A Aaze 1
1
Sẽn-Ka-Saab roogã meebo
1#Ɛsd 4.24—5.2, 6.14Rĩm a Daryʋʋs sẽn deeg naam tɩ yʋʋm yiiblẽ, kiuug a yoob soabã pipi daare, Sẽn-Ka-Saab tũnuga b no-rɛɛs a Aaze n gom ne a Saltiyɛll biig a Zorobabɛll sẽn dag n yaa Zʋʋda soolem gʋvɛrneerã, ne a Yehosadak biig a Zozoe sẽn dag n yaa maan-kʋʋr kãsmã. B yeela bãmb yaa:
2«Saasẽ-Pãng-Soabã yetame: ‹Nin-bãmbã yetame: Wakatã nan ka ta ye. Wakat ning b sẽn segd n lebs n me Sẽn-Ka-Saab roogã nan ka ta ye.› »
3Rẽ n kɩte, tɩ Sẽn-Ka-Saab tũnug b no-rɛɛs a Aaze n gom ne bãmb n yeele:
4«Rẽ yĩnga, zemsame tɩ yãmb be ro-neeb pʋsẽ,
tɩ mam doogã yaool n lʋɩ zãnga?»
5Moasã, Saasẽ-Pãng-Soabã yetame yaa:
«Tags-y n ges-y yãmb sẽn yaa-a soabã.
6Yãmb bʋda wʋsgo, la y tigsa bilfu.
Yãmb dɩtame, la y ka tɩgd ye.
Yãmb yũudame, la y nens ka yilimd ye.
Yãmb yera futu, la y waoodã ka yit ye.
La sẽn dɩkd-a yaood sã n deeg a ligdi,
yaa wa a sui-a-la kor-wurung pʋga.»
7Ade, maam a Saasẽ-Pãng-Soabã yetame:
«Tags-y n ges-y yãmb sẽn yaa-a soabã.
8Rʋ-y tãngã zug n tɩ bao raad n lebg n wa
me m doogã,
tɩ m sũur yɩ noog ne-a tɩ m wilg m ziirã beenẽ.
Yaa maam a Sẽn-Ka-Saab n yeele.»
9Yãmb dag n tẽeda wʋsgo,
la y wa n yasa ne bilfu,
tɩ y wʋk rẽndã n kuili,
la mam fʋʋs-a lame t'a looge.
Bõe yĩng tɩ m maan a woto?
Yaa maam a Saasẽ-Pãng-Soabã n sokde.
Yaa mam doogã sẽn lʋɩ,
tɩ yãmb ned kam fãa bas-a,
n bas n get a meng roog yellã yĩnga.
10Yaa rẽ n kɩte, tɩ saag ka leb n niida,
tɩ tẽn-gãongã bõn-koaadl ka womd ye.
11Mam kɩtame tɩ war kẽ tẽngã, tɩ tãmsã zut kʋɩ,
tɩ bɩle wã, ne reezẽ rãamã la kaamã sɛ,
la m kɩt tɩ tẽn-gãongã bõn-koaadl kʋɩ,
tɩ ninsaalb ne rũms namsdẽ,
la y tʋʋmã fãa yɩɩ zaalem.
12A Saltiyɛll biig a Zorobabɛlle, ne a Yehosadak biig a Zozoe sẽn yaa maan-kʋʋr kãsmã, la neb a taabã fãa kelga Sẽn-Ka-Saab sẽn yaa bãmb Wẽnnaamã koɛɛga, wa sẽn zems no-rɛɛs a Aaze sẽn togsã, la wa sẽn zems Sẽn-Ka-Saab sẽn yaa bãmb Wẽnnaamã sẽn tʋm-a t'a togsã. La rabeem yõka nebã Sẽn-Ka-Saab taoore. 13Sẽn-Ka-Saab koe-toagsd a Aaze goma ne nebã n yeel-b tɩ Sẽn-Ka-Saab yetame: «Mam bee ne yãmba. Yaa maam a Sẽn-Ka-Saab n yeele!» 14Sẽn-Ka-Saab neka a Saltiyɛll biig a Zorobabɛll sẽn yaa Zʋʋda gʋvɛrneerã yam, la b nek a Yehosadak biig a Zozoe sẽn yaa maan-kʋʋr kãsmã yam, ne neb a taabã fãa. Bãmb wa n sɩnga Saasẽ-Pãng-Soabã sẽn yaa bãmb Wẽnnaamã roog meeb tʋʋmde. 15Yaa rĩm a Daryʋʋs sẽn deeg a naamã tɩ yʋʋm yiiblẽ, kiuug a yoob soabã rasem pisi la a naas daare.
Currently Selected:
A Aaze 1: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
