Iroma 10

1Ilalashera laainei, ore enayieu oleng oltau lai o enkomono ai te Nkai te ninche naa pee eitajeuni. 2Kara nanu shakeni te ninche nchere keeta Siraeli olokiyo kitok te Nkai, kake mewang eyiolounoto. 3Amu ore te nkaraki nemeyiolo esupatisho naa Enkai eing'uaa, nejo ninche maing'oru enenye naitasheyie, neaku eitu eisho meitoria esupatisho naing'uaa Enkai. 4Amu eitabayie Kristo enajo nkitanapat, peyie aa ore pooki ng'ae oata enkirukoto neisho Enkai ninye esipata.

Ene pooki ng'ae enjeunoto

5 # Ilaw 18.5 Eigero Musa ajo, “Ore oltung'ani oitabaya esupatisho naibalieki too nkitanapat, neishuyie ina supatisho.” 6#Enkig 30.12-14Kake inji ejo esupatisho naa enkirukoto eimu, “Nimijo to ltau lino, ae ng'ae oilep alo keper?” Eji, alo aitadou Kristo enkop, 7aashu “Ae ng'ae odoyio alo olodo le nkop?” Eji, ailepunye Kristo too lootuata. 8Kake kejo aa? “Kinyikita ilo rorei, enkutuk ino etii, netii oltau lino,” eji, ilo rorei le nkirukoto likilikioo; 9amu ti nimbalunye iyie te nkutuk ino nchere Yesu Olaitoriani, niruk sii to ltau nchere eitopiwuo Enkai ninye aitung'uaa ilootuata, nikintajeuni. 10Amu to ltau eiruk oltung'ani neaku teina eishori sipat, nelimu te nkutuk enye neitajeuni teina. 11#Isa 28.16Ejo Lkigerot, “Meetae hoo oloiruk ninye oitukurruni.” 12Amu meeta enepaashare Ilyahudi o Lgiriki; ilo Aitoriani obo Olaitoriani le pooki naa ninye oitadoiki enkarsisisho enye lelo pooki ooipot ninye. 13#Yoe 2.32Amu, “Ore pooki ng'ae oipot enkarna o Laitoriani naa keitajeuni.”

14Kake amaa, kaji eiko iltung'ana te neipot ilo leitu eiruk? Naa kaji eiko te neiruk ninye oleitu aekata elikini metoning'o? Naa kaji eiko te nening meeta olalikioroni? 15#Isa 52.7Naa kaji eiko tenelikioo eitu eirriwari, “Kebaa esidano oo nkejek e lelo ooyau lomon supati.” 16#Isa 53.1Kake mme pooki ootishilaitie lelo omon supati; amu ejo Isaya, “Olaitoriani, aing'ae oiruko inaatoning'o te iyiook?” 17Neaku nena naaning'i eimu enkirukoto, ore ina naning'i naa elikioroto e Kristo.

18 # Olk 19.4 Kake kaikilikuanu nanu ajo, keitu doi ening ninche? Keibala ajo etoning'o; amu, “Eshomo oltoilo lenye enkop pooki, nepuo irorei lenye ineeiting'ie enkop.” 19#Enkig 32.21Naitoki ake nanu aikilikuanu ajo, keitu pasa ening'u Siraeli? Musa oitera ajo, “Kapik intae olom too ltung'ana leme olosho; naitagor intae to olosho omoda.” 20#Isa 65.1Nenyaaka Isaya ajo te mpijan, “Aanotito lelo leitu aaing'oru nanu, naitoduaayie kewan te lelo leitu aaikilikuanu nanu.” 21#Isa 65.2Kake etejo ninye tialo Siraeli, “Aitorioko inkaik aainei endama pooki ailejileju ltung'ana lemening'isho naatanyaita nanu.”

Currently Selected:

Iroma 10: BIBLIAPRO

Highlight

Copy