Tẽn‑tʋmdbã tʋʋmã 5

A Ananiyaas ne a Safɩɩra

1La rao a yembr yʋʋr sẽn boond t'a Hananiyaas ne a pag a Safɩɩra me koosa b pʋʋgo. 2La a Ananiyaas ne a pagã seda ne taab n yãk ligdã n bĩng b mens yĩnga. La a rɩk sẽn kellã n tɩ kɩs tẽn-tʋmdbã. 3La a Pɩyɛɛr sok-a lame yaa: Ananiyaase, yaa bõe tɩ Sʋtãanã soog fo sũurã halɩ n kɩt tɩ f yag zĩrẽ ne Sɩɩg-sõng n yãk pʋʋgã ligd fo sẽn koosã? 4Fo sẽn dag n nan ka koos pʋʋgã, a ka foom n so la? La fo sẽn koos-a wã ligdã ka fo rẽnd sɩda? La yɩɩ a wãn tɩ fo tags f sũurẽ tɩ maan bõn-kãnga? Fo ka yag zĩrẽ wã ne ninsaalb ye, la yaa ne Wẽnnaam la f yag yã. 5A Ananiyaas sẽn wʋm gom-kãense, a lʋɩɩ tẽng n ki. La rabeem kãseng yõka neb nins fãa sẽn wʋm yel-kãnga 6La kom-bɩɩsã yikame n dɩk-a n vil ne pɛɛl n tɩ mume.

7La sẽn kaoos bilf n kolg lɛɛr a tãabo, a Ananiyaas pagã me kẽeme la yẽnda ka bãng bũmb ning sẽn da maanã ye. 8A Pɩyɛɛr sok-a lame yaa: Togs maam yãmb sã n koosa y pʋʋgã a woto tɛka. La a leokame tɩ n-yẽe, tɩ yaa woto tɛka. 9Dẽ, a Pɩyɛɛr yeela yẽnda yaa: Yɩɩ a wãn tɩ yãmb sed ne taab n na n mak Zu-soabã Sɩɩga? Gese, neb nins sẽn mum fo sɩdã bee rignoorẽ, la bãmb na n dɩka foom me n looge. 10La wakat-kãng bala, yẽnda lʋɩɩ tẽng a Pɩyɛɛr taoor n ki. La kom-bɩɩsã kẽeme n mik t'a Safɩɩra kiime. La b rɩk-a lame n tɩ mum n yegl a sɩdã. 11Rabeem kãseng yõka tẽedbã fãa ne neb nins fãa sẽn wʋm bõn-kãensã.

Bõn-bãn ne bõn-yɛɛsds wʋsg maaname

12Tẽn-tʋmdbã maana bãn la bõn-yɛɛsds wʋsg nebã sʋka. Tẽedbã fãa tigma taab zĩig ning b sẽn boond t'a Salmo zãndã. 13La neb a taabã sʋk ned ba a yembr da ka saagd n dat n naag-b ye. La nebã rag n pẽgda tẽedbã wʋsgo. 14Raop la pagb wʋsg sẽn da tẽed Zu-soabã tara paasg daar fãa. 15B rag n tallda bãad-dãmb ne gãas wala pãnday n wat n gãnegd-b soayã zut tɩ daar ninga, a Pɩyɛɛr sã n wa n loogdẽ, bɩ a maasmã tõe n bui bãad-dãmb kẽere. 16La neb wʋsg-wʋsg yii tẽms sẽn yeg Zeruzalɛm n tall bãad-dãmb la neb zĩn-dẽgd sẽn namsd n wa. La bãmb fãa paama maagre.

A Pɩyɛɛr ne a Zã paama namsgo

17La maan-kʋʋdbã kãsem ne neb nins fãa sẽn da be ne yẽnda wã, sẽn dat n togs tɩ Saduusẽ-dãmbã, yik n pida ne sũ-kiiri. 18Bãmb yõga tẽn-tʋmdbã n kẽes bi-bees roogẽ. 19La Zu-soabã malɛɛk waa ne yʋng n pak bi-bees roogã kʋɩleng n yiis tẽn-tʋmdbã n yeel-b yaa: 20Kẽng-y n tɩ yals-y wẽnd doogã pʋg n togs nebã vɩɩm‑kãngã koɛɛgã fãa. 21La bãmb sẽn wʋm woto, bãmb kẽe wẽnd doogẽ wã yibeoog pĩnd n sɩng n zãmsd nebã. La maan-kʋʋdbã kãsem ne neb nins sẽn da be ne yẽnda wã waame n tigim kaorengã yɛl-bʋ-kaoodbã la Israyɛll kãsem-dãmbã, La b tʋmame tɩ b tall tẽn-tʋmdbã sẽn be bi-bees roogẽ wã n wa. 22La gũudbã sẽn ta bi-bees roogẽ wã, b ka yãnd tẽn-tʋmdbã be ye. La b lebgame n tɩ yeel yaa: 23Tõnd yãnda bi-bees roogã sẽn pag sõama, tɩ gũudbã yas noyẽ wã n gũudẽ. La tõnd sẽn pake d ka yã ned doogã pʋgẽ ye.

24La bãmb sẽn wʋm gom-kãensã, wẽnd-doog gũudbã kãsem ne maan-kʋʋdbã kãsem-dãmb dag n ka mi b sẽn na n tags bũmb ning tẽn-tʋmdbã wɛɛngẽ ye, la b rag n sokda b mens tɩ yel-kãngã na n yɩɩ a wãna. 25La ned n wa n yeel-b tɩ neb nins bãmb sẽn dag n kẽes bi-bees roogẽ wã bee wẽnd doogẽ wã n zãmsd nebã.

26La wẽnd-doog gũudbã kãsem ne gũudbã kẽngame n tɩ tall tẽn-tʋmdbã n wa n ka maan-b pãng ye. Bala, gũudbã rag n yɛɛsdame tɩ nebã na n wa lob bãmb kuga. 27La b sẽn tall tẽn-tʋmdbã n leb n wa, b kɩtame tɩ b yals kaoreng yɛl-bʋ-bʋʋdbã taoore. La maan-kʋʋdbã kãsem yeel-b lame yaa: 28#Mat 27.25Tõnd dag n yeela yãmb tɩ y ra leb n saag n zãms nebã ne yʋ-kãngã ye. La ade, yãmb pidsa Zeruzalɛm ne y zãmsgã. La y rat n dɩk raoã kũum yell n dogl tõnd zutu!

29A Pɩyɛɛr ne tẽn-tʋmdbã leokame yaa: Tõnd tog n saka Wẽnnaam n yɩɩd ninsaalbã. 30Tõnd yaab-rãmbã Wẽnnaam vʋʋga a Zeezi yãmb sẽn dag n ka a soab da-pɩkã zug tɩ b ki wã. 31Wẽnnaam zẽka a Zeezi tɩ b be bãmb rɩtgo n yaa rĩmã la fãagda n na n kõ Israyɛll nebã yam tekre la yel-wẽnã sugri. 32Tõnd yaa bõn-kãens kaset dãmba. La Sɩɩg-sõng Wẽnnaam sẽn kõ neb nins sẽn sak bãmbã me yaa kaset soaba.

33La kaoreng yɛl-bʋ-bʋʋdbã sẽn wʋm gom-kãense, b sũyã puugame tɩ b ra baood tẽn-tʋmdbã n dat n kʋ. 34La tõog karen-saamb a yembr yʋʋr sẽn boond t'a Gamalyɛll n yaa Fariizẽ ned n dag n be b sʋka. La nebã ra waoogda yẽnda la a yika kaoreng yɛl-bʋ-bʋʋdbã taoor n kõ noor tɩ b yiis tẽn-tʋmdbã tɩ yɩ bilfu. 35La yẽnda yeela nebã yaa: Israyɛll nebã, gũus-y ne bũmb ningã yãmb sẽn dat n maan nin-bãmbã wã. 36Bala, a Tedaas yika wakat sẽn ka zãra n yetẽ tɩ yẽnda yaa nin-kãsenga. La neb sẽn kolg kobs-naas da tũuda yẽnda. La b kʋ-a lame, la neb nins fãa sẽn da tũud yẽnda wã zoe n sãeegame, la b tũudmã yɩɩ zaalem. 37La yẽnda sẽn looge, Galɩle dao a Zʋdaas me yika sõdbã wakat n kɩt tɩ neb wʋsg tũ yẽnda. La b kʋʋ yẽ me, la neb nins fãa sẽn da tũud yẽnda wã sãeegame. 38Dẽ, moasã, mam yeta yãmb tɩ y bas nin-bãmbã tɩ b loog la y ra leb n bao tɩ maan bãmb bũmb ye. Bala, bãmb sẽn maandã, wala b tʋʋmã sã n yaa ninsaalb rẽnda, a na n sãama b toore. 39La b sã n yita Wẽnnaam nengẽ, yãmb kõn tõog n sãam-b ye. Gũus-y y mens n da wa n zab ne Wẽnnaam ye.

40Bãmb saka a Gamalyɛll goamã. La b leb n boola tẽn-tʋmdbã n kɩt tɩ b pãb-b ne kalwaase n yeel-b tɩ b ra leb n saag n gom ne a Zeezi yʋʋre, La b bas-ba.

41Tẽn-tʋmdbã yii kaoreng yɛl-bʋ-bʋʋdbã taoor ne sũ-noogo b sẽn ges tɩ bãmb zemsame tɩ paam namsg a Zeezi yʋʋrã yĩnga. 42Bãmb dag n zãmsda nebã la b moond a Zeezi Kiris koe-noogã wẽnd doogẽ wã la zagsã pʋs daar fãa n ka basdẽ ye.

Currently Selected:

Tẽn‑tʋmdbã tʋʋmã 5: MPBU

Highlight

Copy