Marko 1

Ilomon ootolimuo Yohana Olaibatisani

(Mat 3.1-12; Lk 3.1-18; Yhn 1.19-28)

1Nji eikununo enkiterunoto oo lomon supati le Yesu Kristo Enkerai e Nkai. 2#Mal 3.1Anaa enaigero oloiboni le Nkai oji Isaya pee ejo,

“Kairriwaa olkipaaret lai dukuya iyie, oitobir enkoitoi ino.

3 # Isa 40.3 Etii oltoilo obuaku ti ong'ata,

‘Entobiraki Olaitoriani enkoitoi,

entobiraki irrekiei ooitoriori.’”

4Neipang'u ti ong'ata Yohana Olaibatisani, nelimu enkibatisa nayau enkirridunoto neyau empalakinoto oo ng'ok. 5Nepuo enetii ninye iltung'ana le nkop pooki e Yudea, o le Yerusalem, neibatisa Yohana ninche to lkeju le Yordan eirridu ing'ok enye.

6 # 2 Ilai 1.8 Naa enkila oo lpapit e ntames eishopito Yohana neeta enkeene e mpolos, naa lmaat o naishi e ong'ata enya. 7Nelikioo ninye ejo, “Kelotu te siadi nanu ologol laalang nanu olaa kaamakua te nairrugokino alak enkeene e namuke enye. 8Aidipa nanu aibatisa intae te nkare kake te Nkiyang'et Sinyati eibatisa ninye intae.”

Enkibatisa e Yesu

(Mat 3.13; 4.11; Lk 3.21-22; 4.1-13)

9Nelotu Yesu te nena olong'i eing'uaa enkanasa e Nasaret te Galilaya, neibatisa Yohana ninye to olkeju le Yordan. 10Ore nabo kata pee eilepu Yesu te nkare, nedol pee ebolo keper nedou Enkiyang'et Sinyati eikununo anaa enturkuluo adoiki ninye; 11#Enk 22.2; Olk 2.7; Isa 42.1; Mat 3.17; 12.18; Mk 9.7; Lk 3.22nelotu oltoilo oing'uaa keper ojo, “Ira iyie Oinoti lai lanyor; atishipe te iyie.”

Etetemaki Yesu

12Ore nabo kata nerik Enkiyang'et e Nkai Yesu ong'ata. 13Nebik ti ong'ata nkolong'i artam, etemita Sheitani; neboitare ng'uesi e ong'ata; neisiaai ilmalaika ninye.

Eiterua Yesu alikioo ororei te Galilaya

(Mat 4.12-22; Lk 4.14-15; 5.1-11)

14Ore eidipaki aateen Yohana, nelotu Yesu Galilaya, alikioo lomon Supati le Nkai; 15#Mat 3.2ejo, “Etabaua enkata, netinyikua enkitoria e Nkai; erridutu, naa eruko ele rorei supat.”

Eipoto Yesu larreshok oong'uan loo sinkir

16Ore eshepita Yesu enaiposha e Galilaya, nedol Simon o Andrea olalashe le Simon enang'aki orreshet atua enaiposha; amu ilarreshok loo sinkir apa ninche. 17Nejoki Yesu ninche, “Entusujuaki pee aitaa intae ilarreshok loo ltung'ana.” 18Neing'uaa nabo kata irresheta lenye nesuj Yesu. 19Ore pee enyikaa peno, nedol Yakobo o Yohana ilayiok le Sebedayo etii atua empeut eripita irresheta. 20Neipot nabo kata; neing'uaa Sebedayo menye lenye te mpeut eboitare ilaisiaayiak nesuj Yesu.

Eishiunye Yesu oltung'ani oata oloirirua oiduruk

(Lk 4.31-37)

21Nepuo Yesu o lkipaareta lenyena aabaya Kapernaum. Ore ake pee eaku enkolong e Sabato nejing enkaji e ntumo neiteng'enisho. 22#Mat 7.28,29Neing'asiae te nkiteng'enare enye, amu eiteng'ena ninche anaa oloitore enajo, nemetiu anaa ilaigerok. 23Netii teina kata ake te nkaji enye e ntumo oltung'ani oata oloirirua oiduruk; 24nebuaku ajo, “Kainyoo iatayie iyie iyiook, Yesu le Nasaret? Iewuo aidaikie iyiook? Kaayiolo ajo ira ng'ae, ira iyie ilo Sinyati le Nkai.” 25Kake eisikong'a Yesu ninye ajoki, “Tigirayu, tupuku tung'uai ninye!” 26Nediding'unye oloirirua aiterreyie, nebuaku to ltoilo sapuk, nepuku aing'uaa.

27Neing'asia pooki, o meikilikuanata aajo, “Kainyoo ena? Enkiteng'enare ng'ejuk! Eji keitore te ngolon iloiriruani ooiduruk, nening ninche ninye.” 28Ore ina kata ake, neibulu olning'o lenye pooki wueji te nene neemanita Galilaya.

Eishiunye Yesu iltung'ana kumok

(Mat 8.14-17; Lk 4.38-41)

29Nepuku Yesu te nkaji e ntumo, nejing enkaji e Simon o Andrea, eboitare Yakobo o Yohana. 30Neirrag enkaputani e Simon emuoi oloirobi, neinosakini ninye teina kata. 31Nelotu neibung enkaina nedumu, neing'ueiki oloirobi, neinyototo aisiaai ninche.

32Ore pee eaku teipa, etadoyie enkolong, nerikokini Yesu iltamuoyia pooki o lelo ooata loiriruani. 33Nesotokino enkanasa pooki enkalo e kutuk aji. 34Neishiunye ilkumok ooata muoyiaritin oo mpukunot kumok, nearaa iloiriruani kumok; neitu eisho iloiriruani meiroro amu keyiolo ninche ninye.

Etolikioyie Yesu ilomon supati te Galilaya

(Lk 4.42-44)

35Ore enasirie, neinyototo Yesu ayok alo ewueji neliyio neomon teine. 36Neing'oru Simon o lelo ooboitare. 37Ore pee etum nejoki, “King'oru ltung'ana pooki.” 38Nejoki Yesu ninche, “Emaape kunda kulie ang'itie, pee aliki sii ninche, amu ina doi pee aewuo enkop.” 39#Mat 4.23; 9.35Neman Yesu Galilaya pooki, alikioo ilo rorei too nkajijik enye e ntumo, nearaa loiriruani.

Etisika Yesu oltung'ani oata enkeeya oo lbolot

(Mat 8.1-4; Lk 5.12-16)

40Nelotu oltung'ani oata enkeeya oo lbolot asai Yesu, negilaki kung nejoki, “Tiniyieu eikindim aishiunye matisikayu.” 41Neing'urrie Yesu, neitorioo enkaina aiseyie, nejoki, “Ekayieu, tisikayu.” 42Neing'uaa enkeeya oo lbolot nabo kata ilo tunga'ani, nesika. 43Neing'ode Yesu oleng nereu nabo kata, 44#Ilaw 14.1-32nejoki, “Toduaa ake miliki likae tung'ani; kake shomo intoduaai kewan to lapolosani; ninchooyo entoki apa naitanapishe Musa te nkisujata, pee intadedeyie to lorere.” 45Kake etupukuo ake ilo tung'ani neiteru ainosaa, aibalie ilo omoni, neaku eitu eitoki Yesu aidim atijing'a enkang eduaakini, neaku ti ong'ata eton; nepuonu ltung'ana aayiaya eing'uaa nkaloli pooki.

Currently Selected:

Marko 1: BIBLIAPRO

Highlight

Copy