1 Corinthians 10

1Qatangutitka itqaumalugit hivullit ingilraat tapkua Moses malikpangmatjuk. Tamarmik amirijauplutik nuvujakkun, tariukkullu atiqaqtukkun Nugluaglingmik, ikaaqpaktun nammaktumik. 2Nuvujami tariukmilu tamarmik baptaiqtauhimavaktun Mosesmun malikpangmata. 3Tamarmiglu niqikhamik inuutilingmik nirivaktun, 4imikhamiglu atjikkiiktumik imiqhutik. 5Taffumanili Godim hivullivut amigaitqijat quviahuutigingmatik, tuquvaktuq inuilrumi. 6Tapkua pivaktainin ilihautjaujukhaujugalujugut uvagut hivulliptitun ihuittumik aaruhuqunata. 7Angaatjuvigiqunagillu godingat hanahimajuq hivullivut taimailiuqpangmata. Godim uqauhiit titiraqhimangmata, “Inuit ingitqaaqhutik niriplutik imiingakkamiglu makittun numiriaqtuqhutik ihuittumik.” 8Uvagut tapkunatun aallatuqtukhaunngittugulli taffumani uplumi atauhirmi inuit 23,000ngujun tuquvaktun. 9Tapkunatuttauq uvagut uktuqtukhaunngitpiaqtugut Godmik tapkua ilangit taimailiuramik tuqutauvaktun nimirianin. 10Aahiin uqaniluktukhaunngitkaluaqtugut. Tapkua ilangit taimailiuramik piiqtitaujun tuquplutik iharulikkun tuqunnaqtukkun. 11Hapkua tamarmik taimaihiqpaktun inuit aallat tapkuninga ilihatjauquplugit, titiraqtauquplugiglu upingaqhiqunata. Uvagut inuutjagikhiqupluta nunaum ihua qaglilirman. 12Kinaliqaak qahaittumik nangiqhimanahugigumi ukpiriamini, qaujimagilugu napatkarnakhavuq. 13Uktuqtaugaiguffi ilaa uktuqtaugaluaqtuhi inuit tamarmik uktuktauvingita atjikkutainnik. Godli uqarijaqtugaluaq pipkaivakhuni iliffi uktuqtauvallaaqunahi kihimi. Naniliqaak uktuqtaugaiguffi hakugiktinniaqtaahi naammaktumik annaqupluhi. 14Talva ilanarijatka godinguanun hanahimajunun angatjuktailivagluhi. 15Uqautigiffi ihumatugaffi: uqaqtamnik iliffingnik uukturluhi naammangmangaata. 16Qallun nakurutilik, piplugu God qujagijaqqut. Umanga imiraigupta piqataunngitpitaa Christim aunganiik? Muqpaujamiglu avguigupta uminga niriguptigu piqataunngitpitaa Christim timaaniik? 17Muqpaujaq atauhiungman tamapta niriqatigiikupta muqpaujamik atjikkiiktumik uvagut amigaitkaluaqhuta ilaujugut timimun atauhirmun.

Currently Selected:

1 Corinthians 10: AQ

Highlight

Copy