Marko 8

Eitotio Yesu iltung'ana inkalifuni ong'uan

(Mat 15.32-39)

1Ore te nena olong'i, enyaaka olorora kitok asoto, nemeeta entoki nanya, neipotu Yesulkipaareta lenyena nejoki ninche, 2“Kaata olng'ur tele orere, amu nkolong'i uni taata aaisiritore nanu nemeeta entoki nanya. 3Naa te najoki meshomo nkang'itie enye, neiterriaa te nkoitoi; neetuo kulikae eing'uaa enelakua.”

4Newaliki lkipaareta lenyena aajoki, “Kaji eiko oltung'ani te neitoti kulo tung'ana too mukateni te ne ti ong'ata?” 5Neikilikuan Yesu ajoki, “Kaja mukateni niatata intae?” Nejoki, “Naapishana.”

6Neitanapisho metotona ltung'ana te nkop, nedumu nena mukateni naapishana, ore pee eisho Enkai enashe nebelibel neisho lkipaareta lenyena meitarasaki olorere. Neitarasaki ninche ilo orora. 7Neeta sii lkuti sinkir kutiti. Ore pee emayian, neitanapisho meitarasari sii ninche lelo aaisho olorere. 8Nenya, neraposho. Nesotuni lmong'oishi ootelekuaki, nkikapuni naapishana naabore. 9Nebaya lelo tung'ana nkalifuni ong'uan. 10Neitanap Yesu meshomo ang; nejing ninye nabo kata atua empeut te nebo lkipaareta lenyena, nepuo enkalo olkerenket le Dalmanuta.

Eetuo Ilfarisayo aayie Yesu olmonekie

(Mat 16.1-4)

11 # Mat 12.38; Lk 11.16 Nepuonu Ilfarisayo, aaishankarrarre Yesu aayie olmonekie oing'uaa keper aatem.

12 # Mat 12.39; Lk 11.29 Neitadoiyio Yesu oltau te nguton, nejo, “Kainyoo pee eing'oru kulo tung'ana le na kata olmonekie oing'uaa keper? Esipa, ajoki intae, meetae hoo olmonekie oishori ltung'ana le na kata.” 13Neing'uaa Yesu ninche, neitoki ajing empeut nelo olikae kekun.

Enkaisuishoi oo Lfarisayo o ene Herode

(Mat 16.5-12)

14Netorikine lkipaareta eitu eyau mukateni; neaku emukate nabo ake eeta tiatua empeut. 15#Lk 12.1Neitanap Yesu ninche ajoki, “Entorrip ate te nkisuisho oo Lfarisayo o te nkisuisho e Herode.” 16Neiguana maate aajo, “Mukateni mikiaata.” 17Neyiolou Yesu ina, nejoki ninche, “Kainyoo pee ijokinono eji miatata mukateni? Keton ake mejing'aa intae naa aimining'ung'u? Kaji etiu pee egol intae ilukuny? 18#Yer 5.21; Esek 12.2; Mk 4.12Aimidolidolo niatata nkonyek? Niatata nkiyiaa aimining'ishosho? Aimidamumu? 19Amaa pee abel imukateni imiet abelaki ltung'ana nkalifuni imiet, kaja nkikapuni oo lmong'oishi naabore nitasotutuo?” Nejoki, “Tomon o aare.” 20“Oo napa naapishana natebelaka nkalifuni ong'uan: kaja nkikapuni naabore oo lmong'oishi nitasotutuo?” Nejoki, “Naapishana.” 21Nejoki Yesuninche, “Neton ake intae mining'ung'u?”

Olmodooni otaboloki nkonyek te Betsaida

22Nepuonu Betsaida. Nerikokini Yesu olmodooni, aaomon meiseyie. 23Nerik ilo modooni aibung enkaina, neipung'ie teina ang. Ore pee enotaki nkonyek enyena, neiteleiki nkaik, neikilikuan ajoki, “Idol toki?” 24Neshumu nkonyek nejo, “Kadol iltung'ana; kake etiu anaa lkeek, epuoito.” 25Neitoki ake Yesu aiteleiki nkonyek enyena nkaik, neing'orisho ninye oleng neishiu, nedolishoyu aitobiraki. 26Neisho elo ang, nejoki, “Nimirrinyo ake ajing ena ang.”

Etolimuo Petero Yesu

(Mat 16.13-20; Lk 9.18-21)

27Nelo Yesu o lkipaareta lenyena, nkang'itie e Kaisaria e Filipi. Ore epuo te nkoitoi neikilikuan Yesu lkipaareta lenyena ajoki, “Kejo iltung'ana kara nanu ng'ae?” 28#Mk 6.14,15; Lk 9.7,8Nejoki ninche ninye, “Yohana Olaibatisani, nejo kulikae, Eliya; nejo sii kulikae ira obo loo lapa oibonok le Nkai.” 29#Yhn 6.68,69Neikilikuan Yesu ajoki, “Kake amaa intae, nijojo kara ng'ae?” Newaliki Petero ajoki, “Ira iyie Kristo.” 30Neitanap ninche pee meliki likae tung'ani.

Etolimuo Yesu keeya o empiunoto enye

(Mat 16.21-28; Lk 9.22-27)

31Neiteru Yesu aiteng'en ilooteng'eni lenyena ajoki meeta nchere pee meisilisili Enkerai e Tung'ani too mbaa kumok neany ilpayiani o lapolosak kituaak o lasirak, neari metua, ore pee elusoo nkolong'i uni neitoki apiu. 32Nelimu ina aibalunye. Nerik Petero ninye neiteru aisikong. 33Kake eibelekenye Yesu ore pee edol lkipaareta lenyena, neing'ode Petero, nejoki, “Shomo kurum ai Sheitani! Amu mitii iyie enkalo e Nkai, kake enoo ltung'ana itii.”

34 # Mat 10.38; Lk 14.27 Neipotu Yesu olorere te nebo o lkipaareta lenyena meetu enetii ninye, nejoki ninche, “Te neyieu oltung'ani naasuj nanu, nchoo metanya inaayieu oltau lenye, nedumu osalaba lenye naasuj nanu. 35#Mat 10.39; Lk 17.33; Yhn 12.25Amu ore olojo aitopok enkishui enye neiminie; ore oloiturraa enkishui enye te nkaraki ele rorei supat, neitajeu. 36Amu ainyoo edupore oltung'ani, te netum enkop pooki neiturraa enkishui enye? 37Anaa kainyoo einosie oltung'ani enkishui enye? 38Amu ore olodol enkurruna te naaimaki nanu aashu ororei lai tena ishoi oo ng'ok naloloito nedol sii ninye Enkerai e Tung'ani enkurruna eimaki ninye teina olong elotu te nkitoo e Menye eiriamunore ilmalaika sinyat.”

Currently Selected:

Marko 8: BIBLIAPRO

Highlight

Copy