Sɩngre 7
7
Sa-kẽengã waoongo
1Sẽn-Ka-Saab yeela a Nowe yaa: «Bɩ foom ne f pagã, la f zakã rãmb fãa kẽ koom koglgã pʋga. Bala, mam gesame, tɩ fo zamaanã nebã sʋka, yaa foom f yembr n yaa nin-tɩrg mam taoore. 2Yãk rũm-sõama wã buud fãa kãadem-kãadem a yopoe-poe n ning f nengẽ, raoog ne yãanga. La f yãk rũms nins sẽn ka sõama m nifẽ wã me, raoog ne yãanga. 3La f yãk bõn-yɩgdɩ wã sẽn yɩgd yĩngrã me kãadem-kãadem yopoe-poe, raoog ne yãanga, tɩ bãmb me buudã tõe n zĩnd dũniyã zugu. 4Bala, ka ne rasem a yopoe, mam na n kɩtame tɩ saagã wa ni dũniyã zug rasem pis-naase, la yʋnd pis-naase, la mam na n menesa bõn-vɩɩsã buud fãa mam sẽn naanã.» 5A Nowe maana bũmbã fãa wa sẽn zems Sẽn-Ka-Saab sẽn dag n yeel yẽnda wã kɛpɩ.
6Sa-kẽengã sẽn wa n na n wa dũniyã zugã, rẽ t'a Nowe rag n tara yʋʋm kobs-yoobe. 7#Mat 24.38-39, Luk 17.27A Nowe kẽe koom koglgã pʋga, yẽnda ne a kom-dibli wã, la a pagã ne a bi-pagbã, n na n paam n põs sa-kẽengã koom. 8Rũm-sõama wã ne rũms nins sẽn ka sõama wã, n paas bõn-yɩgdɩ wã ne bõn-bãoonegã sẽn saad tẽn-gãongã zugã waame, 9la b kẽe koglgã pʋg kãadem-kãadem n naag a Nowe, raoog ne yãanga, wa Wẽnnaam sẽn dag n yeel a Nowe wã. 10La rasem a yopoe wã daare, sa-kẽengã sɩnga niib dũniyã zugu.
11 #
2Pɩy 3.6
A Nowe sẽn wa n tar yʋʋm kobs-yoobã yʋʋmde, kiuug a yiib soabã rasem piig la a yopoe daarã, tẽngã zĩ-zulumsã ko-ninã pusame n yi, tɩ sa-gãongã ko-ninã pagse. 12La saagã nii dũniyã zug rasem pis-naase, la yʋnd pis-naase. 13La badaar bala, a Nowe ne a pagã, ne a kom-dibli a tãabã, a Sɛm, ne a Kam la a Zafɛte, ne b pagb a tãabã kẽe koom koglgã pʋga. 14La b kẽe ne we-rũmsã fãa wa sẽn zems b buudu, la yir rũmsã fãa wa sẽn zems b buudu, la ne bõn-bãoonegã fãa sẽn saagd tẽn-gãongã zugã wa sẽn zem b buudu, bõn-yɩgdɩ wã fãa wa sẽn zems b buudu, la bũmb nins fãa sẽn tar pɩgs n yɩgdã. 15Bũmb nins fãa sẽn tar vʋʋsmã kẽe koglgã pʋg kãadem-kãadem, n naag a Nowe. 16Bãmb fãa kẽe beenẽ raoog ne yãang raoog ne yãanga, wa Wẽnnaam sẽn dag n yeel a Nowe wã. La Sẽn-Ka-Saab paga koom koglgã t'a Nowe be pʋgẽ. 17Sa-kẽengã nii dũniyã zug n kaoos rasem pis-naase. Koomã lebga wʋsgo, la a zẽka koglgã t'a bas tẽn-gãongã. 18Koomã rag n paasdame n lebgd wʋsg dũniyã zugu, la koglgã rag n dugda koomã zugu. 19Koomã rag n lebgda wʋsg dũniyã zug n paasdẽ. La a lima tãms nins fãa sẽn yaa lug-lug n be dũniyã zugã. 20Koomã lima tãmsã hal n zʋʋg t'a zulmã ta kãntɩɩg piig la a nu. 21Bũmb nins fãa sẽn dag n vɩ dũniyã zugã kiime. Yaa bõn-yɩgdɩ wã, la yir rũmsi, we-rũmsi, la bõn-bãooneg nins fãa sẽn saagd tẽn-gãongã zugã, la ne ninsaalbã fãa. 22Bũmb nins fãa sẽn vʋʋsd ne yõor n dag n be tẽn-koɛɛngã zugã kiime. 23Wẽnnaam menesa bõn-vɩɩs nins fãa sẽn dag n be dũniyã zugã, yaa ninsaalbã, rũmsã, bõn-bãoonegã ne bõn-yɩgdɩ wã. B menesa bãmb fãa dũniyã zugu. Yaa a Nowe ne sẽn dag n be-b koglgã pʋgã bal n põse. 24Koomã kell n yɩɩ wʋsg dũniyã zug n kaoos rasem koabg la pis-nu.
Currently Selected:
Sɩngre 7: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.