A Amoose 3
3
Sẽn-Ka-Saab keooga Israyɛll nebã
1Israyɛll nebã, yãmb dãmb fãa sẽn yaa buud ning Sẽn-Ka-Saab sẽn yiis Ezɩpt yembdã pʋgẽ wã, kelg-y koɛɛg ning Sẽn-Ka-Saab sẽn yet yãmb wɛɛngẽ!
2Dũniyã buud fãa sʋka,
yaa yãmb bal la mam yãk yã.
Yaa rẽ yĩng n kɩte,
tɩ mam na n sok yãmb tʋʋm-beed nins fãa
yãmb sẽn maanã võore
3Neb a yiib tõe n tũu taab
tɩ b ka reng n yẽs ne taab sɩda?
4Gɩgemd wat n kelemda weoogẽ,
tɩ sã n ka a paama bũmb n yõke?
Gɩgem-poll wat n be a põkẽ n kelemdẽ,
tɩ sã n ka a yõka bũmbu?
5Tãoog tõe n zĩnd tẽng n yõk liuul
tɩ sã n ka b ninga bẽdgo?
Tãoog ka fisgd tɩ sã n ka bũmb la a yõkɩ ye!
6Kũng na wẽ tẽng pʋgẽ tɩ neb pɛleng ka yɩke?
Yel-beed tõe n paama tẽng tɩ Sẽn-Ka-Saab zɩ tiiri?
7Sẽn-Ka-Saab ka maand bũmbu,
tɩ b ka reng n vẽneg-a ne b tʋmtʋmdbã
sẽn yaa bãmb no-rɛɛsdbã ye.
8Gɩgemd sã n kelme, ãndã n ka na n yɛɛse?
Wẽnnaam Sẽn-Ka-Saab sã n gome,
ãnda soab n tõe n ka togs bãmb koɛɛgã?
Bũmb ka na n kell Samaari ye
9Moon-y Asdood ne Ezɩpt pãng zĩisẽ wã n yeele:
«Tigm-y taab Samaari tãmsã zutu, n ges zũnglg ninga,
la namsg ning b sẽn namsd nebã Samaari tẽngã pʋgẽ wã.»
10Sẽn-Ka-Saab yetame:
Bãmb ka mi tɩ maan sɩd ye,
bãmb pidsda b pãng zĩisã
ne paoong b sẽn deeg ne pãnga.
11Bõn-kãens yĩnga,
Zu-soab a Wẽnnaam yetame:
Bɛ wã na n gũbga tẽngã n sãam a pãng zĩisã,
la a fã laogã sẽn be a na-yiyã pʋsẽ wã.
12Sẽn-Ka-Saab yetame:
Wa gɩgemd sẽn mi n yõk rũnga,
tɩ pe-kɩɩm dig-a n deeg kars a yiib bɩ tʋb-bɛkã,
Israyɛll nebã sẽn be Samaari wã
ne neb nins sẽn be Damaas n gãe b gã-bʋgses
zutã me na n paama fãagr a woto!
13Kelg-y la y keoog a Zakoob buudã!
Zu-soab a Wẽnnaam
sẽn yaa Saasẽ-Pãng-Soabã n yeele.
14 #
2Rĩm 23.15
Daar ning mam sẽn na n sɩbg Israyɛll nebã
b tʋʋm-beedã yĩngã,
Mam na n sãama Betɛll tẽn-kugã,
la tẽn-kugã yɩɩl na n kao n dʋʋga tẽnga,
15Mam na n luba tẽn-bɛdã roto,
la m lub tẽn-bãoonegã roto,
la m menes rot nins b sẽn nags ne wob-yẽnã,
la rot wʋsg na n sãamame.
Yaa Sẽn-Ka-Saab n yeele.
Currently Selected:
A Amoose 3: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
