Sɩngre 14

A Abram zaba ne rĩm-dãmb wʋsg n tõoge

1Sineyaar dĩm a Amrafɛll ne Elazaar dĩm a Arzok wakatã, ne Elam dĩm a Kedorlaomeer la Goyim dĩm a Tideyall wakate, 2rĩm-dãmb-bãmb fãa naaga taab n yik zabr ne Sodom dĩm a Beera, la ne Gomoor dĩm a Birsa ne Adma dĩm a Sineyaabe, la Seboyim dĩm a Semebɛɛre, la ne a Sowaar sẽn yaa Bela rĩma. 3Bãmb fãa kẽng n tɩ tigma taab Sidim longẽ wã, beenẽ yaa yamsem ko-kãseng zĩiga. 4Dĩm a Kedorlaomeer rag n sooga bãmb fãa yʋʋm piig la yiibu, la yʋʋm piig la a tãabã yʋʋmde, b zãgsame. 5La yʋʋm piig la a naasã yʋʋmd pʋgẽ, a Kedorlaomeer ne rĩm-dãmb nins sẽn dag n be yẽnda poorẽ wã waa n zab n tõoga Refayim nebã sẽn dag n be Asterot-Karnayimã, ne Zuzim nebã sẽn be Hama wã, la ne Enim-dãmbã sẽn be Kiriyatayim tẽn-nabdrẽ wã. 6La b tõoga Hoor-dãmbã sẽn be Seyɩɩr tãmsã sʋkã, hal n tɩ tãag Paarã tɩɩsã sẽn pẽ we-raoogã. 7Rẽ poore, bãmb lebgame, la b taa Kadɛɛs b sẽn boond tɩ Eyin-Mispatã, la b zaba ne Amalɛk-rãmbã b soolmã fãa pʋga, la b zaba ne Amoor nebã sẽn be Hatsatsõ-Tamaarã. 8Woto, Sodom dĩmã ne Gomoor dĩmã, la Adma rĩmã ne Seboyim rĩmã, la rĩm ning sẽn so Bela sẽn yaa Sowaarã yiime n tak zabr ne bãmb Sidim tãngã long pʋga. 9Bãmb zaba ne a Kedorlaomeer sẽn yaa Elam dĩma, la ne Goyim dĩm a Tideyalle, la Sineyaar rĩm a Amrafɛlle, la ne Elasaar dĩm a Arzoke. Yaa rĩm-dãmb a naas sẽn na n zab ne rĩm-dãmb a nu. 10Sũud bogd wʋsg n dag n be Sidim longã pʋga, la Sodom dĩmã ne Gomoor dĩma zoeeme n tɩ lʋɩ bog-bãmb pʋse. La neb nins sẽn ket-bã zoeeme n tees tãngã sẽnẽ. 11Neb nins sẽn tõog bãmbã wʋka Sodom ne Gomoor nebã paoongã ne b rɩɩbã n tall n looge. 12Bãmb yõka a Abram yao wã biig a Lot sẽn dag n be Sodomã, la b wʋk a teedã n tall n looge.

13Ned a yembr n zoe n põs n wa togs Ebre ned a Abram yellã sẽn yɩ to-to. A Abram dag n bee Mamre tɩɩsã sʋka. A Mamre yɩɩ Amoor-dãmbã buud neda, n yaa a Ɛskoll ne a Aneer saam-biiga. Bãmb dag n maana kaool ne a Abram. 14A Abram sẽn wa n wʋm tɩ b yõka yẽnda biigã, a baoo zab-teed n kõ yẽnda tʋmtʋmdb nins sẽn dog yẽnda zakẽ wã, la sẽn yaa gãndaadã, b sõorã yaa neb kobs-tã la piig la a nii. A Abram peega bãmb n babs rĩm-dãmbã hal n tɩ tãag Dan. 15A Abram welga a nebã n na n zab ne-b ne yʋngo. La yaa yẽnda ne a tʋmtʋmdbã. La a Abram dãmb tõog-b lame n dig-b hal n tãag Hoba sẽn be Damaas tẽngã nug-goabgã. 16A Abram tɩ reega teedã fãa, la a peeg a biig a Lot me ne a paoongã fãa, la ne pagbã la nebã b sẽn dag n yõgã.

A Melkisedɛk ninga a Abram barka

17A Abram sẽn tõog Kedorlaomeer tẽngã ne rĩm-dãmb nins sẽn be ne bãmbã n lebgdẽ, Sodom rĩma yiime n seg yẽnda Saave tãngã longẽ, longã boondame tɩ rĩm tãng longo. 18#Ebr 7.1-10A Melkisedɛk sẽn yaa Salɛm dĩma kɩtame tɩ b wa ne buri la reezẽ rãam. A Melkisedɛk yaa Saasẽ-Pãng-Soab a Wẽnnaam maan-kʋʋda. 19Yẽnda ninga a Abram bark n yeele:

«Abram, bɩ Saasẽ-Pãng-Soab a Wẽnnaam,

sẽn yaa-a yĩngr la tẽng naandã,

ning foom a Abram zug barka!

20Bɩ Saasẽ-Pãng-Soab a Wẽnnaam sẽn kɩte,

tɩ f tõog f bɛɛbã paam pẽgre!»

La a Abram yãka bũmbã fãa piig pʋɩɩr n kõ yẽnda. 21La Sodom rĩma yeela a Abram yaa: «Kõ maam nebã, la fo soog teedã.» 22La a Abram leoka Sodom rĩmã yaa: «Mam zẽkda m nug n wẽend ne Saasẽ-Pãng-Soab a Wẽnnaam Sẽn-Ka-Saab sẽn yaa yĩngr la tẽng naandã, 23tɩ mam ka na n yãk yãmb bũmb baa fɩ ye, baa fu-pĩim mengã, wall neoodr sẽbdg meng ye. Tɩ yãmb da wa n yeel tɩ yaa yãmb maasem yĩng la maam a Abram lebg arzɛk soab ye. 24Mam ka rat bũmb baa fɩ ye, sã n ka kom-bɩɩsã sẽn dɩ bũmb ningã, la neb nins sẽn tũ maam n kẽng zabrã pʋɩɩr bala. Yaa a Aneere, a Ɛskolle, ne a Mamre. Bãmb tog n deega b pʋɩɩre.»

Currently Selected:

Sɩngre 14: MPBU

Highlight

Copy