Sɩngre 46

A Zakoob kẽnga Ezɩpte

1A Israyɛll talla a sẽn so bũmb ninsã fãa n looge. La bãmb sẽn ta Bɛɛr-Seba, a Israyɛll maana maoong beenẽ n kõ a ba a Izak Wẽnnaamã. 2La Wẽnnaam goma ne a Israyɛll yʋng vẽnegr pʋgẽ n yeele: «Zakoobe, Zakoobe!» T'a Israyɛll leok tɩ ad maam. 3La Wẽnnaam yeel-a lame: «Mam yaa Wẽnnaam sẽn yaa fo ba wã Wẽnnaam. Ra zoe rabeem tɩ kẽng Ezɩpt ye. Bala, yaa beenẽ la mam na n kɩt tɩ fo lebg bu-kãseng ba. 4Mam meng na n yãaga foom n kẽng Ezɩpte, la mam mengã n na n leb n tall foom n wa. Yaa a Zozɛf meng nug n na n mum fo nin f kũum daare.»

5A Zakoob yii Bɛɛr-Seba. A Israyɛll kambã talla b ba a Zakoob ne bãmb kambã ne b pagbã ne terok-rãmb nins Faarõ sẽn dag n kõ tɩ b tɩ rɩk-b n wa wã. 6#Tʋʋm 7.15Bãmb kãaga b rũmsã, la b wʋk b paoongã b sẽn dag n paam Kana tẽngã n zã n kẽng Ezɩpt tẽnga. Dẽ, a Zakoob talla a yirã rãmb fãa n kẽng Ezɩpt tẽnga. 7A Zakoob peega a kom-dibli wã ne a kom-pugli wã, la a kambã kom-dibli ne a kambã kom-pugli, la a yirã rãmb fãa n kẽng Ezɩpt tẽnga.

8Ad a Israyɛll kamb nins sẽn tũ n kẽng Ezɩptã yʋy: Yaa a Zakoob ne a kom-dibli wã: Yaa a Zakoob pipi bi-ribl a Rubɛn. 9A Rubɛn kamb yaa a Henoke, a Palu, a Ɛtsron ne a Karmi. 10A Sɩmyõ kamb yaa a Yemuwɛlle, a Yamindi, a Ohaade, a Yakin ne a Sokaare, n paas Kana tẽng bi-puglã biig a Sayulli. 11A Leevi kamb yaa a Gerson, a Kehat ne a Meraari. 12A Zʋʋda kamb yaa a Ɛɛre, a Onan, a Sela, a Perɛtse, ne a Zerake. La a Ɛɛr ne a Onan kii Kana tẽnga. A Perɛts kamb yaa a Ɛtsron ne a Hamulli. 13A Isakaar kamb yaa a Tola, a Puuva, a Zoob ne a Sɩmron. 14A Zabulõ kamb yaa a Serɛɛde, a Elon ne a Zaheleyɛlle. 15Bãmb yaa a Zakoob kamb nins a Leya sẽn dog Padan-Aramã, n paas yẽnda bi-pugl a Dina. Bãmb fãa zãng yaa neb pis-tã la a tã, kom-dibli wã ne kom-pugli wã sẽn naag taaba.

16A Gaad kamb yaa a Sifyon, a Hagi, a Suni, a Ɛtsbon, a Eri, a Aarodi ne a Aareli. 17A Asɛɛr kamb yaa a Yimna, a Yiseva, a Yisevi ne a Beriya, n paas bãmb tão-poak a Seera. A Beriya kamb yaa a Ebɛɛr ne a Malkiyɛlle. 18Bãmb yaa a Zilpa kamba. A Labã sẽn dag n dɩk a soab n kõ a bi-pugl a Leya wã. A Zilpa roga a Zakoob kamba. Bãmb fãa yaa kamb piig la a yoobe. 19Ad a Zakoob pag a Rasɛll kamba: Yaa a Zozɛf ne a Benzame. 20#Sɩng 41.50-52On maan-kʋʋd a Poti-Feera bi-pugl a Asnat sẽn yaa a Zozɛf pagã roga a Zozɛf kamb a yiib Ezɩpt tẽnga. Yaa a Manaase ne a Efrayiim. 21Ad a Benzame kamba: Yaa a Bela, a Bekɛɛre, a Asbɛlle, a Geera, a Naama, a Eki, a Roose, a Mupim, a Hupim ne a Arde. 22Bãmb yaa a Zakoob kamb nins a Rasɛll sẽn dogã. Bãmb fãa yaa neb piig la a naase.

23A Dan biig la a Husim. 24Ad a Neftali kamba: Yaa a Yatseyɛlle, a Guni, a Yetsɛɛr ne a Sɩlɛm. 25Bãmb yaa a Bila kamba. A Bila yaa bi-pugl ning a Labã sẽn dag n dɩk n kõ a bi-pugl a Rasɛllã. A Rasɛll kambã fãa yaa neb a yopoe.

26Neb nins sẽn tũ a Zakoob n kẽng Ezɩpt tẽngã fãa sõor yaa neb pis-yoob la a yoobe. La rat n yeelame tɩ yaa a Zakoob kom-dogdsã ne b kambã, a Zakoob kambã pagb sẽn ka naage. 27#Tʋʋm 7.14A Zozɛf paama kamb a yiib Ezɩpt tẽnga: Yaa neb a yiibu. Dẽ, a Zakoob yirã rãmb fãa sẽn kẽng Ezɩptã sõor yaa neb pis-yopoe.

28A Zakoob tʋma a Zʋʋda t'a kẽng a Zozɛf nengẽ n tɩ yeel-a tɩ bãmb rabda Gosɛn tẽnga. La a Zakoob ne a yirã rãmb sẽn ta Gosɛn tẽngã, 29a Zozɛf segla a saar n kẽng Gosɛn tẽngã n na n tɩ seg a ba a Israyɛlle. La a Zozɛf sẽn yãnd a baaba, a mobg-a lame, n yãb n kaoose. 30A Israyɛll yeela a Zozɛf yaa: «Mam sẽn yãnd fo nengã, n bãng tɩ fo ket n vɩɩme wã, baa mam sã n ki moasã, ka yell ye!» 31A Zozɛf yeela a kẽem-dãmbã ne a ba wã zak rãmb fãa yaa: «Mam na n kẽng n tɩ togsa Faarõ, la m wilg-b tɩ mam kẽem-dãmbã ne mam ba wã zak rãmb sẽn dag n be Kana tẽngã waame, n be mam nengẽ. 32La m wilg Faarõ tɩ nin-bãmbã yaa gʋʋn-gʋʋndba, la b tara rũms wʋsgo. La b talla b rũm-bãoonegã ne b rũm-bɛdã, la bũmb nins fãa bãmb sẽn so wã n wa. 33Woto, Faarõ sã n wa bool yãmb n sok tɩ yãmb tʋʋmd yaa bõe, 34bɩ y leok-b yaa: Tõnd sẽn yaa yãmb tʋmtʋmdbã yaa gʋʋn-gʋʋndba, sẽn sɩng ne yãadem wakat hal tɩ ta rũndã, wa tõnd ba-rãmbã me sẽn dag n yaa gʋʋndbã. Dẽ, b na n bas-y lame tɩ y zĩnd Gosɛn tẽngã pʋga. Bala, Ezɩpt tẽngã neb kisa neb nins fãa sẽn gʋʋnd rũm-bãoonegã.»

Currently Selected:

Sɩngre 46: MPBU

Highlight

Copy