A Matye koe‑noogo 3

A Zãmbatiis koe-moonego

(Mark 1.1-8, Luk 3.1-9,15-17, Zã 1.19-28)

1Wakat kãnga, a Zãmbatiis waa n moonda koe-noog Zʋʋde we-rasempʋɩɩgẽ wã n yetẽ: 2#Mat 4.17, Mark 1.15Tek-y yam n kos sugr tɩ arzãn soolem kolgame. 3#Eza 40.3Yaa a Zã yell la Wẽnnaam no-rɛɛs a Ezayi dag n gom n yeele:

Ned a yembr koɛɛg n kelemd we-rasempʋɩɩgẽ n yetẽ:

Maneg-y Zu-soabã sore,

rems-y bãmb so-bugsã tɩ yɩ tɩrse.

4 # 2Rĩm 1.8 A Zã rag n yera fuug sẽn wʋg ne yʋgemd kõbdo, la a rag n sẽbga a sɛɛgã ne gãong sẽbdga. A rɩɩb rag n yaa sʋy la weoog sɩɩdo. 5Zeruzalɛm dãmbã ne Zʋʋde fãa nebã, la tẽms nins fãa sẽn pẽ Zʋrdẽ wã neb kẽnga yẽnda nengẽ. 6La bãmb vẽnegame n togs b yel-wẽna, tɩ yẽnda lis bãmb Zʋrdẽ koomã pʋgẽ.

7 # Mat 12.34, 23.33 La a Zã sẽn yã Fariizẽ-dãmbã ne Saduusẽ-dãmbã wʋsg sẽn wat lisgã, a yeel-b lame yaa: Wag-toos buudu, ãnda n wilg yãmb y sẽn na maan to‑to n zoe n põs sũ-puugr sẽn watã? 8Sã n yaa a woto, bɩ y wom biis sẽn zems neb sẽn tek yam n kos sugri, 9#Zã 8.33la y ra tags t'a Abrahaam sẽn yaa yãmb ba wã sekame ye. Bala, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abrahaam kamba. 10#Mat 7.19Lar zoe n bee tɩɩs yẽgẽ moasã. B na n kɛɛga tɩɩg ning fãa sẽn ka womd bi-sõamyã n lob bugmẽ. 11Mam yẽ lisda yãmb koomẽ yam tekr yĩnga, la sẽn pʋgend-a maam n watẽ wã yɩɩda maam, tɩ mam pʋs n pa zems tɩ logs bãmb neooda sẽbds ye. Bãmb na n lisa yãmb Sɩɩg-sõng pʋgẽ la bugum pʋgẽ. 12Bãmb zãada b kaorgo. Bãmb na n pɩɩsa b zɛɛga, n wʋk b ki n sui b baoorẽ, la b na n yõoga wudgã ne bugum sẽn ka kiida.

A Zeezi koom lisgu

(Mark 1.9-11, Luk 3.21-22)

13A Zeezi yii Galɩle n wa a Zã nengẽ Zʋrdẽ kʋɩlgẽ wã t'a lis-ba. 14La a Zã zãgsame n yeele: Yaa maam n tog n wa yãmb nengẽ tɩ yãmb lis maam, tɩ yãmb wat mam nengẽ? 15A Zeezi leoka yẽnda yaa: Bas tɩ yɩ a woto, bala, a zemsame tɩ tõnd pids bũmb nins fãa sẽn yaa tɩrse. La a Zã ka kɩɩs bãmb yɛs ye. 16A Zeezi sẽn paam lisg n sa, b yii koomẽ wã. La gese, yĩngr pakame, la bãmb yãnda Wẽnnaam Sɩɩg sẽn wẽnd wall t'a sigd bãmb zugu. 17#Sɩng 22.2, Yɩɩn 2.7, Eza 42.1, Mat 12.18, 17.5, Mark 1.11, Luk 9.35La koɛɛg zĩnda saasẽ n yeele: «Ada yaa mam Bi-ribl-nongr sẽn ta mam yam zãnga.»

Currently Selected:

A Matye koe‑noogo 3: MPBU

Highlight

Copy