Enkiterunoto 32

Eterretene Yakobo peyie etumore Esau

1Nedumunye Yakobo alo arrinyo enkop enye, nenang'are ilmalaika le Nkai ninye. 2Ore peyie edol Yakobo ninche, nejo, “Enjore e Nkai ena!” Neipot enkarna eine ajo Mahanaim#32.2 Mahanaim: Eutu te nkutuk oo Lbrania ajo “Ilng'oborri”.

3Neirriwaa Yakobo ilkiliku meituruko aapuo enetii olalashe lenye Esau te nkop e Seir, natii enkop e Edom. 4Neitaarriyian ninche nejoki, “Inji intae enchom entiaaki olkitok lai Esau inji ejo olaisiaayiani lino Yakobo, ‘Ataboitare Laban o taata, 5naata ilmong'i o sirkon o ntare o laisiaayiak lewa o nkaisiaayiak ng'oruo nairriwua olkilikuai aliki olkitok lai, pee atum anoto omom too nkonyek inono.’ ”

6Nerrinyunye lelo kiliku enetii Yakobo nejoki, “Kitabaikitia olalashe lino Esau, naa elotu ninye peyie kinang'are iyie nerikito ilewa iip ong'uan.” 7Neureishoyu Yakobo oleng oleng netum enkiputukuny oleng, Neor lelo tung'ana apa ooboitare, neor inkishu o ntamesin, neitainye pooki ntukusi are edamu ajo, 8“Tenelotu Esau aidaikie entukus nabo, neaku ore entukus natelekua neidim aisika.”

9Nejo Yakobo, “Na Ai Enkai e papa lai Abraham naa Enkai e papa lai Isaak, Lo Aitoriani, ilo apa laatiaaka nanu, ‘Torrinyoyu shomo enkop ino enetii olorere lino le sotua, naa kaitaas iyie esidai,’ 10maaishiaakino nanu katukul ina nyorrata ino nauno, tenebo o ina kisiligata nintoduaa iyie osinka lino, amu te ng'udi ai ake atalang'a ele keju le Yordan; nataa taata iltimito oaare. 11Tokorduaki nanu, aatoomono iyie, te nkaina olalashe lai, te nkaina e Esau, amu kaure nanu ninye melotu ake aar iyiook pooki matuata, inkera o noo ng'otonye. 12#Enk 22.17Kake itejo, ‘Ekaaitaas iyie esidai, naisho eishoi ino metaba anaa osinyai le naiposha, nemeikenayu te nkumoi.’ ”

13Metaa eirraga ine ina kewarie, neitayu te nena naata ninye enkishooroto naisho olalashe lenye Esau. 14Inkineji iip are o oloroi tikitam o supeni e kerra iip are tenebo ilmeregeshi tikitam, 15intamesin naalepo tomoni uni o nkurrarrun enye o nkishu artam tenebo iloing'ok tomon o sirkon lipong'a tikitam o lamuyeishi tomon. 16Neitarasaa kuna too nkaik oo laisiaayiak lenyena, meeta ake ineitu erewi te luaata enye maate, nejoki sinkan lenyena, “Enchom enturuko ninchosho metaa ketii erishata eluaata ake o eluaata.” 17Neitaarriyian olorikito pooki ajoki, “Ore te nenang'are intae Esau olalashe lai, nikinkilikuan ajoki, ‘Ira iyie oleng'ae? Kaji iloito? Naa einkuneng'ae kuna masaa nireutata?’ 18Naa ijokiki ninye, ‘Ino sinka lino Yakobo naa enkishooroto nairriwaka olkitok lai Esau, ore ake sii, elotu ninye te siadi ang.’ ” 19Neitaarriyian ake sii ilo liare o ilo liokuni o lelo pooki ooreuta nena masaa nejoki, “Entiaaki Esau ina bae tininang'arere, ninye. 20Naa ijokiki intae, ‘Ore ake sii, elotu osinka lino Yakobo te siadi.’ ” Amu etadamua Yakobo ajo, “Kaidim aitoborro ninye too nkishoorot naashomo te dukuya nanu, ore esuju ina naidim atoduaa enkomom enye, nebaiki naaidim atang'amai nanu.” 21Metaa neiturukieki nkishoorot e Yakobo, ore ina kewarie neirrag ninye olng'obor.

Etupupung'are Yakobo oltung'ani te Peniel

22Ore ake ina kewarie nedumunye Yakobo arik inkituaak enyena pokira are, o nkaisiaayiak enyena pokira are tenebo inkera enyena tomon oobo nelang te lang'ata e Yabok. 23#Eng'e 10.12Neya ninche aitalang enkare, tenebo o pooki toki naba anaa enaata, 24#Hos 12.3,4neing'uari Yakobo aa ninye ake. Ore ina kewarie etii oltung'ani otupupungare enkewarie pooki o metamanai esirua. 25Ore peyie edol ilo tung'ani ajo eitu eidimu Yakobo, neiseyie oloudo le nkupes, nepuku enkupes e Yakobo te rubata oloudo ina kata epupung'are ilo tung'ani. 26Ina peyie ejo oltung'ani, “Inchooki mashomo, amu ekenyua.” Kake etiaaka Yakobo, “Maaisho hoo ilo o metaba anaa nikimayian.” 27Nejoki ninye, “Aikiji ng'ae enkarna?” Nejo, “Yakobo.” 28#Enk 35.10Ina peyie ejoki “Mikintokini aekata aajo Yakobo, kake Israel#32.28 Israel: Ore te nkutuk oo Lbrania neutu “etekeshare ninye Enkai” aashu “enkesha Enkai”, amu itekeshare Enkai tenebo o iltung'ana nisulie.” 29#Ilari 13.17,18Neitoki Yakobo aikilikuan ninye ajoki, “Tolikioki aatasayia enkarna ino.”

Kake etiaaka, “Kainyoo doi peyie inkilikuanu enkarna ai?” Nemayian ninye teine.

30Neipot Yakobo enkarna ine wueji ajo Peniel etejo, “Amu kitoduaate o Enkai too nkomomi, ore ake eyia neton aishu.” 31Neilepaki enkolong egiroo Penuel, neitong'ojinari te nkaraki enkupes enye. 32Ore ebaiki ina olong, menya Isiraeli emorloo o loudo; naatii enkong'u oloudo, te nkaraki naibung'a apa ilo tung'ani enkong'u oloudo le Yakobo o emorloo enye.

Currently Selected:

Enkiterunoto 32: BIBLIAPRO

Highlight

Copy