Luk 6:27-49

Yezu pɛ: «Sɛnɛ, masɛ n pii ka nɛ, kasɛn mɛnɛn bɛ́ n too koe ma lon, ka kaa zɔ́ɔn narɛ, ka bǐɛ̃ zɛnaa kaa baa zɔ́ɔbaa wolen manɛ. Min mɛnɛn bɛ́ n liɛ ka li, ǹ mɛnɛn dɔn bɛ́ boe ka yii ni, ka Lawa nyankɔ bɛn lɛa Lawa bǐɛ̃ zɛnaa ǹ nɛ. Bɛ̀ min nə́ n gɔn tɔ n para-n, a goon kɛ dɔ dia la. Bɛ̀ min nə́ n dɔnkɛ gole si n la, a giulun wɔ boɛɛn kɛ dɔ bɔ n kɔ la. Bɛ̀ min nə́ màn nyankɔ n la, a kɔ la. Bɛ̀ min nə́ n gɔn màn si n la, n baran wo liɛ la wa. Ka bɛ́ zoɛ̃ mà minin nə sii zɛnaa ka-n lɔn, ka dɔn nə zɛnaa ǹ nɛ miɛ̃. Bɛ̀ ka tá kaa narɛɛ wolen narɛ, Lawa n die wàa mɛn saraa koe ka la bɛa lɛa? A giala min kooron dɔn tá ǹ narɛɛ wolen narɛ. Bɛ̀ ka tá bǐɛ̃ zɛnɛɛ kaa dɔmalɛ wolen manɛ, Lawa n die wàa mɛn bǐɛ̃ zɛnɛɛ ka nɛ bɛa lɛa? Min kooron dɔn tá a din goon lɛ zɛnɛɛ. Bɛ̀ ka tá giɔ̀mɔ diɛ a boo la a saraa wolen dininsɔɔ̃nɔn-a, wàa mɛn na a nɛ? Min kooron dɔn tá giɔ̀mɔ diɛ ǹ miãn ganaa, ǹ wusoo ǹ na a dòo saraa ǹ la. Sɛnɛ, bɛ̀ ka tá li ka n baa Lon a Lawa Gole a nɛnyaanan lɛa sonbore, ka saraa gole yɛ, ka siin kɛn zɛnaa: Ka kaa zɔ́ɔn narɛ, ka bǐɛ̃ zɛnaa, min mɛnɛn bɛ́ pàã ba ǹ lon ǹ giɔ̀mɔ dòo saraa wa, ka giɔ̀mɔ da bɛn-a, a giala Lawa lɛ sɛ n bǐɛ̃ zɛnɛɛ bǐɛ̃-doɛ̃ baãnaan laanka min baraan manɛ. Ka makara bɔ kɔn-a, ka kaa Díi Lawa bɛ́ makara doɛ̃ lɔn. Ka baran ka miãn zɛ̀rɛ baa wa, Lawa a re ka zɛ̀rɛ biɛ wa. Ka baran dɔlɔ da kɔn mìi-n wa, Lawa a re dɔlɔ diɛ ka mìi-n wa. Ka zɛ̀rɛn toa kɔn nɛ, Lawa á die ka zɛ̀rɛn toɛ ka nɛ. Ka kɔn gɔ ka màn nɛ, ka zɔɔ̃ a dɔ, ka zɔɔ̃ ka munyəə, ka zɔɔ̃ ka zuzuu. Lawa wɔ a zɛnaa ǹ gɔn nɛ ka bɛ nɛ. Ka bɛ́ ka miãn gɔ ǹ màn zoɛ̃ màn mɛn ganaa, Lawa á die ka dɔn wɔ zoɛ̃ ka bɛ lɛ nɛ.» Yezu boo giməə kɔ́n da ǹ nɛ á pɛ: «Bɛ̀ yii tere-a pɛ, mà a n yii tere-a kɔsɔ a bàlà kuĩ, wàa mɛn sii n die zɛnɛɛ? Ǹ paanan man die kiɛ nyankɔrɔ nɛ.» Á suusu kɛ dɔ da: «Kialandɛnaa ba boe la a la a daraali-n wa, sɛnɛ, kialandɛnaa mɛn bɛ́ ǹ nə́ daraa sɔnbɔraanɛ, bɛ n die goɛ̃ ka a daraali bɛ́ lɔn.» Yezu wusoo á boo giməə kɔsɔ da: «Wàa na á baa n tá giɛ buun ganaa n dɔɔ̃n yii ni, a da yaa mɛn mɛn bɛ́ n din wɔ nɛ, n yii ba bɛ ganaa wa? Man boe la lɔn n pɛ n dɔɔ̃n nɛ mà a golee nsɛ buun bɔ a yii ni, a da yaa n din yii na a ba mɛn kɛ ganaa n wɔ-n wa? Gɔ́ɔ̃ tì-a ke, n mɛn lɛ bɔ n din yii-n bɔrɔ! Bɛ kio, n yii á die wɔlɔ yii n buun lɛ bɔ n dɔɔ̃n wɔ nɛ.» Yezu wusoo doo á pɛ: «Da sonbore kɔ́n ba nɛ baraa koe wa. Da baraa kɔ́n dɔ a nɛ sonbore koe wa. Da gogoonmaa nə n doɛ̃ a din a nɛ li. Min ba gɔ́rɔ nɛ niɛ̃ nyan da ganaa wa, n ba too nɛ niɛ̃ sɛmɛlɛ da ganaa wa. Min sonbore n bǐɛ̃ zɛnɛɛ, a giala a gɔ́ɔ̃ n fu, min baraa dɔ n baraa zɛnɛɛ, a giala a gɔ́ɔ̃ n tì. Min gɔ́ɔ̃ bɛ́ á pã ka boo mɛn nɛ, a lɛ n bɛ lɛ diɛ.» Yezu pɛ: – Bɛ̀ ka a masɛ Di Lawa a boo sii ka n zɛnɛɛ wa, wàa mɛn là na a nɛ ka nə n lɛ paparɛ koe masɛ tɔ li, mà «Dɛnaa, Dɛnaa»? Min woo min, á daa masɛ ganaa, á n too kɔ masɛ a boo ganaa, á si á zɛnaa, masɛ n die nyɛɛ ka nɛ bɛa dɛnaa bɛ́ kɔnboe ka màn mɛn nɛ. Bɛa min lɛ n kɔnboe ka kion-dɔle goon ne. A ná a yala fɔ̃ á zuzulu kɔ yǎa tataã ganaa, á tɔ́n kion lɛ gòã daa. Mu tii wɔ, mu toɛ̃ á daa kion lɛ ganaa, sɛnɛ, a boo la á kion lɛ kaa wa, a giala kion lɛ a doe bǐɛ̃ kɔ. Sɛnɛ, min mɛn bɛ́ masɛ a boo lɛ miɛ, a na a ba zɛnɛɛ wa, bɛa dɛnaa n kɔnboe ka giĩ goon ne, a ná a kion dɔ tán kooro la. A na a giala daa á wɔ tán wa. Mu toɛ̃ á daa kion lɛ ganaa, bǎã goon ne á kaa ka lenlen. Bɛa kion lɛ a kaa a bɔ̀n nə́ gole kɔ parsiini.