Jẹnẹsisi 12
12
Isi Nke Mmẹbụọ
Kẹ Osolobuẹ Dọn Kpọ Ebram
1Omẹgụ, Osolobuẹ nọ sị Ebram, “Hapụ alị ị lẹ ebọn ụnụ lẹ iwe nẹdi i, n'i jẹnmẹ alị m sikọ d'a ghọsị ị.
2M k'e gi i mẹmẹ okẹn alị;
m k'a gọzi i;
m k'e mẹ wẹ nụ ẹfan ị —
kẹni ị wụrụ ngọzi.
3M k'a gọzi ndị hụn gọzini i,
kanị,
onyẹ bụ ị ọnụ, a bụ m'a ọnụ.
Ịyụ kẹ ebọn ile rị elu-ụwa
k'a gha nwọnhẹn ngọzi.”
4Ebram nọ gha alị wẹ kwapụ kẹ Osolobuẹ dọn gwa a; Lọtụ nọ sọnmẹ ẹ. Ebram rị ahụa mmisẹn kwasị ọgụn-ẹtọ k'ọ gha obodo Haranị pụ. 5Ebram weri Saraị wụ nwunyẹ ẹ lẹ Lọtụ nwa-nwẹnẹ ẹ lẹ ihiẹn ile wẹ nwọn lẹ ndị ile wẹ nwọnhẹn imẹ alị Haranị, wẹ ile nọ buli, jẹnmẹ alị Kenaanị.
E ru wẹ alị Kenaanị, 6Ebram nọ ghama imẹ alị ahụn d'e ru ebahụn rị imẹ obodo Shẹkẹm — ẹhụ okẹn-osisi Mọrẹ. Ndị Kenaanị rị alị ahụn ogẹn ahụn. 7Ya kẹ Osolobuẹ nọ we enwẹn ẹ ghọsị Ebram, sị, “M k'e ye nwa ị alịnị.” Ebram nọ rụnnị Osolobuẹ ukpo wẹ n'a chụn ẹjan ebahụn — Osolobuẹ hụn we enwẹn ẹ ghọsị a.
8Omẹgụ, ọ nọ kwarịzị, jẹnmẹ azụụn mẹ oke-oke hụn rị ibẹka ọwụwa-ẹnyanwụn obodo Bẹtẹlụ. Ọ nọ tumẹ ọdụ w'e bi, ụlọ w'a kpụkpọrị, ye ẹgbata Bẹtẹlụ lẹ Aị, Bẹtẹlụ rị a azụụn ọdịdan-ẹnyanwụn, Aị rị a azụụn ọwụwa-ẹnyanwụn. Ọ nọ rụnzịnị Osolobuẹ ukpo wẹ n'a chụn ẹjan ebahụn, kpọku ẹfan Osolobuẹ.
9Ebram nọ kwasọnmẹ, jẹnkọ ẹgbẹrẹ Nẹgẹvụ.
Ebram Lẹ Saraị E Shi Alị Ijiptu
10O ru ogẹn ohu, ụnwụn nọ mụma alị Kenaanị. Ebram nọ gi ufiri ẹ kwashi alị Ijiptu d'e biri nọkẹ abịamabịa, makẹni ụnwụn hụ karị ẹka imẹ alị Kenanị.
11Ogẹn o gi chọ n'ọ banye alị Ijiptu, ọ nọ sị Saraị nwunyẹ ẹ, “A marịnghọ m nị y'a maka mma ẹhụ; 12ndị Ijiptu hụn ị tan, wẹ k'a sị, ‘Nwunyẹ ẹ rọ’; o ru ẹ, e gi wẹ ufiri mma ị gbu m, dọnmẹ yụ nwẹn ndụn. 13Gwa wẹ nwan nị nwẹnẹ m k'ị wụ, kẹn'ọ rịnị m mma makẹ ufiri i, e gizi wẹ ufiri i dọnmẹ m ndụn.”
14Ogẹn Ebram gi banhan alị Ijiptu, ndị Ijiptu a hụn a nị nwunyẹ ẹ a maka mma. 15Ogẹn ịhaịmẹ Fẹro, eze wẹ, gi hụn a, wẹ nọ ku oku ẹ ọhụnma ebe Fẹro rị; o ru, wẹ nọ webanhan a imẹ obi-eze Fẹro. 16Fẹro nọ gi ẹka rị mma sọn Ebram makẹ ufiri Saraị; Ebram nọ nwọnrinsọnmẹ atụnrụn lẹ efin lẹ okẹn jaki lẹ idibo-ikẹnnyẹ lẹ idibo-ikpoho lẹ onyẹnnyẹ-jaki lẹ anyịnyan-mkpukpuke wụ kamẹlụ.
17Kanị, Osolobuẹ nọ tụ Fẹro lẹ ndị rị obi-eze ẹ emu ichẹn-ichẹn — makẹ ufiri Saraị nwunyẹ Ebram. 18Ya Fẹro nọ zi wẹ kpọha Ebram; ọ nọ sị Ebram, “Kị wụ ihiẹnni i mẹ m? Kị haịn i gilẹni gwa m nị nwunyẹ i rọ? 19Kị haịn i gi sị, ‘Nwẹnẹ m rọ’, m gi nwan weri ẹ n'ọ wụrụ nwunyẹ m? Weri nwan nwunyẹ i, n'ị gha ebeni pụ!” 20Eze nọ gwa ndị idibo ẹ, ya wẹ nọ dupụ Ebram alị ahụn, ịya lẹ nwunyẹ ẹ lẹ ihiẹn ile o nwọn.
Currently Selected:
Jẹnẹsisi 12: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
