SGK 3

Giĩ laanka lɔ loo a bɔ Edɛn dù gɔrɔ-n boo

1 # SNS 12.9; 20.2 Dɛnaa Lawa don mànan mɛnɛn tumaa zɛnaa, miɛ̃ yiri goã wooro, á la ǹ tumaa nɛ. Á nɔ̀n da lɔ la kɛnɛn: «Lawa pɛ ka nɛ sonbore, mà ka baran dù gɔrɔ lɛ a da nɛ kɔ́n bii wa?»

2Lɔ miɛ̃ lɛ si á pɛ: «Wɔ á boe la wɔ dù gɔrɔ lɛ a da nɛn bii. 3Sɛnɛ, da mɛn bɛ́ dù gɔrɔ lɛ bii, Lawa na á pɛ wɔ nɛ bɛ wɔ paǹ li, mà wɔ baran a nɛ bii wa, wɔ baran n gɔn da a ganaa wa, màn mɛn bɛ́ toɛ wɔ baran gã wa.»

4Miɛ̃ tɔ́n pɛ lɔ-n kɛnɛn: «Haayii dɛ! Ka a re giɛ̃ wa. 5Sɛnɛ, Lawa á doɛ̃, mà bɛ̀ ka bii ǹ mɛn pinaa, ka yii á re toɛ̃, ka á re n biɛ ka Lawa din bɛ́ lɔn, ka sii bǐɛ̃ laanka a baraa dɔ̃.»

6Lɔ lɛ yɛ, mà da nɛ lɛ á siĩn yɔrɔ-a á la yii ni, mà a bii doamaa nɛ a goã kɔɔ̃n lɛ-n, mà min yii á boe li, mà á boe la a min yiri bũ. A ná a nɛ goon na, á bii, á ǹ kɔ́n kɔ ǹ zuũ la a li, a dɔ́ bii. 7Bɛ kio, ǹ dinin paanan yii toɛ̃ kəni, ǹ nə́ dɔ̃ mà ǹsɛn tontoro ne. Ǹ nə́ tɔ́n gɔ́rɔ luu na, ǹ nə́ wɔrɔ kɔn, ǹ nə́ yii ǹ bɔsɔ̃-n mɔnaa lɛa.

8Wasamiɛ̃nɛ, piɛ̃ lɔlɔɔ bɛ́ boe ǹ mɛn waáraa, ǹ nə́ Dɛnaa Lawa lɛ ma, n bibiĩ dù gɔrɔ lɛ gɔ́ɔ̃ nɛ. Ǹ nə́ nɔmaa ǹ nə́ n duru a nyɛɛnɛ dù gɔrɔ lɛ a dan bii. 9Sɛnɛ, Dɛnaa Lawa lɛ dia giĩ lɛ la, á nɔ̀n da la kɛnɛn: «Ma n maa?»

10Giĩ lɛ ná a lɛ si: «Má n lɛ ma dù gɔrɔ lɛ nɛ, nyɛ́ɛ ma kũ, a giala ma tontoro ne, bɛ lɛ nɛ, má n duru.»

11Dɛnaa Lawa tɔ́n nɔ̀n da la: «Die na á pɛ n nɛ, mà n tontoro ne? Ma bɛ́ má pɛ n nɛ, máa n baran da nɛ mɛn bii wa, ma nə́ n bɛ lɛ bii ya?»

12Giĩ lɛ tɔ́n pɛ: «N din lɔ mɛn lɛ kɔ ma la, bɛ lɛ na á da lɛ a nɛ kɔ ma la, má tɔ́n bii.»

13 # Kor2 11.3; Tim1 2.14 Dɛnaa Lawa pɛ lɔ lɛ nɛ: «Wàa na á baa ń kɛ zɛnaa?»

Lɔ lɛ ná a lɛ si: «Miɛ̃ na á ma bebele, má da nɛ lɛ bii.»

14Dɛnaa Lawa tɔ́n pɛ miɛ̃-n kɛnɛn: «N sii mɛn zɛnaa ke, man die lɛn pipiã bíi n li. Tɔɔ mànan tumaa laanka don mànan tumaa bii, n din nə die n giɛrɛ tán n nɔ̀ la, ń tá re tii bii n yiikoonaabaa biikoo tumaa li. 15#SNS 12.17 Ma á re baraabaa diɛ n laanka lɔ bii ni, ma da n tɔrɔ laanka lɔ tɔrɔ bii ni. Lɔ tɔrɔ á re n mìi yɔyɔrɛ, n dɔ á re lɔ tɔrɔ yawɛɛ a gòãtoro ganaa.»

16Á tɔ́n pɛ lɔ dɔ nɛ kɛnɛn: «Bɛ̀ ń tá nɔ̀ nɛ ǹ mɛn waáraa, má á re màn diɛ n nɔmaa li, n tá re nɛ yii ka là paparɛɛ nɛ. Giã kun ka n zuũ-n tá re goɛ̃ wɛ̃ nɛ n ganaa, sɛnɛ, n zuũ n die goɛ̃ n mìi la.»

17 # Ebr 6.8 Bɛ kio á tɔ́n pɛ giĩ ni: «Ma bɛ́ má pɛ má laa n ganaa, máa n baran da mɛn a nɛ bii wa, n bɛ́ ń nə́ n saa n lɔ a boo li ń bii, man die lɛn pipiã bíi tán li, n din lɛ taman yii. N yiikoonaabaa gɔ́ɔ̃ nɛ, n la n die paparɛ n tɔn nə n lɛ-a ǹ bii yɛ a nɛ. 18N tá re nyan laanka buu babaraa boe n gòã giulun, tán kɔsɔ ǹ màn nɛ, n tá re bii. 19N tá re sɛ̀fuu koɛ̃ n pɛsɛ̃ n tɔn nə n lɛ-a ǹ bii yɛ, yǎa n wusii n woe tán, n bɛ́ ń bɔ tán mɛn lɛ nɛ. N nə ǹ tii lɛa, n nə ǹ die wusii n wo tii li.»

20Giĩ lɛ ná a lɔ lɛ tɔ kɔ Ɛvu, bɛ giala mà "Yiikoonaa", a giala a din na á yiikoonaan tumaa a náa baa. 21Dɛnaa Lawa tɔɔ ki zɛnaa dɔnkɛ lɛa, á wɔ Aadã laanka a lɔ ganaa. 22#SNS 22.14 Bɛ kio, Dɛnaa Lawa tɔ́n pɛ kɛnɛn: «Minbuiin nɛ á ke, á n baa ka wɔsɛn bɛ́ lɔn, sii bǐɛ̃ laanka sii baraa doɛ̃ wɔ paǹ li. Sisia, yǎa wɔsɛn nə kurii yiikoonaabaa ǹ da kɛa nɛ bii ganaa. Bɛ̀ bɛ bie wa, bɛ̀ á bɛa nɛ na, á bii, a n goɛ̃ a yii n koo miɛ̃, yǎa duduu.»

23Dɛnaa Lawa nə́ ǹ loo, á ǹ bɔ Edɛn dù gɔrɔ lɛ nɛ, màn mɛn bɛ́ toɛ ǹ bɔ tán mɛn nɛ, ǹ wo bɛ lɛ kɔsɔ. 24A bɛ́ á ǹ loo á ǹ bɔ a nɛ ǹ mɛn waáraa, a na á lon màn yiikoonaan doa Edɛn dù gɔrɔ lɛ a lɛ̀giala gɔn la. Gɔya sà tɛ-pɛle n bɛn gɔn, ǹ nə́ pepere bǎã yii ni, yiikoonaabaa ǹ da lɛ a zii lɛduĩ ni.

Currently Selected:

SGK 3: SBPE2011

Highlight

Copy