छाम्‍माय़ङ 10

कर्नेलियस्‌आ पत्रुस बुत्‍तुओ

1कैसरिया सहरादा कर्नेलियस अ़ऩङ मुवाङाओ अ़क्‍छा म़ना युङाङा। खो #१०:१ इतालिया रात्‍खामि रुहुप : रोम तोक्‍पोहाङ्‌होन्‌ओ अ़क्‌तात रात्‍खामि रुहुप।इतालिया रात्‍खामि रुहुप्‌नि अ़लोवाङाओदाओ अ़क्‍छा अ़चुकप्‍ताना याआङा। 2खो खोन्‍कि खोसोओ अ़खिम्‌दाओचि झारासाआ निनाम्‍हाङ अ़मित्‍ताङा, खोन्‍कि अ़कित्‍ताङा। खोसाआ मान्‍तोक्‍कादा यहुदिचि सोमातुक्‍तुचिकि फासुङुचि, खोन्‍कि खो अ़धुन निनाम्‍हाङ्‌एदा यामाराङा। 3अ़खोलेन आप्‍फात सुम्‌काकोम साङाहिदा खोसाआ अ़सेन्‍चिदा निनाम्‍हाङ काफा खोएदा ताओ नुलोक खा, खोन्‍कि मो निनाम्‍हाङ काफाआ “कर्नेलियस!”नि बुत्‍तु।

4खोसोओ अ़क़मा काराकि खोएह्‍यात्‍नि होन्‍नि चोउदिसु, खोन्‍कि “हाङ्‌पो, दे त़य़ङिन्‌येन?”नि लो।

खोन्‍कि निनाम्‍हाङ काफाआ खो लासुलो, “निनाम्‍हाङ्‌आ आम्‌यामात्‍मा अ़एनायुङ्‌सा, खोन्‍कि खाना मान्‍तोक्‍कादाचि मोहा त़प़चिओ अ़खायुङ्‌सा! 5खोन्‍कि हान योप्‍पादा म़नाचि छुत्‍तुखाइसुचि, खोन्‍कि सिमोन अ़ऩङ मुवाङाओ पत्रुस बुत्‍लामेत्‍तुचि। 6खो अ़क्‍छा साहोक्‌वाओ काचि कामु सिमोन्‌ओ अ़खिम्‌दा युङ्‌याङ। खोसोओ अ़खिम धियाङ्‌वामाओ अ़केम्‌दा छुक्‌याङ।”

7खोन्‍किना कर्नेलियस्‌एनान काचेप निनाम्‍हाङ काफा खारालावाकिना खोसाआ अ़हारुक्‌चिएदाओ ह़वाङ, खोन्‍कि खोसोओ अ़रात्‍खामिचिएदाओ अ़क्‍छा निनाम्‍हाङ कामित म़ना बुत्‍तु। 8खोन्‍कि खोसाआ झारा म़लिसाओ य़ङ्‌चि मोचि खाएत्‍तुचिकि योप्‍पा छुत्‍तुखाइसुचि।

पत्रुस्‌ओ अ़सेन्‍चि

9अ़माङ्‌कोलेन अ़खोलेन्‌ओ आप्‍फात बार साङाहिदा मोचि कोन्‌याङ्‌सा मो सहराओ अ़च़क्‌दा म़तादिसाङा। पत्रुस मोन्‍ग़रि साहोक्‌वाओ काचि कामु सिमोन्‌ओ अ़खिम्‌ओ अ़छोङ्‌छान्‌दु यामात्‍सि वाङा। 10खो सासुवा, खोन्‍कि दि-दि चामानि मिना। खोन्‍कि निचि चा म़कुक्‍ताङाओ ग़रि इम्‍सिन्‍दान्‌वा लिसाकि खोसाआ सेन्‍चि खा। 11खोसाआ निनाम्‍मा होराओ खोन्‍कि मोदुङ्‌का चारकाचोम्‌दा अ़लावाकि अ़धिवाङ तित्‌वाको हेन्‍खामाह्‍युत्‍नि धाङाओ खा। 12मो तित्‌दा झाराकाखालाओ चारकालाङ्‍ओ साक्‍स़ङ्‌चि, खोन्‍कि बाखादा कासात्‍नान्‍चिन्‌चि खोन्‍कि नाम्‍छ़ऱदुओ छोङ्‌वाचि म़याआङा। 13खोन्‍किना खोसाआ अ़क्‌तात य़ङ एनु, “पत्रुस, पुवालोन्‍ता, खोन्‍कि सेरुचिकि चोचि!”

14मेन पत्रुस्‌आ लो, “नुमाइ अ़नुनिन, हाङ्‌पो! देकिनालो अ़ङ्‌का देम्‍खाछाङ अ़सेङ्‌निनिन्‌ओ खोन्‍कि पोप्‍ताओ मान्‍चायुक्‍ङा।”

15मो य़ङ खोसाआ ह्‍वादुओदु लासुएनु, “दि निनाम्‍हाङ्‌आ अ़सेङ्‌सायुङ्‌सा, मो खाना पोप्‍ताओनि मान्‍लोदो।”

16ओ य़ङ सुम्‌कादुओदुतारि मोवात्‍निङा लिसा, खोन्‍कि मो च़क्‍नि निनाम्‍मादुत्‍नि अ़लासाखात्‍ता।

17पत्रुस्‌आ खाओ सेन्‍चिओ अ़तुप्‍माय़ङ दि हे निकिना अ़मिन्‍मादा ओहा ना मोहा लिसायुङ्‌साहिदा कर्नेलियस्‌आ छुत्‍तुचिओ म़नाचि मोन्‍ग़रिङा सिमोन्‌ओ अ़खिम सेन्‌याङ्‌सा वाङ्‌खा लाम्‌ओ अ़बुदा म़तादिसा। 18खोन्‍कि “सिमोन्‌निओ पत्रुस ओदा युङ्‌याङ हे?”नि य़ङ्‌सा अ़धिवा य़ङ्‌आ अ़सेना।

19मोन्‍ग़रितारि पत्रुस्‌आ सेन्‍चिओ अ़तुक्‌वादा मित्‍तुयुङ्‌सुङु, खोन्‍कि सेङ्‌लावाआ खो अ़लोवा, “एनु खो! सुम्‍पाङ म़नाचिआ खाना ऩलाम्‌याङ। 20पुवालोन्‍ताकि ह्‍युछान्‌यु धा, खोन्‍कि आम्‍ऩङ्‌मान्‍छुन्‍माङ मोचिएनान अ़क्‍नि खारा, देकिनालो अ़ङ्‌का मोचि छुत्‍तुङ्‌च़ङ्‌ओ।”

21खोन्‍किना पत्रुस ह्‍युना धान्‍तान्‍चिन्‌कि मो म़नाचि लोचि, “खानानिन्‌आ त़लामुम्‌योम्‌ओ म़ना अ़ङ्‌काङा ओ। खानानिन देकि त़तान ओ?”

22मो म़नाचिआ अ़लासालोवा, “रोमि रात्‍खामिचिओ अ़चुकप्‍ताना कर्नेलियस्‌आ अ़बाइसिन्‍काओ। खो साम्‌योक्‍मि म़ना खोन्‍कि निनाम्‍हाङ काकित खोन्‍कि झारा यहुदिचिआ अ़न्‍नुनु साया अ़मेत्‌याङ्‍ओ म़ना म़मुयाङ। खोसोओ अ़खिम्‌दा खानानिन ऩबुत्‍तिन्‌येन, खोन्‍कि खानानिन्‌एदाङ्‌का खोसाआ य़ङ्‌खान एन्‍मानि अ़क्‍छा निनाम्‍हाङ्‌ओ अ़चुकाफाआ लोयुङ्‌सु।” 23खोन्‍किना पत्रुस्‌आ मो म़नाचि खिम्‍हुत्‌दा बुत्‍तुचिकि साऩङ्‌वा मेत्‍तुचि।

कर्नेलियस्‌ओ अ़खिम्‌दा पत्रुस

खोन्‍कि अ़माङ्‌कोलेन पत्रुस चुम्‍सान्‍चिन्‌कि मोचिएनान खारा। खोन्‍कि योप्‍पादाओ साकोङ्‌छ़ङ कामुचिछाङ थोरेत खोएनान अ़क्‍नि म़खारा। 24अ़छिन्‍तुओ लेन मोचि कैसरियादा म़ताला। कर्नेलियस्‌आ अ़दाक्‍मित्‌चि खोन्‍कि म़तोङाङाओ अ़यावाचि अ़क्‍नि बुत्‍तुचिकि पत्रुस अ़हुङाङा। 25पत्रुस तादिसाकिना कर्नेलियस्‌आ तुउ, खोन्‍कि खोसोओ अ़लाङ्‌दा बोम्‍सान्‍चिन्‌कि साया मेत्‍तु। 26मेन पत्रुस्‌आ खो क़क्‍तुकि लो, “पुवालोन्‍तानिन, अ़ङ्‌काछाङ म़ल़क म़नाङा ओ।”

27खोन्‍किना पत्रुस कर्नेलियस्‌एनान हान्‌याङ्‌सा खिम्‍हुत्‌दा वाङाचि, पत्रुस्‌आ मोदा ब़द्‍धेकापाङ म़नाचि म़कोवान्‍चिन्‌ओ खाचि। 28खोन्‍कि खोसाआ मोचि लोचि, “अ़क्‍छा यहुदिआ ओवात्‍नि निरावाचिएनान यावा मुमा खोन्‍कि अ़चुखिम्‌दा वाङ्‌मा आन्‍काओ य़ङ्‌हुप्‌ओ अ़देङ्‌सालाप्‍पा ओ निकिना खानानिन्‌आ नुलोक त़सिन्‍तुम्‌योम। मेन निनाम्‍हाङ्‌आ साङ्‌छाङ अ़सेङ्‌निनिन्‌ओनि अ़मित्‍तिमिन निकिना अ़ङ्‌का खाङ्‌ऩमेत्‍ताङ्‌युङ्‌साङ। 29खोन्‌ओसा खानानिन्‌आ अ़ङ्‌का त़बुत्‍ताङ्‌याङ्‌ऩङ्‌वा देत्‍छाङ मान्‌य़ङ्‌माङ अ़ङ्‌का बानाङ। हान अ़ङ्‌का लोनि, देकि खानानिन्‌आ अ़ङ्‌का त़बुत्‍निओ?”

30खोन्‍कि कर्नेलियस्‌आ लो, “चारकालेन बुया, अ़खोलेन आप्‍फात सुम्‌काकोम साङाहिदा अ़ङ्‌का अ़ङ्‌खिम्‌दा यामाराङ्‌याङ। मोन्‍ग़रि छोक्‍छोक्‍छोक्‌वाओ तित हुम्‍साङाओ अ़क्‍छा म़ना अ़ङ्‌बुदा एवादिसा। 31खोसाआ अ़लोवाङ, ‘कर्नेलियस, निनाम्‍हाङ्‌आ आम्‌यामात्‍मा अ़एनायुङ्‌सा, खोन्‍कि खाना मान्‍तोक्‍कादाचि मोहा त़प़चिओ अ़खायुङ्‌सा। 32खोन्‌ओसा योप्‍पा सहरादा पत्रुस्‌निओ सिमोन बुत्‍सि म़नाचि छुत्‍तुखाइसुचि, खो धियाङ्‌वामाओ अ़केम्‌दा साहोक्‌वाओ काचि कामु सिमोन्‌ओ अ़खिम्‌दा युङ्‌याङ।’ 33खोन्‍किना च़क्‍नि अ़ङ्‌का खानानिन बुत्‍सि म़नाचि छुत्‍तुङ्‌च़ङ, खोन्‍कि खानानिन ओदा त़बानिन्‌ओ नुलोक लिसा। हान हाङ्‌पाआ खानानिन आन्‍काओ निम्‍पाङ ऩलोन्‌ओ य़ङ्‌चि एन्‍सि झारा आन्‍कान्‍का निनाम्‍हाङ्‌ओ अ़चुबुदा युङिन्‌येन्‍का।”

निरावाचिआ नुय़ङ्‌खान अ़एन

34खोन्‍किना पत्रुस्‌आ चेप्‍मा पुङ्‌सु, “अ़नुछ्‍याङा अ़ङ्‌का नुलोक सिन्‍तुङ्‌योङ, निनाम्‍हाङ साङ लिप्‍पाछाङ ऩवाङ्‌निन। 35मेन झारा रावादा साङ्‌आ खोक्‍को कित्‍तु, खोन्‍कि निनाम्‍हाङ्‌ओ अ़मिन्‍मावा काचि मु, मो निनाम्‍हाङ्‌आ अ़लोक। 36निनाम्‍हाङ्‌आ इस्राएलि म़नाचि म़हान्‍तुचिओ नुय़ङ्‌खान खानानिन त़सिन्‍तुम्‌योम। खोसाआ येसु ख्रिस्‍तलाम्‍पा खानानिन सेवाङ्‌निओ नुय़ङ्‌खान खाऩएत्‍तिन्‌युङ्‌सिन। खोक्‍कोङा झारासोओ आन्‍हाङ्‌पा ओ। 37येसुओ अ़चुकाचिचि युहन्‍नाओ बप्‍तिस्‍मा प़मा काचि चिआकिना गालिल धिखाहुप्‌दाङ्‌का पुङ्‌सुकि झारा यहुदिया धिखाहुप्‌दा म़लिसाओ निकिना खानानिन्‌आ त़सिन्‍तुम्‌योम्‍च़म। 38खोन्‍कि देत्‍नि निनाम्‍हाङ्‌आ सेङ्‌लावा खोन्‍कि सावा नासरत्‌ओ येसु अ़पुवा, खोक्‍कोसोओ अ़तुक्‌वादा खानानिन्‌आ त़सिन्‍तुम्‌योम्‌ङा। खोन्‍किना खोक्‍को अ़नुवाक काचि मुयाङ्‌सा खोन्‍कि सैतानाआ क़म्‍तुङुचिओचि नुयाङ्‌सा झारादात्‍नि म़कोला, देकिनालो निनाम्‍हाङ खोक्‍कोएदा म़याआङा।

39खोक्‍कोसाआ यहुदियादा खोन्‍कि यरुसलेम्‌दा अ़मुवाओ झारा काचिचिओ आन्‍कान्‍का अ़सालुम्‍स़ङ युङिन्‌येन्‍का। यहुदिचिआ खोक्‍को क्रुस्‌दा अ़ख़न्‍तासेरा। 40मेन निनाम्‍हाङ्‌आ खोक्‍को म़सुवादाओदाङ्‌का सुम्‌कालेन्‌दा अ़खोन्‍तालोइसा, खोन्‍किना खोक्‍को खाङ्‌अ़मुसा। 41निनाम्‍हाङ्‌आ खोक्‍को झारा म़नाचिएदा ना खाङ्‌मान्‍मुअ़दा, मेन अ़चुसालुम्‍स़ङ्‌ओ निकि ऩछेन्‍तिन्‍काओ आन्‍कान्‍काएदा ओन्‍ङा खाङ्‌अ़मुसा। येसु म़सुवादाओदाङ्‌का म़लासाखोन्‍तालोन्‍ताकि खोक्‍कोएनान काचा कादुङ आन्‍कान्‍काङा ओ। 42खोन्‍कि येसुआ आन्‍कान्‍का ऩलोन्‌युङ्‌सिन्‍का, ‘निनाम्‍हाङ्‌आ अ़ङ्‌का अ़ह़ङ्‌चि खोन्‍कि म़सुवादाओचिओ अ़चुछ़ङ्‌छेइसि अ़छेन्‍ताओ निकिना खालुसानुम खोन्‍कि सालुम्‍स़ङ पुवानुम।’ 43झारा निनाम्‍हाङ्‌य़ङ खाकालुचिआ ओक्‍को येसुओ अ़तुक्‌वादा सालुम्‍स़ङ अ़पुवायुङ्‌सा, ‘खोक्‍कोसोओ अ़चुऩङ्‌दा साकोङ्‌छ़ङ कामुचि साङ्‌नुछाङ निनाम्‍हाङ्‌आ अ़चुहेवाचि म़लेत्‍तुप़चि।’”

44पत्रुस ओ य़ङ्‌चि चेवाङाहिदा झारा निनाम्‍हाङ्‌ओ अ़य़ङ काएन्‍चिएदा सेङ्‌लावा म़धान्‍तान्‍चिन। 45खोन्‍कि सेङ्‌लावाओ आसिखा निरावाचिछाङ निनाम्‍हाङ्‌आ म़प़चिओ अ़खाकि पत्रुस्‌एनान अ़क्‍नि काबान यहुदि साकोङ्‌छ़ङ कामुचि दोम्‍तुदोचि, 46देकिनालो मो निरावाचिआ नि य़ङ्‌चिदा म़चेवाङाओ खोन्‍कि निनाम्‍हाङ अ़चोन्‍ताङाओ खोचिआ अ़एना। खोन्‍किना पत्रुस्‌आ लोचि, 47“आन्‍कान्‌वा सेङ्‌लावा कातोक ओचि चाक्‌वाओ बप्‍तिस्‍मा प़मादाङ्‌का साङ्‌आ छेक्‍मा ऱचि?” 48खोन्‌ओसा पत्रुस्‌आ मोचि “येसु ख्रिस्‍तओ अ़चुऩङ्‌दा बप्‍तिस्‍मा लोआनिन”नि लोचि। मोचिआ पत्रुस “अ़क्‍चित लेन युङिन्‍ने”नि अ़लोवा।

Currently Selected:

छाम्‍माय़ङ 10: bap

Highlight

Copy