युहन्ना 16
16
1 “आम्नुओ साकोङ्छ़ङ त़छिरिमिन्ने निकिना अ़ङ्का खानानिन ओ य़ङ्चि लोनानिन्ओ। 2मोचिआ खानानिन यावायोक्खिम्चिदाङ्का ऩलोइसिन्खाइसिन। अ़नुछ्या ओवाको ग़रि तायाङ, खानानिन कासेत्आ निनाम्हाङ ब़क्तुङ्योङ्नि मिन। 3खोन्कि मोचिआ ओ काचिचि म़मुचि, देकिनालो मोचिआ अ़ङ्पापा मान्सिन्अ़युक, ना अ़ङ्काङा ऩसिन्ताङ्युङ्साङ। 4ओ य़ङ्चि अ़ङ्का खानानिन खाएत्नायुङ्नानिन, देकिनालो माय़ङ मोवाको काचि लिहिदा अ़ङ्का खानानिन दे लोनानिन्ओ मो खानानिन्आ त़मित्तुम्तोक्तुम्ने।
सेङ्लावाओ अ़चुकाचि
बुयादाङ्का अ़ङ्का खानानिन ओ मान्लोदानानिन, देकिनालो अ़ङ्का खानानिन्एनान युङाङ्याङ। 5हान अ़ङ्का काछुत्एदा खात्ङाङा, मेन ‘खानानिन खादा त़खारिन्येन?’निकिना खानानिन साङ्आछाङ अ़ङ्का त़सेन्ऩङ्ऩम़ङ। 6मेन अ़ङ्का खानानिन ओ य़ङ्चि लोनानिन्ओसा आम्नुओ साकोङ्वा मिन्राक्आ भेप्तुयुङ्सु। 7खोन्नुछाङ अ़ङ्का खानानिन अ़नुछ्या लोनानिन, अ़ङ्का खात्ङाकिना खानानिन नुलोक त़लिसिन। देकिनालो अ़ङ्का अ़खात्ऩङ्नालो यायोक काप़ खानानिन्एदा ऩय़निन। मेन अ़ङ्का खात्ङानालो अ़ङ्का खोक्को खानानिन्एदा छुत्तुङ। 8खोन्कि खोक्को म़ताकिना हेन्खामादाओ म़नाचि हेवा, अ़नुवाक लिमा खोन्कि छ़ङ्छेन्माओ अ़तुक्वादा मोचिआ अ़फियाङ निकिना खाङ्म़मेत्तुचि। 9हेवाओ अ़तुक्वादा, हेन्खामादाओ म़नाचि अ़ङ्काएदा साकोङ्छ़ङ मान्मुचि। खोन्कि यायोक काप़आ मोवात्नि च़मा ना हेवा ओ निकिना खाङ्म़मेत्तुचि। 10अ़नुवाक लिमाओ अ़तुक्वादा अ़ङ्का पापा निनाम्हाङ्एदा खात्माआ अ़ङ्का अ़नुवाक मुङाङा निकिना खाङ्म़मेत्तुचि। खोन्ओसा खानानिन्आ अ़ङ्का त़लाऩङ्खाङ्ऩङ्ऩम़ङ। 11छ़ङ्छेन्माओ अ़तुक्वादा निनाम्हाङ्आ ओ हेन्खामादाओ हाङ्कामु बुयाङा छ़ङ्अ़छेन्तायुङ्सा। ओ काचि यायोक काप़आ खाङ्म़मेत्तुचि।
12 अ़ङ्का खानानिन लोमादोत्ओ य़ङ्चि ब़द्धे म़युङ्याङ, मेन ओन्ग़रि खानानिन मो य़ङ तुप्मा त़ऱन्मिन। 13अ़छ़ङ ओ लावा म़ताहिदा खोक्कोसाआ खानानिन झारा अ़छ़ङ्दा ऩतित्तिन। खोक्को आप्पिओ अ़चुपाङ्लाम्पा ऩचेप्तिन्प़न। खोक्कोसाआ दि अ़एन, मो अ़चेप, खोन्कि लिसि म़ताओ य़ङ्चि खानानिन खाऩएत्तिन। 14खोक्कोसाआ अ़ङ्साया अ़मेत्ङा, देकिनालो अ़ङ्को अ़छ़ङ्य़ङ अ़ङ्काएदाङ्का अ़लोक्कि खानानिन मो खाऩएत्तिन। 15झारा अ़ङ्पापाएदा म़युङ्याङ्ओ, मो अ़ङ्कोचिङा ओ। खोन्ओसा अ़ङ्का य़ङाङ, दि अ़ङ्को ओ, अ़ङ्काएदाङ्का सेङ्लावाआ लोउकि खानानिन खाऩएत्तिन।
काखेङ्पाचिओ अ़चुदुखा सेवाङ्निदा फान्ता
16 अ़क्दुकि खानानिन्आ अ़ङ्का त़खाङ्निन, खोन्किना अ़क्दुकि अ़ङ्का त़लाङाखाङ्ङाऩङ।”
17खोन्किना खोक्कोसोओ खा-खाक्को अ़चुकाखेङ्पाचि अ़क्छा निएदा लोकालो म़मुवा, “खोक्को म़य़ङ अ़क्दुकि आन्कान खोक्को अ़खान्मिन्नि, खोन्किना अ़क्दुकि आन्कान खोक्को लासुम्खाम्नि, खोन्कि खोक्को अ़चुपाएदु म़खात्नि। खोक्कोसाआ आन्कान ओ म़लोवाओसो अ़तुप्य़ङ दि ओ?” 18मोचि म़य़ङा, “खोक्को ‘अ़क्दुकि’नि म़य़ङाओसो अ़तुप्य़ङ दि ओ? आन्कान अ़सिन्तिमिन्येन, खोक्को दे म़य़ङ्याङ।”
19मोचिआ खोक्को सेन्मा अ़लाप्ताङाओ य़ङ येसुआ अ़सिन्ता, खोन्कि खोक्कोसाआ मोचि म़लोचि, “‘अ़क्दुकि खानानिन्आ अ़ङ्का त़खाङ्ऩङ्ऩम़ङ, खोन्किना अ़क्दुकि खानानिन्आ अ़ङ्का त़खाङ्ङाऩङ’निओ य़ङ्ओ अ़तुप्य़ङ दि ओ निओसो अ़तुक्वादा खानानिन अ़क्छा निएदा दुम त़छ़रिन्येन? 20अ़नुछ्या, अ़ङ्का खानानिन लोनानिन, खानानिन ओत्ओत्ओत्वा त़खाविन खोन्कि आम्नुओ राक स़, मेन हेन्खामाओ अ़ऩङानु। खानानिन सोखादा त़छुक्तिन, मेन आम्नुओ सोखा सेवाङ्निदा फान। 21छातोक्मा ग़रि मेत्छामा अ़चाअ़त्मादा छुक, देकिनालो मोसोओ अ़ग़रि तायुङ्सा, मेन मोसाआ खाउग़रि छा तोक्तु, खोन्कि मोसाआ मो अ़चाअ़त्मा मान्तुकेसु, देकिनालो हेन्खामादा अ़क्छा छा लिसायुङ्साओदा मोसोओ अ़ऩङानु। 22खोन्ओसा ओन्ग़रि खानानिन दुखा लि, मेन अ़ङ्का खानानिन लोनाखाङ्नानिन, खोन्कि आम्नुओ साकोङ्वाओ अ़ऩङानु। खोन्किना साङ्आछाङ आम्नुओ ऩङानुमा खानानिन्एदाङ्का त़ङाप्तिमिन। 23मो लेन खानानिन्आ अ़ङ्का दित्छाङ त़सेन्ऩङ्ऩम़ङ। अ़नुछ्या अ़ङ्का खानानिन लोनानिन, खानानिन्आ अ़ङ्पापा अ़ङ्ऩङ्दा दि त़दोत्तुम, खोक्कोसाआ खानानिन मो ऩप़न। 24ओन्ग़रितारि खानानिन्आ अ़ङ्ऩङ्दा दित्छाङ मान्दोत्त़युक्तुम। दोरानुम खोन्किना खानानिन्आ त़तोक्तुम। ओवात्नि आम्नुओ ऩङानुमा तालाने।
25 ओ य़ङ अ़ङ्का खानानिन दोय़ङ्लादा लोनानिन। मेन ग़रि तायाङ, अ़ङ्का खानानिन्एनान दोय़ङ्लादा अ़चेप्ऩङ, मेन अ़ङ्पापाओ अ़चुतुक्वादा खानानिन छेङ्छेङ्छेङ्वा खाएत्नानिन। 26मो लेन खानानिन्आ अ़ङ्ऩङ्दा अ़ङ्पापाएदा त़दोरुम। ओसोओ अ़तुप्य़ङ अ़ङ्का आम्नुओ निम्पाङ अ़ङ्पापाएदा दोत्मा अ़दोत्निन। 27देकिनालो अ़ङ्पापा आप्पिआ खानानिन सोमाऩतुक्तिन, देकिनालो खानानिन्आ अ़ङ्का सोमा त़तुक्ताङ्ऩङ, खोन्कि अ़ङ्का निनाम्हाङ्दाङ्का ताङ्ओ निकिना साकोङ्छ़ङ त़मुनियुङ्नि। 28अ़ङ्का अ़ङ्पापाएदाङ्का ताङ्किना हेन्खामादा ताङ्युङ्साङ, खोन्कि अ़ङ्का हेन्खामा छिरुङ्दाङ्कि अ़ङ्पापाएदु लाङाखात्ङाङा।”
29खोक्कोसोओ अ़चुकाखेङ्पाचिआ अ़लोवा, “हान खानानिन छेङ्छेङ्छेङ्वा त़चेविन्येन, दोय़ङ्लादा माआङ। 30हान आन्कान्का तुप्तुम्का, खानानिन झारा य़ङ त़सिन्तुम्योम, खोन्किना साङ्आछाङ खानानिन सेन्मा अ़दोत्निन। ओ लाम्पाङा खानानिन निनाम्हाङ्एदाङ्का त़तान ओ निकिना आन्कान्का साकोङ्छ़ङ मुन्का।”
31येसुआ मोचि म़लासुलोचि, “दि खानानिन हान साकोङ्छ़ङ त़मुन? 32खानुम, ग़रि तायाङ, अ़नुछ्याङा ताचिआयुङ्सा, खानानिन त़रिसिन्खारिन खोन्कि झारा आम्नुओ खिम्दा त़खारिन, खोन्कि अ़ङ्का ओन्ङा त़छित्ङादाङाऩङ। खोन्नुछाङ अ़ङ्का आप्पि ओन्ङा अ़लिऩङ, देकिनालो अ़ङ्पापा अ़ङ्काएनान म़युङ्याङ। 33अ़ङ्तुक्वाआ खानानिन सेवाङ्नि त़लिसिन्ने निकिना अ़ङ्का खानानिन ओ य़ङ्चि लोनायुङ्नानिन। खोन्ओसा हेन्खामादा खानानिन दुखा त़तोक्तिन, मेन राक मुवानिन! अ़ङ्का हेन्खामाएदा छोसाङ।”
Currently Selected:
युहन्ना 16: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
