Sɩngre 31

A Zakoob yii a Labã nengẽ n zoe

1A Zakoob wa n wʋma a Labã kom-dibli wã sẽn gomd n yetẽ: «A Zakoob reega tõnd ba wã laog zãnga. La yaa tõnd ba wã laogã yĩng n kɩt t'a lebg arzɛk soaba.» 2La a Zakoob mikame t'a Labã sũurã ka leb n noom ne yẽnda wa pĩndã ye. 3Dẽ, Sẽn-Ka-Saab yeela a Zakoob yaa: «Lebg n kuil f ba-yirã, f buudẽ wã, la mam na n zĩnda ne foom.» 4A Zakoob kɩtame tɩ b tɩ bool a Rasɛll ne a Leya sẽn dag n be we-kɛɛng n gũud yẽnda rũm-bãoongã tɩ b wa. 5Yẽnda yeel-b lame: «Mam neeme tɩ yãmb ba wã neng ka leb n wẽnd a zaamẽ ne maam ye. La mam ba wã Wẽnnaam zĩnda ne maam. 6Yãmb mensã miime tɩ mam tʋma ne m pãnga fãa n kõ y ba wã. 7La yãmb ba wã bao n na n zãmba maam n tek mam yaoodã naoor piiga. La Wẽnnaam ka sak n bas tɩ yẽnda maan maam wẽng ye. 8Wakat fãa, y baaba sã n yeel tɩ yaa rũm-pẽrem-pẽrmã n yaa mam yaoodo, rũmsã fãa rogda pẽrem-pẽrem, la bãmb sã n yeel tɩ yaa rũm-wad-wadã n na n yɩ mam yaoodo, rũmsã fãa rogda wada. 9Wẽnnaam deega yãmb ba wã rũm-kʋʋngã n kõ maam.

10Wakat ning rũmsã sẽn wat n na n dʋ taabã, mam zãmsd pʋga mam sã n gese, mam neeme tɩ boees nins sẽn dʋʋd yãansã yaa pẽrem-pẽrem, wad-wada, la bẽesem-bẽesem. 11Wẽnnaam malɛɛkã yeela maam zãmsdã pʋgẽ yaa: Zakoobe! Tɩ mam sake. 12La malɛɛkã yeela maam yaa: Zẽk f neng n gese. Boees nins fãa sẽn dʋʋd yãansã yaa pẽrem-pẽrem, la wad-wada, la bẽesem-bẽesem. Bala, mam yãnda a Labã sẽn maan foom bũmb ningã fãa. 13#Sɩng 28.18-22Mam yaa Betɛll Wẽnnaam, zĩig ninga fo sẽn maan tẽn-kugr n ning bark n maan pʋleng ne maamã. Moasã, yik n yi tẽn-kãngã n lebg n kuil fo sẽn dog tẽng ningã.»

14-15Dẽ, a Rasɛll ne a Leya leoka a Zakoob yaa: «Tõnd ka leb n tar zĩig wall pʋɩɩr d ba wã zakẽ ye. Tõnd ba wã geta tõnd wa sãamba. Bala, bãmb koosa tõnd n dɩ d ligdã. 16Wẽnnaam sẽn deeg arzegs nins fãa tõnd ba wã nengẽ n kõ yãmbã yaa tõnd ne d kambã n so. Dẽ wã, bɩ y maan fãa wa Wẽnnaam sẽn yeel yãmb tɩ y maanã.» 17A Zakoob yikame n kɩt t'a kambã ne a pagbã zomb yʋgma. 18A Zakoob kãaga a rũmsã fãa, la a wʋk a laogã yẽnda sẽn dag n paama zãnga. Yaa ne rũms nins yẽnda sẽn dag n paam Padan-Aram soolmẽ wã. A Zakoob yiime n loog n na n kẽng a Ba a Izak nengẽ Kana tẽnga. 19La mikame t'a Labã rag n kẽnga a rũm-bãooneg wõrsgo. A Rasɛll zuu a ba wã wẽn-naandse. 20La a Zakoob belga Aram ned a Labã n soos n zoe n ka togs-a ye. 21A Zakoob wʋka a sẽn so wã fãa n zoe. Yẽnda yikame n pɩʋʋg kʋɩlgã n kẽng Galaad soolem ning sẽn be tãms sʋkã sẽnẽ.

A Labã babsa a Zakoobe

22La rasem a tãabẽ daarã, b tɩ togsa a Labã t'a Zakoob zoeeme. 23A Labã peega a saam-biisã tɩ b tũ yẽnda. Bãmb pʋgla yẽnda n kẽn rasem a yopoe kẽnde, n yaool n na n tɩ paam a Zakoob Galaad soolem ning sẽn be tãms sʋkã pʋga. 24La Wẽnnaam wa n goma ne Aram ned a Labã yʋng zãmsd pʋgẽ n yeele: «Gũus f meng n da yeel a Zakoob tɩ bũmb ye.»

25A Labã paama a Zakoobe. A Zakoob rag n tilga a fu-roogã tãngã zugu. A Labã ne a saam-biisã me tilga b fu-roogã Galaad tãngã zugu. 26Dẽ, a Labã yeela a Zakoob yaa: «Yaa bõe la fo sẽn maan a woto wã? Yaa bõe tɩ fo zãmb maam n tall mam kom-pugli wã n loog wa b sẽn yõg yem-pogs tãpẽ? 27Bõe yĩng tɩ fo zãmb maam n soos n zoe n ka togs maam? Fo sã n dag n togsẽ, mam dag n na n kõẽ-la foom sor tɩ f loog ne sũ-noogo, la ne yɩɩla, la sɩlsãgs ne pends wẽebo. 28La fo ka sak n yaas tɩ mam pʋʋs m kom-dibli wã ne m kom-pugli wã ye! Fo sẽn maana yaa yalemdo! 29Mam tara pãng n tõe n maan yãmb wẽnga, yãmb ba wã Wẽnnaam yeela maam yʋngẽ yaa: ‹gũus f meng n da yeel a Zakoob tɩ bũmb ye!› 30Moasã, fo rɩka f sor n kuiisẽ, tɩ bala, fo ba-yirã yamleoog n tolg n tar-fo, la yaa bõe tɩ fo zu mam wẽn-naandsã?»

31A Zakoob leoka a Labã n yeele: «Mam dag n zoeta rabeem. Bala, mam dag n tagsdame tɩ yãmb na n yõka maam n deeg y kom-pugli wã sẽn be ne maamã ne pãnga. 32La yãmb sẽn na n yãnd y wẽn-naandsã ned ning nengẽ wã ka na n vɩɩmd ye! Ade, vees-y mam teedã d saam-biisã taoor n gese, yãmb bũmb bee beenẽ.» La a Zakoob rag n ka bãng t'a Rasɛll zuu wẽn-naandsã ye.

33A Labã kẽe a Zakoob fu-roogẽ wã, la a kẽ a Leya fu-roogẽ wã, la a kẽ yem-pogs a yiibã fu-roogẽ wã. La yẽnda ka yãnd bũmb ye. La a sẽn yi a Leya fu-roogẽ wã, a kẽe a Rasɛll fu-roogẽ wã. 34A Rasɛll rɩka wẽn-naandsã yẽnda sẽn dag n zu wã, n ning yʋgemdã gaar tẽngre, n zomb a zugu. Dẽ, a Labã veesa fu-roogã zãnga, la a ka yãnd bũmb ye. 35La a Rasɛll yeela a baaba yaa: «M soaala, y kabre, ra yik-y y sũur ne maam, mam sẽn ka yik yĩngr yãmb taoorã yĩnga. Bala, mam yãnda m pekre.» A Labã baoome, la a ka yãnd wẽn-naandsã ye.

36A Zakoob sũurã puugame t'a yik zabr ne a Labã. Yẽnda yeela a Labã yaa: «Mam beegrã yaa bʋgo? Yaa yel-wẽn-bʋg la mam maan yã, tɩ yãmb pʋgd maam a woto ne sũuri? 37Rẽ yĩnga, yãmb sẽn vees mam teedã zãngã, yãmb yãnda bõe beenẽ sẽn yaa yãmb zakã bũmbu? Bɩ y wilg-a maam, mam saam-biisã ne yãmb saam-biisã taoore, tɩ bãmb yɩ tõnd d yiibã bʋ-kaoodba. 38Ade, mam zĩnda yãmb nengẽ yʋʋm pisi, la yãmb pe-yãang bɩ y bʋ-yãang ka tol n fab ye, la mam ka tol n wãb yãmb rũmsã pe-raoog baa a yembr nemd ye. 39Mam ka tol n tall yãmb rũng we-rũng sẽn kʋ nem-begs n wa kɩs yãmb ye. Rẽ fãa yɩɩ maam n bao n lebse. Wagdr sã n dag n zuk yãmb rũng wĩndg bɩ yʋngo, yãmb kɩtdame tɩ mam yao. 40Wĩndga, tʋʋlg namsa maam, la yʋngo, waood namsa maam! La mam dag n ka tõe n gũs ye. 41Yaa yʋʋm pisi la woto mam sẽn zĩnd yãmb yirã. Mam tʋma yãmb yĩng yʋʋm piig la a naase, n yaool n paam yãmb kom-pugli a yiibã, la m tʋm yʋʋm a yoobe, yãmb rũm-bãoonegã gũub yĩnga, la yãmb teka mam yaoodã naoor piiga. 42Mam ba wã Wẽnnaam sẽn yaa a Abrahaam Wẽnnaamã, m ba a Izak sẽn zoet a soabã sã n dag n ka beẽ ne maam, yãmb dag n na n kɩtame tɩ mam kuil nug-zaala. La Wẽnnaam yãnda mam paoogrã ne m nusã tʋʋm-toodã, dẽ, yʋngẽ, bãmb kaoo yel-kãng bʋʋdo.»

A Zakoob ne a Labã wẽena ne taaba

43Dẽ, a Labã leoka a Zakoob n yeele: «Kom-pugli wã yaa mam kom-pugli, kom-dibl-bãmbã me yaa mam kamba, rũm-kʋʋngã me yaa mam rũmsi. Bũmb ning fãa fo sẽn ne wã yaa maam n so. Rẽ wã, bõe la mam tõe n maan rũndã m kom-pugli wã ne kamb nins bãmb sẽn dogã yĩnga? 44Woto yĩngã, bɩ f wa tɩ d maan kaool ne taaba, tɩ kaset be maam ne foom sʋka!» 45Dẽ, a Zakoob rɩka kugr n vigli. 46La a yeela a saam-biisã tɩ b wʋk kuga. La bãmb rɩka kugã n zam taaba. La bãmb rɩɩ b rɩɩbã kug-rʋrã zugu. 47La a Labã pʋda zĩ-kãng yʋʋr tɩ ‹Yegaar-Sahaduta›,#31.47 Yegaar-Sahaduta: Yʋʋrã võor dat n yeelame tɩ ‹kaset rãmb wʋsgo.› la a Zakoob pʋda zĩigã yʋʋr tɩ ‹Galɛɛde›#31.47 Galɛɛde: Yʋʋrã võor ne Yegaar-Sahaduta wã yaa bũmb a yembre.. 48A Labã yeelame: «Kug-rʋr-kãngã yaa kaset maam ne foom sʋk rũndã!» Yaa rẽndã yĩng n kɩt tɩ b pʋd a yʋʋrã tɩ Galɛɛde, sẽn dat n togs tɩ ‹kaset rʋre.› 49B boonda zĩ-kãng yʋʋr me tɩ Mispa. Bala, a Labã rag n yeelame «Bɩ Sẽn-Ka-Saab gũus maam ne foom, baa tõnd sã n wa n ka leb n yãnd taaba. 50Fo sã n nams mam kom-pugli wã, wall f peeg pagb a taab n paase, ka ninsaal n na n ges yel-kãng yell ye, yaa Wẽnnaam mengã n na n yɩ maam ne fo kaset soaba, rẽ wã, bɩ f gũusi.» 51A Labã leb n yeela a Zakoob yaa: «Ad kug-rʋrã ne tẽn-kugrã mam sẽn ning maam ne foom sʋkã. 52Kug-rʋrã yaa kaseto, la tẽn-kugrã me yaa kaset tɩ mam ka na n yõsg kug-rʋrã n kẽ fo toadgẽ ye, la fo me ka na n yõsg kug-rʋrã ne tẽn-kugrã n kẽ mam toadgẽ wã n maan wẽng ye. 53Bɩ a Abrahaam ne a Nahoor Wẽnnaamã, ne bãmb ba-rãmbã Wẽnnaamã yɩ bʋ-kaood tõnd d yiibã sʋka.» A Zakoob maana pʋleng ne yẽnda ba a Izak sẽn zoet a soabã yʋʋre.

54A Zakoob maana maoong tãngã zug n bool a saam-biisã tɩ b wa naag yẽnda n dɩ. Bãmb sẽn dɩ rɩɩbã n sɛ, b gãanda tãngã zug yʋn-kãnga.

Currently Selected:

Sɩngre 31: MPBU

Highlight

Copy