Sɩngre 19

Sodom ne Gomoor sãoongo

1Malɛgs a yiibã taa Sodom tẽngã wĩndgã kõom wakate. La a Lot dag n zĩi Sodom tẽngã noore. A Lot sẽn yãnd-bã, a yikame n kẽng n na n seg-ba, la a wõgemdame n fõgen a neng tẽnga. 2A Lot yeela bãmb yaa: «Mam zu-soben-dãmba, mam kot-y lame tɩ y wa sig y tʋmtʋmdã zakẽ n gãand yʋngã, la y waas y naoã, n yaool n sãd beoog n looge.» La raopã zãgsame n yeel tɩ bãmb na n tɩ gãanda zĩ-vɩʋʋgẽ wã. 3La a Lot pẽdga bãmb hal wʋsgo, tɩ b kong n wẽnemd n tũ yẽnda n na n kuil a yirã. A Lot maana tigr bãmb yĩnga, n maan bur sẽn ka ning rã-bɩll n kõ bãmba, la b rɩɩme.

4Wakat ning bãmb sẽn dag n nan ka kẽ gãagã, Sodom tẽngã nebã fãa gilli, sẽn sɩng ne b kom-bɩɩs tɩ tãag b nin-kẽembã wa n gũbga roog ning bãmb sẽn be wã. 5#Bʋ 19.22-24Bãmb tool n boola a Lot n yeel yaa: «Raop nins sẽn wa n sig fo zakẽ wã yʋngẽ wã bee yɛɛnẽ? Yiis-b n kõ tõnd tɩ d gãand-ba.» 6A Lot yii n bʋʋga bãmb roogã noore, la a lebs kʋɩlengã n page. 7A Lot yeelame: «M saam-biisi, mam kot-y lame tɩ y ra maan yel-beedã ye! 8Ade, mam tara kom-pugli a yiib sẽn nan ka bãng rao ye, mam na n yiisa bãmb n kõ-yã, tɩ y maan bãmb wa y sẽn date. La bũmb sẽn be bala, ra maan-y rao-bãmbã bũmb ye. Bala, bãmb wa n siga mam zakẽ.» 9Tẽngã nebã yeela a Lot yaa: «Kẽng n yi beenẽ.» La b leb n yeele: «Nin-kãngã waa kaanẽ a yembre, n yaa sãana, n wa rat n wilg tõnd sẽn segde. Beneere, sã n yaa woto, tõnd sẽn na n maan foom bũmb ningã wẽng na n yɩɩga nin-bãmbã rẽndã.» Dẽ, bãmb tusa a Lot ne pãng n na n kolg n sãam kʋɩlengã. 10Woto, Malɛgsã tʋma b nus yɩng n tak a Lot n kẽes roogã pʋg n naag b menga, la b lebs kʋɩlengã n page. 11#2Rĩm 6.18Malɛgsã lobga neb nins fãa sẽn dag n be roogã noor yɩngã zondo, sẽn sɩng ne kãsem tɩ ta yao-zʋʋga. Rẽ kɩtame tɩ bãmb babl n nams n ka leb n ne roogã noor sẽn beẽ ye.

12Raopã soka a Lot yaa: «Fo tara neb a taab sẽn be ka bɩ? Peeg f reem-dãmbã, f kom-dibli wã ne f kom-pugli wã, la f wʋk fo sẽn so bũmb ninsã fãa tɩ be tẽngã pʋgã n yi ka n looge. 13Bala, tõnd na n sãama tẽngã. Tẽn-kãngã nebã tʋʋm-beedã yell goam yaa wʋsg n zẽk n ta Sẽn-Ka-Saab nengẽ. Dẽ, Sẽn-Ka-Saab tʋma tõnd tɩ d wa sãam tẽngã.» 14La a Lot yiime n na n gom ne a reem-dãmbã sẽn yaa yẽnda kom-pugli wã sɩdbã n yeel-b yaa: «Yik-y n yi-y n bas-y zĩ-kãngã, bala, Sẽn-Ka-Saab na n sãama tẽngã.» La yẽnda reem-dãmbã geelga a Lot goamã wa kʋʋsem goamã.

15La beoogã sẽn wa n kolg vẽegre, malɛgsã pẽdga a Lot n yeel-a yaa: «Yik n peeg f pagã ne f kom-pugli a yiibã sẽn be ka ne foomã n zoe, tɩ tẽngã kongr sɩbgr da wa rɩ foom ye.» 16#2Pɩy 2.7La a Lot dag n ka maand tao-tao ye. La Sẽn-Ka-Saab sẽn dag n dat n fãag bãmbã yĩnga, b gãda a Lot nugã, la b gãd a pagã ne a kom-pugli a yiibã nusi, n tɛ-b n yiis tẽngã. 17Bãmb sẽn tall-b n yiis tẽngã n sɛ, raopã ned a yembr yeela a Lot yaa: «Zoe n paam n fãag f yõore. Ra wẽnemd n ges f poorẽ ye, la f ra yals soolem-kãngã zĩig baa a yembr pʋg ye! Zoe n kẽng tãmsã sẽnẽ n da wa ki ye.» 18La a Lot yeela bãmb yaa: «Ayo! M Zu-soaba! Maan-y sugri! 19Y kabre, Zu-soaba! Yãmb maana mam sẽn yaa yãmb tʋmtʋmdã neere, la yãmb leb n zoee mam nimbãaneg wʋsg n fãag mam vɩɩmã. Ad-y mam ka tõe n zoe n ta tãmsã n paam n põs tɩ sɩbgrã ka paam maam n kʋ ye. 20Yãmb nee tẽngã sẽn be yambã wã? Mam kotame n na n zoe n ta beenẽ, yaa tẽn-bil bala. Bas-y tɩ m zoe n ta beenẽ n põse.» 21Dẽ, malɛɛkã yeela a Lot yaa: «Beneere, m sakame, fo yĩnga, mam na n basa tẽng ning fo sẽn gom a yellã n ka sãam-a ye. 22Haya! Zoe n ta beenẽ n põse, bala, mam ka tõe n maan bũmbu, sã n ka tɩ fo tõog n zoe n taa beenẽ.» Yaa rẽndã yĩng n kɩt tɩ b pʋd tẽn-kãng yʋʋr tɩ Sowaare. 23A Lot sẽn wa n na n ta Sowaar tẽngã, rẽ tɩ sõorã pukdame.

24 # Mat 10.15, 11.23,24, Luk 10.12, 17.29, 2Pɩy 2.6, Zʋʋ 1.7 Dẽ, Sẽn-Ka-Saab kɩtame tɩ kidbr ne bugum yi saasẽ n ni wa saag Sodom tẽngã ne Gomoor tẽngã zugu. Bõn-kãng yii Sẽn-Ka-Saab nengẽ. 25Bãmb sãama tẽn-bãmb b yiibã, ne b kunkubã, la b tẽngã nebã fãa, la ne bõn-bɩtsã sẽn yi tẽn-gãongã zugã zãnga. 26#Luk 17.32La a Lot pagã wẽnegame n ges a poorẽ, la a lebga yams-kugri.

27A Abrahaam sãda beoog n kẽng zĩig ninga yẽnda sẽn dag n yals Sẽn-Ka-Saab taoorã. 28A Abrahaam zẽka a neng n ges Sodom ne Gomoor tẽngã sẽnẽ, ne tẽngã kunkuba fãa, la yẽnda yãnda bug-zõos sẽn nukd wa wʋng bug-zõose. 29Wakat ning Wẽnnaam sẽn wa n na n sãam tẽms nins sẽn be kunkubã zutã, bãmb tẽega a Abrahaam yelle, la b yiisa a Lot t'a põs sãoongã, wakat ning bãmb sẽn wa n na n sãam tẽms nins a Lot sẽn dag n beẽ wã.

Moaab ne Amo buudã sɩngre

30A Lot yii Sowaar tẽngã n tall a kom-pugli a yiibã n kẽng tãmsã sẽnẽ, bala, yẽnda rag n zoeta rabeem n ka rat n zĩnd Sowaar tẽngã ye. Bãmb kẽng n tɩ kẽe tãng bokẽ. 31La bi-pugl-kãsmã yeela a yao-bi-puglã yaa: «Tõnd baaba wã kʋʋlame, tɩ raop me yaool n ka be tẽn-kãngã n na n bao tõnd wa sẽn zems ninsaalb miningã ye. 32Dẽ wã, wa tɩ d yũnug d ba wã rãam n paam n kẽ ne-a, sẽn na n yɩlẽ n kɩt tɩ d baaba wã paam yagense.» 33La badaar yʋngo, bãmb yũnuga b ba wã rãam, la bi-pugl-kãsmã kẽng n tɩ gãanda ne a ba wã, la a ba wã ka bãng a gãandgo, wall a yikr wakat ye. 34La vẽkembeoogo, bi-pugl-kãsmã yeela a yao-bi-puglã yaa: «Yʋngẽ, mam kẽe ne m baaba. Wa tɩ d leb n yũnug-b rãam yʋngã tɩ fo kẽng n tɩ kẽ ne-ba, sẽn na yɩl tɩ d ba wã paam yagense.» 35Badaar yʋngo, bãmb leb n yũnuga b ba wã rãam, la yao-bi-puglã kẽe n gãanda ne a ba wã. La a ba wã ka bãng wakat ning yẽnda sẽn gãande, la a sẽn yik wakat ning ye. 36Woto, a Lot kom-pugli a yiibã fãa rɩka b ba wã pʋse. 37Bi-pugl-kãsmã roga bi-ribla, n pʋd a yʋʋr t'a Moaabe. Yaa yẽnda n yaa Moaab buudã sẽn be rũndã wã yaaba. 38Yao-bi-puglã me roga bi-ribla, n pʋd a yʋʋr t'a Bɛn-Ami. Yaa yẽnda n yaa Amo-rãmbã sẽn be rũndã wã yaaba.

Currently Selected:

Sɩngre 19: MPBU

Highlight

Copy