Luka 22

Eiguanateki pee eari Yesu metua

(Mat 26.1-5; Mk 14.1-2; Yhn 11.45-53)

1 # Ena 12.1-27 Nenyiku osirua loo Mukateni neitu eisuishieki oji Pasaka. 2Neing'oru ake lapolosak kituaak o lasirak eneiko pee ear Yesu metua; paa olorere eure.

Eiruko Yudas pee ekaldaa Yesu

(Mat 26.14-16; Mk 14.10-11)

3Nejing Sheitani Yudas oji Iskariot, olaa obo le lelo tomon o aare; 4nedumunye alo aning'ore lapolosak kituaak o sikarini aitoriak eneiko pee ekaldaa Yesu te ninche. 5Neshipa ninche nejoki keisho mpisai. 6Nenyorraa Yudas, neing'oru erishata naitarasarie Yesu meyiolo olorere.

Eitobirakaki Yesu osirua le Pasaka

(Mat 26.17-25; Mk 14.12-21; Yhn 13.21-30)

7Nebau enkolong oo Mukateni Nemeisuishieki, ina olong nayieng'i olkuoo lo sirua le Pasaka. 8Neirriwaa Yesu Petero o Yohana, ajoki, “Enchom entobiraki iyiook Pasaka pee kitum aainosa.” 9Nejoki ninche Yesu, “Kaji iyieu nikipuo aaitobirie?” 10Nejoki, “Eng'ura, ore ijing'ijing'i ina anasa, nenang'are intae olee onapita oltoo le nkare, enturubare nijing'ijing'i enkaji najing, 11nijokiki olopeny enkaji, ‘Kitiaaka Olaiteng'enani, koree ake olgilata loo lomon, lainosie Pasaka o lkipaareta laainei?’ 12Naa keutaki intae olgilata le shumata oidipaki aaitobira; entobira teine.” 13Nepuo, neinepu etiu anaa enatiaaka; neitobiraki Pasaka.

Endaa o Laitoriani

(Mat 26.26-30; Mk 14.22-26; 1 Ilkor 11.23-25)

14Ore pee ebaya esaa, neton Yesu adaa, netoni lkipaareta lenyena te nebo ninye. 15Nejoki ninche, “Atayiewua te yieuna sapuk nanya ena Pasaka te nebo intae eton eitu aaisilisili. 16Amu ajoki intae, meekure aitoki ai kata anya o meitabari te nkitoria e Nkai.” 17Ore pee eng'amu enkikompe, neisho Enkai enashe nejo, “Entudumu ena entang'ar; 18amu ajoki intae ore ebaiki taata meekure aitoki ai kata aok ena kikombe oo lng'anayio lo sabibu o meeu enkitoria e Nkai.” 19Nedumu emukate, ore pee eisho Enkai enashe nebel neisho ninche ejoito, “Osesen lai ele oishoori te nkaraki intae. Entaas ena kidamumu nanu.” 20#Yer 31.31-34Neiko nejia enkikompe eidipa endaa, ejoito, “Ore ena kikompe, osotua ng'ejuk eitaiki intae anaa enaibukori osarge lai, te nkaraki intae. 21#Olk 41.9Kake eng'ura amu etii ilo laaitarasaa ena misa te nebo nanu. 22Amu keikunari Enkerai e Tung'ani anaa enatejoki apake; kake ee kake aiyia ilo laa ninye oitarasaa!” 23Neiteru ninche aaikilikuana maate, aajo kalo pasa oiko nejia.

Eishankarrate lkipaareta ejo kalo olkitok aisul te pooki

24 # Mat 18.1; Mk 9.34; Lk 9.46 Nepuku sii enchankar tiatua lkipaareta ejo kalo lenye oaku olkitok aisul te ninche. 25Nejoki Yesu ninche, “Eitoreisho laiguanak loo Loreren; ore lelo ooata enkitoria te ninche neji ninche ilooduporeki. 26#Mat 23.11; Mk 9.35#Mat 20.25-27; Mk 10.42-44Kake mme nejia etiu te intae; enchoo ilo kitok aisul te intae pooki metotiwuo anaa ai ninye oloti aisul, netiu olarikoni anaa olaisiaayiani. 27#Yhn 13.12-15Amu kalo olkitok, koloton te misa, anaa keilo oisiaaisho? Aime ilo oton te misa? Kake atii nanu atua intae atiu anaa oloisiaaisho.

28“Naa intae ootobiko kiboitarere too ntemat aainei 29ore anaa enaaishoo Papa enkitoria, aisho sii nanu intae aiko nejia 30#Mat 19.28pee itonini aadaa te nebo nanu te nkitoria ai, nitonini too lorikan le nkitoo aaiguanaki lelo oshon tomon o aare loo Siraeli.

Etolikio Yesu Petero nchere kelo amiki

(Mat 26.31-35; Mk 14.27-31; Yhn 13.36-38)

31“Simon, Simon, kitoomonuo iyie Sheitani neishooki pee kitum ninye aipiripiro, anaa enkano, 32kake aatoomonoko iyie pee meish enkirukoto ino, naa ore pee kishukokino, ntagolo lalashera linono.” 33Nejoki Petero, “Lo Kitok, atonyorrayie nanu pee aarubare jila aashu keeya.” 34Nejoki Yesu, “Aajoki, Petero, meru olchogoo ade taata, eitu kimiki iyie, katitin uni ajo mikiyiolo.”

35 # Mat 10.9,10; Mk 6.8,9; Lk 9.3; 10.4 Nejoki Yesu ninche, “Amaa apa pee airriwaa intae miatata mbenia oo mpisai aashu olbene aashu namuka, italaita toki?” Nejo, “Eitu.” 36Nejoki, “Kake ore ilo oata olbene inchoo eya, naa inchoo ilo lemeeta olalem emir enkila enye pee einyang'u. 37#Isa 53.12Amu meeta nchere pee eitu eitabari ele sirata te nanu ojo, ‘Amu eikenakini ninye ilwushuush;’ amu kepuonu o metimitunye inaatisiraki tialo nanu.” 38Nejo ninche, “Olaitoriani, ng'ura doi, noolo lalema aare.” Nejoki ninche, “Eidipe.”

Eshomo Yesu aomon Enkai to Idoinyo loo Loirienito

(Mat 26.36-46; Mk 14.32-42)

39Nepuku Yesu anaa enaiko apake, nelo oldoinyo loo Loirienito, nesuj lkipaareta lenyena.

40Ore pee ebaiki ine wueji nejoki ninche, “Entoomon pee mijing'ijing'i atua ntemat.” 41Nelam ninche alo enelakua peno, negil kung aomon ejo, 42“Papa, ti niyieu, torishieki ena kikompe; kake ore ake eyia mme anaa enayieu nanu, kake nchoo metotiwuo anaa eniyieu iyie.” 43Neipang'aki ninye olmalaika oing'uaa Keper, aitagol. 44Ore te nkaraki naisina neitirrish oleng aomon netiu enkinyinyiret enye edoiki enkop anaa lkituaa kitong'at lo sarge. 45Ore pee einyototo te nkomono, nelotu enetii loointeng'eni lenyena neinepu eirurate te nkaraki osina, 46nejoki, “Kainyoo pee irurara? Enyoito entoomon pee mijing'ijing'i atua ntemat.”

Eibung'aki Yesu

(Mat 26.47-56; Mk 14.43-50; Yhn 18.3-11)

47Ore eton eirorita, nelotu esiamo tenebo o ltung'ani oji Yudas, obo le lelo tomon o aare, erikito. Nenyikaki Yesu ang'utut; 48kake etiaaka Yesu, “Yudas, ai te ng'ututata intarasaa Enkerai e Tung'ani?” 49Ore pee edol lelo ooboitare enaasayu, nejo, “Olaitoriani, eikiosh too lalema?” 50Neosh obo osinka lo lapolosani kitok nedung'u enkiok e tatene. 51Kake nejo Yesu, “Entapal ena!” Neiseyie enkiok enye neishiunye. 52Neitoki Yesu ajoki lapolosak kituaak o laitoriak loo sikarini le nkaji e Nkai, o lpayiani, ooetuo aarasaki, “Amaa, eikipuonunu aarasaki anaa kara olaisimani, iatata lalema o siaren? 53#Lk 19.47; 21.37Kaboitare intae anaa ake te nkaji e Nkai, neitu kimbung'ubung'u. Kake esaa inyi ena, o engolon e naimin.”

Etomikio Petero Yesu

(Mat 26.57-58,69-75; Mk 14.53-54,66-72; Yhn 18.12-18,25-27)

54Ore pee eidip aaibung'a Yesu nerik, neitabaiki enkang o lapolosani kitok. Nesuju Petero tenelakua. 55Ore pee einoki enkima te mpolos o lkoriet netoni te nebo, neton sii ninye Petero te nebo ninche. 56Ore pee edol enkaisiaayiani ninye eton te newang neunoki enkong'u nejo, “Ore ele tung'ani keboitare oshi Yesu.” 57Kake etomikio Petero, ejo, “Na kitok, maiyiolo nanu ninye.” 58Ore te nkiti kata nedol likae nejo, “Ira sii iyie obo lenye.” Kake etejo Petero, “Eero, mme nanu.” 59Ore etulusoyie esaa nabo neitoki ake likae aitirrishaki, ejo, “Kedede keboitare sii oshi ake ele tung'ani Yesu amu Olgalilayai.” 60Kake etejo Petero, “Lo lee, maiyiolo nanu enijoito.” Ore nabo kata, eton eirorita, neru olchogoo. 61Neibelekenya Olaitoriani aing'or Petero. Nedamu Petero ororei lo Laitoriani otiaka, “Ore ade taata eitu eru olchogoo aikimiki iyie katitin uni.” 62Neipang alo aishir te mion.

Etusukenyaki Yesu neari

(Mat 26.67-68; Mk 14.65)

63Ore ina kata lelo ooibung'ita Yesu nesurdaany near ninye; 64neitoki sii aaen nkonyek neikilikuan aajoki, “Imbonu! Ai ng'ae likitoosho?” 65Nejo siib kulikae rorei kumok aayietaa ninye neinyal.

Ewaki Yesu enetii olkioma

(Mat 26.59-66; Mk 14.55-64; Yhn 18.19-24)

66Ore pee ekenyu, netumo olkioma loo lpayiani lo lorere o lapolosak kituaak o lasirak, nerik Yesu enetii olkioma lenye, nejoki, 67“Toliki iyiook tenaa keyie Kristo?.” Nejoki Yesu ninche, “Tenaliki intae, mikirukuruku; 68naa te naikilikuan intae embae nimikiwalikiki. 69Kake ore ebaiki taata keton Enkerai e Tung'ani te nkaina e tatene e ngolon e Nkai.” 70Nejo ninche, “Metaa eira doi Enkerai e Nkai?” Nejoki ninye ninche, “Intae ootejo kara.” 71Nejo ninche, “Kainyoo ai shakenisho neton kiyieu? Kitoning'okito ate eimunye enkutuk enye.”

Currently Selected:

Luka 22: BIBLIAPRO

Highlight

Copy