Luka 10

Eirriwayie Yesu iltung'ana ntomoni naapishana aare

1Ore te siadi nena, negelu Olaitoriani kulikae tung'ana ntomoni naapishana neirriwaa maare, meturuko nena ang'itie o pooki wueji neyieu neitoki openy alo. 2#Mat 9.37,38Ejoki Yesu ninche, “Aisapuk enkikesare kake aikuti ilaisiaayiak, entoomon naa olopeny enkikesare meirriu ilaisiaayiak meetu enkikesare enye. 3#Mat 10.16Enchom! Airriwaa intae anaa lkuoo le kerra ooirrikini atua suyian. 4Emiya embene, aashu nkilani, aashu namuka, nimirorokiki hoo oltung'ani te nkoitoi. 5Ore enkaji pooki nijing'ijing'i entang'as entejo, ‘Metijing'a eseriani ena aji.’ 6Naa te netii oltung'ani onyor eseriani ine netum ninye eseriani inyi, naa te nemetii, neshukokino intae eseriani inyi. 7#1 Ilkor 9.14; 1 Tim 5.18Entotoni teina aji ninyanya, niokioko entoki naba anaa enaishori intae, amu kenare olaasani le siaai olekoisiaayio lenye; emipuo aarukurukoo nkajijik. 8Ore enkang pooki nijing'ijing'i neitoomon intae, enosa endaa naishooki intae; 9ninchiunyenye iloomuoi ootii nijokiki etinyikua enkitoria e Nkai. 10#Iat 13.51Ore enkang nijing'ijing'i nemeitoomon intae, enchom inkoitoi enyena naalala nijojo, 11#Mat 10.7-14; Mk 6.8-11; Lk 9.3-5‘Ore ninye enterit e nkang inyi nikiaata too nkejek ang, kimpiripiroki intae, kake entayiolo nchere, etinyikua enkitoria e Nkai.’ 12#Enk 19.24-28; Mat 11.24; Mat 10.15Esipa ajoki intae, ore teina olong e nkiguana, Sodom eikashieki alang enaitaasi ina ang!

Inkang'itie neitu eiruk

(Mat 11.20-24)

13 # Isa 23.1-18; Esek 26.1–28.26; Yoe 3.4-8; Amo 1.9,10; Sak 9.2-4 “Ee kake ayia iyie Korasin! Ee kake ayia iyie Betsaida! Amu tenaa ketaasaki apa te Tiro o Sidon nena e nking'asia naatasaki tiatua intae, anaata eirridutua apa moitie, neishop lkuniyiani, neelare nkuruon. 14Kake Tiro o Sidon eikashieki te nkolong e nkiguana aaitalang intae. 15#Isa 14.13-15Oi iyie Kapernaum, eijo shumata kilepieki! Kintadouni shomo enemeneng'a.” 16#Mat 10.40; Mk 9.37; Lk 9.48; Yhn 13.20Nejoki Yesu lkipaareta lenyena, “Ore pooki oning intae, nanu ening, ore oloany intae, nanu eany, ore olaany nanu, naa ilo laairriwua etanya.”

Etushukunye lelo ntomoni naapishana

17Neshukunye lelo kipaareta ntomoni naapishana o aare te ng'ida. Nejo, “Olaitoriani, ore ebaiki loiriruani, etoning'o iyiook kiaaraa te nkarna ino!” 18Newaliki Yesu nejoki, “Atoduaa Sheitani esulunye anaa enkiwuang'ata eing'uaa shumata. 19#Olk 91.13Enining'o! Aishoo intae enkidimata, metaa indimidimi aaitunyoi ilasuriaa o nkulupani, o engolon pooki e ilo mang'atinta, nemeeta enaiko intae. 20Kake eming'idare ina naning intae iloiriruani; kake enting'idata amu eigero nkarn inyi te keper.”

Etishipe Yesu

(Mat 11.25-27; 13.16-17)

21Ore ina kata ake neshipayu Yesu eiputa Enkiyang'et Sinyati, nejo, “Ashe Papa Olaitoriani le keper o enkop! Amu isudorie kuna baa ilang'eni o loata eyiolounoto niboloki inkera naanana, amu ina eyieunoto e mpiris ino. 22#Yhn 3.35; Yhn 10.15Nanu eishoo Papa pooki toki, nemeetae oloyiolo Oinoti leme Papa ake, nemeetae oloyiolo Papa leme Oinoti lenye ake, o pooki ng'ae ake ogelu enkerai aboloki ninye.”

23Neibelekenyakino Yesu lkipaareta lenyena, neirorie too nkurrat nejo, “Emayiana inkonyek naadol kuna nidolitata intae. 24Amu ajoki intae, keyieu apa iloibonok o laiguanak, nedol kuna nidolidolo, kake eitu hoo edol; neyieu apa nening kuna nining'ining'i kake eitu hoo ening.”

Enkitanyaanyukoto o Samariyiai supat

25 # Mat 22.35-40; Mk 12.28-34 Neinyototo olang'eni obo aikilikuanishore Yesu, eyieu netem, nejoki, “Lo Aiteng'enani, kaji aiko pee ajung enkishui nemeish?” 26Nejoki Yesu, “Kakua baa naaigero too nkitanapat e Nkai? Kejo aa enisuma iyie?” 27#Enkig 6.5; Ilaw 19.18Newaliki olang'eni ajoki, “Tonyorra Olaitoriani Enkai ino to ltau lino pooki, o te nkiyang'et ino pooki, o te ng'eno ino pooki, o te ngolon ino pooki, ninyorru o le latia ino anaa eninyor kewan.” 28#Ilaw 18.5Nejoki Yesu ninye, “Itawalua aitobiraki, taasa ina pee ibik inchu.” 29Neyieu ninye neitaa kewan asipani, nejoki Yesu, “Ai ng'ae doi ole latia ai?” 30Newaliki Yesu ajoki, “Etadowuo oltung'ani eing'uaa Yerusalem alo Yeriko, neinepu ilaisimak ninye neoru nkilani, near neing'uaa etaa keye. 31Nelotu olapolosani aim ina oitoi, ore pee edol nepaash, nelo. 32Nelotu sii ninye ole Lawi aim ine ore pee edol nepaash, nelo. 33#2 Int 28.15Kake ore pee elotu Osamariyiai olo sii ninye nkang'itie, ore pee edol neing'urrie. 34Nebaiki neen ilbaa lenyena nebukoki eilata neisho enaisho oo sabibu, neitoki aitaked esikiria enye, nerik enkaji naitoomonishoreki neramat teine. 35Ore pee ekenyu, neitayu dinari are aisho olopeny ina aji nejoki, ‘Ing'ura taa ele tung'ani, ore pooki toki nanya nalusoo te nena, nalotu alak tenashukunye.’ 36Kaa idol iyie te lelo tung'ana pokira okuni, kalo otaa ole latia teilo otara ilaisimak?” 37Nejo ninye; ilo oing'urrie ninye. Nejoki Yesu Ninye shomo sii iyie taasa ina.

Etaparana Yesu Marisa o Mariamu

38 # Yhn 11.1 Ore epuoito Yesu o lkipaareta lenyena neimaa Yesu enkang namanya enkitok naji Marisa, neitoomon te nkaji enye. 39Neeta enkanashe naji Mariamu, nelotu ina aton too nkejek e Yesu, aton aainining inkiteng'enat e Yesu. 40Nenyamalu Marisa too siaaitin enyena kumok, nelotu enetii Yesu nejoki, “Olaitoriani, aimidol ajo emakua te naasisho openy, naapalaki enkanashe ai? Tiaaki naa maaeu aret.” 41Kake etawalikia Olaitoriani ajoki, “Marisa, Marisa, intanyamaluo nimposha too mbaa kumok; 42kake nabo bae ake naata tipat, ena bae natudutayie Mariamu naisul; nemeyae aaitung'uaa ninye.”

Currently Selected:

Luka 10: BIBLIACATHO

Highlight

Copy