Yikri 14
14
Faarõ pʋgla Israyɛll nebã
1Sẽn-Ka-Saab goma ne a Moyiis n yeele: 2«Yeel Israyɛll nebã tɩ b lebg n leb poorẽ n tilg tãb-sikã Pi-Hahirot taoore, Migdoll ne ko-kãsengã sʋka, zĩig ning sẽn teesd Baall-Sefondã. Yãmb na n tilga y tãb-sikã ko-kãsengã noor n tees zĩ-kãnga. 3Faarõ na n goma Israyɛll nebã wɛɛngẽ n yeele: ‹Bãmb saadame n gilimd we-raoogã pʋgẽ, n ka mi b sẽn dabdẽ ye. Bãmb gɩmba we-raoogã pʋga.› 4Mam na n kenga Faarõ sũuri, t'a yik n pʋgl yãmba. Mam na n paama waoogr Faarõ ne a tãb-biisã fãa yĩnga, la Ezɩpt nebã na n bãngame tɩ mam yaa Sẽn-Ka-Saabo.» Dẽ, Israyɛll nebã maana a woto.
5B togsa Ezɩpt rĩmã tɩ nebã zoeeme. Dẽ, Faarõ ne a tʋmtʋmdbã teka yam Israyɛll nebã yell poorẽ, la b yeelame: «Yaa bõe la tõnd sẽn maan woto wã, n bas Israyɛll nebã tɩ b loog n bas tõndo, tɩ b yaool n dag n tʋmd n kõta tõndo?» 6Faarõ kɩtame tɩ b segl yẽnda saarã, la yẽnda peega a nebã tɩ b tũ yẽnda. 7Yẽnda rɩka saar-dãmb kobs-yoob sẽn yaa sõama wʋsgã, n paas Ezɩpt soolem saar-dãmbã fãa. La tãb-biis a tãab n dag n be saar fãa pʋgẽ. 8La Sẽn-Ka-Saab kɩtame tɩ Faarõ sẽn yaa Ezɩpt rĩmã sũur keng t'a yik n babs Israyɛll nebã. La Israyɛll nebã yaool n dag n yii ne lohorem. 9La Ezɩpt rãmba pʋgla bãmba, yaa Faarõ wiidã ne a saar-dãmbã la a wed-rʋʋdbã ne a tãb-bi-kʋʋngã. La bãmb paama Israyɛll nebã b sikã zĩigẽ ko-kãsengã noor sẽn be Pi-Hahirot n tot Baall-Sefondã.
10Faarõ sẽn kolgd Israyɛll nebã, bãmb zẽka b neng n yãnd Ezɩpt rãmbã sẽn pʋgd bãmb n watẽ. La rabeem wʋsg yõka bãmba. Dẽ, Israyɛll nebã zẽka b koees n bool Sẽn-Ka-Saabo. 11Israyɛll nebã yeela a Moyiis yaa: «Yaa yaad zĩig n ka be Ezɩpt tẽngã pʋg bɩ, bɩ yaa bõe tɩ yãmb tall tõnd n wa tɩ d na n ki we-raoogẽ ka? Yaa bõe tɩ yãmb maan tõnd woto, n yiis tõnd Ezɩpt soolmã pʋgẽ? 12Ka woto la tõnd sẽn dag n deng n gom ne yãmb Ezɩpt soolmã pʋgẽ n yeel yãmb tɩ y bas tõnd tɩ d tʋm Ezɩpt nebã tʋʋmã sɩda? Bala, tõnd sẽn tʋmd Ezɩpt rãmbã tʋʋmã n são tõnd sẽn na n ki we-raoogẽ wã!» 13A Moyiis yeela nebã yaa: «Da zoe-y rabeem ye. Yaas-y n ges-y fãagr ning Sẽn-Ka-Saab sẽn na n fãag yãmb dũndã wã. Bala, Ezɩpt neb nins yãmb sẽn ne rũndã wã, yãmb kõn leb n yãnd bãmb abada. 14Sẽn-Ka-Saab na n zaba yãmb yĩnga. Yãmb tɛka, yaa y sĩnd sɩddd...»
Sẽn-Ka-Saab kɩtame tɩ ko-kãsengã welge
15La Sẽn-Ka-Saab soka a Moyiis yaa: «Bõe yĩng tɩ fo zẽkd f koɛɛg n boond maam? Yeel Israyɛll nebã tɩ b yik n dɩk sore. 16La bɩ fo zẽk f rasaarã n tẽeg f nugã ko-kãsengã zug n welg-a, tɩ Israyɛll nebã kẽ koomã sʋka, n kẽn tẽn-koɛɛng zug n looge. 17La sã n yaa ne maam, mam na n kɩtame tɩ Ezɩpt nebã keng b sũyã n pʋgl Israyɛll nebã poore. La mam na n paama waoogr Faarõ ne a tãb-bi-kʋʋngã, la a saar-dãmbã ne a wed-rʋʋdbã fãa yĩnga. 18La mam sã n paam waoogr Faarõ ne a saar-dãmbã la a wed-rʋʋdbã fãa yĩnga, Ezɩpt rãmbã na bãng tɩ mam yaa Sẽn-Ka-Saabo.»
19Dẽ, Wẽnnaam malɛɛkã sẽn dag n be Israyɛll nebã taoorã lebgame n leb bãmb poorẽ. La sawad-taokã yii bãmb taoorã n tɩ yals bãmb poorẽ, 20la a yalsa Ezɩpt nebã ne Israyɛll nebã sʋka. Sawaodgã lebga libsg yʋngã tɛka. La yʋngã tɛka, Ezɩpt rãmbã ne Israyɛll dãmbã ka tõe n kolg taab ye.
21Dẽ, a Moyiis tẽega a nug ko-kãsengã zugu, la yʋngã tɛka, Sẽn-Ka-Saab kɩtame tɩ sob-kãseng yi yaang n pãrg koomã, la ko-kãsengã pʋgẽ lebga koɛɛnga. 22#1Kor 10.1,2, Ebr 11.29Israyɛll nebã kẽna tẽn-koɛɛngã zug ko-kãsengã pʋga. La koomã lebga wa lalg n be bãmb goabg la b rɩtgo. 23La Ezɩpt nebã pʋgla Israyɛll nebã n kẽ ko-kãsengã pʋgẽ, yaa Faarõ wiidã ne a saar-dãmbã la a wed-rʋʋdbã fãa. 24Beoogã vẽegr wakate, Sẽn-Ka-Saab sẽn be sawad-taokã pʋgẽ wã sulgame n ges Ezɩpt rãmba. La bãmb kɩtame tɩ rãmbg zĩnd Ezɩpt rãmbã sʋka. 25Bãmb kɩtame tɩ Ezɩpt rãmbã saar-dãmbã nao sud hal tɩ Ezɩpt nebã kẽnd lebg toogo. La bãmb yeelame: «Wa-y tɩ d zoe la d bas Israyɛll nebã, bala, Sẽn-Ka-Saab zabda ne Ezɩpt nebã n sõngd-ba.»
26Sẽn-Ka-Saab yeela a Moyiis yaa: «Tẽeg f nug ko-kãsengã zug tɩ koomã lebs n lim Ezɩpt rãmbã ne b saar-dãmbã la b wed-rʋʋdbã.» 27La a Moyiis tẽega a nug ko-kãsengã zugu, la koomã leb n leba a zĩigẽ zĩ-yẽegr wakate. La koomã sẽn segd Ezɩpt nebã, bãmb lebgame n na n zoe, la Sẽn-Ka-Saab luba Ezɩpt nebã ko-kãsengã pʋgẽ. 28Koomã leb n waame n lim Faarõ tãb-bi-kʋʋngã saar-dãmbã ne b wed-rʋʋdbã fãa sẽn pʋgl Israyɛll nebã poor n kẽ ko-kãsengã pʋgẽ wã. Bãmb ned baa a yembr ka põs ye. 29Israyɛll nebã kẽna tẽn-koɛɛngã zug ko-kãsengã pʋga. La koomã yɩɩ wa lalg n be bãmb goabg la b rɩtgo. 30Badaare, Sẽn-Ka-Saab fãaga Israyɛll nebã Ezɩpt rãmbã nugẽ. La Israyɛll nebã yãnda Ezɩpt rãmba kũum ko-kãsengã noore. 31Israyɛll nebã yãnda Sẽn-Ka-Saab sẽn zab ne Ezɩpt nebã ne pãn-kãseng ningã. La nebã zoee Sẽn-Ka-Saabo, la bãmb tẽe Sẽn-Ka-Saab ne b tʋmtʋmd a Moyiisi.
Currently Selected:
Yikri 14: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
