Iroma ENAITURUK
ENAITURUK
Ore empalai e Paulo natisiraka IROMA naa enaitobirie apa enkoitoi pee etumoki ataparana esirit naatii Roma. Ore apa yieuna enye naa kejo pee elo aasisho tenebo Ile Kristo te nkiti rishata, neitoki aikilikuan metaretu ninye meshomo enkop e Spein. Etisiraka ninye ninche ena palai aibalakinye ening'unoto enye e nkirukoto e Kristo o mbaa naaipirta enkishui oo Le Kristo. Ore ena buku nelimu te nguton inkirorot e Paulo o lkilikuai lenye.
Ore peyie eidip airoroki iltung'ana le sirit natii Roma, neliki ninche enkomono oshi naomonoki ninche, neibalie enkipirta sapuk e mpalai enye nejo, “Kelimu ilomon supati aibalunye enaikuna Enkai pee epik iltung'ana empuaan naishuyie tiatua ninye; naa to rrekie le nkirukoto, eiteru te nkiterunoto o metabaiki enkiting'oto” (1.17).
Nelo taa Paulo aitalala ina damunoto too matuan naasuju. Aa iltung'ana pooki, aa taa Ilyahudi o loreren, eyieu neitobirakini osotua o pooki te Nkai, amu enyaanyuk pooki, ketii pooki abori eng'oki. Ore iltung'ana neishori esipata ake te Nkai to rrekie le nkirukoto tiatua Yesu Kristo. Keitoki ake sii Paulo aibalie ajo ore pee eibung'are oltung'ani Yesu Kristo, neaku ena enchula ng'ejuk o Enkai. Ketum olairukoni eseriani o Enkai nelakuni ninye te ngolon oo ng'ok o keeya Enkiyang'et Sinyati. Ore too matuan (5-8), keutu Paulo enkipirta oo nkitanapat e Nkai o engolon e Nkiyang'et Sinyati e Nkai tiatua enkishui olairukoni. Enyaaka ake sii aponaa endamunoto aibalie eneikunakino Ilyahudi tenebo o iloreren enjeunoto Enkai e pooki tung'ani. Etuutua ajo ore eyanyata natanya Ilyahudi Yesu naa eyieuna natii atua Enkai pee etum ayau iloreren pooki atua enkirukoto e Nkai te mpiris e Yesu Kristo. Keiruk sii ajo metoni intarasi Ilyahudi eitu eng'amu enkirukoto e Yesu, keyooki ake aang'amu ninye. Ore enabayie etuutua Paulo enaishiaakino nesuj olairukoni te nkishui enye e anaake, eisulaki ninye enkoitoi enyorrata tiatua ilalashera o nkanashera. Eibalie imbaa anaa enkisiaayiare e Nkai, enaishiaakino olairukoni neas te nkaraki enkitoria o mbaa naaipirta olairukoni o likae, o mbaa enkiguana o ltau. Eikeno empalai enye too lkiliku le nkorrok enye o rorei le nkisisa te Nkai.
Iorot oo Matuan
Enkiterunoto oo lomon o enkipirta e mbuku 1.1-17
Eyieunoto e tung'ani e njeunoto 1.18–3.20
Enkoitoi e Nkai e njeunoto 3.21–4.25
Enkishui ng'ejuk tiatua Kristo 5.1–8.39
Olosho loo Siraeli tiatua inkitobirat e Nkai 9.1–11.36
Olkuaak lo lairukoni 12.1–15.13
Enkikenoto o enkirorokino 15.14–16.27
Currently Selected:
Iroma ENAITURUK: BIBLIAPRO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2018