A Luk koe‑noogo 10

A Zeezi tʋma karen-biis pis-yopoe

1Rẽ poore, Zu-soabã leb n yãka neb pis-yopoe la a yiib a taaba, n tʋm bãmb yiib‑yiib tɩ b reng bãmb taoor n kẽng tẽng fãa la zĩig ning fãa bãmb meng sẽn tog n kẽngã. 2#Mat 9.37,38A Zeezi yeela bãmb yaa: «Tigsgã yaa wʋsgo la tʋmtʋmdbã sõor paoodame. Kos-y tigsgã soab tɩ b tʋm tʋmtʋmdb b tigsgẽ wã. 3#Mat 10.16Kẽng-y-yã! Ade, mam tʋmda yãmb wa piis digd-n-yĩids sʋka. 4Da zã-y ligd korgo, wall yolgo, wall neooda ye, la y ra yals n pʋʋs ned sor zug ye. 5Yãmb sã n na n kẽ yir fãa, bɩ y pʋʋs-b a woto: ‹Bɩ laafɩ zĩnd yi-kãngã pʋga.› 6La laafɩ ned sã n be beenẽ, yãmb laafɩ wã na n siga a zugu. La laafɩ ned sã n ka be, bɩ y loog ne y laafɩ pʋʋsem. 7#1Kor 9.14, 1Tɩm 5.18Pa-y yi-yɛnga, n dɩtẽ la y yũud bũmb ning b sẽn na n kõ yãmbã. Bala, tʋmtʋmd toga ne a yaoodo. Da tegs-y yiy ye. 8Tẽng ning fãa yãmb sẽn na n kẽ tɩ b reeg yãmba, bɩ y rɩ bũmb nins b sẽn na n kõ yãmbã. 9Maag-y bãad-rãmb nins sẽn be beenẽ wã, la y yeel-b tɩ Wẽnnaam soolmã kolga bãmba. 10#Tʋʋm 13.51Tẽng ning fãa yãmb sẽn na n kẽ tɩ b ka reeg yãmba, kẽng-y tẽngã soay zut n yeele: 11#Mat 10.7-14, Mark 6.8-11, Luk 9.3-5‹Yãmb tẽngã wubsg meng sẽn bol tõnd naoã, tõnd pĩmsd-a lame n basd ne yãmba. La baoosgo, bãng-y tɩ Wẽnnaam soolmã pẽnegame.› 12#Sɩng 19.24-28, Mat 11.24, Mat 10.15Mam yeta yãmb tɩ da-kãnga#10.12 Da‑kãnga: Yaa bʋʋdã kaoob daare., Sodom sɩbgrã toolem kõn ta tẽng‑kãng rẽndã ye.»

Tẽms sẽn tõdg tɩ b kõn tẽ ye

(Mat 11.20-24)

13 # Eza 23.1-18, Eze 26.1—28.26, Zow 4.4-8, Amo 1.9,10, Zaka 9.2-4 «Korazin, fo na paam toogo! Betsayɩda, fo na paam toogo! Bala, bõn-bãn nins sẽn maan yãmb sʋkã sã n dag n maanẽ Tɩɩr ne Sɩdõ, yaa hal daar zãr la b da na n yeelg boto, la b yug b zug tompeglem n kos sugri. 14Dẽ n kɩt tɩ bʋʋdã daare, Tɩɩr ne Sɩdõ sɩbgr kõn ta yãmb dẽndã ye. 15#Eza 14.13-15La foom, Kapɛrnaom, b na n zẽka foom n taas saasẽ bɩ? Ayo! B na n sigsa foom hal n taas kɩɩm-kulgu. 16#Mat 10.40, Mark 9.37, Luk 9.48, Zã 13.20Ned ning sẽn kelgd yãmb kelgda maam. La ned ning sẽn zãgsd yãmb zãgsda maam. La sẽn zãgsd-a maam zãgsda sẽn tʋm-a maamã.»

Karen-biis pis-yopoe wã lebg n waame

17Neb pis-yopoe la a yiibã lebg n waa ne sũ-noog n yeele: «Zu-soaba, baa zĩn-dãmbã mens sakda tõnd noor yãmb yʋʋrã yĩnga.» 18A Zeezi yeel-b lame: «Mam dag n nee a Sʋtãan sẽn yi yĩngr n lʋɩt wa sa-yãgbo. 19#Yɩɩn 91.13La ade, mam kõo yãmb pãng tɩ y tab wiis la namse, la bɛyã pãngã fãa, la baa fʋɩ kõn tõog n maan yãmb wẽng ye. 20Baoosgo, da maan-y sũ-noog zĩn-dãmbã sẽn sakd yãmbã yĩng ye. Maan-y sũ-noogo, yãmb yʋyã sẽn gʋls arzãn pʋgẽ wã yĩnga.»

A Zeezi sũ-noogo

21Wakat-kãng bala, Sɩɩg-sõng kɩtame t'a Zeezi paam sũ-no-kãseng n yeele: «M ba sẽn yaa arzãn la tẽng Zu-soaba, mam pẽgda yãmba, yãmb sẽn solg bõn-kãens ne yam-dãmba, la yẽesem-dãmbã, n yaool n vẽneg-b ne kom-bãoonegã yĩnga. N‑yẽe, m ba, yaa yãmb n dat tɩ yɩ a woto. 22#Zã 3.35, Zã 10.15M ba kõo maam bũmbã fãa, la ned baa a yembr ka mi Bi-riblã sẽn yaa a soaba, sã n ka a ba wã ye. La ned baa a yembr ka mi ba wã sẽn yaa a soaba, sã n ka Bi-riblã bala, la ned ning Bi-riblã sẽn dat n vẽneg bãmb ne-a wã ye.» 23A Zeezi wẽnemdame n gom ne b karen-biisã b yeyn-yeyn n yeel-b yaa: «Bark bee neb nins nin sẽn yãt bũmb nins yãmb sẽn yãtã zutu. 24Bala, mam yeta yãmb tɩ Wẽnnaam no-rɛɛsdb wʋsgo, la rĩm-dãmb dag n dat n yãnda bũmb nins yãmb sẽn yãtã la b ka yãnd ye. B rag n dat n wʋma bũmb nins yãmb sẽn wʋmdã la b ka wʋm ye.»

Samaari nin-sõng yel-bũndi

25 # Mat 22.35-40, Mark 12.28-34 La gese, tõog karen-saamb a yembr yikame n na n mak a Zeezi n yeele: «Karen-saamba, bõe la mam tog n maan n paam vɩɩm sẽn kõn sa wã tɩ yɩ m pʋɩɩre?» 26A Zeezi sok-a lame: «Bõe la b gʋls tõodã sebrã pʋgẽ, bõe la fo karemd be?» 27#Tõ 6.5, Mk 19.18A leokame n yeele:

«Nong Zu-soabã fo Wẽnnaamã ne f sũur fãa,

ne f yalẽ fãa la ne f pãngã fãa,

la f yamã fãa, la f nong f to wa f menga.»

28 # Mk 18.5 A Zeezi leok-a lame yaa: «Fo leokrã yaa sõama. Maan a woto, tɩ f na vɩɩmde.» 29La yẽnda sẽn dat n wilg t'a yaa tɩrga, a soka a Zeezi yaa: «Ãnda la mam to?» 30Dẽ, a Zeezi leb n gomame n yeele: Dao n dag n yi Zeruzalɛm n dabd Zeriko. A tɩ lʋɩɩ fãadb sʋka, tɩ b rees a sẽn tarã, n pãb-a hal t'a kolg kũum, tɩ b bas-a n looge. 31Mikame tɩ maan-kʋʋd n dag n dɩk so-kãnga. A yãnda raoã, la a gilg n loog n bas-a lame. 32Woto me, Leevi ned a yembr taa zĩ-kãngã. A yãnda raoã, la a gilg n loog n bas-a lame. 33#2Kib 28.15La Samaari ned a yembr sẽn dag n togd sor taa raoã sɛɛgẽ n yãnd-a, t'a nimbãaneg yõk-a. 34A kolga raoã, n tɩbs a noadã ne kaam la reezẽ rãam, la a vil-b ne pɛɛla. Rẽ sẽn sa, a rɩk-a lame n zombg a meng bõn-zoambdga, n tall-a n kẽng sik zĩigẽ n tɩ ges a yelle. 35Vẽkembeoogo, a yãka deniye a yiib n kɩs sik zĩigã soab n yeel-a t'a yõdg n ges bãadã yelle, la t'a ligd sã n kẽ, a lebgre a meng na lebs-a. 36Bãmb b tãabã sʋka, bʋg n wẽnda a yaa ned ning sẽn lʋɩ-a fãadbã sʋkã to? 37Tõog karen-saambã leokame tɩ yaa ned ning sẽn zoe-a yẽnda nimbãanegã. La a Zeezi yeel-a lame t'a me kẽng n tɩ maan a woto.

A Mart ne a Maari

38 # Zã 11.1 A Zeezi sẽn kẽnd ne b karen-biisã, b taa tẽng a yembre, la pag sẽn boond t'a Mart sika bãmb a yiri. 39A dag n tara ma-bi-poak sẽn boond t'a Maari. La a Maari zĩnda Zu-soabã sɛɛgẽ n kelgd bãmb goamã. 40Rɩɩbã seglg yɛl toay-toayã dag n sooga a Mart tagsgã. A waame n yeel yaa: Zu-soaba, mam ma-bi-poakã sẽn bas maam m yembr tɩ m get seglgã yellã ka namsd yãmba? Dẽ wã yaa, yeel-y-yã-a t'a sõng-ma. 41Zu-soabã yeela a Mart yaa: Marte! Marte! Fo maanda yɩɩre, n sidgd ne bũmb wʋsgo. 42Bũmb a yembr tãa n yaa tɩlɛ. A Maari yãka pʋɩ-sõng b sẽn kõn deeg n bas-a ye.

Currently Selected:

A Luk koe‑noogo 10: MPBU

Highlight

Copy