SGK 13

1Abramu soo Ezipti, á woo Kanaan a gusin a lɛ̀gɔn la, a din laanka a lɔ nɛ, ka ǹ gɔn màn tumaa nɛ. Lɔti dɔ á kun ni.

Abramu laanka Lɔti a sawaa kɔn

2Abramu na á goã pàãma gole lɛa: tɔɔn nə́ goã a lon, ka wɔrɔ laanka sana nɛ. 3Á n toa gusin a lɛ̀gɔn la, á woo miɛ̃ boɛboɛ yǎa Betɛli. A na a zìã lɛ dɔ bǎã mɛn nɛ lɛlɛ, Betɛli laanka Ayii bii ni, á woo yǎa walan. 4A bɛ́ á *wúlu bɔ ǹ bǎã dɔ maa lɛlɛ, á Dɛnaa nyankɔ walan, a n bíi ka a tɔ nɛ.

5Lɔti mɛn dɔ goã zii tɔ we kun ka Abramu ni, tɔɔn nə́ goã a dɔ lon: sèren laanka bòen ne ka diin ni. Zìãn nə́ goã a dinmaa lon. 6Minbuiinin lɛn laanka tɔɔn lɛn mɔnaa taman yii, bǎã lɛ nə ǹ bɔ, ǹ tumaa boo la ǹ nə́ giã kɔn li wa. 7Bɛa biikoo li Kanaan minin laanka Perɛzi minin nə́ goã gána lɛ nɛ. Ǹ kɔn pinaa, zia yoo Abramu a tɔɔn-lɛduə̃lin laanka Lɔti wɔn, bii.

8Abramu tɔ́n pɛ Lɔti ni kɛnɛn: «Zia a siĩni, a wɔ n laanka masɛ bii wa, a siĩni, a wɔ masɛ a tɔɔn-lɛduə̃lin dɔn laanka n wɔn bii wa, a giala, wɔ n kɔn dɔɔ̃nɔn lɛa. 9Gána lɛ a bǎã tumaa bie ke n yɔrɔ-a wa ya? Daa wɔ na kɔn. Bɛ̀ ń woo a gɔsɛ a lɛ̀gɔn la, masɛ n woe a gusin a lɛ̀gɔn la. Bɛ̀ n gusin a lɛ̀gɔn la saa, masɛ n woe gɔsɛ a lɛ̀gɔn la.»

10 # SGK 2.10 Lɔti nə́ n yii saa á ga Zurdɛ̃ bǎã tumaa ganaa. Á yɛ mà mu á bɛa bǎã lɛ boe parsiini, á goã ka Dɛnaa a lɛlɛ a dù gɔrɔ kɛ bɛ́ lɔn, ka Ezipti gána bɛ́ lɔn, bɛ̀ Dɛnaa bɛ́ a tɔn Sodɔmu laanka Gomɔɔrɔ kiwi bɔ̀n baa ǹ mɛn waáraa wa. 11Lɔti Zurdɛ̃ bǎã lɛ tumaa saa a din wɔ lɛa á yoo á woo lɛ̀giala-n. Ǹ nə́ sawaa kɔn miɛ̃. 12Abramu giã Kanaan gána nɛ, Lɔti sɛ giã bǎã basiɛ̃ lɛ a kiwin ni, á woo a zìãn doa yǎa Sodɔmu. 13Bɛa kiwi lɛ dɔ a minin man nə́ goã we Lawa lon parsiini, ka ǹ zɛnaa ǹ sii babaraan nɛ.

14Lɔti bɛ́ á n na, á n bɔ Abramu ganaa ǹ mɛn waáraa, Dɛnaa pɛ Abramu-n bɛ kio kɛnɛn: «N bɛ́ bǎã mɛn nɛ ke lɛn, n toa walan, n nə n yii saa n ga gɔsɛ a lɛ̀gɔn laanka gusin a lɛ̀gɔn la ganaa, ka lɛ̀giala laanka lɛ̀nyɛɛn nɛ. 15#NDS 7.5 Gána kɛ lɛ n yii tá a ganaa ke, má a tumaa kɔ n la, má kɔ n tɔrɔn la yǎa duduu. 16Má á re n tɔrɔ mɔnɛɛ ka tán tii bɛ́ lɔn. Tán tii bɛ́ mɔnaa-n lɔn, min ná a boe la á nimii wa, n dɔ tɔrɔ n die mɔnɛɛ miɛ̃, min ná a boe la a nimi wa. 17Yoo n nə n bibiə̃ gána lɛ nɛ, n wo a sasabaa li, n ga a gɔ́ɔ̃ dɔ a golebaa ganaa. A giala, man koe n la.»

18Abramu yoo ka a zìãn nɛ, á daa giã Manbre a dan gòã li, kunu Ebrɔn ganaa. Á wúlu bɔ ǹ bǎã dɔ walan Dɛnaa wɔ lɛa.

Currently Selected:

SGK 13: SBPE2011

Highlight

Copy