Luka 4

Etetemaki Yesu

(Mat 4.1-11; Mk 1.12-13)

1Neiput Yesu Enkiyang'et Sinyati apa pee errinyunye eing'uaa olkeju le Yordan, Nerik Enkiyang'et ninye ong'ata, 2nkolong'i artam, metetema oloirirua. Neitu enya Yesu ae toki te nena olong'i. Ore pee eishunye nena olong'i netir esumash. 3Nejoki Sheitani ninye, “Te naa ira iyie Enkerai e Nkai, tiaaki ele soit metaa endaa.” 4#Enkig 8.3Newaliki Yesu ajoki, “Etisiraki aajo, ‘Mme endaa ake eishuyie oltung'ani.’ ”

5Neilepie Sheitani Yesu enchumata o ldoinyo oodo, neitodol enkitoo o pooki e nkop, te nkiti kata, 6nejoki Sheitani ninye, “Kaaisho ntoria kuna pooki, o enkitoo enye, amu aaishooki, pee aisho pooki layieu naisho; 7metaa te nikiserem iyie nanu neaku ninono pooki.” 8#Enkig 6.13Newaliki Yesu ajoki ninye, “Etisiraki aajo, ‘Olaitoriani Enkai ino ake iserema, naa ninye ake isiaai.’ ” 9Nerik Sheitani Yesu Yerusalem neitasheyie te ntopij e enkaji e Nkai, nejoki, “Te naa ira Enkerai e Nkai, tusulai kewan, 10#Olk 91.11,12amu etisiraki aajo, ‘ekirriwaki Enkai lmalaika, mikitorripo,’ netejoki sii, 11Eking'amaa too nkaik enye, pee mikinkob osoit enkeju ino.”

12 # Enkig 6.16 Newaliki Yesu ajoki, “Eigeroki aajo, ‘Mitem iyie Olaitoriani Enkai ino.’ ” 13Ore pee emitunye Sheitani too ntemat enyena pooki nelo aing'uaa eanyu ai rishata enye.

Eiterua Yesu alikioo lomon te Galilaya

(Mat 4.12-17; Mk 1.14-15)

14Nerrinyo Yesu Galilaya ebore engolon e Nkiyang'et Sinyati, neibulaa enkisisa enye, nkuapi naamanita ilo kerenket. 15Neiteng'enisho too nkajijik enye e ntumo nerrep iltung'ana pooki ninye.

Etanyaki Yesu te Nasaret

(Mat 13.53-58; Mk 6.1-6)

16Neito Yesu Nasaret ine netubulaka, nejing enkaji e ntumo te nkolong e nkiyeng'iyeng'ata, anaa enaiko apake, neitashe aisum ilkigerot. 17Neishori embuku o loiboni le Nkai Isaya. Nebol ina buku netum ewueji netisiraki aajo,

18 # Isa 61.1,2 “Etii Enkiyang'et o Laitoriani atua nanu,

amu aatubukoko ninye eilata, aput,

naairriwua matoliki ilaisinak ororei supat,

nalaku te sinkaisho ilooena,

naliki lmodook emboloto oo nkonyek enye,

nalaku aisho epuo lelo ooitorogonyaki,

19nalimu olari osarunye Enkai ltung'ana lenyena.”

20Neiken Yesu embuku, neshukoki olashumani neton. Neibelekenya lelo pooki ootoni te nkaji e ntumo aaing'or ninye. 21Neiteru ajoki ninche, “Eitabayioki taata kulo sirat ining'itoto too nkiyiaa inyi.” 22Neimaki pooki ninye aarrep eing'asia too rorei le mpiris ooimu enkutuk enye. Nejo, “Ae mme olayioni le Yosef doi ele?” 23Nejoki ninye ninche, “Meeta nchere pee eitu kiyiookiki aadung'ie rashe aajoki, ‘Olabaani tabaa kewan,’ nijojo, ‘Taasa sii iyie teine nitubulaka, mbaa naaijo nena nikitoning'o nchere itaasa te Kapernaum.’ ” 24#Yhn 4.44Nejo Yesu, “Esipa ajoki intae, meetae oloiboni le Nkai oyanyiti te murua natubulaka. 25#1 Ilai 17.1Esipa nchere keetae apa nkolia kumok tiatua Siraeli te nkata o loiboni Eliya, pee elai enchan too larin okuni o lapaitin ile, neibulu olameyu ina kop pooki; 26#1 Ilai 17.8-16kake ore eyia, eitu eirriwakini Eliya oltung'ani hoo obo te Siraeli, enkoliai e Sarepta ake eirriwakaki te nkop e Sidon. 27#2 Ilai 5.1-14Kumok sii iltung'ana le nkeeya oo lbolot ootae te Siraeli te nkata o loiboni le Nkai Elisha, nemeetae hoo likae obo oishiunyeki, leme Naaman ake le Siria.” 28Ore pee ening iltung'ana nena baa pooki etoni tiatua enkaji e ntumo neiput engoro. 29Neinyototo, nearaa Yesu auluo eina anasa neriku embata e marti nataaniki ina anasa, ejo pee esulaa teina marti; 30kake etapaashare Yesu apolos atua lelo tung'ana nelo ninye.

Oltung'ani oata oloirirua oiduruk

(Mk 1.21-28)

31Nedoyio Yesu alo Kapernaum, enkanasa natii Galilaya, neiteng'en iltung'ana te nkolong e nkiyeng'iyeng'ata naji Pasaka. 32#Mat 7.28,29Neing'asia iltung'ana te nkiteng'enare enye, amu keiro anaa oloata enkitoria. 33Netii atua ina aji e ntumo oltung'ani oata oloirirua oiduruk. Nebuak aishir to ltoilo sapuk ejo, 34“Ooi Yesu le Nasaret, ainyoo iatakinore iyiook? Iewuo aidaikie iyiook? Kaayiolo ajo ira ng'ae: ira ilo obo Sinyati le Nkai.” 35Neisikong Yesu ilo oirirua nejoki, “Tigirayu! Tupuku tung'uai ninye.” Nebatat ilo oirirua torrono ilo tung'ani te dukuya ninye nepuku aing'uaa meeta enaitaasa ninye. 36Neing'asia iltung'ana pooki nejokino, “Kaa kiroroto ena nairo ele tung'ani? Aaku kearaa te nkitoria o te ngolon iloiriruani ooiduruk, nepuku ninche.” 37Neibulu enkisisa e Yesu pooki wueji te nena murua naamanita.

Eishiunye Yesu ltung'ana kumok

(Mat 8.14-17; Mk 1.29-34)

38Ore pee eing'uaa Yesu enkaji e ntumo nejing enkaji e Simon. Neitirrishaka olkirobi enkaputani e Simon, neomoni Yesu meishiunye.

39Neitashe arumaki ninye kop nearaa ilo kirobi, neishiu olkirobi. Neinyototo nabo kata aisiaai ninche.

40Ore edoyio enkolong, neyau lelo pooki ooata ltamuoyia loo mpukunot kumok aayaki Yesu meishiunye. Neiteleiki ake pooki tung'ani nkaik neishiunye ninche. 41Nepuku sii iloiriruani ooiduruk kumok, aaing'uaa iltung'ana ebuaaya aajo, “Ira iyie Enkerai e Nkai.” Neing'ode amitiki eiro, amu keyiolo ninche aajo Kristo ninye.

Etolikioyie Yesu ororei te Yudea

(Mk 1.35-39)

42Ore pee ekenyu nelo Yesu ewueji neliyio; kake eing'orutua olorere ninye. Nepuonu enetii, nejo maiboo neing'uaa ninche; 43kake etiaaka ninche, “Kalo ake pee aliki sii ninche kulie ang'itie kulo omon supati le nkitoria e Nkai. Ina pee aairriwuaki.” 44Nelikioo lelo omon too nkajijik e ntumo e Yudea.

Currently Selected:

Luka 4: BIBLIACATHO

Highlight

Copy