Abadjângele 11
11
Pîêre nyîsə̂ tchêngbâ arə nə̈ bhâ Jerûzalêmo
1 Abadjângele la arə̂mâ lə̂ Krîsiti ndə̂ andjë mbô gö bhâ Judë djê rə̂ pä, azü ndə̂ andjë wâbô wâtə̂ ajuîfu gämba pö Ndjapä. 2Ndə̂ Pîêre kângbâ yê atə̂ Jerûzalêmo, azü ndə̂ andjë wâ gasa sə̂ lakə̂ gama andjê la tchë, 3andjë tö rə̂ päkëdə̂: «Mo lï bhâ tchâalê ndə̂ azü ndə̂ andjë wâbô gasa wâ ânyë kə̈ zɨ̂ rə la andjê!» 4Käko Pîêre nyîsə̂ rə ndə̂ âmbô balë balë sə̈ andjê lakə̂ to rə̂ päkëdə̂: 5«Më sə̈ lakə̂ to pö sə̈ Ndjapä bhâlə̂ gö ndə̂ Jopë kə̈ wûn ngâ rə batə̂ lü. Më wûn ngâ rə ndə̂ âkʉ̂ gbölö tchêla kʉ̈kʉ̂-lə̂ba ndə̂ a kʉ̂ manə̈ voanə̈, ätö bhâ lafô kə̈ jrê atə̂ bêche, kə̈ nə̂, kə̈ krʉ̂ ndrotə̂ mê. 6Më âsə̈ cheko rə̂, kə̈ wûn agia tchêbêche la da andjê voanə̈ la agia güsü la andjanə̈ ndə̂ andjë hro la anyïɛ̈nə̈ tchêlafô. 7La tchêngbâ nə̈, më djê tchə̂lə̂ ngâ gɨ̈ ndə̂ âtô rə̂ sə̈ mê päkëdə̂: ‹Pîêre alafô, kə̈ wôn rə̂, kə̈ zɨ̂ rə̂!› 8Praâbalë më tô rə̂ päkëdə̂: ‹Âdə̂âbo käko balë-a Gbölö Gbïɛ̈! Ngâ rə kâkpö âdəndjë rə ndə̂ ndïɛ̈ kôsə̂ nə̈ lîâbo ma mê lo balë-a!› 9Tchə̂lə̂ gɨ̈ nə̈ bhâ lafô lâme kâ tô rə̂ tə̂ bïchuû nə̈ päkëdə̂: ‹Rə ndə̂ Ndjapä dɨ̂ rə̂ tə̂ tchôtchô nə̈, amö wun-abô rə̂ wûn batə̂ ngbongbo rə-ê.› 10Rə nə̈ wütu käko sûsunə̈ vötaâ, pânə̈ a kênga la rə̂ gbɛ̂ atə̂ lafô. 11Posə̂nə̈, angâ aköchë vötaâ tô bhâ Sezarë, a wän andjê sə̈ mê, ânyë andjë wûtu bhâ sə̂nə̈ ndə̂ më lô tâ. 12Kpɨ̂ki Yingö tô rə̂ sə̈ mê päkëdə̂: ‹Amö gûgü la andjê, âwâbo pä mo wa la su bïbïchuû-a.› Arə̂mâ ndə̂ Jopë mïndûu manə̈ balë ndə̂ nyê wun andjê âtə, ârâ päla la andjê kə̈ lî bhâ tchâalê ndə̂ Körönɛ̈ye. 13Tche tô tchêngbâ pö pâ ânje ndə̂ tche wûn tchë ndə̂ tche krʉ̂ bhâ tchâalê ndə̂ yê sə̈ ârâ. Ânje nə̈ tô rə̂ sə̈ tchë päkëdə̂: ‹Amö wan ngâ akrə bhâ Jopë ndə̂kə̂ e Chemön, ndə̂ ngâ rə̈ yê wû pä Pîêre. 14Tchê toadje ngâ pö sə̈ mö ânyë lə̂ köbosə̂ pö nə̈, momö la azü lə̂ bûngrɨ̂ ndə̂ zə̈ gbɛ̂ nyê tchadje lə̂ kuzü.› 15Sə̂nə̈ ndə̂ më jêtə̂ kə̂ to pö nə̈, Kpɨ̂ki Yingö jrê pâ andjê batə̂ rə̂ ndə̂ âjrê pâ azə̂ lə̂ kêsâ nə̈. 16Käko sə̂ pö ndə̂ Gbölö Gbïɛ̈ tô rə̂ alême tê lə̂ mê: ‹Jâan zä batɛ̂me ndə̂ ngû, praâbalë nyê gboadje batɛ̂me ndə̂ Kpɨ̂ki Yingö.› 17Käko Ndjapä kʉ̈ rə sə̈ andjê tiî batə̂ arə ndə̂ Yingö kʉ̂ rə̂ sə̈ azə̂, sə̂nə̈ ndə̂ azə̈ zâ su azə̂ sə̈ Gbölö Gbïɛ̈ Jezü Krîsiti lâme. Käko më də̈ tchabâ ndə̂kə̂ kitə̂ köbo tə̂ Ndjapä ndə̂kə̂ mbo rə ndə̂ tche nyîndə̂ kə̂ mbo rə̂?» 18Ndə̂ andjë djê pö nə̈, andjë ngbô ma andjê tâ ânyë kə̈ sə̂ lakə̂ voga Ndjapä päkëdə̂: «Ndjapä zä ndjë köbo sə̈ azü ndə̂ andjë wâbô wâtə̂ ajuîfu ndə̂kə̂ gbotə̂ bəndɨ kə̂ mbo rə ndə̂ andjê, ânyë kə̂ gbo tchîsûwu!»
Egilîze ndə̂ Äntïyôche
19La tchêngbâ kuzü Etîêne, a mbö gbôgbô tə̂ azü ndə̂ Jezü ânyë andjë krʉ̂ tchə̂lə̂ tə̂ andjê katchôgbɛ̂. Andjë krʉ̂ tchə̂lə̂ tə̂ andjê lə̂ gö ndə̂ Fenisï, la Chîpre, la Äntïyôche. Praâbalë andjë mü pö kütû sə̈ ajuîfu. 20Dëkë, angânə̈ lə̂ gûtə̂ andjê ndə̂ andjë də̂ azü gö ndə̂ Chîpre la Sïrêne, andjë ê atə̂ Äntïyôche kə̈ mû ndjë Tchôtchô Pö ndə̂ Gbölö Gbïɛ̈ Jezü sə̈ agerêke. 21Gbôgbô ndə̂ Gbölö Gbïɛ̈ kä la andjê, ârə̂ kä ndə̂ âmbô rə̂ pä angbängbä azü kâ pu Gbölö Gbïɛ̈ lakə̂ za su andjê sə̈ tchë. 22Ndə̂ azü ndə̂ Egilîze ndə̂ Jerûzalêmo djê pö ndə̂ rə ndə̂ âmbô lâme, andjë wân Bärnäbâse bhâ Äntïyôche. 23Ndə̂ tche wûtu bhâye, tche wûn rə̂ ndə̂ Ndjapä mbô tchôtchô su tə̂ azü nə̈. Tche wâ la mômô, ânyë kə̈ zâ wängö sə̈ andjê ndə̂kə̂ pa andjë za su andjê gbɛ̂ lakə̂ sə kpô ngbâ Gbölö Gbïɛ̈ logbɛ̂. 24Bärnäbâse də̈ tchôtchô akrə, tche sɨ̂sɨ̈ la Kpɨ̂ki Yingö, kə̈ gê lə̂ kə̂ za su sə̈ Ndjapä. Kpûlû azü zâtə̂ andjê gbɛ̂ sə̈ Gbölö Gbïɛ̈.
25Pânə̈ Bärnäbâse ê atə̂lə̂ gö ndə̂ Târese ndə̂kə̂ pu Sôlo. 26Ndə̂ tche gbô tchë, tche kâ la tchë atə̂ Äntïyôche. Lə̂ ngû balë, andjë bïchuû gbɛ̂ mbô kua lə̂ Egilîze nə̈ lakə̂ nyisə̂ rə sə̈ angbängbä azü. Bhâ Äntïyôche kä ndə̂ azü ê rə̂ tə̂ adjisîpili tə̂ dokʉ̈ nə̈ päkëdə̂: «Azü ndə̂ Krîsiti». 27Tə̂ngâlo, angâ a-earə̂ ndə̂ma Ndjapä tô bhâ Jerûzalêmo kə̈ nə̂ atə̂ Äntïyôche. 28Ngânə̈ balë lə̂ gûtə̂ andjê ndə̂ rə̈ yê wû pä Ägäbûse, Kpɨ̂ki Yingö nyîsə̂ nə̈ sə̈ tchë, ânyë tche tô rə̂ päkëdə̂: «Ngâ gbölö gʉ âzadje tchêpâ cho gbɛ̂.» Gʉ nə̈ zä tchô alême gbɛ̂ sə̂nə̈ ndə̂ Kölôde wâtə̂ gbölö gbïɛ̈ pâ Rômo. 29Käko adjisîpili nyîkrə pö ndə̂kə̂ pa akrə balë balë kʉ rə gundə̂sə̂ rə ndə̂ tche wâ la rə̂, ânyë andjë zâ könô sə̈ arə̂mâ ndə̂ Krîsiti ndə̂ andjë sə̂ bhâ Judë. 30Andjë mbô tâ käko. Andjë wân arə nə̈ sə̈ akpôkpô azü ndə̂ Judë, tchânə̂ Bärnäbâse la Sôlo.
Currently Selected:
Abadjângele 11: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
