छाम्माय़ङ 14
14
आइकोनिया सहरादा
1आइकोनियन्दा पावल खोन्कि बारनाबास अ़धुन्वाङा यहुदिचिओ अ़चुयावायोक्खिम्दा वाङाचिकि निनाम्हाङ्ओ अ़चुय़ङ अ़चुमिन्मादा खारालो चेवाचि, खोन्ओसा मोदा म़युङाङाओ ब़द्धे यहुदिचि खोन्कि ग्रिक्चिआ येसु ख्रिस्त साकोङ्छ़ङ अ़मुवा। 2मेन साकोङ्छ़ङ मान्मुकादा यहुदिचिआ निरावाचि म़थेन्तुचिकि हाङ्पाएदा साकोङ्छ़ङ कामुचिओ अ़चुदेङ्सालाप्पादा अ़चुमिन्मा अ़त्लो म़मेत्तुप़चि। 3खोन्नुछाङ पावल खोन्कि बारनाबास मो सहरादा ब़द्धेकालेन्तारि हाङ्पाओ अ़चुसोमातुक्मा य़ङ्ओ अ़तुक्वादा राक्एनान खालुयाङ्सा युङाचि। हाङ्पा येसुआ खोचि म़दोम्दाओ बुन्चि खोन्कि काचिचि मुमा सावा म़प़चिकिना खोचिओ अ़चुय़ङ अ़छ़ङ मुयाङ निकिना खाङ्अ़मुसा। 4मेन सहरादाओ म़नाचि ह्वा रुहुप्दा म़हासान्चिन। देम्पाङ यहुदिचिएह्यात्नि खोन्कि देम्पाङ छाम्माय़ङ्चिएदात्नि म़वाङा। 5खोन्किना निरावाचिकि यहुदिचि अ़क्नि अ़चुबुसुवाचिएनान म़तोङाकिना पावल खोन्कि बारनाबास म़सुङुचिकि लुङ्आ वेन्मा याम़योआ। 6मेन खोचिआ ओ य़ङ अ़सिन्ताचु, खोन्कि खोचि लुकोनिया धिखाहुप्दा छुक्ताङाओ लुस्त्रा खोन्कि दर्बि सहरादा फुङ्साखाराचिकि 7मोदा खोचिआ नुय़ङ्खान खाअ़लुसायुङ्साचु।
लुस्त्रा खोन्कि दर्बि सहरादा
8लुस्त्रा सहरादा अ़क्छा म़ना युङाङा। खो अ़माआ तोक्तुओदाङ्काङा पेसोला मुवाङाओसा देम्खाछाङ मान्कोन्युक्ता। 9पावल्आ हाङ्पाओ अ़चुय़ङ खालुसुङुओ ग़रि खोसाआ एनुङु। पावल्आ होन्नि खोएह्यात्नि चोउदिसु, खोन्कि खो नुमा अ़साकोङ्छ़ङ याआङाओ सिन्तुकिना, 10पावल्आ अ़धिवा य़ङ्आ लो, “आम्लाङ्दा चोप्नि एवा!” खोन्किना मो पुवालोन्ताकि कोन्मा पुक्तु।
11खोन्कि पावल्आ मो म़दोम्दाओ काचि मुओ म़ना मुक्लाचिआ अ़खाकिना मोचि लुकोनिया य़ङ्दा ओवात्नि म़य़ङा, “माङ्चि म़नाचिवा आन्कान्एदा म़धान्तान्युङ्सान्चिन!” 12मोचिआ बारनाबास जिउस माङ खोन्कि पावल हर्मेस माङ्नि अ़लोवा, देकिनालो खो मुलो काचेप्पा ओ। 13जिउस माङ्ओ माङ्खिम सहराओ अ़बुदा याआङा। माङ काब़क्पा खोन्कि म़ना मुक्लाचिआ बोयोङ्चि खोन्कि बुङ्वात़क्चि म़तारुचिकि सहरा वाङ्खा लाम्दा छाम्माय़ङ्चि हेन्खोक्वा धान्माप़मा निकिना म़चुम्सान्चिन।
14मेन छाम्माय़ङ्चि बारनाबास खोन्कि पावल्आ ओ य़ङ्ओ अ़तुक्वादा अ़एनाचु, खोन्कि खोचिआ अ़चुतित्चि अ़रेआचुचिकिना म़नाचिओ अ़चुरादा पात्याङ्सा लोराखाराचि, 15“यावाचि ओ, खानानिन देकिना ओवाको काचि त़मुन्येन? आन्काच्याछाङ खानानिन्वाको म़नाङा ओ। आन्काच्या खानानिन ओ सोज्जेओ य़ङ्चिदाङ्का अ़ह़ङ निनाम्हाङ्एदात्नि लासानिन निकि नुय़ङ्खान खुत्निकि तायुङ्साच्या। मोक्को निनाम्हाङ्आङा निनाम्मा, हेन्खामा, धियाङ्वामा खोन्कि मोदा म़याक्याङ्ओ झारा म़मुयुचि। 16आराङ्ओ झारा म़नाचि निनाम्हाङ्आ अ़चुताकावा च़मा म़प़चि। 17खोन्नुछाङ खोसाआ खोक्को देम सोमाकातुक म़युङ्याङ निकिना म़नाचि खाङ्म़मेत्तुयुङ्सुचि। खोक्कोसाआ खानानिन निनाम्मादुङ्का वा खोन्कि अ़नुवाक चा खोन्कि चामायु ऩप़न्कि ऩङानुमाआ आम्नुओ साकोङ्वा कोङ्हाक्नि ऩमेत्तिन्प़न।” 18पावल खोन्कि बारनाबास्आ मोवात्नि अ़लोवाचुचिन्कि खोचि हेन्खोक्वा प़मादाङ्का राक्काभाला मोचि अ़थेङ्ताचुचिन। 19खोन्किना खा-खाक्को एन्तिओखिया खोन्कि आइकोनियन्याङ्का म़बानाओ यहुदिचिआ पावल्ओ अ़देङ्सालाप्पादा म़ना मुक्लाचि म़थेन्तुचि। खोचिआ पावल लुङ्आ अ़वेरा, खोन्कि खो सुवादानि अ़मित्ताकिना सहरादाङ्का बुङ्खाया अ़सारालोत्ता। 20मेन काखेङ्चि म़ताकि पावल्ओ अ़ऱङ्कोप्नि म़एवा, खोन्किना खो पुवालोन्ताकि सहराहुत्दा लासादिसा। खोन्कि अ़माङ्कोलेन बारनाबास्एनान दर्बि सहरादा खाराचि।
सिरिया धिखाहुप्ओ एन्तिओखिया सहरादा लासाचिओ
21खोचिआ मो दर्बि सहरादा नुय़ङ्खान खाअ़एत्ताचुचिन, खोन्कि हाङ्पाएदा ब़द्धे काखेङ्चि म़लिसा। खोन्किना खोचि लुस्त्रा, आइकोनियन खोन्कि एन्तिओखिया लासाचि। 22खोचिआ येसु काखेङ्चि “लावामि ह़ङ्म़ङ्दा सावा खोन्कि साकोङ्छ़ङ मुवायुङ्सानिन” निकिना राक अ़पुवाचुचिन। “निनाम्हाङ्ओ अ़चुहाङ्होन्दा वाङ्मा आन्कान ब़द्धे दुखाचि आङ्माङादोत”नि खोचिआ अ़लोवाचुचिन। 23पावल खोन्कि बारनाबास्आ झारा साम्भुङ्चिओ निम्पाङ ताङ्पाचि अ़छेन्ताचुचिन। खोन्कि खोचिओ निम्पाङ चा मान्चामाङ युङाचिकि याअ़मात्तापुवाचुचिन, खोन्कि खोचिआ साकोङ्छ़ङ अ़मुवाचुओ हाङ्पाआ म़खाचिने निकिना मोचि अ़पुवालावाचुचिन। 24खोन्किना खोचि पिसिदिया लियाङ्सा पाम्फिलियादा लासाताचि। 25पर्गादा निनाम्हाङ्ओ अ़चुय़ङ खाअ़लुसाचिआचुकि खोचि अतालियादा धाचि।
26मोदाङ्का मोचि वाप्तेलादा वाङाचिकि एन्तिओखिया लासाखाराचि। मोदाओ साकोङ्छ़ङ कामुचिआ पावल खोन्कि बारनाबास म़छेन्तुचिकि निनाम्हाङ्ओ अ़चुय़ङ खाअ़लुचुने निकिना मोचि निनाम्हाङओ अ़चुसोम्तुक्मादा म़प़लाउयुङ्सुचिओ, मो काचि खोचिआ ओन्ग़रि अ़चिआयुङ्साचु। 27खोचि एन्तिओखियादा लासाताचिकिना साम्भुङ अ़बुत्ताचु, खोन्कि निनाम्हाङ्आ खोचिएदा अ़मुवाओ झारा काचिचिओ अ़तुक्वादा खोन्कि देत्नि निनाम्हाङ्आ निरावाचिछाङ साकोङ्छ़ङ मुखालाम म़होत्तुप़चिओ मो खाअ़एत्ताचुचिन। 28खोन्किना खोचि मोदा काखेङ्चिएनान ब़द्धेकालेन्तारि युङाचि।
Currently Selected:
छाम्माय़ङ 14: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
