Sɩngre 49
49
A Zakoob ninga a kambã barka
1A Zakoob boola a kambã n yeel-b yaa:
«Tigm-y taab tɩ m wilg-y bũmb ning sẽn na n paam yãmb wakat sẽn wate.
2A Zakoob kambã, tigm-y taab n kelg-y-yã!
Kelg-y yãmb ba a Israyɛlle!
3Rubɛn, fo yaa mam bi-kãsenga,
n yaa mam pãnga, la mam bi-bɩɩlem
wakatẽ bi-rẽenga.
Fo tara ziir n yɩɩda, la f tar pãng n yɩɩda.
4Fo fõta wa koom, la fo ka na n leb n paam
kãsengã ye.
Bala, fo kẽe ne f ba paga, la fo sẽn dʋ mam
gãagã n dẽgma wã, fo paooga maam.
5A Sɩmyõ ne a Leevi yaa ma-biisi.
Bãmb tara b sʋʋs n maand nen-kegl-tʋʋma.
6Bɩ mam da kẽes m toog bãmb yellẽ ye.
Mam kõn tol n paam yam a yembr
ne bãmb b tiging pʋgẽ ye.
Bala, bãmb sũ-puugrã pʋga, b kʋʋ nebã,
la bãmb maana pʋ-toog n pas niig nao-gĩina.
7Bɩ kãab-wẽng paam bãmb sũ-puugrã,
bala, yaa nen-keglem tʋʋmde.
La m kãabd bãmb sũ-yikrã,
bala, a yaa nin-kʋʋre.
Mam na n weela bãmb a Zakoob
kambã sʋka,
la m na n kɩtame tɩ b sãeeg n kẽ Israyɛll
buudã sʋka.
8Zʋʋda, fo saam-biisã na n pẽga foom.
Fo nug na n wẽooga f bɛɛbã yubli,
la fo ba wã kom-dibli na n wõgemda fo taoore.
9 #
Sõd 24.9, Vẽn 5.5 A Zʋʋda yaa gɩgem-polle.
M biiga, fo yii kʋʋb zĩigẽ n watẽ!
A Zʋʋda põta a nao, n gãe wa gɩgemde,
n gãe wa gɩgem-yãanga.
La yaa ãnda n na n tõog t'a yiki?
10Naam dasaar kõn tol n zãag n bas a Zʋʋda ye.
La naam kãnd kõn tol n kong yẽnda
naoã tẽngr ye, hal t'ɩ sẽn soa bãmbã wa,
tɩ nebã buud fãa sak yẽnda.
11Yẽnda na n loee a bõang reezẽ tɩɩga,
la a rɩk a bõan-bil n loe ne reezẽ bu-sõng tɩɩg willi.
Yẽnda na n pegsa a fut reezẽ rãam pʋga,
la a pekda a fu-yerg reezẽ rãam
sẽn moog wa zɩɩm pʋga.
12Rãam kɩtame tɩ yẽnda nin mooge,
la bĩisim na n pelga a yẽna.
13A Zabulõ na n zĩnda ko-kãsemsã noore.
Yẽnda zĩigã na n yɩɩ koom kogend zĩiga,
la yẽnda soolmã na n tall n tɩ tãaga Sɩdõ.
14A Isakaar yaa bõan-kɛgeng sẽn gãe yãg
a yiib sʋka.
15Yẽnda mikame tɩ zĩig ning yẽnda sẽn be
wã yaa sõama.
La tẽngã yaa noogo.
Yẽnda kɩlla a bãok tɩ b zɩlg-a zɩɩbo,
la a kẽesa a meng yembd tʋʋm-wɛgl pʋga.
16A Dan na n yɩɩ a nebã bʋ-kaooda,
wa Israyɛll buud a taabã.
17A Dan na n yɩɩ wa waaf sẽn be sor zugu,
la wa põeer sẽn be sor zugu,
n dũmd wed-moaag nao-bendo,
t'a wed-rʋʋdã lʋɩt zãmbɛɛla.
18Sẽn-Ka-Saabo, mam gũuda yãmb fãagrã!
19Sã n yaa ne a Gaade, tãb-bi-sull n na n
tigim n zab ne yẽnda,
la yẽnda na n tõog-b lame n dig-ba!
20Sã n yaa ne a Asɛɛre, yẽnda tẽngã
bõn-koaadlã na n woma biis wʋsgo.
Yẽnda na n yãka rɩ-nood n kõ rĩm-dãmba.
21A Neftali yaa wa walg sẽn tar lohorem
n dogd kom-neeba.
22A Zozɛf wẽnda tɩɩg yẽgen-tobengo,
a yaa wa tɩɩg sẽn be ko-bundum noor yẽgen-tobengo,
la a wilã tãoome n zʋʋg lalgã.
23Tãb-biis baoo yẽnda noore,
la b tãoo yẽnda ne pɛɛma.
Yẽnda bɛɛbã rag n yaa tãb-tãoodba.
24La yẽnda kell n gãda a tãpã kãenkãe.
A Zakoob pãng-soabã paasa yẽnda nusã pãnga.
Rẽ kɩtame tɩ yẽnda lebg pe-kɩɩma,
n yaa Israyɛll pĩig kugr sẽn tar pãnga.
25Bɩ fo ba wã Wẽnnaam sõng foom.
Bɩ Sẽn-Tõe-Fãa wã ning foom barka,
yaa bark sẽn na n yi yĩngr saasẽ,
yaa bark sẽn yɛdg zĩ-zulumsẽ,
yaa bark sẽn kõt rogem.
26Fo ba wã bark yaa kãseng n yɩɩd neb
nins sẽn dog maamã rẽnda.
La a yɩɩda hal kʋdem-wẽndẽ tãmsã barkã.
La a yɩɩd pĩnd kunkubã bõn-neeba.
Bɩ bark-kãensã zĩnd a Zozɛf zugu,
bɩ barkã zĩnd soab ning sẽn welg toor
a ba-biisã sʋkã zugu.
27A Benzame yaa rigd-n-yĩidga.
Yibeoogo, yẽnda wãbda a rũnga.
La zaabre, yẽnda pʋɩta a sẽn paamã.»
28Yaa nin-bãmbã n yaa Israyɛll buud piig la a yiibã. Yɩɩ woto la bãmb ba wã gom ne bãmba, n ning-b zut barka. Yẽnda ninga ned kam fãa zug bark sẽn yaa toor zalle.
A Zakoob kũum ne a mumbu
29Dẽ, a Zakoob yeela a kambã yaa: «Mam na n kiime n bʋʋg m saam-dãmbã sẽn deng maam n ki wã. Bɩ y mum maam n naag m yaab-rãmbã yaad sẽn be tãn-bok ning sẽn be Hɛt ned a Efrõ pʋʋgẽ wã. 30#Sɩng 23.3-20Yaa tãn-bok ning sẽn be Makpela pʋʋgã sẽn pẽ Mamre Kana tẽngã. Yaa pʋʋg ning a Abrahaam sẽn deeg Hɛt ned a Efrõ nengẽ n da n maan yaad zĩigã. 31#Sɩng 25.9,10, Sɩng 35.29Yaa beenẽ la b mum a Abrahaam ne a pag a Saara, la yaa beenẽ me, la b mum a Izak ne a pag a Rebeka. Dẽ wã, yaa beenẽ la mam me mum a Leya. 32Bala, b reega pʋʋgã ne tãn-bokã sẽn be beenẽ wã n da Hɛt nebã nengẽ.» 33#Tʋʋm 7.15A Zakoob sẽn gom ne a kambã woto n sɛ, a rʋʋsa a naoã a gãagã zugu, la a kiime tɩ b mum-a n naag a saam-dãmbã.
Currently Selected:
Sɩngre 49: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
