प्रेरित 3
3
जन्मटीहिक नाङ्गर मनैया चोखैलक
1एक दिन पत्रुस ओ यूहन्ना दिनक तीन बजेओर मन्दिरम प्रार्थना कर जाइटलह। उ यहूदीन्हक प्रार्थना कर्ना समय रह। 2मनै जन्मटीहिक एकठो नाङ्गर मनैयह हरेक दिन बोक्क आनँट् ओ मन्दिरम जैना सुन्दर नाउँक गेटठे बैठादेहँट्। ऊ मन्दिरम अइना-जैना मनैनसे भीख माङ्ग। 3जब ऊ पत्रुस ओ यूहन्नह मन्दिरम जाइट् द्याखल, तब ऊ हुँकनसे भीख माङ्गल। 4यूहन्नकसँग पत्रुस ओहीह एकटक लगाक हेर्ल, ओ पत्रुस ओहीह कल, “यिहँर हेर्।” 5यी सुन्क उ मनैया कुछुकुछु पाडरम कना आशले हुँकन् ह्यारल।
6पत्रुस ओहीह कल, “म्वारठे स्वान, चाँदी नैहो तर म्वारठे ज्या बा उह मै टोहीह देहम। नासरत सहरक येशू ख्रीष्टक नाउँम नेङ्ग।”#३:६ येशू ख्रीष्टक नाउँम कलक येशू ख्रीष्टक अधिकारम कहल हो। 7तब पत्रुस वाकर दाहिन हाँठ पकर्क उठैल। तबहेँ वाकर पौली ओ घुट्ठी बलगर होगैलस। 8ऊ उल्रल् ओ न्याङ्गलागल। ऊ नेङ्गटी, उल्रटी, ओ परमेश्वरक प्रशंसा कर्टी हुँकन्हकसँग मन्दिरम गैल्। 9सबजन ओहीह न्याङ्गट् ओ परमेश्वरक प्रशंसा करँट् देख्ल। 10मन्दिरक सुन्दर कना गेटठे बैठक भीख मङ्गुइया यिह हो कैक हुँक्र ओहीह चिन्ह्ल ओ उ मनैया न्याङ्ग सेक्ना हुइलकम छक्क पर्ल।
मन्दिरम पत्रुसक प्रचार
11सबजन अचम्म मान्क हुँकन्हकठे सोलोमनक बरण्डा कना ठाउँम दगुर्टी अइल। उ मनैयाजुन खुशीले पत्रुस ओ यूहन्नह पक्रलरह। 12हुँकन् देख्क पत्रुस कल, “हे इस्राएलीहुँक्र, यी बातम अप्नहुँक्र काजे छक्क परलबाटी? हम्र आपनऽ शक्ति या भक्तिले यहीह न्याङ्ग सेक्ना बनाइलअस काजे वाल्ल पर्क हमन ह्यारटी? 13हमार पितापुर्खा अब्राहाम, इसहाक ओ याकूब जौन परमेश्वरक आराधना कर्ल, उह परमेश्वर आपन सेवक येशूह आदर कर्ल। अप्नहुँक्र उहाँह मुवैहीपरी कैक सुम्पदेली। पिलातस उहाँह छोरदेना विचार कैरख्लह तर अप्नहुँक्र नैमन्ली। अप्नहुँक्र पिलातसक सामुन्नेम उहाँह इन्कार कैदेली।#प्रस ३:१५ 14उहाँ पवित्र ओ निर्दोष रलसे फे अप्नहुँक्र उहाँह अस्वीकार कैदेली, बेनसे एकठो ज्यानमारह छुटामङ्ली।#मत्ती २७:१५-२३; मर्क १५:६-१४; लूक २३:१३-२३; यूह १९:१२-१५ 15अप्नहुँक्र जीवन देहुइयह मुवैली। तर परमेश्वर उहाँह मुवलमसे जियादेरख्ल। हम्र यी बातक साक्षी हुइटी। 16उहाँकम विश्वास कर्लक कारण अप्नहुँकन्हक द्याखल ओ जानल यी मनैया बलगर होरहल। उहाँक नाउँम करल विश्वासले यी मनैया पूरा चोखैलक अप्नहुँक्र देख्टीबाटी।
17“आब, हेरो भैयौ, महीह थाहाँ बा कि अप्नहुँक्र येशूह अन्जानम मुवैली, ओ अप्नहुँकन्हक अगुवन फे उह कर्ल। 18तर परमेश्वर आपन ब्वालल् अगमवाणी असिक पूरा कर्ल। उहाँ ख्रीष्टह दुःख भ्वाग परहीन कैक अगमवक्तन्हक मुहसे अगमवाणी बोलरख्लह। 19उहओर्से आब आपन-आपन पापी मन परिवर्तन कैक परमेश्वरकठे घुमी, तब उहाँ अप्नहुँकन्हक पाप क्षमा कैदेहीँ। असिक अप्नहुँक्र परमप्रभुसे शान्ति ओ शक्ति पैबी। 20अप्नहुँकन बचाइक लाग आघहेँ परमेश्वरक नियुक्त करल ख्रीष्ट येशूह पठादेहीँ। 21परमेश्वर अघट्टे आपन पवित्र अगमवक्तन्हक मुहसे कहलअस, सब चिज लौव बनैना समय नैआइट्सम येशू स्वर्गहेँम पलरहपर्ठा। 22मोशा फे असिक कैरख्ल, ‘परमप्रभु टुन्हक परमेश्वर टुन्हक्के जातिमसे म्वारअस एकठो अगमवक्ता पठुइयाबाट। टुह्र उहाँक कहल सब बात मानपर्ठा।#व्य १८:१५,१८ 23उहाँक कहल नैमनुइया परमेश्वरक मनैन्हक बगालिमसे निक्रावापाई ओ नाश हुई।’#व्य १८:१९
24“वास्तवम, शमूएलठेसे लेक सब अगमवक्ताओँ आजकाल हुइटीरहल घटनक बारेम बोलरख्ल। 25अगमवक्तन्हक कहल परमेश्वरक बाचा अप्नहुँकन्हक लाग हो। हमार पुर्खनसे परमेश्वरक करल बाचा अप्नहुँकन्हक लाग फे हो। परमेश्वर हमार पुर्खा अब्राहामह कल, ‘सारा पृथ्वीक मनै ट्वार सन्तानद्वारा आशिष पैहीँ।’#उत २२:१८ 26जब परमेश्वर आपन सेवक येशूह पठैल, तब उहाँ अप्नहुँक्र सबजहन दुष्ट काममसे घुमाक आशिष देहक लाग पैल्ह उहाँह अप्नहुँकन्हकठे पठैलह।”
Currently Selected:
प्रेरित 3: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
