɨ̂ ndə̂ yê gbɛ̂#7.14 Nyë dɨ̈ Jen 45.9-10,17-18; 46.27.. 15Ädə̈ käko ânyë Jakôbo ê atə̂ Ejîpiti. Bhâye kä ndə̂ tche tchû ndjë la araâta azə̂#7.15 Nyë dɨ̈ Jen 46.1-7; 49.33.. 16A kʉ̂ krʉkrʉ andjê, kə̈ gû la rə̂ bhâlə̂ gbölö gö ndə̂ Sïchême ânyë kə̈ chî andjê lə̂ cho akuzü ndə̂ Abrahâmo yô rə̂ la makətche tchânə̂ abechë ndə̂ Hamorë ndə̂ tche də̂ âta azü gö ndə̂ Sïchême#7.16 Nyë dɨ̈ Jen 23.3-16; 33.19; 50.7-13..
17«Lö nə̈ âsə̈ ndo ndə̂kə̂ pa bâlâ ndə̂ Ndjapä zâ rə̂ tə̂ pö ndə̂ Abrahâmo watə̂ lëge nə̈, azü pâ mawo ndə̂ azə̂ âzɨadje abechë, ânyë andjë ngba tə̂ gbölösə̂nə̈ bhâ Ejîpiti. 18La tchêngbâ nə̈, ngâ gbïɛ̈ ndə̂ tche wûn-âbô sə̂ Jozêfu wûn, â pâ mbätä-gbïɛ̈ ndə̂ gö ndə̂ Ejîpiti#7.18 Ndə̂kə̂ to tə̂ yɛ̈yɛ̈ da 17 ëtə̂ 18, nyë dɨ̈ Eki 1.7-8.. 19Tche bôlo azü pâ mawo ndə̂ azə̂, ânyë kə̈ mbô rə yûkü tə̂ araâta azə̂; tche yükû nə̈ sə̈ andjê la gbôgbô ndə̂kə̂ pa andjë gbotə̂ angbelɛ̂-bechë ndə̂ andjê, andjë tchu-î#7.19 Nyë dɨ̈ Eki 1.10-11,22.. 20Sə̂nə̈ lâme kä ndə̂ a zɨ̂ Möyîze, tche fû lə̂ la Ndjapä. A bâta tchë tchâalê ndə̂ bha nə̈ lə̂ nyîpï vötaâ#7.20 Nyë dɨ̈ Eki 2.2.. 21Sə̂nə̈ ndə̂ a gbôtə̂ yê, ɛ̈wünrə ndə̂ Faraön zâ tchë, kə̈ bâta tchë batə̂ modô ndə̂ yê. 22A mânda Möyîze la köbo ndə̂ küma akrə ndə̂ Ejîpiti wa lanə̈. Tche tö apö, kə̂ mbo arə ndə̂ yê gbɛ̂ la gbôgbô. 23Ndə̂ Möyîze âsə̈ wa la ngû tə̂ azü bïchuû (40), tche nyîkrə su yê ndə̂kə̂ e ndə̂kə̂ wun ayîngâ yê azü ndə̂ Isarayële. 24Tche wûn ngâ akrə gö ndə̂ Ejîpiti ndə̂ tche yuku ngâ yê juîfu. Tche sə̂ dəndə̂ ngâ yê nə̈, kə̈ nyîndə̂ kə̂ mbo ndjë akrə ndə̂ Ejîpiti nə̈ la yûkü, ânyë kə̈ wôn tchë. 25Tche wûntî pä, ayîngâ yê wun-adje sə̂nə̈ pä, lə̂ köbosə̂ yê kä ndə̂ Ndjapä mboadje rə̂ ndə̂kə̂ pa andjë wutu lə̂ kua ngbâa, praâbalë andjë djêâbo tchə̂lə̂ nə̈-a. 26Lö balë la tchêngbâ nə̈, Möyîze wûn azü ndə̂ Isarayële bïchuû ndə̂ andjë mbo kʉ̈ʉ̈ ânyë tche ê ndə̂kə̂ nyikrə tchôtchô kə̂ sə lə̂ gbâtə̂ andjê. Tche tô rə̂ sə̈ andjê päkëdə̂: ‹Aköchë, nyë wätə̂ ayîngâ, nyë sə̈ lakə̂ mbö kʉ̈ʉ̈ lə̂ gbâtə̂ nyê bëte giamâ?› 27Praâbalë tchanə̈ ndə̂ tche bhî ngâ yê tə̂ gêgêe nə̈ lâme nyôto Möyîze kə̈ tô rə̂ sə̈ tchë päkëdə̂: ‹Tchabâ kä ndə̂ âzâ mö tə̂ makündji la earə̂ kə̂ wa ngbanga pâ ârâ? 28Mo nyïndə̂ kə̂ won mê batə̂ rə̂ ndə̂ mo wôn akrə gö ndə̂ Ejîpiti dalîtə lâme?› 29Ndə̂ Möyîze djê pö nə̈ lâme, tche kpê kə̈ sə̂ lə̂ gö ndə̂ azü ndə̂ Madiän, bhâye tche zɨ̂ abechë tə̂ aköchë bïchuû#7.29 Ndə̂kə̂ to tə̂ yɛ̈yɛ̈ da 23 ëtə̂ 29, nyë dɨ̈ Eki 2.11-15,21-22; 18.3-4. .
30«Ngû tə̂ azü bïchuû la tchêngbâ nə̈, bhâlə̂ kpaɛ̈gâ, ndola aga ndə̂ Sinayï, ngâ ânje wûtu tchâtchu Möyîze lə̂ ngâ wo ndə̂ âtcho lə̂ gbâkü dɨgbɨ ndöndö yö#7.30 Ndə̂kə̂ to tə̂ yɛ̈yɛ̈ da 30 ëtə̂ 34, nyë dɨ̈ Eki 3.1-10.. 31Ndə̂ Möyîze âsə̈ wun rə̂ käko, tchə̂lə̂ küma yê djîngɨli ânyë tche gîtə̂ yê ndola rə̂ ndə̂kə̂ wun rə̂. Käko tche djê tchə̂lə̂ gɨ̈ Gbölö Gbïɛ̈ päkëdə̂: 32‹Më də̈ Ndjapä ndə̂ araâta zə̈, Ndjapä ndə̂ Abrahâmo, Ndjapä ndə̂ Izâke la Ndjapä ndə̂ Jakôbo.› Möyîze sə̂ lakə̂ gugu la wa, kə̈ kâ nyîâbo ndə̂kə̂ wun rə̂-a. 33Gbölö Gbïɛ̈ tô rə̂ sə̈ tchë päkëdə̂: ‹Zu dakpo tə̂ da zə̈, bëte tchô ndə̂ mo krʉ̂ tâ âtə wätə̂ cho ndə̂ âwâ ngbî bëte Ndjapä. 34Më wûn yûkü ndə̂ azü ndə̂ mê bhâ Ejîpiti nə̂, kə̈ djê kɨ̈ andjê, ânyë kə̈ jrê ndə̂kə̂ ji andjê. Angaâtə amö êë, më wän mö atə̂ Ejîpiti.›
35«Möyîze ndə̂ azü ndə̂ Isarayële kôsə̂ yê alême ânyë kə̈ yû tchë päkëdə̂: ‹Tchabâ kä ndə̂ âzâ mö tə̂ makündji la earə̂ kə̂ wa ngbanga pâ ârâ?› Tchetchë kä ndə̂ Ndjapä wân tchë batə̂ makündji la earə̂ kə̂ ji azü lə̂ ngbâa. Tche zäma lâme sə̈ tchë lə̂ köbosə̂ ânje ndə̂ tche wûtu tchâtchu yê lə̂ wo ndə̂ âtcho lə̂ gbâkü dɨgbɨ ndöndö yö. 36Möyîze kä ndə̂ âkʉ̂ azü nə̈, kə̈ wûtu la andjê bhâ Ejîpiti. Tche mbö arə ndə̂ ârôpâ küma azü la akpɨ̈ngbɨ̈ rə bhâ Ejîpiti. Tche mbö arə nə̈ lâme la gbölö ngbêngbê ngû, ndjë bhâlə̂ kpaɛ̈gâ lə̂ ngû tə̂ azü bïchuû#7.36 Nyë dɨ̈ Eki 7.3; 14.21; Nomb 14.33.. 37Möyîze kä ndə̂ âtô rə̂ sə̈ azü ndə̂ Isarayële päkëdə̂: ‹Ndjapä wan-adje ngâ earə̂ ndə̂ma yê batə̂ rə̂ ndə̂ tche wân mê; tchê wadje tə̂ ngâ yîngâ nyê#7.37 Nyë dɨ̈ Det 18.15..› 38Sə̂nə̈ ndə̂ azü ndə̂ Isarayële pâlatə̂ andjê bhâlə̂ kpaɛ̈gâ, Möyîze kä ndə̂ âwâ lə̂ gbâtə̂ araâta azə̂ la ânje ndə̂ tche tô pö sə̈ tchë bhâlə̂ küma aga ndə̂ Sinayï. Tchetchë kä ndə̂ âgbô apö dəndə̂ Ndjapä ndə̂ âza tchîsûwu sə̈ akrə, ndə̂kə̂ pa tche nyisə̂ nə̈ sə̈ azə̂. 39Praâbalë araâta azə̂ kôsə̂ kə̂ dje ma yê, andjë kôsə̂ yê kə̈ nyîndə̂ nə̈ bhâlə̂ su andjê ndə̂kə̂ dotə̂ andjê atə̂ Ejîpiti. 40Käko andjë tô rə̂ sə̈ Arön päkëdə̂: ‹Nyikrə angâ andjapä sə̈ ârâ ndə̂kə̂ pa andjë nyisə̂ köbo sə̈ ârâ. Bëte Möyîze ndə̂ tche kʉ̂ azə̂ kə̈ wûtu la azə̂ lə̂ Ejîpiti lâme, azə̈ wûn-âbo sə̂ rə ndə̂ âgbô tchë-a#7.40 Nyë dɨ̈ Eki 32.1,23..› 41Sə̂nə̈ lâme, andjë nyïkrə ngâ ɛ̈nə̈ bâgala, kə̈ wâ ngela sə̈ ngakʉ̈lä ânyë kə̈ mbô kpülü la mômô bëte rə ndə̂ könô andjê la tə̂ andjê mbô rə̂. 42Ârə̂ kä ndə̂ Ndjapä gbôtə̂ andjê ânyë andjë vôga akêkêrə̂ lafô, batə̂ rə̂ ndə̂ a mbô rə̂ lə̂ Mbëtï ndə̂ a-earə̂ ndə̂ma Ndjapä päkëdə̂:
‹Nyënyê ndə̂ azü ndə̂ Isarayële,
agia ndə̂ nyë wâ andjê la ngela,
la angâ arə ndə̂ nyë kʉ̂ rə̂ lə̂ ngû tə̂ azü bïchuû bhâlə̂ kpaɛ̈gâ lâme,
nyë nə̈ la rə̂ sə̈ mê?
43Âdə̂âbo käko-a!
Nyë zä ndokʉ̈ ndə̂ Mölôke tə̂ ndjapä ndə̂ nyê,
nyë zä ndjë kêkêrə̂ ndə̂ Refä tə̂ ndjapä ndə̂ nyê,
andjapä ndə̂ nyënyê la tə̂ nyê nyîkrə andjê ndə̂kə̂
voga andjê.
Bëte rə̂ kä ndə̂ mê mboadje rə̂ ndə̂kə̂ pa a kʉ nyê,
kə̂ e la nyê ngrɨ̈ dəkêlê gö ndə̂ Bäbïlône#7.43 Yɛ̈yɛ̈ mawû 42-43: Nyë dɨ̈ Amo 5.25-27..›
44«Bhâlə̂ kpaɛ̈gâ, araâta azə̂ wä alême la ndokʉ̈ ndə̂ a takpa la Ndjapä lə̂nə̈, ndə̂ andjë kʉ̂ atäme bhâlə̂ nə̈. Atäme lâme, a mbö apö ndə̂ madɨ̈ pânə̈. Ndjapä zâma sə̈ Möyîze ndə̂kə̂ nyikrə nda ndə̂ a mbô rə̂ la lə̂ba batə̂ rə̂ ndə̂ tche wûn rə̂#7.44 Nyë dɨ̈ Eki 25.9,40.. 45Ndə̂ araâta azə̂ gbô nda nə̈, andjê la Jozuwë zâ rə̂ kə̈ ê la rə̂ kupâ angâ agö ndə̂ Ndjapä grô azü gö nə̈ tchâtchu andjê. Nda nə̈ wä po lə̂ agö nə̈ ndjoa tə̂ lo nə̈ ndə̂ Davîdi wâtə̂ gbïɛ̈#7.45 Nyë dɨ̈ Joz 3.14-17.. 46Ndjapä mbö tchôtchô su tə̂ Davîdi ânyë tche yû Ndjapä ndə̂kə̂ pa tche nyində̂ nə̈ anyë mbo ngâ nda bëte Ndjapä ndə̂ Jakôbo#7.46 Nyë dɨ̈ 2 Sam 7.1-16.. 47Praâbalë Salomön kä ndə̂ âmbô nda nə̈ bëte Ndjapä#7.47 Nyë dɨ̈ 1 Agbi 6.1-38.. 48Praâbalë Ndjapä ndə̂ tche sə̂ bhâ lafô pâ arə gbɛ̂, tche lôâbo lə̂ anda ndə̂ könô akrə mbô rə̂-a. Pö nə̈ mbô gundə̂sə̂ pö ndə̂ earə̂ ndə̂ma Ndjapä tô rə̂ päkëdə̂:
49‹Tchêlafô də̈ mbätä-gbïɛ̈ ndə̂ mê,
tchêbêche də̂ mbätä ndə̂ mê kʉ da mê pânə̈.
Gbölö Gbïɛ̈ tö rə̂ päkëdə̂:
Anə̈bâ nda nə̈ kä ndə̂ âwâ pä nyë mbo rə̂ sə̈ mê?
Sə̂nə̈ ndə̂ mê yatə̂ mê tâ də̈ anə̈bâ?
50Âdə̂âbo könô mê kä ndə̂ âmbô arə âtə gbɛ̂#7.50 Ndə̂kə̂ to tə̂ yɛ̈yɛ̈ da 49 ëtə̂ 50, nyë dɨ̈ Eza 66.1-2.?›
51«Nyënyê ndə̂ azü ndə̂ küma nyê kpô âtə, ndə̂ su nyê la tü nyê jîâbô tə̂ yê jî sə̈ Ndjapä âtə. Logbɛ̂ nyë sə̈ lakə̂ kosə̂ pö ndə̂ Kpɨ̂ki Yingö! Nyë wä batə̂ araâta nyê! 52Earə̂ ndə̂ma Ndjapä nə̈bâ kä ndə̂ araâta nyê mbôâbô gbôgbô mbô tə̂ yê? Araâta nyê wön azü ndə̂ andjë tô pö ndə̂kə̂ nə ndə̂ djîrə̂ akrə alême. Angaâtə, nyënyê kä ndə̂ âyôsə̂ djîrə̂ akrə nə̈ ânyë andjë wôn tchë! 53Nyë gbö ndïɛ̈ ndə̂ Ndjapä alême lə̂ köbosə̂ aânje#7.53 Lə̂ köbosə̂ ndə̂ma pö ndə̂ ajuîfu, bhâlə̂ küma aga ndə̂ Sinayï, Ndjapä nyïsə̂ ndïɛ̈ ndə̂ yê sə̈ Möyîze lə̂ köbosə̂ ânje. Nyë dɨ̈ Gal 3.19; Ahe 2.2., praâbalë nyë mbôâbo rə gundə̂sə̂ ndïɛ̈ nə̈-a!»
Kuzü Etîêne
54Ndə̂ azü ndə̂ Gbölö Kpûlû ndə̂ a-earə̂ kə̂ wa ngbanga nə̈ djê pö nə̈, mêrâ mbô andjê ânyë andjë zɨ̂ tchə̂lə̂ da jï andjê tə̂ Etîêne. 55Praâbalë Kpɨ̂ki Yingö sɨ̂ Etîêne; tche wûn tchô atə̂ lafô kə̈ wûn golowäre ndə̂ Ndjapä ndjë la Jezü ndə̂ tche krʉ̂ də ndôkö könô Ndjapä. 56Tche tö rə̂ päkëdə̂: «Më wün tchêlafô ndə̂ âkrô, ânyë kə̈ wûn Modô ndə̂ Akrə ndə̂ tche krʉ̂ də ndôkö könô Ndjapä!» 57Azü nə̈ tâ wârə̂ ngbôô, kə̈ gʉ̂â tü andjê kə̈ tû gbûgbudu gbɛ̂ ëpâ Etîêne. 58Andjë gbɨ̂tɨ tchë, kə̈ wûtu la tchë lə̂ gbölö gö nə̈, kə̈ nyê tchë la täme. Azü ndə̂ andjë nyê Etîêne la täme lə̂ ngbanga lâme, andjë zû alə̂ba tə̂ andjê gbɛ̂ kə̈ kʉ̂ rə̂ ndrotə̂ ngâ bechë-ɛ̈köchë ndə̂ rə̈ yê wû pä Sôlo. 59Ndə̂ andjë nyê Etîêne la täme, tche tô pö sə̈ Ndjapä päkëdə̂: «Gbölö Gbïɛ̈ Jezü, amö za vrö mê!» 60La tchêngbâ nə̈ tche gʉ̂te ëbêche ânyë kə̈ ôn ngbôô kə̈ tô rə̂ päkëdə̂: «Gbölö Gbïɛ̈, amö ko pö lə̂ küma andjê!» La tchêngbâ pö nə̈ lâme, tche tchû-î.
Currently Selected:
Abadjângele 7: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
