Yikri 12
12
Pak tigri
1 #
Mk 23.5, Sõd 9.1-5, 28.16, Tõ 16.1,2 Sẽn-Ka-Saab yeela a Moyiis ne a Aarõ Ezɩpt tẽngã pʋgẽ yaa: 2«Ki-kãngã na n yɩɩ pipi kiuug kiisã fãa sʋk yãmb yĩnga. A na n yɩɩ yʋʋmdã pipi kiuug yãmb yĩnga. 3Kẽng-y n tɩ yeel-y Israyɛll nebã fãa yaa: ‹Ki-kãngã rasem piigã daare, zak fãa tog n baoo pesgo, wall bʋʋga, la yaa rũng a yembre, zak fãa yĩnga.› 4Zakã neb sõor sã n paoodẽ tɩ b ka tõe n sɛ pe-tõre, bɩ b pʋɩ-a ne b yak ning sẽn pẽ n yɩɩdã, wa sẽn zems nebã sõore. Bɩ y pʋɩ pesgã n zems ned fãa sẽn tõe n dɩ to-to. 5Pesgã tog n yɩɩ pe-raoog sẽn zems yʋʋmde, la sẽn ka tar zang ye. Yãmb tõe n baoo pe-bila, wall bulla. 6Yãmb na n baoo zĩig n bĩng-a tɩ ta ki-kãngã rasem piig la a naasã daare. Israyɛll nebã fãa na n kodg-a-la zaab-noor wakate. 7Bɩ b yãk a zɩɩmã n mes y rot nins yãmb sẽn na n zĩnd-b pʋs n dɩ-a wã lug a yiibã zutu, la y mes rignoorã zugẽ. 8Badaar yʋngo, bɩ y sẽ rũngã, la y wãb a nemdã ne bur sẽn ka ning rã-bɩlle, la ne mood sẽn yaa toogo. 9Bɩ y ra wãb rũngã nemd tɩ ka bɩ n ta, wall y rʋg-a ne koom ye. Sẽ-y-yã a zugã ne a karsã la a pʋ-teedã. 10Bɩ y ra bas rũngã neong ba a yembr tɩ vẽeg beoog ye. Beoogã sã n vẽeg tɩ nemdã ketẽ, bɩ y rɩk-a n yõog bugum. 11Ad yãmb sẽn na n dɩ-a to-to: Sẽb-y y sẽbdga, la y wid y neooda, tɩ y dasaarã be y nugẽ. Rɩ-y-yã-a ne yãgbo. Sẽn-Ka-Saab Pak tigrã la woto.
12Badaar yʋngo, mam na n pɩʋʋga Ezɩpt tẽngã, la m na n kʋʋ Ezɩpt kom-dẽemsã fãa kɛpɩ, sẽn sɩng ne ninsaalbã tɩ ta rũmsã, la mam na n sɩbga Ezɩpt wẽnnaam-dãmbã fãa. Mam yaa Sẽn-Ka-Saabo. 13Zɩɩmã sẽn be rot nins yãmb sẽn be b pʋsẽ wã zutã na n yɩɩ bãnd yãmb yĩnga. La mam sã n yãnd zɩɩmã, mam na n zʋʋg n basa yãmba, la toog sẽn sãamdã ka na n paam yãmb wakat ning mam sẽn na n sɩbg Ezɩptã ye.
14 #
Yik 23.15, 34.18, Mk 23.6-8, Sõd 28.17-25, Tõ 16.3-8 Daarã na n yɩɩ tẽegr daar yãmb yĩnga. Yãmb na n maan-a lame t'a yɩ tigr Sẽn-Ka-Saab yĩng n tẽegd da-kãng yelle, la y na n maand-a lame t'a yɩ wa no-tũudg sẽn ka sɛta, yãmb zamaan-dãmbã fãa yĩnga.»
Bur sẽn ka ning rã-bɩll tigri
15Yãmb na n dɩɩ bur sẽn ka ning rã-bɩll dasem a yopoe tõre. La sẽn sɩng ne rasem a yopoe wã pipi daarã, bɩ y yiis rã-bɩllã y rotẽ wã. Ned ning sẽn na n dɩ-a bũmb sẽn ning rã-bɩlle, pipi daarã n tãag rasem a yopoe daarã, b na n yiis-a-la Israyɛll buudã neb sʋka. 16Pipi daarã ne rasem a yopoe daarã, bɩ y maan tiging sẽn welg toore. La ned ka tog n tʋm dasem-kãens daarã, sã n ka tɩ segl rɩɩb n kõ yãmb ned kam fãa bala. 17Maand-y bur sẽn ka ning rã-bɩll tigrã, bala, yaa ra-kãng la mam yiis yãmb tãb-biisã Ezɩpt tẽnga. Bɩ y tẽegd da-kãng yelle, t'a yɩ no-tũudg sẽn ka sɛta, yãmb zamaan-dãmbã fãa yĩnga. 18Pipi kiuugã rasem piig la a naasã daar zaabre, yãmb na n dɩta bur sẽn ka ning rã-bɩlle, n tãag a rasem pisi la a yembrã daar zaabre. 19Rasem a yopoe tõre, b ka tog n yãnd rã-bɩll yãmb dotẽ wã ye. Bala, ned ning fãa sẽn na n dɩ-a bur sẽn ning rã-bɩlle, b na n yiisa a soab Israyɛll buudã neb sʋk n kʋ, sã n yaa sãana, wall tẽng-n-neda. 20Bɩ yãmb da rɩ bũmb sẽn ning rã-bɩll ye. Yãmb sẽn be zĩig ning fãa, bɩ y rɩ bur sẽn ka ning rã-bɩlle.
Pak tigrã seglgo
21A Moyiis boola Israyɛll kasem-dãmbã fãa n yeel-b yaa: «Kẽng-y n tɩ bao-y rũm-bãooneg yãmb yirã rãmb yĩnga, n kʋ n maan Pak tigrã. 22Dẽ poore, bɩ y bao izop vãado, n suk zɩɩmã sẽn be laagẽ wã n mes y rignoorã zugu, la y lug a yiibã. La bɩ yãmb ned ba a yembr da yi a roogẽ tɩ beoogã ka vẽeg ye. 23#Ebr 11.28Dẽ, Sẽn-Ka-Saab sã n wa n pɩʋʋgd n na n sɩbg Ezɩpt nebã, n yãnd zɩɩmã sẽn be y rignoorã ne y lug a yiibã zutã, Sẽn-Ka-Saab na n zʋʋga yãmb dignoorã, la b ka na n bas sãamdã ne toogã t'a kẽ yãmb dotã pʋs ye.
24Bɩ bõn-kãng yɩ no-tũudg yãmb ne y yagensã yĩng zamaan woo zamaane. 25Yãmb sã n wa tɩ kẽ tẽng ning Sẽn-Ka-Saab sẽn kãab tɩ b na n kõ-y lame wã, bɩ y maan minin-kãnga. 26La yãmb yagensã sã n wa sok yãmb n na n wʋm minin-kãng võore, 27bɩ y yeel-b yaa: Yaa Pak tigrã maoong tõnd sẽn maand n kõt Sẽn-Ka-Saabo, b sẽn zʋʋg n bas Israyɛll nebã rot Ezɩpt tẽngã yĩnga. Bãmb sẽn sɩbg Ezɩpt tẽngã ne toogã, b basa tõnd zagsã n ka maan-b bũmb ye.»
Nebã sulgame n wõgemde. 28Dẽ, Israyɛll nebã kẽngame n tɩ maan wa Sẽn-Ka-Saab sẽn dag n yeel a Moyiis ne a Aarõ wã.
Toog piig soaba: Kom-dẽems kũum
29 #
Yik 4.22-31
Yʋn-sʋk wakate, Sẽn-Ka-Saab kɩtame tɩ Ezɩpt kom-dẽemsã fãa ki, sẽn sɩng ne Faarõ sẽn zao a naam geerẽ wã bi-kãseng tɩ ta sẽn be-b bi-bees roogẽ wã kom-dẽemse, la rũmsã kom-dẽems me. 30Faarõ ne a ʋmtʋmdbã, la Ezɩpt nebã fãa yika ne yʋngã, la kelem-kãsems yika Ezɩpt tẽngã pʋgẽ, bala zak ka zĩnd tɩ kũum ka ki ye.
31Yʋn-kãng bala, Faarõ boola a Moyiis ne a Aarõ n yeel-b yaa: «Bɩ yãmb ne Israyɛll nebã yi la y bas m tẽngã. Kẽng-y n tɩ waoog-y Sẽn-Ka-Saab wa y sẽn dag n yeelã. 32Tall-y y rũm-bãoonegã ne y rũm-bɛdã me n looge, wa y sẽn dag n kosã. Kẽng-y la y ning mam me zug barka.» 33Ezɩpt nebã rag n pẽdgda Israyɛll nebã. Bãmb dag n datame tɩ Israyɛll nebã loog n bas tẽngã tao-tao, bala, b rag n tẽedame tɩ bãmb sẽn yaa Ezɩpt nebã na n kii zãnga.
34Israyɛll nebã rɩka b zom-nagdɩ wã sẽn nan ka ning rã-bɩllã. Bãmb dag n luda b wamã ne b futu, n bob b bãgdẽ. 35#Yik 3.21,22Israyɛll nebã maana wa a Moyiis sẽn dag n yeelã. Bãmb kosa Ezɩpt nebã wanzuri ne sãnem teedo, la futu. 36Sẽn-Ka-Saab kɩtame tɩ Ezɩpt nebã nand Israyɛll nebã, la Ezɩpt nebã kõo bãmb bũmb nins b sẽn kosã. Dẽ, bãmb reesa Ezɩpt nebã sẽn dag n tarã fãa.
Ezɩpt tẽngẽ wã yiibu
37Israyɛll nebã yii Ramsɛs n dabd Sukote. Raop nins sẽn dag n kẽnd-b ne naoã sõor dag n kolga neb tus kobs-yoobe, kambã sõor sẽn ka naage. 38Neb sẽn yaa buud toor-toor neb me n dag n be ne bãmba, la nin-bãmb rag n tara rũm-bãooneg ne rũm-bɛd wʋsgo. 39Bãmb dɩka zom-nagdem nins b sẽn yi ne Ezɩptã n maan bur-maas sẽn ka ning rã-bɩlle. Bala, b riga bãmb Ezɩpt tɩ b ka paam n yals tɩ zom-nagdmã wuki, la b ka paam n bao rɩɩb n zã me ye. 40#Sɩng 15.13, Gal 3.17Israyɛll nebã zĩnda Ezɩpt yʋʋm kobs-naas la pis-tã. 41La yʋʋm kobs-naas la pis-tã wã zugẽ, Sẽn-Ka-Saab nebã fãa yii Ezɩpt tẽngã.
42Badaar yʋngo, Sẽn-Ka-Saab gesa bãmb yell tɩ b tõog n yi Ezɩpte. Woto me, Israyɛll nebã tog n dɩka ra-kãng tɩ yɩ tẽegr daare, zamaan woo zamaane.
43Sẽn-Ka-Saab yeela a Moyiis ne a Aarõ yaa: «Ade, Pak tigrã no-tũudg la woto: ‹Sãan ba a yembr ka tar noor tɩ rɩ Pak tigrã rɩɩb ye.› 44Yamb ning fãa f sẽn da ne ligd ka tog n dɩ Pak tigrã rɩɩb tɩ f ka reng n kẽes-a bãong ye. 45Nin-loaagdg wall tʋmtʋmd sẽn deegd yaood ka tar noor tɩ rɩ Pak tigrã rɩɩb ye. 46#Sõd 9.12, Zã 19.36Yãmb na n wãba nemdã roog a ye pʋgẽ. Yãmb ka tog n tall neong n yi roogã pʋgẽ, la y ka tog n wõrg kõbr ba a yembr ye. 47Bɩ Israyɛll buudã neb fãa maan Pak tigrã. 48Nin-loaagdg sã n be yãmb sʋkã n dat n maan Pak tigrã n waoog Sẽn-Ka-Saabo, bɩ a raopã ne kom-dibli nins fãa sẽn be yẽnda zakẽ wã reng n kẽ bãongo. Dẽ poore, a na yaool n naag Israyɛll nebã n maan Pak tigrã. La rao sẽn ka kẽ bãong ka tog n dɩ tigrã rɩɩb ye. 49Tõogã tog n yɩɩ bũmb a yembr Israyɛll nebã ne sãamb nins sẽn be yãmb tẽngẽ wã yĩnga.»
50Dẽ, Israyɛll nebã fãa maana wa Sẽn-Ka-Saab sẽn dag n yeel a Moyiis ne a Aarõ wã kɛpɩ-kɛpɩ. 51La badaar bala, Sẽn-Ka-Saab kɩtame tɩ Israyɛll nebã yi Ezɩpt tẽngã, tãb-bi-sull-sulli.
Currently Selected:
Yikri 12: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
