Abadjângele 10
10
Ngâ ânje ndə̂ Ndjapä mätə̂ yê tə̂ Körönɛ̈ye
1Ngâ köchë alême kä tâ bhâlə̂ gö ndə̂ Sezarë, ndə̂ rə̈ yê wû pä Körönɛ̈ye. Tche wätə̂ kabïta ndə̂ aturûgu ngbangbo balë ndə̂ âwâ lə̂ gbölö kpûlû ndə̂ aturûgu ndə̂ rə̈ nə̈ wû pä «Kpûlû aturûgu ndə̂ Italï.» 2Tche zätə̂ yê gbɛ̂ sə̈ Ndjapä, kə̈ kpê wa yê, tchetchë la azü tchâalê ndə̂ yê. Tche kʉ̈ arə tə̂ gbölösə̂nə̈ sə̈ a-earə̂ yûkü ndə̂ andjë sə̂ lə̂ gûtə̂ ajuîfu, kə̂ to pö sə̈ Ndjapä logbɛ̂. 3Tə̂ngâlo, lə̂ dalo vötaâ la tchêngbâ ngbɛ̂ngbɛ̂ lo#10.3 Dalo lâme də̈ ngâ dalo ndə̂ ajuîfu to pö sə̈ Ndjapä., ndə̂ tche âsə̈ to pö sə̈ Ndjapä, ngâ ânje ndə̂ Ndjapä wûtu tchâtchu yê, tche wûn tchë kraâ batə̂ kə̂ wun lü. Ânje nə̈ ê tchë päkëdə̂: «Körönɛ̈ye!» 4Gbô la Körönɛ̈ye kä lakə̂ wun ânje nə̈; wawa mbô tchë ânyë tche tô rə̂ päkëdə̂: «Giamâ kä, Gbölö Gbïɛ̈?» Ânje nə̈ tô rə̂ ndə̂nə̈ sə̈ tchë päkëdə̂: «Apö ndə̂ mo tô rə̂ sə̈ Ndjapä la arə ndə̂ mo kʉ̂ rə̂ sə̈ a-earə̂ yûkü lâme, tche nyîndə̂ nə̈ nə̂, sə̂nə̈ yûâbo tə̂ yê-a. 5Angaâtə, amö wan angâ azü bhâlə̂ gö ndə̂ Jopë#10.5 Ädə̈ ngâ gö ndə̂ âwâtə̂ maga gbölö ngû ndə̂ Mediteranë, ndə̂ abatöo krʉ tchê tâ. Tchə̂lə̂ gbâtə̂ nə̈ la Sezarë gü kïlömɛ̂tere tə̂ azü bïchuû la lə̂ könô gbɛ̂. ndə̂ âwâtə̂ maga gbölö ngû ngbro, ndə̂kə̂ ka la ngâ köchë ndə̂ rə̈ yê wû pä Chemön ndə̂ ngâ rə̈ yê wû pä Pîêre. 6Pîêre nə̈ sə̈ bhândə̂ ngâ köchë ndə̂ rə̈ yê wû ndjë pä Chemön, ndə̂ tche mbo kua ndə̂ kpoto agia. Nda ndə̂ yê wätə̂ maga gbölö ngû ngbro.» 7La tchêngbâ nə̈ ânje ndə̂ tche tô pö lâme rô etə̂. Körönɛ̈ye ê a-earə̂ kua ndə̂ yê bïchuû la ngâ turûgu balë ndə̂ tche sə̂ tchâtchâ yê ndə̂nə̈ gû. Turûgu lâme kpë wa Ndjapä. 8Körönɛ̈ye tô tchêngbâ pö ndə̂ arə gbɛ̂ ndə̂ âwûtu sə̈ andjê, ânyë kə̈ wân andjê atə̂ Jopë.
Pîêre wün küma yê bhâ Jopë
9Lö balë la tchêngbâ nə̈, ndə̂ gbô andjê sə̂ po lə̂ köbo, kə̈ wûtu ndola Jopë, Pîêre â dələ̂ ngâ tchô ndə̂ âwâ dəpâ nda ndə̂kə̂ to pö sə̈ Ndjapä. Sə̂nə̈ lâme dalo wä ndola gûgû tchə̂lə̂ɛtchô. 10Gʉ nyû tchë ânyë tche nyîndə̂ kə̂ zɨ rə. Ndə̂ gbô andjê sə̂ lakə̂ fa kɨ̈zɨ̂ sə̈ tchë, ngâ rə nə̂ sə̈ tchë batə̂ lü. 11Tche wûn tchêlafô ndə̂ âkrô, ngâ rə batə̂ gbölö kʉ̈kʉ̂-lə̂ba ndə̂ a kʉ̂ manə̈ voanə̈ gbɛ̂ ânyë âsə̂ lakə̂ jre atə̂ bêche. 12Lə̂ kʉ̈kʉ̂-lə̂ba nə̈, agia la da voanə̈ gbɛ̂ kä lə̂nə̈ la andjanə̈ ndə̂ andjë hro pâ cho la anyïɛ̈nə̈ tchêlafô. 13Ngâ tchə̂lə̂ gɨ̈ tô rə̂ sə̈ tchë päkëdə̂: «Pîêre, alafô kə̈ wôn rə̂ kə̈ zɨ̂ rə̂!» 14Pîêre tô rə̂ ndə̂nə̈ päkëdə̂: «Âdə̂âbo käko-a, Gbölö Gbïɛ̈! Më zɨ̂âbo kɨ̈zɨ̂ ndə̂ ndïɛ̈ kôsə̂ nə̈-a, âdəndjë kâkpö kɨ̈zɨ̂-a#10.14 Nyë dɨ̈ Lev 11.1-47; Ezk 4.14..» 15Tchə̂lə̂ gɨ̈ nə̈ kä tô rə̂ sə̈ tchë tə̂ bïchuû nə̈ päkëdə̂: «Rə ndə̂ Ndjapä mbô rə̂ pä äwatə̂ tchôtchô nə̈, âwâbo pä mo wun rə̂ tə̂ ngbongbo rə-a.» 16Rə nə̈ wûtu käko sûsunə̈ vötaâ ânyë kpro la tchêngbâ nə̈, âkênga atə̂ lafô.
17Pîêre zâ küma yê tə̂ rə ndə̂ tche wûn rə̂ lâme tʉrʉ-ê, lakə̂ yutə̂ yê la tə̂ yê tə̂ dju lü ndə̂ tche wûn rə̂ lâme. Dëkë sə̂nə̈ lâme, azü ndə̂ Körönɛ̈ye wân andjê lâme sə̈ âmaɛ lakə̂ yukû nda ndə̂ Chemön, andjë wûtu kə̈ krʉ̂ lə̂ manda nə̈. 18Andjë sə̂ lakə̂ e tchô lakə̂ yukû nə̈ päkëdə̂: «Chemön ndə̂ ngâ rə̈ yê wû pä Pîêre lâme lö tchâtə?» 19Dëkë, gbô Pîêre kä lakə̂ za küma yê pâ lü lâme, Yingö tô rə̂ sə̈ tchë päkëdə̂: «Wunsaâ, aköchë vötaâ kä tchâtə lakə̂ pu mö. 20Alafô angaâtə kə̈ jrê, nyë gû la andjê etə̂. Âwâbo pä mo gu la andjê la su bïbïchuû-a, bëte mëmê kä ndə̂ âwân andjê.» 21Pîêre jrê kə̈ wûtu ëtə̂ andjê, ânyë kə̈ tô rə̂ sə̈ andjê päkëdə̂: «Mëmê ndə̂ nyê pu mê lâme kä âtə, nyë nə̈ atə̂ndə̂ mê bëte giamâ?» 22Andjë tô rə̂ ndə̂nə̈ sə̈ tchë päkëdə̂: «Kabïta Körönɛ̈ye ndə̂ tche sə̂ pâ aturûgu ngbangbo balë kä ndə̂ âwân ârâ. Tche də̈ djîrə̂ akrə, kə̈ kpê wa Ndjapä, ajuîfu gbɛ̂ tö tchôtchô pö ndə̂ yê. Ngâ ânje ndə̂ Ndjapä yükû nə̈ la gbôgbô sə̈ tchë, ndə̂kə̂ e mö pä mo e bhândə̂ yê, ânyë tche dje apö ndə̂ mo to rə̂ sə̈ tchë.» 23Pîêre lî la andjê bhâ tchâalê ndə̂kə̂ nyikrə sə̂ lö sə̈ andjê.
Ndə̂ tchô krâ, Pîêre la azü vötaâ lâme âlafô ndə̂kə̂ gu, tche pâla la angâ arə̂mâ ndə̂ Krîsiti ndə̂ andjë sə̂ bhâ Jopë. 24Lö balë la tchêngbâ nə̈, tche wûtu bhâ Sezarë. Ndə̂ Körönɛ̈ye sə̂ lakə̂ krʉ bëte andjê, tche ê angâ azü lə̂ gbölö mawo ndə̂ yê la angâ araagü nə̈ ndə̂ tche nyîndə̂ andjê tə̂ gbölösə̂nə̈. 25Sə̂nə̈ ndə̂ Pîêre âsə̈ li bhâye, Körönɛ̈ye nə̂ kə̈ tâkpa la tchë. Tche gʉ̂te gbrodje tchâtchâ yê lakə̂ lusə̂ yê. 26Praâbalë Pîêre kênga tchë ëlafô, kə̈ tô rə̂ sə̈ tchë päkëdə̂: «Alafô, bëte mëmê ndjë gbɛ̂ më də̈ mbämbä akrə.» 27Tchetchë la Körönɛ̈ye sə̂ lakə̂ to pö lə̂ ma andjê ânyë kə̈ lî atə̂ tchâalê. Pîêre wûn angbängbä azü ndə̂ andjë pâlatə̂ andjê. 28Tche mû pö sə̈ andjê päkëdə̂: «Nyë wûnsə̂ nə̈ nə̂ gbɛ̂ päkëdə̂: Ndïɛ̈ zâbo köbo sə̈ ngâ juîfu ndə̂kə̂ mbo agü la ngâ akrə ndə̂ ngâ gö ngbî, âdəndjë ndə̂kə̂ li bhâ tchâalê ndə̂ yê-a. Praâbalë andə̂ me nə̈, Ndjapä nyïsə̂ nə̈ sə̈ mê pä, âwâbo pä më wun akrə batə̂ ngâ rə kâkpö-a, âdəndjë ndə̂kə̂ kosə̂ kə̂ sə la tchë-a. 29Bëte rə̂ kä, sə̂nə̈ ndə̂ nyë wân tchô ndə̂ mê, më âbolafô la su bïbïchuû ânyë kə̈ nə̂ âtə-a. Ndə̂ azə̈ sə̂ âtə, më nyində̂ kə̂ wunsə̂ nə̈ pä nyë wän tchô ngbâ mê bëte giamâ?» 30Körönɛ̈ye tô rə̂ ndə̂nə̈ päkëdə̂: «Âmbô lö vötaâ angêta nə̂, dalo wä ndjë alême batə̂ anə̈ âtə, lə̂ dalo vötaâ la tchêngbâ ngbɛ̂ngbɛ̂ lo, më sə̂ lakə̂ to pö sə̈ Ndjapä bhâ tchâalê ndə̂ mê. Kpro kâkë, ngâ köchë ndə̂ kʉ̂tê alə̂ba ndə̂ yê sə̂ lakə̂ tcho nə̂ kə̈ krʉ̂ tchâtchu mê. 31Tche tô rə̂ sə̈ mê päkëdə̂: ‹Körönɛ̈ye! Ndjapä djê apö ndə̂ mo tô rə̂ sə̈ tchë lâme nə̂. Atchôtchô arə ndə̂ mo kʉ̂ rə̂ sə̈ a-earə̂ yûkü lâme, sə̂nə̈ yûâbo tə̂ yê-a. 32Amö wan ngâ akrə bhâ Jopë ndə̂kə̂ e Chemön, ndə̂ ngâ rə̈ yê wû pä Pîêre. Tche sə̈ bhândə̂ ngâ Chemön ngbî ndə̂ tche mbo kua ndə̂ kpoto agia. Nda ndə̂ yê wätə̂ maga gbölö ngû ngbro.› 33Posə̂nə̈, më wân azü sə̈ mö ndə̂kə̂ e mö. Mo mbö tchôtchô su ânyë kə̈ nə̂ âtə. Ndə̂ azə̈ sə̂ âtə, azə̈ kä gbɛ̂ tchâtchâ Ndjapä, ârâ krʉ̈ ndə̂kə̂ dje pö ndə̂ Gbölö Gbïɛ̈ zâ rə̂ sə̈ mö ndə̂kə̂ to rə̂ sə̈ ârâ.»
Pîêre mü pö bhâ tchâalê ndə̂ Körönɛ̈ye
34Pîêre zâ pö kə̈ tô rə̂ päkëdə̂: «Tə̂ lëge nə̈, më wûnsə̂ nə̈ nə̂ pä Ndjapä nyïndə̂ azü gbɛ̂, kə̈ sə̂âbo dəndə̂ ngâ akrə balë-a. 35Âdə ngâ akrə âkpe wa Ndjapä, ânyë kə̈ wâtə̂ djîrə̂ akrə, âdəndjë rə̂ ndə̂ tche də̂ akrə ndə̂ ngâ gö ngbî, tche dâka tchâtchu Ndjapä nə̂. 36Ndjapä wän pö ndə̂ yê sə̈ azü ndə̂ Isarayële: Pö nə̈ də̈ Tchôtchô Pö ndə̂ âza zɨtɨ su sə̈ akrə lə̂ köbosə̂ Jezü Krîsiti, tchetchë ndə̂ tche də̂ Gbölö Gbïɛ̈ ndə̂ azü gbɛ̂. 37Nyë wûnsə̂ arə ndə̂ âwûtu bhâlə̂ gö ndə̂ Judë nə̂ gbɛ̂; arə nə̈ tö bhâlə̂ gö ndə̂ Galilë, la tchêngbâ batɛ̂me ndə̂ Jâan-Batîse tô pö ndə̂nə̈. 38Nyë wûnsə̂ köbo ndə̂ Ndjapä zâ gbôgbô lə̂ köbosə̂ Kpɨ̂ki Yingö pâ Jezü akrə gö ndə̂ Näzärête nə̂. Jezü nə̈ lə̂ agö katchôgbɛ̂ lakə̂ mbo tchôtchô rə. Tche jï azü gbɛ̂ ndə̂ andjë sə̂ tchâtchâ gbôgbô ndə̂ Jâbolo, bëte Ndjapä kä la tchë. 39Ârâ kä sə̂ arə gbɛ̂ ndə̂ tche mbô rə̂ lə̂ gö ndə̂ ajuîfu, ndjë la andə̂ Jerûzalêmo. Tchetchë ndə̂ a î tchë ânyë kə̈ wôn tchë bhâtə̂ yö ndə̂ gba. 40Praâbalë lə̂ vötaâ lö nə̈, Ndjapä jô tchë lə̂ kuzü. Ndjapä zâ köbo sə̈ tchë ndə̂kə̂ mâtə̂ yê kraâ. 41Tche mâbo tə̂ yê tə̂ azü gbɛ̂-a, praâbalë tche mätə̂ yê tə̂ ârâ ndə̂ Ndjapä ê ârâ dokʉ̈tchê ndə̂kə̂ pa ârâ sə sə̂ arə ndə̂ tche mbô rə̂. Ârâ ndə̂ ârâ zɨ̂ rə, kə̈ ndjô rə la tchë la tchêngbâ nə̈ ndə̂ tche jô lə̂ kuzü. 42Jezü zäma sə̈ ârâ ndə̂kə̂ mu pö sə̈ azü, kə̂ to pö ndə̂ arə ndə̂ ârâ wûnsə̂ nə̈ lakə̂ to rə̂ päkëdə̂: Ndjapä nyïsə̂ Jezü ndə̂kə̂ pa tche wa ngbanga lə̂ küma azü ndə̂ andjë sə̂ la tʉ̈rʉ̂ la andjê, la andjanə̈ ndə̂ andjë tchû. 43A-earə̂ ndə̂ma Ndjapä gbɛ̂ tö pö pâ yê päkëdə̂: Akrə ndə̂ tche zâ su yê sə̈ tchë, lə̂ köbosə̂ rə̈ yê, Ndjapä âko pö lə̂ küma yê#10.43 Nyë dɨ̈ Eza 53.5-6; Jer 31.34..»
Azü ndə̂ andjë wâbô wâtə̂ ajuîfu gbö ndjë Kpɨ̂ki Yingö
44Ndə̂ gbô Pîêre ndə̂po lakə̂ to pö nə̈, Kpɨ̂ki Yingö jrê pâ azü gbɛ̂ ndə̂ andjë djê pö nə̈. 45Ajuîfu ndə̂ andjë zâ su andjê sə̈ Krîsiti, ndə̂ andjë nə̂ la Pîêre lâme, tchə̂lə̂ küma andjê gbɛ̂ djîngɨli, bëte rə̂ ndə̂ andjë wûn rə̂ ndə̂ Ndjapä zâ ndjë Kpɨ̂ki Yingö ndə̂kə̂ jre pâ azü ndə̂ andjë wâbô wâtə̂ ajuîfu! 46Azü ndə̂ Krîsiti lâme djë azü nə̈ ndə̂ andjë sə̂ lakə̂ to pö la ama gö ndə̂ a wûn-âbô sə̂nə̈ wûn-î, lakə̂ voga gbölö ndə̂ Ndjapä. Pîêre kä zâ pö kə̈ tô rə̂ päkëdə̂: 47«Angaâtə, azü âtə gbö ndjë Kpɨ̂ki Yingö batə̂ rə̂ ndə̂ azə̈ gbô rə̂. A kä wâbo ndə̂kə̂ kitə̂ köbo tə̂ andjê ndə̂kə̂ pa andjë gbo batɛ̂me ndə̂ ngû-a.» 48Käko Pîêre zâma ndə̂kə̂ pa andjë gbo batɛ̂me la rə̈ Jezü Krîsiti. La tchêngbâ nə̈ andjë yûkû nə̈ sə̈ tchë ndə̂kə̂ sə̈ la andjê lə̂ angâ alö ânyë.
Currently Selected:
Abadjângele 10: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
