Luk 21

Lɔ giɔɔrɔ goon a Lawa gɔ ǹ màn

(Mar 12.41-44)

1Yezu nə́ n yii saa lon á yɛ, mà min mɛnɛn bɛ́ ǹ gɔn màn gialaa kiɛ Lawa gɔ ǹ wɔrɔ kaa ǹ goo lɛ nɛ, pàãman manɛ. 2Á lɔ giɔɔrɔ doobaa goon dɔ yɛ, bɛ n wɔrɔ we bisin màn paa kiɛ goo lɛ nɛ. 3Yezu pɛ: «Sonbore, masɛ n pii ka nɛ, lɔ giɔɔrɔ doobaa kɛ lɛ màn mɛn da goo lɛ nɛ, bɛ á soɛ min gialakun kɛ tumaa wɔ nɛ. 4A giala, minin kɛn lɛn man nə́ màn bɔ ǹ gɔn màn gigiã kɛ nɛ, ǹ nə́ kaa goo lɛ nɛ. Sɛnɛ, lɔ kɛ sɛ na a ná a doobaabaa ǹ wɔ din tumaa saa, á da a nɛ, a bɛ́ n din toe ka màn mɛn nɛ ke lɛn.»

Lawa a kion yui boo

(Mat 24.1-2; Mar 13.1-2)

5Min tɛnɛn man nə́ goã Lawa a kion lɛ boo diɛ, a siĩnbaa nɛ, a kɔlɔ sonboren ne, ka màn sonboren mɛnɛn bɛ́ a nɛ, ǹ nə́ ǹ kɔ Lawa la. Sɛnɛ, Yezu pɛ ǹ nɛ: 6«Lɛawaan tá re die, ka yii bɛ́ kion mɛn-a ke lɛn, a kɔlɔ kɔ́n ba re goɛ̃ ǹ miã lalan wa. A din tumaa á re kiɛ.»

Siin mɛnɛn bɛ́ re n zɛnɛɛ ǹ nyaa mà kiri lɛ a kuri dɔ

(Mat 24.3-14; Mar 13.3-13)

7Minin nə́ nɔ̀n da Yezu la mà Mìinaa, mà bɛ n die n zɛnɛɛ biĩ? Mà sii mɛn dɔ n die nyɛɛ mà ǹ zɛnaa biikoo dɔ? 8Yezu nə́ ǹ lɛ si á pɛ: «Ka n dinin kũ, ka baran toa min kɔ́n nə ka yiri sã wa. A giala, min gigiã á re die ka masɛ tɔ nɛ. Ǹ didie á re pii mà asɛ din lɛ nɛ, ka tá n yii diɛ la, mà haya, mà biikoo lɛ pã kəni. Sɛnɛ, ka baran kɔ ǹ lɛ wa. 9Ka á re zian boo miɛ, ka minin piã boo ne, nyɛ́ɛ baran ka kũ wa. A giala, bɛa siin kɛn lɛn doamaa nɛ, ǹ nə n zɛnaa bɔrɔ, bɛ bie re goɛ̃ kanaa a nya lɛa gɔrɔ wa.»

10Á tɔ́n pɛ ǹ nɛ: «Gána á re zia biɛ gána kɔsɔ ganaa, kii á re zia biɛ ǹ miã kii ganaa. 11Tán bìn-diɛ dadaran tá re n zɛnɛɛ. Busu baraan laanka bòo á re we bǎã gigiã nɛ. Nyɛ́ɛ da ǹ siin ni, ka sii giala pɛ ǹ màn dadaran tá re boe lon gɔ̀nɔn ganaa.

12Sɛnɛ, bɛa siin kɛn lɛn laan bɛ̀ maǹ nə́ n zɛnɛɛ, ǹ tá re ka kuĩ, ǹ fuu nyaa ka nɛ. Ǹ tá re ka we kiri-kurulin gɔn lɛsɔkɔn kionən ne, ǹ tá re ka kiɛ kòso-n. Ǹ tá re ka kuĩ, ǹ wo ka-n kiin laanka pàãdɛnan gialakunun yɔrɔ-a masɛ tɔ a lɛa. 13Bɛ á re n biɛ biikoo lɛa ka lon ka siére baa ǹ boo pɛ. 14#Luk 12.11-12 Ka da ka yiri ni mà ka doamaa bie, ka saa lɛlɛ ka n dinin bɔ sii ni ǹ boo yɔrɔ bɔ ka koa wa. 15A giala, masɛ dinmaa lɛ n die boo koe ka la, kaa zɔ́ɔ kɔ́n ná a ba boe la a bɛ liere kɔ wa, masɛ n die yiridɛnaabaa dɔ koe ka la, kaa zɔ́ɔ kɔ́n ná a ba boe la a kaa boo kìi yiɛ wa. 16Ka dɔɔ̃nɔn laanka ka yɛwolen ne, ka ka giaáran tá re ka we minin gɔn, haalɛ kaa díin laanka ka daanan dɔn dinin. Ǹ tá re ka tɛnɛn dinin dii ǹ gã. 17Ka tìĩ á die boe min tumaa nyin ni masɛ tɔ a lɛa. 18Sɛnɛ, màn kɔ́n ba re ka kuĩ wa. 19Ka n wen yii, bɛ á re toɛ ka nyin nyabaã yɛ.

Bɔ̀n mɛn bɛ́ re Zeruzalɛmu yii

(Mat 24.15-21; Mar 13.14-19)

20Ka bɛ́ re zia gɔnɔn yii ǹ mɛn waáraa Zeruzalɛmu kiwi lɛnpɛnɛ, ka dɔ̃ mà a yu biikoo dɔ. 21Haya, bɛa biikoo li, min mɛnɛn bɛ́ re goɛ̃ Zudee gána nɛ, bɛn nə baa si ǹ wo kelen la. Ǹ mɛnɛn bɛ́ re goɛ̃ kiwi gɔ́ɔ̃ nɛ, bɛn nə soo ǹ nə n bɔ kiwi. Ǹ mɛnɛn bɛ́ re goɛ̃ lalaa lɛ-an nɛ, bɛn baran wɔ kiwi wa. 22#Oz 9.7 A giala, bɛa biikoo lɛ n die goɛ̃ Lawa a gɛ̀ dòo bɔ ǹ lɛawaan lɛa. Màn mɛn tumaa nə n kiɛ̃ sɛ́wɔ nɛ, bɛ doamaa nɛ a n zɛnaa bɛa lɛawaan kɛn lɛn nɛ. 23Bɔ̀n nə die goɛ̃ lɔ nɔnaan wɔ lɛa, ka ǹ mɛnɛn dɔn bɛ́ nɛnyaanan nə́ ǹ gɔn, ǹ nə́ nyɔ koe ǹ la bɛa lɛawaan kɛn lɛn li. A giala, Lawa n die a busii nyɛɛ tɔrɔ kɛ lɛ nɛ, fuu gole á die gána lɛ yii. 24Ǹ tá re zia biɛ ǹ ganaa, ǹ nə ǹ tɛnɛn dɛ ǹ gã, ǹ wo ǹ gialakunun ni gána kɔsɔn kɛn tumaa nɛ kòso nɛn lɛa. Tɔrɔ kɔsɔn tá re basaã koe Zeruzalɛmu kiwi lɛ nɛ, Lawa din nə biikoo mɛn kɔ ǹ la, yǎa bɛ́ kiɛ̃.

Min a Nɛgiĩ a daa boo

(Mat 24.29-31; Mar 13.24-27)

25 # Iza 13.10; Eze 32.7; Zow 2.31; SNS 6.12-13 Sii giala pɛ ǹ mànan tá re yii wasa nɛ ka mui ni ka leeren ne. Kanaa gɔ́ɔ̃ nɛ gánan tá re goɛ̃ foo biɛ niɛ̃ nɛ, yìsi mu wuu laanka a bìn diɛ á die nyɛ́ɛ diɛ ǹ ganaa. 26Bɛa biikoo li minin man die giɛ̃ nyɛ́ɛ gɔn bɛa fuu siin kɛn lɛn da kanaa a lɛa. A giala, lon màn pàãdɛnan dinin tumaa á re n lɔlɛkɔn. 27#Dan 7.13; SNS 1.7 Bɛ kio kəni, ka á re Min a Nɛgiĩ yii die labara la, ka pàã gole laanka gugurubaa gole ne.

28Bɛ̀ bɛa siin kɛn lɛn nə́ n giala kɔ, ǹ tá n zɛnɛɛ, ka golee, ka n foo taã doo, a giala, ka bɔlɔ bɔ biɛ-n diri.»

Lawa a kiibaa lɛ a dirii boo

(Mat 24.32-35; Mar 13.28-31)

29Bɛ kio, Yezu sii a kɔnboe kɛ nyaa ǹ nɛ: «Ka ga gɔ́rɔ laanka da gialakunun kɛn tumaa ganaa. 30Bɛ̀ ka ǹ yɛ luu piɛ̃ lɔn gɔrɔ, ka n doɛ̃ ka dinin ganaa mà bɔ̀nɔn diri. 31Bɛa yɔrɔ kɛ lɛ la, bɛ̀ ka dɔn nə́ bɛa siin kɛn lɛn yɛ n zɛnɛɛ, ka dɔ̃, mà Lawa a kiibaa lɛ a daa diri. 32Sonbore, masɛ n pii ka nɛ: Pelo minin kɛn ba re giɛ̃ ǹ nya, bɛ̀ bɛa sii kɛ tumaa ná a n zɛnaa wa. 33Lon laanka tán tá re kiɛ̃, sɛnɛ, masɛ a boon kɛn ba re kiɛ̃ wa.»

Yezu yii dɔraa boo mɛn da

34Yezu mà ǹ ganaa: «Ka n dinin kũ! Kaa taasiɛn baran n doa zɔ́nɔn ganaa, ka yɔ mii baraa nɛ, ka kanaa a gɔ́ɔ̃ bii siin ni wa, màn mɛn bɛ́ toɛ, dɔlɔ bɔ pinaa kɛ lɛ baran da ka tɔwaa wa, 35lɛawaa mɛn bɛ́ re die kirii kanaa min din tumaa la, ka kan a màn kũ bɛ́ lɔn. 36Sɛnɛ, ka n yii dɔraa, ka Lawa nyankɔ biikoo tumaa waáraa, màn mɛn bɛ́ toɛ, pàã yɛ ka lon, ka n bɔ bɛa biɛ̃ ǹ siin kɛn lɛn nɛ, ka boo la ka golee biɛ̃ ka foo tãbaa nɛ Min a Nɛgiĩ yɔrɔ-a kiri kuru ǹ bǎã nɛ.»

37 # Luk 19.47 Bɛ̀ lɛ̀ waa, Yezu na a biikoo yii zɛnɛɛ Lawa a kion, á n minin darɛɛ. Sɛnɛ, tèlò-n a na á goã a biikoo yii zɛnɛɛ *Olivie dan kele la. 38Baayɛlɛ yiisoone, zaman lɛ tumaa na á goã die a li Lawa a kion, ǹ nə n too kɔ a boo ganaa.

Currently Selected:

Luk 21: SBPE2011

Highlight

Copy