Sɩngre 44

B rõda a Benzame wagdem

1A Zozɛf kõ a zakã naab noor n yeel yaa: «Bao kood n pids nin-bãmbã yondã, n zems b sẽn tõe n zɩ n looge, la f rɩk ned kam fãa ligd n ning a yolgẽ. 2La f rɩk mam wũmblã, wanzuri wũmblã n ning yao-zʋʋgã yolgẽ n naag ne a koodã ligdi.» Zak naabã maana bũmbã fãa wa a Zozɛf sẽn yeelã. 3La vẽkembeoogã yibeoogo, b basa nin-bãmbã tɩ b loog ne b bõensã. 4Bãmb sẽn yi tẽngã n nan ka zãage, a Zozɛf yeela a zak naabã yaa: «Yik n babs raopã n mao n paam-ba. La f sok-b n ges yaa bõe tɩ b maan bãmb neere, tɩ bãmb lebsd wẽnga. 5Ka wʋmbl-kãngã la mam soaalã tar n yũud la b lɩkd n get beenẽ n bʋgd b bagrã la? Yãmb sẽn maan bũmb ningã ka zems ye.» 6Zak naabã tɩ paam-b lame, n yeel-b gom-kãensã fãa. 7Bãmb leoka zak naabã yaa: «Yaa bõe tɩ mam soaalã gomd a woto? Tõnd sẽn yaa yãmb yembsã kõn sak n maan bũmb a woto bada! 8Ade, tõnd yii Kana tẽng n zã ligd ninga tõnd sẽn yãnd tɩ be tõnd yondã pʋsã, n lebg n wa lebs yãmba. Dẽ wã, tõnd na n yɩɩ a wãna, n leb n wa zuud wanzuri bɩ sãnem yãmb soaalã zakẽ? 9Yãmb sẽn na n yãnd bõn-kãng ned ning nengẽ yãmb tʋmtʋmdbã sʋkã, bɩ y kʋ a soabã! La tõnd fãa na n lebga m soaalã yembse.» 10Zak naabã leok-b lame: «Beneere, yãmb n gom n yõk y mense. Mam sẽn na n yãnd bõn-kãng ned ning nengẽ wã na n lebga mam yamba, la yãmb na n paama lohorem.» 11Dẽ, ned kam fãa yɩɩ tao-tao n sik a yolg n loke. 12La zak naabã vɛɛsa yondã. Yẽnda sɩnga kãsem n tɩ tãag yao-zʋʋga. La b mikame tɩ wanzuri wũmblã bee a Benzame yolgẽ wã. 13Bãmb ned kam pãrsa a futu, la ned kam fãa lebs a bõang zɩɩb n zɩlge. La b lebg n leba tẽnga pʋga.

14A Zʋʋda ne a ba-biisã lebg n taa a Zozɛf yirã, la rẽ t'a Zozɛf ket n bee yiri. La bãmb wõgemda a Zozɛf taoor n fõgen b nens tẽnga. 15La a Zozɛf soka bãmb yaa: «Yaa bõe tʋʋmd la yãmb sẽn maanã? Yãmb ka mi tɩ ned sẽn yaa wa maamã bʋgda bagr n bãngd bũmb ning sẽn be la?» 16La a Zʋʋda leokame: «Mam na n yeela m soaalã tɩ bõe? Mam na n gomame n yeel tɩ bõe? Tõnd na n maana bõe n wilg tɩ d ka beege? Yaa Wẽnnaam n puk tõnd beegrã. Ad tõndo, tõnd lebga yãmb yembse, tõnd ne b sẽn yãnd wũmblã ned ning nengẽ wã.» 17La a Zozɛf yeelame: «Ayo! Mam ka na n maan a woto ye. Yaa b sẽn yãnd mam wũmblã ned ning nengẽ wã n na n lebg mam yamba, la yãmb tõe n lebg n leba y ba wã nengẽ ne bãane.»

A Zʋʋda yõka a Zozɛf sɛɛga

18La a Zʋʋda kolga a Zozɛf n yeel yaa: «M soaala, y sugri! Y kabre, mam kotame tɩ y sak tɩ y tʋmtʋmdã gom ne-yã, la y ra yik y sũur ne-m ye! Bala, yãmb yaa wa Faarõ meng bala! 19M soaala, yãmb dag n soka y tʋmtʋmdbã n ges b sã n tara baaba bɩ ba-biig a to. 20La tõnd dag n leoka m soaalã n yeele tɩ tõnd tara ba sẽn yaa nin-kẽema, la d tar yao-zʋʋg a yembr d ba wã sẽn dog a kʋʋlem zugẽ, la yao-kãng tara a ma-biig sẽn maan kaalem. Dẽ, yẽnda yaa a ma wã bi-yende. La a ba wã nong-a-la wʋsgo. 21La yãmb yeela tõnd tɩ d tɩ peeg-a n wa yãmb nengẽ, tɩ yãmb meng nif yãnd-a. 22La tõnd dag n leoka m soaalã n yeel yaa: bi-kãngã ka tõe n zãag n bas a ba wã ye, yẽnda sã n bas a ba wã, a ba wã na n kiime. 23La yãmb yeelame: Yãmb yao-zʋʋgã sã n ka tũ yãmb n wa, mam ka na n deeg yãmb ye. 24Dẽ, tõnd sẽn lebg n leb m baaba sẽn yaa yãmb tʋmtʋmdã nengẽ wã, tõnd togs-a-la yãmb goamã fãa. 25La tõnd ba wã yeelame: Lebg-y n leb-y n tɩ ra bɩle n wa. 26La tõnd yeela d ba wã tɩ tõnd ka tõe n lebg n lebe, tɩ tõnd yao-zʋʋgã ka tũ ye. Bala, raoã yeelame tɩ tõnd yao wã sã n ka tũ tõndo, bãmb ka na n deeg tõnd ye. 27Dẽ, mam baaba wã sẽn yaa yãmb tʋmtʋmdã yeela tõnd yaa: ‹Yãmb mens miime tɩ mam pagã dag n tara kamb a yiibu. 28La a yembrã yii mam nengẽ n menem, la mam tagsdame tɩ we-rũms n wãb-a, bala, hal tɩ ta moasã, mam nan ka yãnd-a ye. 29Dẽ wã, yãmb sã n deeg bi-kãngã me n bas maam, tɩ bũmb sã n tɩ maan-a, yãmb na n kɩtame tɩ mam sig kɩɩm-kulg ne m zoob-peendã ne sũ-sãanga.› 30Rẽ wã, mam sã n lebg n leb m baaba sẽn yaa yãmb tʋmtʋmdã nengẽ, tɩ biigã ka tũ tõndo, 31la tõnd ba wã sã n yãnd tɩ biigã ka tũud tõndo, b na n kiime. Rẽ na n yɩɩ tõnd sẽn yaa yãmb tʋmtʋmdbã n na n kɩt tɩ mam ba wã sẽn yaa yãmb tʋmtʋmdã sig kɩɩm-kulg ne a zoob-peendã la ne sũ-sãanga. 32Bala, mam sẽn yaa yãmb tʋmtʋmdã rɩka sard biigã wɛɛngẽ n yeel m baaba tɩ mam sã n ka tall biigã n lebg n wa, bɩ b ning maam taal m vɩɩmã tɛka. 33Rẽ wã, mam kot-y lame tɩ y bas tɩ mam led biigã zĩigẽ n pa ka n lebg yãmb yamba, tɩ biigã lebg n tũ a kẽem-dãmbã n kuili. 34Sã n ka rẽ, mam na n maana a wãn n kẽng m ba wã nengẽ, tɩ biigã ka tũ maam? Mam ka rat n yãnd m ba wã sẽn na n paam sũ-sãang ningã ye!»

Currently Selected:

Sɩngre 44: MPBU

Highlight

Copy