Mark 13

Jesus Hivunikhamik Unipkaqtuq

1Jesusim qimaliramiuk angaatjuvikpagjuaq, atauhiq malirutaa uqallaktuq, “Ilihaiji, takukkit igluqparaaluit pinniqpiaqtut! Takukkit ujaragaaluit pinniqtut hanirainni igluqpaum!”

2Jesus kiujuq, “Hii, takukkit igluqpagjuaraaluit. Kihimi imiktitauqpiarniaqtut. Atauhiq ujaraq aulajunaittuq quulliriiktuni! Tamaita imiktitauniarmata.”

3Uvattiagunngurmat Jesus ikhivajuq Kingingnirmi Olivesmi akiani natirnami angaatjuvikpagjuamit. Peter, James, John Andruplu avalliingaqtilugu upaktaat apiriplugu, 4“Unniutitigut, qakugu hujuqarnialiqqa? Huna naunaitkutauniaqqa pijuqiliqtunik?”

5Jesusim kiujait, “Ulamnaupkaqtitauttaililutit, 6amihut qainiarmata atira aturlugu, uqarlutik, ‘Messiaujunga.’ Amihunik iqqutiniarmata. 7Tuhaaniaqtutillu angujaktunik angujangniaqtunik, kihimi kapiahuktailuhi. Hii, hapkua atuqtauniaqtut, kinguagut kihimi nunngunnia tikiinlimaittuq. 8Nunaqatigiit angujangniaqtut nunaqatiginngitamingnik, atan'nguviillu angujaqatigiiglutik. Nunarjuamilu nunait hajungniaqtut, kaaglutiglu. Una hivulliuniaqtuq ulurianaqtunit arnatut qinulattijutut.

9“Atuliqqata qiniqhimaluhi! Tunijauniaqtutit nunaliit katimajiinnut ningaqtauniaqtuhi angaatjuvigjuani. Apiqhuqtauniaqtuhi atangujanit kiingujunilu uvamnik malirutaugaffi. Kihimi aturlunga uvamnik unipkarvigilugit. 10Godim Uqauhiit hivullirmik tuhaqtitaujukhaungmata tamainnut nunaqatigiinut. 11Kihimi tigujauguffi apiqhuqtauliruffilu, uqauhikharnik ihumaaluguiqluhi. Godim uqauhikhaningniaraahi, ilvit uqarunainnavit, Anirniq Nakuujup uqaqtinniarmahi.

12“Aqqaluariik tigujautinniarait qatangutitik tuqutauqulugu, apaapaujum tigujautinniaraa inmi nutarani, nutaqqallu angajuqqamingnik ihuiguhungniaqtut tuqutaupkarlugit. 13Nakuugijaujunaittutit inungnit malikkaffi uvamnik. Kihimi inuk kinguani unanmijuq annautjauniaqtuq.

14“Upluq qailiqtuq takuviuniaqtumik nakujarnaqpiaqtumik quglungnaqtumik takuviujukhaunngittumi.” (Taiguqtuq kangiqhili.) Talva Judeamiittut qimaarialiit kingingninut. 15Inuk igluqpaum qaanganiittuq utiqtukhaunngittuq puuqtuijaqtugluni tamajaminik. 16Inuk aniiqtuq utiqtukhaunngituq atigaiturluni. 17Nakuujunaitpiaqtuq hingaijunut amaamaktittijunullu. 18Tukhiarlutillu qimaatitaujunaittutit ukiungutillugu. 19Inuit ajukhaqtitauhungungmata akhun taimaitpakhimannginmat God hanalraaninganit nunarjuamik. Talvangaanillu taimaitqigunaittuni. 20Imaa inniaqtuq, Godim naiglitiqaqtinnagu naglikhaarvikhaat, inuk atauhiq annaumajunaittuq. Kihimi pitjutigiplugit niruaqhimajani naililaaqhimajait uplut.

21“Kinaliqaak uqaqqat ilingnut, ‘Takkuuk, uvva Messiah,’ ‘Talvauvuq,’ ukpirittailugu. 22Christngunguaktut nalauttaijiunnguaktullu makinniarmata pilirlutik naunaitkuhiurlutik arlingnaqtuniglu takupkailutiglu iqqutinnahuarlutik, ajunngitkumik, Godimlu niruaqhimajainnik. 23Upingakhittailuhi! Hivuagut kamagiquvaffi!

24“Talvuna, qaangiqqata uplut ajuqhaqtitaunirmit,

hiqiniq taaqhiniaqtuq,

tatqirlu qaumaniirluni,

25upluriat katagarlutik qilangmit,

hakugikniillu qilangmi hajuktaulutik.

26Inuit takuniaraat ‘Irnia Inuum qaijuq nuvujatigut’ hakuginikkut qaumanikkullu. 27Ahiit aulaqtiniarait iharulgit katitirlugit niruaqhimajani nunarjuamit—ungahingniinnit nunaup qilaumlu.

28“Hatja ajuirluhi napaaqtumit ahiaqaqtumik fignik. Nungumait nautiliqqata, atungaujaniktiliqqat, ilihimajutit aujanguliqtuq. 29Taimattauq, takuguffigit, ilihimalutit utirvikhaa qaglinnuaqtuq. 30Ilumuuqtumik uqautigiffi, inuit hadja inuuhimajut qaangiutiunaittut hapkua pitinnagit. 31Qilak nunarjuaglu tammarniaqtuk, kihimi uqauhitka tammarunaittuq.

32“Ilihimajuqanngittuq qakugu pivikhamik, iharulgilluuniit ilihimanngittut, Irnialuuniit. Angutainnaa ilihimajuq! 33Ilihimannginnaffiuk kamagiluhi! Upingaqhiqtailuhi!

34“Tikilvikhaa Irniata Inuum unipkarittauttaqtuq unipkaatut angutip akuni aullaarniatut. Aullalirami, tiliurijuq havaktiminik havaakhainnik, uqautiplugulu amiqhiji qiniqhimaquplugu tikilvikhaanik. 35Ilvillu, kamagilutit! Ilihimannginavit qakugu utirniariakhaa igluqaqtum inua—unnulirnirmi, unnuami, qautinnagu qaummaqqalluunniit. 36Takupkaktailutit hiniktutit tikitpat niriugijaunngittumik. 37Ilingnut uqaqtunga uqauhimnik tamainnut: Qiniqhimalugu!”

Currently Selected:

Mark 13: AQ

Highlight

Copy