Sɩngre 33

A Zakoob seg a Ezayu

1A Zakoob sẽn zẽk a neng n gese, a nee a Ezayu sẽn wate, tɩ neb kobs-naas tũud-a. Woto, a Zakoob pʋɩɩ kambã n kɩt t'a Leya kambã bʋʋg-a, t'a Rasɛll kambã bʋʋg-a, tɩ yem-pogs a yiibã me kamb bʋʋg-ba. 2A Zakoob kɩtame tɩ yem-pogsã ne b kambã lʋɩ taoore, t'a Leya ne a kambã pʋgle, t'a Rasɛll ne a Zozɛf yaool n pʋgl poorẽ. 3La yẽnda mengã lʋɩɩ bãmb fãa taoore, n wõgemd n fõgen a neng tẽng naoor a yopoe n yaool n na n ta a kẽemã sẽn beẽ wã. 4La a Ezayu wudgame n seg yẽnda, n mobg-a, n mok-a. La bãmb b yiibã fãa naaga taab n yãbe. 5La a Ezayu sẽn zẽk a neng n yãnd pagbã ne kambã, a sokame: «Yaa yɛ rãmb la sẽn pʋgd foom woto wã?» La a Zakoob leokame: «Yaa kamb nins Wẽnnaam sẽn maan nimbãan-zoeer n kõ mam sẽn yaa yãmb tʋmtʋmdã.» 6Yem-pogsã ne b kambã kolgame n wõgemde. 7La a Leya me ne a kambã kolgame n wõgemde. Rẽ poore, a Zozɛf ne a ma a Rasɛll me kolgame n wõgemde.

8A Ezayu sokame yaa: «Fo rat n maana bõe ne rũm-kʋʋng ning mam sẽn segã?» A Zakoob leok-a lame: «Yaa sẽn na n kõ yãmb m soaalã tɩ y tõe n sak n deeg-ma.» 9A Ezayu yeela a Zakoob yaa: «M yao sõngo, mam zoe n tarame tɩ seke, dẽ wã, tall f rẽnda.» 10Dẽ, a Zakoob leokame: «Ayo! Yãmb sã n sɩd basa maam taale, mam kotame tɩ y sak n deeg kũunã mam meng sẽn kõt yãmbã. Bala, rẽ kɩtame tɩ mam sẽn yãnd yãmb nengã yaa wa mam sẽn yãnd Wẽnnaam neng bala, la wilgdame tɩ yãmb sak n deega maam sõama. 11Dẽ wã, bɩ y sak n deeg mam kũunã mam sẽn yãk n kõt yãmbã, tɩ bala, Wẽnnaam ninga mam zug bark hal tɩ mam tar mam sẽn dat fãa.» La a Zakoob pẽdga a Ezayu hal t'a wa sak n deeg a kũunã.

12A Ezayu yeelame: «Yik tɩ d looge. Yik tɩ d sɩng kẽna, la maam n na n lʋɩ taoore.» 13A Zakoob leoka a Ezayu yaa: «M soaala, yãmb la sẽn mi tɩ mam kambã ka tar pãngã la! Sẽn paas me, yaa tɩ mam tara piis ne niig sẽn tar kom-peend sẽn ket n yẽsemdẽ. Dẽ wã, b sã n na n modg bãmb tɩ b kẽn daarã tõre, rũm-bãoonegã fãa na n kiime. 14Sẽn yaa woto wã, m soaala, m kot-y lame tɩ y reng maam taoore, tɩ mam na n kẽna bãanem-bãanem, n zems rũmsã sẽn be ne maamã pãnga, la sẽn zems kambã me sẽn tõe n kẽne, hal n wa n ta yãmb nengẽ Seyɩɩr tẽnga.» 15A Ezayu yeelame: «Sã n yaa woto, mam na n yãka neb kẽer sẽn tũud maamã n bas ne foom.» La a Zakoob leokame: «Bõe yĩng tɩ yãmb dat n maan boto? Mam kotame tɩ m soaalã sak mam kosgã bala.» 16Badaar bala, a Ezayu rɩka Seyɩɩr tẽngã sor n lebg n kuili.

17A Zakoob yikame n kẽng Sukote. La yẽnda mee a roog beenẽ, la a maan yãg n kẽes a rũmsã. Rẽ kɩtame tɩ b pʋd zĩ-kãng yʋʋr tɩ ‹Sukote.›#33.17 Sukote: Yʋʋrã rat n yeelame tɩ ‹yãga.›

18A Zakoob sẽn yi Padan-Aramã, a taa Sɩkɛm sẽn be Kana soolmẽ wã ne laafɩ. La yẽnda kolga tẽngã n tilgi. 19#Zoz 24.32, Zã 4.5A Zakoob raa zĩig a Hamoor sẽn yaa a Sɩkɛm ba wã kamb nengẽ, wakɩ-koeems koabga, n tilg a fu-roogã beenẽ. 20A Zakoob maana tẽn-kugr beenẽ n pʋd a yʋʋr tɩ ‹Ɛll-Elohe-Israyɛll.›#33.20 Ɛll-Elohe-Israyɛll: Rat n yeelame tɩ ‹Israyɛll Wẽnnaam.›

Currently Selected:

Sɩngre 33: MPBU

Highlight

Copy