Psalms 19
19
1Qilak niptaqtumik takupkaijuq Godim qaumangninganik, Godim havaanga naunaiqpiaqhunittauq.
2Upluq tamaan taffuminga uniutjiinaqtuugaluit kingullimingnun, unnuk tamaan taimailiuqpakhutik.
3Taimailiuqtuugaluit ilaa uqaqhimaittumik niplijuitkiplutik.
4Nipaali tuhangnaqpiaqtuugaluaq nunani tamainni, unipkaarijaat tikittuni nunaum kiglinganun. Qilangmilu God tupilivaktuq hiqinirmun.
5Hiqiniq ilaa nuijuq nulianigjuqiliqtutun ilipluni igluminin anigiaqhuni, aqpaliurumapluni.
6Hiqinirlu nuunginaqtuq qilaum kivataanin aulapluni uataa kiglinganun, hulliqa iiqtaulimaituugaluit uunaqtumin?
7Atan'ngum pitqujaa nakuuqpiaqtuq inuupkaipluni inuum uummataanik. Atan'ngum pitqujait maliktauhimajun tunihiplutik ilihimanirmik ilihimangitunun.
8Atan'ngum pijumajait naammangmata, maliktun taapkuninga quviahukpaktun. Pitqujaillu ilumuuqpiaramik kangiqhipkaiplutik inuit ihumainik.
9Atan'ngumlu annautjauninga nakuuqpiaqtuq pijauhimaluni nungulaittumun. Atan'nguplu uukturningnit ilumuuqtun naammagijaulutik inungni.
10Tapkua tuhunnatqijaujut Goldmin akituqpiaqtumin. Aahiin pitqujain mamatqijaujun igutam uqhulianginin. Hanimin mamatqijarmin.
11Tapkua tunihiinaqtun ilihimajamingnik uvamnun kivgangnun, tuhaagupkit akiliuhiaraluaqtunga
12Inuit huinniqutimingnik ilitaqhijuitpangmata, annautilunga uvanga huinniqutimnin ijiqhimajunin.
13Aahiin amirilungattauq huinniqutimnin ihumagijumajamnin, tapkua atanniqtuqtailugit uvamnik. Talvuuna nakuuhiniaqtunga huinniqutairlungalu ihuinaaqtunin.
14Uqauhitka, ihumatkalu naamagijaulit ilingnun, Atanira amiqhijiujutin annautjiujutillu uvamnun.
Currently Selected:
Psalms 19: AQ
Highlight
Share
Copy
Want to have your highlights saved across all your devices? Sign up or sign in
