Sɩngre 15

Wẽnnaam maana kaool ne a Abram

1Bõn-kãensã loogr zugẽ, Sẽn-Ka-Saab goma ne a Abram vẽnegr pʋgẽ n yeele: «Abram, da zoe rabeem ye! Mam meng n yaa fo gãongo, la fo keoor na n yɩɩ kãseng wʋsgo.» 2La a Abram leokame: «Mam Zu-soab a Sẽn-Ka-Saabo, yãmb na n kõo maam bõe? Mam na n loogame n ka paam biig ye. La ned ning sẽn na n yõd n soog-a mam zakã, yaa Damaas rao a Eliyezɛɛr sẽn yaa mam tʋmtʋmdã.» 3A Abram leb n yeelame: «Yãmb ka kõ maam biig ye, rẽ kɩtame tɩ mam zakẽ rakõor n na n yõd n soog mam paoongã.» 4La Sẽn-Ka-Saab goma ne yẽnda n yeele: «Ka yẽnda n na n soog fo zakã ye. Na n yɩɩ fo mengã sẽn na n dog biig ningã n na n soog fo zakã.» 5#Rom 4.18, Ebr 11.12Sẽn-Ka-Saab peega a Abram n yi yɩng n yeel-a yaa: «Ade, ges sa-gãongã, la f sõd ãdsã n ges fo tõe n bãnga b sõore.» La b paasame n yeele: «Fo yagensã sõor na n yɩ a woto.» 6#Rom 4.3, Gal 3.6, Zak 2.23La a Abram tẽe Sẽn-Ka-Saabo, woto kɩtame tɩ Sẽn-Ka-Saab geelg a tẽebã wa tɩrlem.

7Bãmb leb n yeela a Abram yaa: «Mam yaa Sẽn-Ka-Saabo, maam n yiis foom Ʋʋr tẽngã sẽn be Kalde rãmbã soolmẽ wã, n wa kõ foom tẽn-kãngã tɩ f sooge.» 8A Abram leokame: «Zu-soab a Sẽn-Ka-Saabo, bõe n wilgd tɩ mam na n sooga tẽngã?» 9Bãmb yeela yẽnda yaa: «Yõk nag-sadg sẽn tar yʋʋm a tãabo, la f bao bʋ-yãang sẽn tar yʋʋm a tãabo, ne pe-raoog sẽn tar yʋʋm a tãabo, la f bao walle, ne man-wan-bila n wa kõ maam.» 10Yẽnda baoo rũm-bãmba fãa, n pasg pʋɩ-sʋgse, n dɩk bogr fãa n dɩgl n yegl a to, la yẽnda ka pas bõn-yɩgdɩ wã ye. 11La yɩbrend waa n na n dɩɩ nemdã, la a Abram dig-b lame.

12 # Zoob 4.13-14 Wĩndgã sẽn wa n dat n kẽ, gõe-kãseng yõka a Abram, la zĩigã sẽn lebgd likã, rabeem-kãseng yõka yẽnda. 13#Yik 1.1-14, Tʋʋm 7.6Sẽn-Ka-Saab yeela a Abram yaa: «Bãng tɩ fo yagensã na n yɩɩ sãamb n zĩnd tẽng sẽn ka bãmb tẽng pʋga. Bãmb na n lebga yembse, la b na n namsa bãmb yʋʋm kobs-naase. 14#Yik 12.40-41, Tʋʋm 7.7La mam na n bʋʋ soolem ning sẽn na n kẽes-a bãmb yembdã bʋʋdo, la fo yagensã na n yii beenẽ ne paoong wʋsgo. 15La sã n yaa ne fo mengã, fo na n saka f saam-dãmb ne bãane, la f na n paama sũ-noog f kʋʋlem wakate, n yaool n ki tɩ b mum-fu. 16La zamaan a naas loogr zugẽ, bãmb na n lebg n waa zĩ-kãngã. Bala, Amoor-dãmbã wẽngã maaneg nan ka lebg wʋsg n loog nug ye.»

17Wĩndgã sẽn wa n kẽ, zĩigã lebga lik bida, la zĩig pʋgẽ, wʋng sẽn tar bug-zõos ne bug-witim n pɩʋʋg rũms nins a Abram sẽn dag n pas n dʋʋgã sʋka. 18#Tʋʋm 7.5Badaare, Sẽn-Ka-Saab maana kaool ne a Abram n yeele: «Mam kõta fo yagensã tẽn-kãngã tɩ b sooge. Yaa sẽn sɩng ne Ezɩpt kʋɩlgã, n tall n tɩ tãag Efrat kʋɩl-kãsengã. 19Tẽn-bãmb yaa Kɛn nebã, ne Keniiz nebã, la Kadmon-rãmbã, 20ne Hɛt-rãmbã, ne Ferɛɛz nebã, la Refayim-dãmbã, 21la Amoor-dãmbã, ne Kana-rãmbã, la Girgaaz nebã, la Zebuus nebã tẽmse.»

Currently Selected:

Sɩngre 15: MPBU

Highlight

Copy