A Malasɩ 2
2
Keoogr maan-kʋʋdbã yĩnga
1Moasã, ad bũmb ning mam sẽn yet yãmb
a maan-kʋʋdbã!
2«Ade, yãmb sã n ka kelge,
la y sã n ka yãk yam n kõ mam yʋʋrã waoogre,
mam na n tʋma kãab-wẽngã yãmb sʋka,
la m kɩt tɩ y barkã lebg kãab-wẽnga.
N-yẽe, mam na n kɩtame tɩ y barkã
lebg kãab-wẽnga,
yãmb sẽn ka kelg m keoogrã yĩnga.»
Maam a Saasẽ-Pãng-Soabã n yeele.
3Yãmb yĩng kɩtame tɩ mam na n leng
y yagensã.
La m bol y nensã ne y maandã bĩndu,
y sẽn kʋ rũms nins n maan y tigã bĩndu.
La b na n talla yãmb ne bĩndã n looge.
4 #
Sõd 3.11-13
Dẽ la yãmb na n bãng tɩ yaa maam n yeel
yãmb koe-kãngã, sẽn na n yɩlẽ tɩ kaool ning
mam sẽn maan ne Leevi buudã yagensã
kell n pa.
Maam a Saasẽ-Pãng-Soabã n yeele.
5 #
Sõd 25.12
Mam kaoolã rag n bee ne Leevi buudã,
la rag n yaa vɩɩm ne vɩ-bãane.
Mam kõo bãmb bõn-kãense,
sẽn na n yɩlẽ tɩ b zoe maam,
la bãmb sɩd zoee maam.
Bãmb zoee mam yʋʋrã rabeem.
6Bãmb noyã rag n togsda sɩd zãmsgã,
zãmb rag n ka be bãmb no-bɩmsẽ wã ye.
Bãmb dag n kẽnda ne maam,
pʋ-peelem la tɩrlem pʋgẽ,
n kɩt tɩ neb wʋsg wẽnemd n bas b kongrã.
7Bãngr bee maan-kʋʋdã noorẽ.
Bala, yaa yẽnda nengẽ la nebã na n wa sok
n bãng tõogã sẽn tog n tũ to-to,
a sẽn yaa Saasẽ-Pãng-Soabã no-rɛɛsã yĩnga.
8Ade, Saasẽ-Pãng-Soabã yetame:
«La yãmb a maan-kʋʋdbã bʋdg n basa sorã.
Yãmb dɩka tõog n kɩt tɩ neb wʋsg kẽ moogo,
la y sãama kaool ning mam sẽn dag n maan
ne Leevi buudã.
9Mam me na n basame tɩ nebã fãa
paoog yãmb la b ning-y yãnde,
yãmb sẽn ka sak mam goamã yĩnga,
la y sẽn dɩkd tõogã n bakd neb n kaood
bʋʋdã yĩnga.»
Zʋʋda nebã sãama kaoolã
10Rẽ yĩnga, tõnd fãa ka ba a yembr la?
Ka Wẽnnaam a yembr n naan tõnd fãa la?
La yaa bõe tɩ d zãmbd taab n sãamd kaool
ning Wẽnnaam sẽn maan ne d yaab-rãmbã?
11Zʋʋda nebã maana zãmbo.
Yel-beed la b maan Zeruzalɛm ne Israyɛlle.
Bala, Zʋʋda nebã paooga Sẽn-Ka-Saab zĩ-sõngã b sẽn nongã, bãmb sẽn peeg pagb sẽn waoogd wẽn-sãamsã yĩnga. 12Ned ning sẽn maand-a woto, Sẽn-Ka-Saab na n menes-a lame, tɩ ned ka be n na n yeel tɩ bũmb ye. B na n yiis-a-la a Zakoob yagensã sʋka, b na n menesa ned ning sẽn wat-a ne kũun n kõt bãmbã. Baa a sã n yaa maan-kʋʋda.
13Ad bũmb a yiibẽ soab yãmb sẽn leb n maandẽ:
yãmb madgda Sẽn-Ka-Saab tẽn-kugrã
ne y nintãmã, la y yãbrã, ne y wõosgã,
Sẽn-Ka-Saab sẽn ka leb n wẽnemded n get
y kũunã, la yãmb nusã kũun sẽn ka
leb n tat bãmb yamã yĩnga.
14La yãmb sokdame:
«Bõe yĩng tɩ yaa a woto?»
Yaa tɩ Sẽn-Ka-Saab yɩɩ kaset soaba,
foom ne pag ning fo sẽn peeg f bi-bɩɩlem wakatã,
pag ning fo sẽn zãmbã,
baa ne yẽnda sẽn yaa fo zĩid-n-taaga,
n yaa pag ning fo sẽn maan kãadem ne wã.
15Ned ba a yembr sẽn tar yam zɩ n maan
a buud ye.
Ned a yembr bal n maan a woto.
Bala, yẽnda rag n baood n paama biig ning
Wẽnnaam sẽn kãab yẽnda wã.
Dẽ wã, gũus-y y mens ne y tagsgã.
Bɩ ned da wa zãmb pag ning yãmb sẽn peeg
y bi-bɩɩlem wakatã ye.
16Bala, Sẽn-Ka-Saab sẽn yaa Israyɛll
Wẽnnaamã yetame:
«Mam kisa ned sẽn digd a paga,
wa mam sẽn kis ned sẽn maand wẽngã.
Yaa maam a Sẽn-Ka-Saab sẽn yaa Israyɛll
Wẽnnaamã n yeele.
Dẽ wã, gũus-y y mens ne y tagsgã,
la y ra maan zãmb ye.»
Bʋʋd kaoob daare
17Sẽn-Ka-Saab yam yii ne yãmb goamã,
la yãmb sokdame:
«D maana bõe tɩ b yam yi-du?»
Yãmb yetame tɩ ned ning fãa sẽn maand
wẽng tata Sẽn-Ka-Saab yam.
La y leb n yetẽ tɩ yaa ned a woto buud
n noogd bãmb sũuri!
Wall y sokdẽ: «Wẽnnaam ning sẽn kaood
bʋʋdã bee yɛɛnẽ?»
Currently Selected:
A Malasɩ 2: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
